Category: فیصل آباد

فیصل آباد(محمد اویس)وزیر اعلی پنجاب سردار عثمان بزدار کی خصوصی ہدایات پر ضلع کے کونے کونے میں کھلی کچہریوں کا انعقاد کرکے عوامی مسائل سے آگاہی اور ان کے حل کے لئے موثر ترین اقدامات کئے جارہے ہیں اس ضمن میں ڈپٹی کمشنر محمد علی اورایس ایس پی آپریشنز سید علی رضا نے سپورٹس کمپلیکس غلام محمد آباد میں کھلی کچہری لگا کر عوامی مسائل سنے اور موقع پر ہی متعلقہ افسران کو داد رسی کی ہدایت جاری کی۔اسسٹنٹ کمشنر ہیڈ کوارٹرزسید ایوب بخاری اوردیگرافسران بھی موجود تھے۔ ڈپٹی کمشنر نے غلام محمد آباد کے بعض علاقوں میں صفائی کی ابتر صورتحال‘ صحت اور دیگر نوعیت کے مسائل کے حل کے لئے اسسٹنٹ کمشنر کو ٹاسک تفویض کیا اور کہا کہ وہ متعلقہ مسائل حل کراکر رپورٹ پیش کریں۔ڈپٹی کمشنرنے کہا کہ ہفتہ وار کھلی کچہری کے انعقاد کے ساتھ تحصیلوں،قصبوں اور گنجان آباد علاقوں میں کھلی کچریوں کے انعقادکا مقصد عوام سے رابطہ استوار،ان کے مسائل دہلیز پر حل اور میرٹ کے مطابق انصاف کی فراہمی یقینی بنانا ہے جس کے لئے ضلعی انتظامیہ متحرک ہے۔انہوں نے کہا کہ عوامی خدمت مشن ہے جس پر بھر پور انداز میں عمل پیرا ہیں۔انہوں نے بتایا کہ وہ حکومت پنجاب کی اوپن ڈور پالیسی کے تحت روزانہ اپنے دفتر کے باہر بیٹھ کر عوام کے مسائل سنتے اور ان کے حل کے لئے اقدامات کر رہے ہیں۔انہوں نے درخواست گزاروں سے کہا کہ عوامی مسائل کے حل میں پیشرفت کو یقینی بنایا جارہا ہے اس ضمن میں لاپرواہی اور سستی دکھانے والے افسران وسٹاف ممبران کے خلاف کارروائی سے بھی گریز نہیں کیا جائے گا۔ایس ایس پی اپریشنز نے شہریوں کے بعض مسائل سنتے ہوئے موقع پر موجود پولیس افسران کودرخواستیں وشکایات میرٹ کے مطابق نمٹانے کی تاکید کرتے ہوئے کہا کہ جرائم پیشہ افراد کے خلاف قانون سرگرم عمل ہے۔
۔۔۔///۔۔۔

فیصل آباد(محمد اویس)ریجنل ڈائریکٹر علامہ اقبال اوپن یونیورسٹی پروفیسر ڈاکٹر زبیر احمد شاہ نے بتایا کہ اوپن یونیورسٹی نے گریجوایٹ اورپوسٹ گریجوایٹ کے داخلوں کا شیڈول جاری کردیا ہے جس کے مطابق بی اے کے تمام مضامین کے داخلے شروع ہوگئے ہیں جبکہ ایم اے،ایم ایس سی کے داخلے یکم مارچ سے15،اپریل تک جاری رہیں گے۔مزید معلومات کے لئے علاقائی کیمپس سے بھی رابطہ کیا جاسکتا ہے۔

فیصل آباد(محمد اویس) واسا کی کارکردگی اورسروسز کو مزید مستحکم بنانے کے اقدامات کے سلسلے میں ارکان اسمبلی اور ایف ڈی اے کی گورننگ باڈی کے دیگر ارکان کو بریفنگ دی گئی۔ڈائریکٹر جنرل ایف ڈی اے محمد سہیل خواجہ اور مینجنگ ڈائریکٹر واسا فقیر محمد چوہدری نے شہریوں کو واٹر سپلائی اور سیوریج کی بہتر سہولیات کی فراہمی، ریونیو ریکوری، سروسز کو جدید بنانے کے لئے نئی اصلاحات اور مستقبل کے ترقیاتی منصوبوں کے بارے میں بریفنگ دی اس سلسلے میں ایک اجلاس واسا کے مرکزی دفتر میں منعقد ہوا جس کی صدارت ایم پی اے/صوبائی پارلیمانی سیکرٹری چوہدری عادل پرویز گجر نے کی۔ایم پی اے میاں وارث عزیز،وائس چیئرمین واسا شیخ شاہد جاوید،ماجد حسین،چوہدری ناصر محمود،انجینئر یاسرانور،ڈی ایم ڈی واسا جبارانور،مختلف شعبوں کے ڈائریکٹرز اوردیگر افسران اجلاس میں موجود تھے۔ڈائریکٹر جنرل ایف ڈی اے محمد سہیل خواجہ اور ایم ڈی واسا فقیر محمد چوہدری نے ارکان اسمبلی اورگورننگ باڈی کے ارکان کا خیر مقدم کرتے ہوئے کہا کہ واسا کے حوالے سے شہریوں کو واٹر سپلائی اور سیوریج کی معیاری سہولیات فراہم کرنے کے لئے تمام ترسروسز کو جدید تقاضوں سے ہم آہنگ کیا جا رہا ہے اس سلسلے میں شہر کو 16حصوں میں تقسیم کرکے سروسز کی فراہمی اور سٹاف کی کارکردگی کی سخت مانیٹرنگ کی جارہی ہے جبکہ مدینہ ٹاؤن اورسرفراز کالونی کو ماڈل بنا کر مسلسل 12گھنٹے پینے کے پانی کی فراہمی کویقینی بنایا گیا ہے اور ان علاقوں کے ہر گھر میں واٹر میٹرز کی تنصیب کے علاوہ سو فیصد ریکوری بھی خوش آئندہے۔مستقبل میں اس نوعیت کی سروسز کا دائرہ تمام تر شہر تک وسیع ہو جائے گا۔انہوں نے بتایا کہ عوامی سہولت کے لئے واسا کے تمام ڈسپوزل اسٹیشنز پر ون ونڈو آپریشن سسٹم شروع کیاگیا ہے تاکہ واٹر سپلائی سیوریج کی خرابی یا بلوں کی ترسیل کے حوالے سے شکایات کا فوری ازالہ کیا جاسکے۔ڈائریکٹر جنرل ایف ڈی اے نے واسا کی ریکوری کے حوالے سے کئے گئے اقدامات سے آگاہ کرتے ہوئے بتایا کہ سپیشل ریکوری مہم کے خاطرخواہ نتائج حاصل ہوئے ہیں اس سلسلے میں متعلقہ شعبوں کے افسران وسٹاف کی کارکردگی قابل ستائش ہے۔انہوں نے مختلف سرکاری محکموں /اداروں اوربعض مسائل زدہ علاقوں سے واسا کی ریکوری میں ارکان اسمبلی کی معاونت کی خواہش کا اظہار کیا اور کہا کہ وسائل میں مشکلات،بجلی کے نرخوں اور دیگر محکمانہ اخراجات میں اضافہ کے باعث واسا کے نرخوں میں مناسب اضافہ ناگزیر ہے جس کی گورننگ باڈی کی طرف سے منظوری دی جاچکی ہے جبکہ صوبائی کابینہ کی توثیق کا انتظار ہے۔انہوں نے کہا کہ ایف ڈی اے اورواسا کی کارکردگی کے معیار میں مزید اضافہ شہری ترقی اور شہریوں کو بہترریلیف کی فراہمی کے بعض امور میں صوبائی سطح پر قانون سازی کی بھی ضرورت ہے۔ایم ڈی واسا نے مستقبل کے بزنس پلان کی تفصیلات سے آگاہ کرتے ہوئے بتایا کہ واسا کے باٹلنگ واٹر پلانٹ کے توسیعی منصوبے کے مطابق ڈیڑھ لیٹر اورآدھا لیٹر پانی کی بوتلوں کی تیاری اور مارکیٹنگ کی منصوبہ بندی کے علاوہ سرگودھا روڈ،جڑانوالہ روڈ اور ستیانہ روڈ کے علاقوں میں سیوریج سسٹم میں توسیع بھی کی جارہی ہے۔انہوں نے بتایا کہ جائیکا کے تعاون سے واسا کی پرانی مشینری کو تبدیل کیا جائے گا جس کے لئے منصوبے کا افتتاح عنقریب متوقع ہے۔انہوں نے پنجاب حکومت کی طرف سے واسا کے لئے آئندہ پانچ سالہ بجٹ مختص کرنے کی ضرورت پر زور دیتے ہوئے واسا کے سروس ایریا میں اضافہ کے لئے مجوزہ ترقیاتی پروگرام اور ویسٹ واٹر ٹریٹمنٹ پلانٹ سمیت واٹر سپلائی اور سیوریج کے آئندہ منصوبوں کی تفصیلات سے آگاہ بھی کیا۔ارکان اسمبلی اورگورننگ باڈی کے دیگر ارکان نے اپنے بھرپور تعاون کایقین دلاتے ہوئے کہا کہ اداروں کے استحکام سے ہی عوام کو عمدہ سروسز فراہم کی جاسکتی ہیں۔ارکان اسمبلی نے کہا کہ وہ مثبت تبدیلی کے سفر میں عوام اور اداروں کے مابین بہترین روابط میں اپنا بھرپور کردار ادا کرنے کے لئے پرعزم ہیں اس ضمن میں وسائل کی فراہمی اوردیگر محکمانہ مشکلات کے حل کے لئے صوبائی سطح پر مکمل نمائندگی کی جائے گی۔

فیصل آباد(محمد اویس )فیصل آباد سے رکن صوبائی اسمبلی اور وزیر اعلیٰ پنجاب کے معاون خصوصی ملک عمر فاروق نے فیصل آباد میں کبڈی کے عالمی مقابلوں کے شاندار انعقاد پر انتظامیہ کو مبارکباد دی ہے۔ اپنے جاری ایک بیان میں ملک عمر فاروق نے کہا کہ انٹرنیشنل ایونٹ کی میزبانی فیصل آباد کے لیے ایک اعزاز کی بات تھی جس کی کامیاب تکمیل پر ضلعی انتظامیہ سمیت پورا اشہر مبارک کا مستحق ہے۔ انہوں نے کہا کہ فیصل آباد زندہ دل لوگوں کی سرزمین ہے اور اہلیان فیصل آباد نے کبڈی مقابلوں کے دوران جس ڈسپلن اور جذبہ شوق کامظاہرہ کیا وہ بلاشبہ لائق تحسین ہے۔ ملک عمر فاروق نے بین الاقوامی کھلاڑیوں کے لیے بہترین اور فول پروف سیکورٹی فراہم کرنے پر ضلعی انتظامیہ کے تمام افسران کی محنت اور کاوشوں کی تعریف کرتے ہوئے کہا کہ اپنی ڈیوٹی پر مامور ہر افسر اور اہلکار اپنے فرائض کی ادائیگی کے لیے پوری طرح الرٹ اور چاک وچوبند تھا جس کی وجہ سے اتنا بڑا عالمی ایونٹ انتہائی احسن اور پرامن طریقے سے منعقد ہوسکا۔ انہوں نے تمام افسران و اہلکاران، صحافی بھائیوں اور بالخصوص اہالیان فیصل آباد کو فردا فردا مبارکباد پیش کی ہے۔

فیصل آباد( )ڈائریکٹر جنرل ایف ڈی اے محمد سہیل خواجہ کی ہدایت پر ایف ڈی اے کی انفورسمنٹ ٹیم نے کارروائی کرتے ہوئے مختلف ہاؤسنگ کالونیز میں یوٹیلٹی سروسز کے لئے مختص 307کنال اراضی کا قبضہ حاصل کرلیا ہے جبکہ دو غیر منظور شدہ ہاؤسنگ سکیموں کو فوری طور پر سیل کردیا گیا ہے۔تفصیلات کے مطابق اسٹیٹ آفیسر امتیاز گورایہ کی سربراہی میں انفورسمنٹ ٹیم نے سات ہاؤسنگ سکیموں محمد علی ہاؤسنگ چک نمبر222رب،لائل پورگارڈن چک نمبر212ر ب،لیسیم کنال برگ212رب،ناظم آباد سٹی چک نمبر220رب،ستارہ سپنا سٹی چک نمبر123ج ب،خالد ٹاؤن چک نمبر7ج ب اور ریاض الجنہ چک نمبر7ج ب جانچ پڑتال کرکے پارکس،سکول،واسا ڈسپوزل،ویسٹ مینجمنٹ،ڈسپنسری اور مفاد عامہ کے لئے دیگر یوٹیلٹی سروسز کے لئے مختص 307کنال کی اراضی واگزار کروا کر قبضہ حاصل کرلیا۔دریں اثناء ایف ڈی اے کی انفورسمنٹ ٹیم نے کارروائی کرتے ہوئے سرگودھا روڈ پر غیر منظور شدہ نواب سٹی اورمسجد اسماعیل روڈ پر غیر منظور شدہ اسماعیل سٹی کوسیل کردیا۔ڈائریکٹر جنرل ایف ڈی اے نے کہا ہے کہ ہاؤسنگ سکیموں میں پبلک یوٹیلٹی کیلئے مختص اراضی کا قبضہ حاصل کرنے کے لئے خصوصی مہم شروع کی گئی ہے اور ایسے پلاٹس کو کسی دوسرے مقاصد کیلئے استعمال کرنے کی اجازت نہیں دی جائے لہذا مفاد عامہ کے مقررکردہ پلاٹس کی مسلسل نگرانی کی جائے گی۔انہوں نے ڈویلپرز سے کہا کہ وہ ایسی قانون شکنی سے گریز کریں۔انہوں نے تاکید کی کہ ہاؤسنگ سکیموں کے قیام کے لئے قانونی ضوابط اورمقررہ شرائط کو پورا کرکے باقاعدہ منظوری حاصل کی جائے بصورت دیگر وہ نقصان کے خود ذمہ دار ہوں گے۔
۔۔۔///۔۔۔

فیصل آباد (محمد اویس ) معاون خصوصی وزیراعلیٰ پنجاب برائے سپورٹس ملک عمر فاروق نے کہا ہے کہ پاکستان خوبصورت نظاروں کی سرزمین ہے۔ وسیع و عریض ریگستان، سر سبز و شاداب میدان، برف سے ڈھکے ہوئے پہاڑ اور بلند و بالا پہاڑی سلسلے، گھنے جنگلات، حسین وجمیل شمالی علاقے جات، جھیلیں، جزائر اور رنگ بدلتے ہوئے موسم پوری دنیا کے سیاحوں کے لئے انتہائی کشش رکھتے ہیں۔ ان خیالات کا اظہار انہوں نے انٹرنیشنل ٹورازم پروموٹرز ارگنائزنیشن کے زیر اہتمام ایشیائی ثقافت اور سیاحت کے عنوان سے منعقدہ بین الاقوامی کانفرنس کے اختتامی اجلاس کے دوران کیا۔ کانفرنس میں پاکستان، انڈیا، بنگلہ دیش اور بھوٹان کے مندوبین کے علاوہ اوورسیز پاکستانیوں کی ایک بڑی تعداد نے شرکت کی۔ کانفرنس کے شرکاء سے اپنے صدارتی خطبے میں ملک عمر فاروق نے کہاکہ وزیراعظم پاکستان عمران خان ملک میں سیاحت کے فروغ کے لیے خاصے متحرک ہیں جنہوں نے سیاحوں کے لئے آسانیاں فراہم کرنے کا حکم دیتے ہوئے دنیا کے مختلف حصوں سے آنے والے سیاحوں کی ترجیحات کو مدنظر رکھتے ہوئے ٹوریسٹ انفراسٹرکچر اور سروسز بہتر کرنے کی ہدایت کی ہے۔ ملک میں سیاحت کی صنعت کے فروغ اور سکوپ کو مزید وسیع کرنے کے لئے آنے والے دنوں میں بین الاقوامی ٹورازم کانفرنس کے انعقاد پر سنجیدگی سے غور ہو رہا ہے۔ سیاحت کے فروغ کے لیے ملکی تاریخ میں پہلی بار نیشنل ٹورازم سٹریٹیجی 2020-30 تشکیل دی گئی ہے۔ اس کے علاوہ نیشنل ٹورازم ایکشن پلان 2020-25 مرتب کرنے کے ساتھ ساتھ مختلف ایونٹس کے لیے نیشنل کلینڈر بھی ترتیب دیا گیا ہے۔ پی ٹی ڈی سی کی نئی ویب سائٹ لانچ کر دی گئی ہے جس میں آن لائن بکنگ کی سہولت بھی رکھی گئی ہے۔ ملک عمر فاروق نے کہا کہ پاکستان میں سیاحت کا بے پناہ پوٹینشل موجود ہے جسے بین الاقوامی سطح پر اجاگر کرکے کثیر زرمبادلہ حاصل کیا جا سکتا ہے۔ انہوں نے کہاکہ پاکستان کابیش قیمت ثقافتی ورثہ اور قدرتی حسن سے مالامال دلکش نظارے دنیا بھر کے سیاحوں کو اپنی خوبصورتی کی طرف مائل کرتے ہیں اور امید ہے کہ موجودہ حکومت کی سیاحت دوست پالیسیوں کی وجہ سے پاکستان بین الاقوامی سیاحت کا بہترین مرکز ثابت ہو گا۔

فیصل آباد(محمد اویس) ڈسٹرکٹ اوورسیز کمیٹی کااجلاس ڈی سی آفس میں منعقد ہوا جس میں چیئرپرسن مرزا محمد اصغر،ڈپٹی کمشنر محمد علی اورایس ایس پی آپریشنز سید علی رضا نے تارکین وطن کے مختلف ضلعی محکموں اور پولیس سے متعلقہ مسائل وشکایات سنیں۔اجلاس میں ایم پی اے میاں خیال کاسترو، ایڈیشنل ڈپٹی کمشنر (ریونیو) میاں آفتاب احمد،ممبر کمیٹی محمد طلحہ حمید اور مختلف محکموں کے افسران بھی موجود تھے۔چیئرپرسن نے کہا کہ وزیراعلیٰ پنجاب سردار عثمان بزدار کی ہدایات پر کمیٹی کا اجلاس ہر ماہ باقاعدگی سے منعقد کرکے ضلع سے متعلقہ اوورسیز پاکستانیوں کے مسائل ترجیحی بنیادوں پر حل کرائے جارہے ہیں۔انہوں نے تارکین وطن کا موقف سنتے ہوئے کہا کہ ضلع کے متعلقہ محکمے اوورسیز پاکستانیوں کو تیزرفتار ریلیف کی فراہمی یقینی بنائیں تاکہ ان کے مسائل کے حل میں تاخیر نہ ہو۔انہوں نے کہا کہ حکومت پنجاب نے اوورسیز پاکستانیوں کے مسائل تیزرفتاری سے حل کرنے کے لئے واضح ہدایات جاری کررکھی ہیں لہذا درخواست گزار محکمانہ پیشرفت سے مطمن نظر آنے چاہیں۔ڈپٹی کمشنر محمد علی نے بتایا کہ ضلع کے محکموں سے متعلقہ اوورسیز پاکستانیوں کی شکایات ومسائل کے حل کے لئے سنجیدہ اقدامات کئے جارہے ہیں اور موصولہ شکایات کا فوری نوٹس لے کر بلاتاخیر محکمانہ کارروائی اوررپورٹس حاصل کرکے صوبائی کمیشن کوبھی آگاہ کیا جارہا ہے۔انہوں نے کہا کہ جائیدادوں پر قبضہ وتقسیم سے متعلق کیسز کو تیزی سے نمٹانے کیلئے اسسٹنٹ کمشنرز اور ریونیو افسران کو سخت ہدایات جاری کررکھی ہیں۔انہوں نے بعض درخواستوں پر تارکین وطن اوران کے نمائندوں کا موقف سنتے ہوئے متعلقہ محکموں کے افسران کو میرٹ پر کیسز نمٹانے کی تاکید کی۔انہوں نے کہا کہ حل ہونے والی درخواستوں پر فریقین کی طرف سے تحریری صلح نامہ ریکارڈ میں موجود ہونا چاہیے۔ایس ایس پی آپریشنز نے بتایا کہ پولیس سے متعلقہ درخواستوں کو تیزرفتاری سے حل کیا جارہا ہے اور تمام کیسز کی پیشرفت کا باقاعدگی سے جائزہ لے رہے ہیں۔انہوں نے کہا کہ اوورسیز کی جائیدادوں پر کسی کو قبضہ نہیں کرنے دیں گے اور خلاف ورزی پر سخت قانونی کارروائی ہوگی۔اجلاس کے دوران اوورسیز کی پولیس،ریونیو،ایف ڈی اے اوردیگر محکموں سے متعلقہ 17درخواستیں زیر سماعت آئیں۔

فیصل آباد(محمد اویس)صوبائی وزیر اقلیتی امور وانسانی حقوق اعجازعالم آگسٹین نے فیصل آباد کا دورہ کیا اور ڈویژنل کمشنر عشرت علی سے ان کے آفس میں ملاقات کی۔ڈپٹی کمشنر محمد علی بھی موجودتھے۔صوبائی وزیر نے حکومتی سطح پر اقلیتی برداری کی فلاح وبہبود وترقی کے لئے کئے جانے والے اقدامات پر تبادلہ خیال کیا اوراقلیتی برداری کے مسائل کے حل میں گہری دلچسپی پر انتظامیہ کی کاوشوں کو سراہا۔انہوں نے کرسمس سمیت دیگر مذہبی تہواروں پر مسیحیوں کو فراہم کی جانے والی سہولیات ومراعات اور علاقائی تعمیر وترقی کے مجموعی اقدامات کا ذکر کرتے ہوئے بعض گرجاگھروں ومشنری سکولوں کے مسائل کی نشاندہی بھی کی۔ڈویژنل کمشنر نے کہا کہ اقلیتی برداری ملکی تعمیر وترقی کے لئے دیگر ہم وطنوں کے شانہ بشانہ یکساں کردار ادا کررہی ہے اور ان کی قومی خدمت کو قدر کی نگاہ سے دیکھتے ہیں لہذا ان کے مسائل کو کسی صورت نظرانداز نہیں کیا جا سکتا۔انہوں نے بتایاکہ اقلیتی برداری کے لئے سرکاری ملازمتوں کے کوٹہ اور تعلیمی وظائف کی فراہمی سمیت دیگر مراعات وسہولیات کے اقدامات پر عملدرآمد کیا جارہا ہے۔ڈپٹی کمشنر محمد علی نے بتایا کہ ضلعی سطح پر کوآرڈینیشن کمیٹی برائے مینارٹی آفیئرز کی میٹنگز کرکے درپیش مسائل کا جائزہ اور ان کے حل کے لئے تیز رفتار اور موثر ترین اقدامات کئے جارہے ہیں۔

فیصل آباد ڈسٹرکٹ ہیلتھ اتھارٹی کے تحت کینسر بارے آگاہی واک کا اہتمام

فیصل آباد(باغی ٹی وی )ڈسٹرکٹ ہیلتھ اتھارٹی کے زیر اہتمام کیسزکے عالمی دن کے موقع پر احتیاطی تدابیر اختیارکرنے کے حوالے سے آگاہی واک منعقد ہوئی جس کی قیادت ڈپٹی کمشنر محمد علی نے کی۔ڈسٹرکٹ ہیلتھ آفیسر ڈاکٹر بلال احمد،محکمہ صحت کے دیگر افسران،پیرامیڈیکل سٹاف اور سول سوسائٹی کے افراد شریک تھے۔واک ڈسٹرکٹ ہیلتھ آفس سے شروع ہو کر ضلع کونسل چوک پہنچ کراختتام پذیرہوئی۔واک کے شرکاء نے احتیاطی تدابیر کی تحریروں پر مشتمل بینرزاورپلے کارڈز اٹھا رکھے تھے۔ڈپٹی کمشنر نے کہا کہ تمباکو نوشی،غیر متوازن خوراک،سہل پسند طرززندگی اور شراب نوشی کیسز کی وجوہات ہیں لہذا روزمرہ زندگی میں محتاط رویہ اپنا کر اس مرض سے بچاؤ ممکن ہے۔

انہوں نے کہا کہ کیسز سے بچنے کے لئے تمباکو وشراب نوشی ترک کریں،متوازن غذا کااستعمال،سیر اور ورزش کو معمول بنائیں،موٹاپے سے بچیں۔انہوں نے کہا کہ عالمی دن منانے کا مقصد کیسز کے خلاف جیت کے عزم کی تجدید کرنا ہے۔ڈسٹرکٹ ہیلتھ آفیسر نے کیسز کی چند بڑی وجوہات،کیسز سے بچاؤ کے سنہری اصول سے آگاہ کرتے ہوئے بتایا کہ جسم کے کسی بھی حصے میں رسولی کابننا،منہ میں السریا نہ ٹھیک ہونے والے چھالوں کا بننا،مسلسل وزن میں کمی اور غیر معمولی جسمانی رطوبات کااخراج ہونے کی صورت میں فوری طبی معائنہ کرائیں کیونکہ بروقت تشخیص اور علاج سے کیسز سے بچاؤ ممکن ہے۔انہوں نے بتایا کہ کیسز کے بارے میں مزید معلومات کے لئے ہیلتھ لائن0800-99000پر مفت کال کی جاسکتی ہے۔
۔۔۔///۔۔۔