Category: فیصل آباد

فیصل آباد (محمد اویس) آر پی او رفعت مختار راجہ نے آر پی او آفس میں اردل روم کا انعقاد کیا۔اردل روم میں پولیس افسران و اہلکاران کے متعلقہ مجموعی طور پر 05کیسز کی سماعت ہوئی۔آر پی او فیصل آباد نے تمام پیش ہونے والے پولیس افسران/اہلکاران کو بغور سنا۔شوکاز نوٹسز کی سماعت کرتے ہوئے سب انسپکٹرز طارق امیر اور آفتاب وسیم کی 1/1سال کی سروس ضبطی کی سزا دی گئی جبکہ اے ایس آئی غلام علی کو 2سال کی سروس ضبطی کی سزا دی گئی۔سب انسپکٹر خالد محمود کو سنشور کی سزا دی گئی جبکہ اے ایس آئی محمد یعقوب تھانہ صدر کو معطلی سے بحال کر کے سنشور کی سزا دی گئی۔اس موقع پر انہوں نے کہا کہ اچھی کارکردگی کا مظاہرہ کرنے والے پولیس افسران کی حوصلہ افزائی کی جائے گی جبکہ فرائض میں غفلت کی صورت میں سزا کا سامنا کرنا ہوگا۔پولیس کی کارکردگی اور موجودہ نظام میں بہتری کیلئے ضروری ہے کہ جزا و سزا کے عمل جاری رکھا جائے۔

فیصل آباد( )ڈائریکٹر جنرل ایف ڈی اے محمد سہیل خواجہ کی ہدایت پر ایف ڈی اے کی ٹیم نے کارروائی کرتے ہوئے ایک غیر منظور شدہ ہاؤسنگ سکیم اور غیر قانونی تعمیرات پر پلاٹ کو سیل کردیا جبکہ کینال روڈ پر زیرتعمیر کشمیر پل انڈر پاس کے قریب اور دیگر علاقوں سے تجاوزت کا خاتمہ کردیا گیا۔تفصیلات کے مطابق ڈائریکٹر اسٹیٹ مینجمنٹ جنید حسن منج کی زیرنگرانی اسٹیٹ آفیسر امتیاز گورایہ کی سربراہی میں ایف ڈی اے کی انفورسمنٹ ٹیم نے چک نمبر209رب میں زیر تعمیر بسم اللہ گارڈن ہاؤسنگ سکیم کو چیک کیا تو وہ غیر منظور شدہ پائی گئی جسے فوری طور پر سیل کرکے دوعدد ٹریکٹر ٹرالی ودیگر مشینری بھی قبضہ میں لے لی گئی۔دریں اثناء انفورسمنٹ ٹیم نے غیر قانونی تعمیر پر گلستان کالونی میں پلاٹ نمبر704/kکو بھی سیل کردیا جبکہ کشمیر پل انڈر پاس اورچک نمبر4پل کے قریب تجاوزات کے خلاف آپریشن کرکے صفایا کردیا گیا۔

فیصل آباد(محمد اویس)ڈویژنل کمشنر عشرت علی نے تحصیل احمدپور سیال کا دورہ کیا۔انہوں نے پارلیمانی سیکرٹری رانا شہباز اور اسسٹنٹ کمشنر اسدعلی کے ہمراہ تحصیل ہیڈ کوارٹر ہسپتال اوردریائی کٹاؤ کے حوالہ سے دادل فلڈ بند کا معائنہ کیا۔ اس موقع پر ایری گیشن سمیت متعلقہ محکموں کے افسران بھی موجود تھے۔ ڈویژنل کمشنر عشرت علی نے تحصیل میں جاری ترقیاتی سکیموں کا جائزہ لیا اور موقع پر احکامات جاری کیئے۔انہوں نے کہا کہ دریا کا کٹاؤ روکنے کے حوالہ سے موثر منصوبہ بندی کی جائے گی تاکہ مستقبل میں اس سے ملحقہ علاقوں کو نقصانات سے بچایا جا سکے۔ ترقیاتی پروگرامز پر تیزرفتار عملدرآمد کا مقصد علاقائی ترقی اور عوام کوہرممکن ریلیف فراہم کرنا ہے اس ضمن میں کسی قسم کی ذاتی پسند یا ناپسند کی بجائے عوامی اورعلاقائی ضروریات اورمسائل کو مدنظر رکھا جائے گا۔ترقیاتی منصوبوں کے تعمیراتی مراحل کی کڑی مانیٹرنگ کی جائے گی اور ان کی پیشرفت کاباقاعدگی سے جائزہ لیا جائے گا۔انہوں نے کہا کہ عوامی فلاح وبہبود اورعلاقائی خوشحالی کے لئے ترقیاتی پروگرامز پراحسن انداز میں عملدرآمد کرکے بہترین نتائج حاصل کرنے کے لئے تمام متعلقہ محکموں میں مکمل کوآرڈینیشن برقرار رہنی چاہیے۔ ڈویژنل کمشنر نے تحصیل ہیڈ کواٹر ہسپتال کی ایمرجنسی سمیت مختلف شعبوں کا بھی معائنہ کیا اور ہسپتال میں پولیو کاؤنٹر پر بھی رپورٹنگ کے عمل کا جائزہ لیا۔ انہوں نے کہا کہ حکومت شعبہ صحت کی بہتری اور ترقی کیلئے مثالی اقدامات کر رہی ہے تاکہ عوام کو ان کی دہلیز پر جدید اور اعلیٰ طبی سہولیات میسر ہو سکے۔ عوام کی فلاح و بہبود اور بہتر سہولیات کی فراہمی ہماری اولین ترجیحات ہیں۔ دور دراز علاقوں میں خصوصاً شعبہ صحت اور تعلیم پربھرپور توجہ دی جا رہی ہے۔ عوام کے مسائل حل کرنا ہماری ذمہ داری ہے۔ اس موقع پر پارلیمانی سیکرٹری رانا شہباز نے کہ پاکستان تحریک انصاف حقیقی تبدیلی کیلئے کوشاں ہے۔وزیر اعظم پاکستان عمران خان کے ویژن کے مطابق ترقی اور خوشحالی کیلئے اقدامات کئے جا رہے ہیں۔ علاقہ کی ترقی کی راہ میں اب رکاوٹیں برداشت نہیں کی جائینگی۔ تحصیل احمد پور سیال میں ریکارڈ ترقیاتی کام کروائے جائیں گے اور تحصیل کی عوام کو اعلیٰ اور معیاری سہولیات دہلیز پر میسر ہونگی۔ عوام سے کئے گئے تمام وعدے پورے کئے جا رہے ہیں۔ڈویژنل کمشنر نے ہسپتال میں نیو ڈینٹل یونٹ کو فعال بنانے کے احکامات جاری کئے جبکہ ایکسرے مشین کی تنصیب سمیت بیڈز کی تعداد بڑھانے کے حوالہ سے یقین دہانی کروائی۔ انہوں نے تحصیل آفس احمدپور سیا ل میں پودا لگا کر شجر کاری مہم کا افتتاح کیا اور شہر بھر میں صفائی ستھرائی کے بہتر انتظامات پر اسسٹنٹ کمشنر اسدعلی کی کارکردگی کو سراہا۔

فیصل آباد(محمد اویس ) فیصل آباد انسٹیٹیوٹ آف کارڈیالوجی کو ہارٹ سیور فاؤنڈیشن کی طرف سے ڈونرز کے تعاون سے لاکھوں روپے مالیت کے ساڑھے تیس ہزار سے زائد لائف سیونگ انجکشنز عطیہ کئے گئے ہیں جو صدر ہارٹ سیور فاؤنڈیشن محمد اشرف اور جنرل سیکرٹری کاشف فاروق نے ہسپتال انتظامیہ کے حوالے کئے۔فاؤنڈیشن کے عہدیداران شیخ محمد یونس،عمر جاوید، عاصمہ مزمل اوردیگر ارکان بھی موجود تھے۔میڈیکل سپرنٹنڈنٹ کے نمائندہ ڈاکٹر نے کہا کہ ایف آئی سی میں مریضوں کے علاج معالجہ کے لئے طبی سہولیات میں وسعت لائی جارہی ہے تاہم ہارٹ سیور فاؤنڈیشن کی طرف سے مشینری،ادویات،انجکشنز ودیگر درکار وسائل کی فراہمی قابل ستائش اقدام ہے۔انہوں نے فاؤنڈیشن کا شکریہ ادا کیا۔جنرل سیکرٹری نے اپنے عزم کو دہراتے ہوئے کہا کہ مریضوں کی فلاح وبہبود کے لئے اقدامات کو تسلسل سے آگے بڑھایا جائے گا۔

فیصل آباد(محمد اویس)وزیر اعلی پنجاب سردار عثمان بزدار کی خصوصی ہدایات پر ضلع کے کونے کونے میں کھلی کچہریوں کا انعقاد کرکے عوامی مسائل سے آگاہی اور ان کے حل کے لئے موثر ترین اقدامات کئے جارہے ہیں اس ضمن میں ڈپٹی کمشنر محمد علی اورایس ایس پی آپریشنز سید علی رضا نے سپورٹس کمپلیکس غلام محمد آباد میں کھلی کچہری لگا کر عوامی مسائل سنے اور موقع پر ہی متعلقہ افسران کو داد رسی کی ہدایت جاری کی۔اسسٹنٹ کمشنر ہیڈ کوارٹرزسید ایوب بخاری اوردیگرافسران بھی موجود تھے۔ ڈپٹی کمشنر نے غلام محمد آباد کے بعض علاقوں میں صفائی کی ابتر صورتحال‘ صحت اور دیگر نوعیت کے مسائل کے حل کے لئے اسسٹنٹ کمشنر کو ٹاسک تفویض کیا اور کہا کہ وہ متعلقہ مسائل حل کراکر رپورٹ پیش کریں۔ڈپٹی کمشنرنے کہا کہ ہفتہ وار کھلی کچہری کے انعقاد کے ساتھ تحصیلوں،قصبوں اور گنجان آباد علاقوں میں کھلی کچریوں کے انعقادکا مقصد عوام سے رابطہ استوار،ان کے مسائل دہلیز پر حل اور میرٹ کے مطابق انصاف کی فراہمی یقینی بنانا ہے جس کے لئے ضلعی انتظامیہ متحرک ہے۔انہوں نے کہا کہ عوامی خدمت مشن ہے جس پر بھر پور انداز میں عمل پیرا ہیں۔انہوں نے بتایا کہ وہ حکومت پنجاب کی اوپن ڈور پالیسی کے تحت روزانہ اپنے دفتر کے باہر بیٹھ کر عوام کے مسائل سنتے اور ان کے حل کے لئے اقدامات کر رہے ہیں۔انہوں نے درخواست گزاروں سے کہا کہ عوامی مسائل کے حل میں پیشرفت کو یقینی بنایا جارہا ہے اس ضمن میں لاپرواہی اور سستی دکھانے والے افسران وسٹاف ممبران کے خلاف کارروائی سے بھی گریز نہیں کیا جائے گا۔ایس ایس پی اپریشنز نے شہریوں کے بعض مسائل سنتے ہوئے موقع پر موجود پولیس افسران کودرخواستیں وشکایات میرٹ کے مطابق نمٹانے کی تاکید کرتے ہوئے کہا کہ جرائم پیشہ افراد کے خلاف قانون سرگرم عمل ہے۔
۔۔۔///۔۔۔

فیصل آباد(محمد اویس)ریجنل ڈائریکٹر علامہ اقبال اوپن یونیورسٹی پروفیسر ڈاکٹر زبیر احمد شاہ نے بتایا کہ اوپن یونیورسٹی نے گریجوایٹ اورپوسٹ گریجوایٹ کے داخلوں کا شیڈول جاری کردیا ہے جس کے مطابق بی اے کے تمام مضامین کے داخلے شروع ہوگئے ہیں جبکہ ایم اے،ایم ایس سی کے داخلے یکم مارچ سے15،اپریل تک جاری رہیں گے۔مزید معلومات کے لئے علاقائی کیمپس سے بھی رابطہ کیا جاسکتا ہے۔

فیصل آباد(محمد اویس) واسا کی کارکردگی اورسروسز کو مزید مستحکم بنانے کے اقدامات کے سلسلے میں ارکان اسمبلی اور ایف ڈی اے کی گورننگ باڈی کے دیگر ارکان کو بریفنگ دی گئی۔ڈائریکٹر جنرل ایف ڈی اے محمد سہیل خواجہ اور مینجنگ ڈائریکٹر واسا فقیر محمد چوہدری نے شہریوں کو واٹر سپلائی اور سیوریج کی بہتر سہولیات کی فراہمی، ریونیو ریکوری، سروسز کو جدید بنانے کے لئے نئی اصلاحات اور مستقبل کے ترقیاتی منصوبوں کے بارے میں بریفنگ دی اس سلسلے میں ایک اجلاس واسا کے مرکزی دفتر میں منعقد ہوا جس کی صدارت ایم پی اے/صوبائی پارلیمانی سیکرٹری چوہدری عادل پرویز گجر نے کی۔ایم پی اے میاں وارث عزیز،وائس چیئرمین واسا شیخ شاہد جاوید،ماجد حسین،چوہدری ناصر محمود،انجینئر یاسرانور،ڈی ایم ڈی واسا جبارانور،مختلف شعبوں کے ڈائریکٹرز اوردیگر افسران اجلاس میں موجود تھے۔ڈائریکٹر جنرل ایف ڈی اے محمد سہیل خواجہ اور ایم ڈی واسا فقیر محمد چوہدری نے ارکان اسمبلی اورگورننگ باڈی کے ارکان کا خیر مقدم کرتے ہوئے کہا کہ واسا کے حوالے سے شہریوں کو واٹر سپلائی اور سیوریج کی معیاری سہولیات فراہم کرنے کے لئے تمام ترسروسز کو جدید تقاضوں سے ہم آہنگ کیا جا رہا ہے اس سلسلے میں شہر کو 16حصوں میں تقسیم کرکے سروسز کی فراہمی اور سٹاف کی کارکردگی کی سخت مانیٹرنگ کی جارہی ہے جبکہ مدینہ ٹاؤن اورسرفراز کالونی کو ماڈل بنا کر مسلسل 12گھنٹے پینے کے پانی کی فراہمی کویقینی بنایا گیا ہے اور ان علاقوں کے ہر گھر میں واٹر میٹرز کی تنصیب کے علاوہ سو فیصد ریکوری بھی خوش آئندہے۔مستقبل میں اس نوعیت کی سروسز کا دائرہ تمام تر شہر تک وسیع ہو جائے گا۔انہوں نے بتایا کہ عوامی سہولت کے لئے واسا کے تمام ڈسپوزل اسٹیشنز پر ون ونڈو آپریشن سسٹم شروع کیاگیا ہے تاکہ واٹر سپلائی سیوریج کی خرابی یا بلوں کی ترسیل کے حوالے سے شکایات کا فوری ازالہ کیا جاسکے۔ڈائریکٹر جنرل ایف ڈی اے نے واسا کی ریکوری کے حوالے سے کئے گئے اقدامات سے آگاہ کرتے ہوئے بتایا کہ سپیشل ریکوری مہم کے خاطرخواہ نتائج حاصل ہوئے ہیں اس سلسلے میں متعلقہ شعبوں کے افسران وسٹاف کی کارکردگی قابل ستائش ہے۔انہوں نے مختلف سرکاری محکموں /اداروں اوربعض مسائل زدہ علاقوں سے واسا کی ریکوری میں ارکان اسمبلی کی معاونت کی خواہش کا اظہار کیا اور کہا کہ وسائل میں مشکلات،بجلی کے نرخوں اور دیگر محکمانہ اخراجات میں اضافہ کے باعث واسا کے نرخوں میں مناسب اضافہ ناگزیر ہے جس کی گورننگ باڈی کی طرف سے منظوری دی جاچکی ہے جبکہ صوبائی کابینہ کی توثیق کا انتظار ہے۔انہوں نے کہا کہ ایف ڈی اے اورواسا کی کارکردگی کے معیار میں مزید اضافہ شہری ترقی اور شہریوں کو بہترریلیف کی فراہمی کے بعض امور میں صوبائی سطح پر قانون سازی کی بھی ضرورت ہے۔ایم ڈی واسا نے مستقبل کے بزنس پلان کی تفصیلات سے آگاہ کرتے ہوئے بتایا کہ واسا کے باٹلنگ واٹر پلانٹ کے توسیعی منصوبے کے مطابق ڈیڑھ لیٹر اورآدھا لیٹر پانی کی بوتلوں کی تیاری اور مارکیٹنگ کی منصوبہ بندی کے علاوہ سرگودھا روڈ،جڑانوالہ روڈ اور ستیانہ روڈ کے علاقوں میں سیوریج سسٹم میں توسیع بھی کی جارہی ہے۔انہوں نے بتایا کہ جائیکا کے تعاون سے واسا کی پرانی مشینری کو تبدیل کیا جائے گا جس کے لئے منصوبے کا افتتاح عنقریب متوقع ہے۔انہوں نے پنجاب حکومت کی طرف سے واسا کے لئے آئندہ پانچ سالہ بجٹ مختص کرنے کی ضرورت پر زور دیتے ہوئے واسا کے سروس ایریا میں اضافہ کے لئے مجوزہ ترقیاتی پروگرام اور ویسٹ واٹر ٹریٹمنٹ پلانٹ سمیت واٹر سپلائی اور سیوریج کے آئندہ منصوبوں کی تفصیلات سے آگاہ بھی کیا۔ارکان اسمبلی اورگورننگ باڈی کے دیگر ارکان نے اپنے بھرپور تعاون کایقین دلاتے ہوئے کہا کہ اداروں کے استحکام سے ہی عوام کو عمدہ سروسز فراہم کی جاسکتی ہیں۔ارکان اسمبلی نے کہا کہ وہ مثبت تبدیلی کے سفر میں عوام اور اداروں کے مابین بہترین روابط میں اپنا بھرپور کردار ادا کرنے کے لئے پرعزم ہیں اس ضمن میں وسائل کی فراہمی اوردیگر محکمانہ مشکلات کے حل کے لئے صوبائی سطح پر مکمل نمائندگی کی جائے گی۔

فیصل آباد(محمد اویس )فیصل آباد سے رکن صوبائی اسمبلی اور وزیر اعلیٰ پنجاب کے معاون خصوصی ملک عمر فاروق نے فیصل آباد میں کبڈی کے عالمی مقابلوں کے شاندار انعقاد پر انتظامیہ کو مبارکباد دی ہے۔ اپنے جاری ایک بیان میں ملک عمر فاروق نے کہا کہ انٹرنیشنل ایونٹ کی میزبانی فیصل آباد کے لیے ایک اعزاز کی بات تھی جس کی کامیاب تکمیل پر ضلعی انتظامیہ سمیت پورا اشہر مبارک کا مستحق ہے۔ انہوں نے کہا کہ فیصل آباد زندہ دل لوگوں کی سرزمین ہے اور اہلیان فیصل آباد نے کبڈی مقابلوں کے دوران جس ڈسپلن اور جذبہ شوق کامظاہرہ کیا وہ بلاشبہ لائق تحسین ہے۔ ملک عمر فاروق نے بین الاقوامی کھلاڑیوں کے لیے بہترین اور فول پروف سیکورٹی فراہم کرنے پر ضلعی انتظامیہ کے تمام افسران کی محنت اور کاوشوں کی تعریف کرتے ہوئے کہا کہ اپنی ڈیوٹی پر مامور ہر افسر اور اہلکار اپنے فرائض کی ادائیگی کے لیے پوری طرح الرٹ اور چاک وچوبند تھا جس کی وجہ سے اتنا بڑا عالمی ایونٹ انتہائی احسن اور پرامن طریقے سے منعقد ہوسکا۔ انہوں نے تمام افسران و اہلکاران، صحافی بھائیوں اور بالخصوص اہالیان فیصل آباد کو فردا فردا مبارکباد پیش کی ہے۔

فیصل آباد( )ڈائریکٹر جنرل ایف ڈی اے محمد سہیل خواجہ کی ہدایت پر ایف ڈی اے کی انفورسمنٹ ٹیم نے کارروائی کرتے ہوئے مختلف ہاؤسنگ کالونیز میں یوٹیلٹی سروسز کے لئے مختص 307کنال اراضی کا قبضہ حاصل کرلیا ہے جبکہ دو غیر منظور شدہ ہاؤسنگ سکیموں کو فوری طور پر سیل کردیا گیا ہے۔تفصیلات کے مطابق اسٹیٹ آفیسر امتیاز گورایہ کی سربراہی میں انفورسمنٹ ٹیم نے سات ہاؤسنگ سکیموں محمد علی ہاؤسنگ چک نمبر222رب،لائل پورگارڈن چک نمبر212ر ب،لیسیم کنال برگ212رب،ناظم آباد سٹی چک نمبر220رب،ستارہ سپنا سٹی چک نمبر123ج ب،خالد ٹاؤن چک نمبر7ج ب اور ریاض الجنہ چک نمبر7ج ب جانچ پڑتال کرکے پارکس،سکول،واسا ڈسپوزل،ویسٹ مینجمنٹ،ڈسپنسری اور مفاد عامہ کے لئے دیگر یوٹیلٹی سروسز کے لئے مختص 307کنال کی اراضی واگزار کروا کر قبضہ حاصل کرلیا۔دریں اثناء ایف ڈی اے کی انفورسمنٹ ٹیم نے کارروائی کرتے ہوئے سرگودھا روڈ پر غیر منظور شدہ نواب سٹی اورمسجد اسماعیل روڈ پر غیر منظور شدہ اسماعیل سٹی کوسیل کردیا۔ڈائریکٹر جنرل ایف ڈی اے نے کہا ہے کہ ہاؤسنگ سکیموں میں پبلک یوٹیلٹی کیلئے مختص اراضی کا قبضہ حاصل کرنے کے لئے خصوصی مہم شروع کی گئی ہے اور ایسے پلاٹس کو کسی دوسرے مقاصد کیلئے استعمال کرنے کی اجازت نہیں دی جائے لہذا مفاد عامہ کے مقررکردہ پلاٹس کی مسلسل نگرانی کی جائے گی۔انہوں نے ڈویلپرز سے کہا کہ وہ ایسی قانون شکنی سے گریز کریں۔انہوں نے تاکید کی کہ ہاؤسنگ سکیموں کے قیام کے لئے قانونی ضوابط اورمقررہ شرائط کو پورا کرکے باقاعدہ منظوری حاصل کی جائے بصورت دیگر وہ نقصان کے خود ذمہ دار ہوں گے۔
۔۔۔///۔۔۔

فیصل آباد (محمد اویس ) معاون خصوصی وزیراعلیٰ پنجاب برائے سپورٹس ملک عمر فاروق نے کہا ہے کہ پاکستان خوبصورت نظاروں کی سرزمین ہے۔ وسیع و عریض ریگستان، سر سبز و شاداب میدان، برف سے ڈھکے ہوئے پہاڑ اور بلند و بالا پہاڑی سلسلے، گھنے جنگلات، حسین وجمیل شمالی علاقے جات، جھیلیں، جزائر اور رنگ بدلتے ہوئے موسم پوری دنیا کے سیاحوں کے لئے انتہائی کشش رکھتے ہیں۔ ان خیالات کا اظہار انہوں نے انٹرنیشنل ٹورازم پروموٹرز ارگنائزنیشن کے زیر اہتمام ایشیائی ثقافت اور سیاحت کے عنوان سے منعقدہ بین الاقوامی کانفرنس کے اختتامی اجلاس کے دوران کیا۔ کانفرنس میں پاکستان، انڈیا، بنگلہ دیش اور بھوٹان کے مندوبین کے علاوہ اوورسیز پاکستانیوں کی ایک بڑی تعداد نے شرکت کی۔ کانفرنس کے شرکاء سے اپنے صدارتی خطبے میں ملک عمر فاروق نے کہاکہ وزیراعظم پاکستان عمران خان ملک میں سیاحت کے فروغ کے لیے خاصے متحرک ہیں جنہوں نے سیاحوں کے لئے آسانیاں فراہم کرنے کا حکم دیتے ہوئے دنیا کے مختلف حصوں سے آنے والے سیاحوں کی ترجیحات کو مدنظر رکھتے ہوئے ٹوریسٹ انفراسٹرکچر اور سروسز بہتر کرنے کی ہدایت کی ہے۔ ملک میں سیاحت کی صنعت کے فروغ اور سکوپ کو مزید وسیع کرنے کے لئے آنے والے دنوں میں بین الاقوامی ٹورازم کانفرنس کے انعقاد پر سنجیدگی سے غور ہو رہا ہے۔ سیاحت کے فروغ کے لیے ملکی تاریخ میں پہلی بار نیشنل ٹورازم سٹریٹیجی 2020-30 تشکیل دی گئی ہے۔ اس کے علاوہ نیشنل ٹورازم ایکشن پلان 2020-25 مرتب کرنے کے ساتھ ساتھ مختلف ایونٹس کے لیے نیشنل کلینڈر بھی ترتیب دیا گیا ہے۔ پی ٹی ڈی سی کی نئی ویب سائٹ لانچ کر دی گئی ہے جس میں آن لائن بکنگ کی سہولت بھی رکھی گئی ہے۔ ملک عمر فاروق نے کہا کہ پاکستان میں سیاحت کا بے پناہ پوٹینشل موجود ہے جسے بین الاقوامی سطح پر اجاگر کرکے کثیر زرمبادلہ حاصل کیا جا سکتا ہے۔ انہوں نے کہاکہ پاکستان کابیش قیمت ثقافتی ورثہ اور قدرتی حسن سے مالامال دلکش نظارے دنیا بھر کے سیاحوں کو اپنی خوبصورتی کی طرف مائل کرتے ہیں اور امید ہے کہ موجودہ حکومت کی سیاحت دوست پالیسیوں کی وجہ سے پاکستان بین الاقوامی سیاحت کا بہترین مرکز ثابت ہو گا۔