فیصل آباد(محمد اویس) معاون خصوصی وزیر اعلی پنجاب برائے سپورٹس ملک عمر فاروق کی کاوشوں سے رکھ برانچ کینال کی صفائی کے لئے خطیر فنڈز جاری کر دئیے گئے ہیں۔رکھ برا نچ کینال کی صفائی کا کام پچھلے 30 سال سے زیر التواء تھا۔ معاون خصوصی ملک عمر فاروق نے ذاتی نگرانی میں صفائی کا آغاز کرایا۔واضح رہے کہ نہروں سے بھل، جھاڑیوں اور سرکنڈوں کی سالانہ صفائی ضروری ہوتی ہے تاکہ کاشتکاروں کو ٹیل تک نہری پانی کی دستیابی میں پریشانی کا سامنا نہ کرنا پڑے۔ کسانوں کے ایک وفد نے گزشتہ دنوں وزیراعلی پنجاب کے معاون خصوصی ملک عمر فاروق سے ملاقات کے دوران مطالبہ کیا تھا کہ فیصل آباد کی رکھ برانچ کینال کی صفائی نہ ہونے کی وجہ سے کسانوں کو شدید مشکلات درپیش ہیں اور کھیتوں کو سیراب کرنے کے لئے مناسب پانی نہیں مل رہا جس کی وجہ سے کاشتکاروں کی ہزاروں ایکڑ زرخیز زمینیں بنجر ہونے کے قریب ہیں۔ملک عمر فاروق نے ذاتی دلچسپی لیتے ہوئے وزیراعلی پنجاب سے فنڈز منظور کروانے کے بعد نہر کی صفائی کا کام شروع کرادیا ہے۔ملک عمر فاروق نے کسانوں کو یقین دلایا کہ ان کے مفادات کا ہر قیمت پر تحفظ کیا جائے گا اور ٹیل تک بلارکاوٹ نہری پانی کی فراہمی کے لیے تمام دستیاب وسائل بروئے کار لائے جائیں گے۔انہوں نے محکمہ انہار کے ملازمین کو ہدایت کی کہ وہ نہروں کی صفائی کے کام میں کسی غفلت یا کوتاہی کا مظاہرہ نہ کرتے ہوئے نہر کی صفائی کے کام کوتیز رفتاری سے مکمل کریں۔
Category: فیصل آباد
-
ڈائریکٹر جنرل ایف ڈی اے محمد سہیل خواجہ نے کہا ہے کہ ایف ڈی اے کے زیراہتمام فضائی آلودگی کی سطح جانچنے کے لئے سائنسی اقدامات کرنے کی منصوبہ بندی جاری
فیصل آباد (محمد اویس) ڈائریکٹر جنرل ایف ڈی اے محمد سہیل خواجہ نے کہا ہے کہ ایف ڈی اے کے زیراہتمام فضائی آلودگی کی سطح جانچنے کے لئے سائنسی اقدامات کرنے کی منصوبہ بندی کی جارہی ہے تاکہ شہری ترقی کے ساتھ ماحولیاتی تحفظ کے بارے میں شہریوں کو آگاہ رکھاجاسکے۔ انہوں نے یہ بات ایک میٹنگ کے دوران بتائی جس میں فضائی آلودگی جانچنے کے آلات کی تنصیب کے بارے میں منصوبہ سازی کے بارے میں بریفنگ دی گئی۔واسا کے انجینئر شاہد گل نے شہر میں فضائی آلودگی اور اس کے لیول سے آگاہی کے طریقہ کار کے بارے میں بریفنگ دی۔ڈائریکٹر جنرل ایف ڈی اے نے شہرمیں بڑھتی ہوئی فضائی آلودگی پر گہری تشویش کا اظہار کرتے ہوئے کہا کہ شہریوں کو اس گھمبیر صورت حال سے آگاہ رہنا چاہیے تاکہ وہ اپنی صحت کا تحفظ کرسکیں تاہم اس ضمن میں انسدادی اقدامات پر عملدرآمد متعلقہ اداروں کی ذمہ داری ہے۔انہوں نے کہا کہ فضائی آلودگی کا لیول جانچنے کی ڈیوائس کی تنصیب ابتدائی طور پر ایف ڈی اے سٹی میں لگانے کا منصوبہ بنایا جائے گا جبکہ بعدازاں ایسی ڈیوائسز کی تنصیب کے لئے نجی ہاؤسنگ سکیموں کی انتظامیہ کو متحرک کریں گے۔انہوں نے بتایا کہ پالوشن لیول مانیٹر کرنے کے آلات کی تنصیب کے ذریعے فضاء میں آلودگی کی سطح،موسمی درجہ حرارت اور سموگ کی صورت حال کے بارے میں بھی آگاہی ہوسکے گی۔اس موقع پر بتایا گیا کہ پالوشن لیول مانیٹرکے ساتھ بڑی سکرین لگا کر شہریوں کو موسمی درجہ حرارت اور فضائی آلودگی کے بارے میں براہ راست آگاہ کرنے کے علاوہ آلودگی سے بچاؤ کے بارے میں رہنمائی فراہم کی جائے گی۔ڈائریکٹر جنرل نے کہا کہ تیزرفتار ترقی اور صنعتی شہر ہونے کے اعتبار سے فیصل آباد میں بڑھتی ہوئی فضائی آلودگی پر قابو پانے کے لئے انسدادی واحتیاطی اقدامات ناگزیر ہیں اس ضمن میں حکومتی سطح پر اقدامات کے علاوہ فضائی آلودگی جانچنے کے آلات نصب کرنے کے اقدامات بھی ممدومعاون ثابت ہوں گے۔
-
ڈائریکٹر جنرل ایف ڈی اے محمد سہیل خواجہ کی ہدایات پرغیر منظور شدہ ہاؤسنگ سکیموں کے خلاف آپریشن جاری
فیصل آباد(محمد اویس)ڈائریکٹر جنرل ایف ڈی اے محمد سہیل خواجہ کی ہدایات پرغیر منظور شدہ ہاؤسنگ سکیموں کے خلاف جاری آپریشن کے سلسلے میں اسسٹیٹ آفیسر امتیاز گورایہ کی سربراہی میں ایف ڈی اے کی ٹیم نے غیر منظور شدہ تین ہاؤسنگ سکیموں کو سیل کردیا اورغیر تعمیرات کو مسمار کردیاگیا۔سرگودھا روڈ،جھمرہ روڈاورملت روڈ پر واقع ان غیر قانونی/غیر منظور شدہ ہاؤسنگ سکیموں میں القاسم بلاسم،رائل پام اور جے ایم ویلی شامل ہیں۔
-
فیصل آباد امین پور انٹر چینج پر ٹریفک حادثہ
فیصل آباد (محمد اویس) فیصل آباد میں ٹریفک حادثے میں خاتون سمیت 3افراد جاں بحق جبکہ 2شدید زخمی ہوگئے۔ تفصیلات کے مطابق فیصل آباد نڑوالا روڈ پر امین پور بنگلہ انٹرچینج کے قریب تیز رفتار کار کو نامعلوم گاڑی نے ٹکر مار دی، کار میں سوار خاتون سمیت 3 افراد موقع پر ہی جاں بحق ہوگئے، 2 افراد کو شدید زخمی حالت میں قریبی ہسپتال منتقل کر دیا گیا۔ریسکیو حکام کے مطابق حادثہ تیز رفتاری کے باعث پیش آیا، ٹکر مارنے والی نامعلوم گاڑی موقع سے فرار ہوگئی
-
اسسٹنٹ کمشنر سٹی زوہا شاکر نے گرینڈ آپریشن کرکے 3کریانہ سٹورز کو آٹا ذخیرہ کرکے مہنگے داموں فروخت کرنے پربھاری جرمانہ کیا
فیصل آباد(محمد اویس )ڈپٹی کمشنر محمد علی کی ہدایات پر اسسٹنٹ کمشنر سٹی زوہا شاکر نے گرینڈ آپریشن کرکے 3کریانہ سٹورز کو آٹا ذخیرہ کرکے مہنگے داموں فروخت کرنے پربھاری جرمانہ اور صوفی امین کریانہ سٹور کے خلاف مقدمہ درج کرادیا جبکہ مہر کریانہ سٹور اور عاشق کریانہ سٹور کو جرمانہ کیا گیا۔انہوں نے سٹورز کے گوداموں میں ذخیرہ کیا گیا آٹا سٹورز کے سامنے کاؤنٹر قائم کرکے سرکاری نرخ پر فروخت کرادیا۔اسسٹنٹ کمشنر سٹی نے فلور ملز میں آٹے کی گرائینڈنگ کا ریکارڈ بھی چیک کیا اور ان کے مین گیٹس پر قائم فیئر پرائس شاپس پر آٹے کی فروخت کو مانیٹر کیا۔انہوں نے کہا کہ آٹے کی سرکاری طور پر مقررکردہ قیمت پر فروخت کویقینی بنانے کے لئے انسپکشن کا عمل جاری رہے گا۔
-
علامہ اقبال اوپن یونیورسٹی کے سمسٹر بہار2020 میں میٹرک سے لیکر پوسٹ گریجوایٹ سطح تک داخلے شروع
فیصل آباد(محمد اویس)ریجنل ڈائریکٹر علامہ اقبال اوپن یونیورسٹی پروفیسر ڈاکٹر زبیر احمد شاہ کے مطابق علامہ اقبال اوپن یونیورسٹی کے سمسٹر بہار2020 میں میٹرک سے لیکر پوسٹ گریجوایٹ سطح تک داخلے شروع ہوگئے ہیں جو سنگل فیس کے ساتھ 21فروری تک جاری رہیں گے۔تمام کورسز کی پراسپیکٹس ریجنل آفس علامہ اقبال اوپن یونیورسٹی ملت ٹاؤن Fبلاک میں دستیاب ہیں داخلہ کے سلسلے میں مزید معلومات کیلئے 041-8814982 پر رابطہ کیا جاسکتا ہے۔
-
ڈائریکٹر جنرل ایف ڈی اے محمد سہیل خواجہ کی ہدایت پراسٹیٹ آفیسر ایف ڈی اے امتیاز گورایہ کی سربراہی میں غیر منظور شدہ ہاوسنگ اسکیمیں سیل
فیصل آباد(محمد اویس)ڈائریکٹر جنرل ایف ڈی اے محمد سہیل خواجہ کی ہدایت پراسٹیٹ آفیسر ایف ڈی اے امتیاز گورایہ کی سربراہی میں ٹیم نے کارروائی کرتے ہوئے مختلف علاقوں میں دو غیر منظور شدہ ہاؤسنگ سکیموں کو سیل کردیا جبکہ کینال روڈ پر زیرتعمیر کشمیر پل انڈر پاس کے ارد گرد تمام تجاوزات کو ہٹاکر راستے کلیئر کردئیے گئے ہیں۔تفصیلات کے مطابق جڑانوالہ روڈ پر غیر قانونی/غیر منظور شدہ بسم اللہ گارڈن اورامین پور روڈ پرجلال ٹاؤن کے دفاتر کو سربمہر کرکے ان کی غیر قانونی تعمیرات کو مسمار کردیاگیا اور ان غیر منظور شدہ ہاؤسنگ سکیموں کے ڈویلپرز سے کہا گیا ہے کہ وہ قانونی تقاضے پورے کرتے ہوئے ایف ڈی اے سمیت دیگر متعلقہ اداروں سے منظوری حاصل کریں بصورت دیگر وہ ہاؤسنگ سکیموں کے امور جاری نہیں رکھ سکیں گے۔ایف ڈی اے کی طرف سے سیل کی جانے والی ہاؤسنگ سکیموں کے ڈویلپرز کو خبردار کیاگیا ہے کہ بلااجازت ازخود سیل کھولنے یا دیگر قانون شکنی کی صورت میں قصور واروں کے خلاف مقدمات بھی درج کرائے جاسکتے ہیں۔دریں اثناء ایف ڈی اے کے سٹاف نے زیرتعمیر کشمیر پل انڈر پاس کے دونوں اطراف میں دکانداروں کی طرف سے قائم کی گئی عارضی وپختہ تجاوزات کو ختم کردیاہے تاکہ ٹریفک کے بہاؤ میں تمام رکاوٹوں کو دور کرکے شہریوں کو ریلیف فراہم کیا جاسکے۔
-
)ڈپٹی کمشنرمحمد علی کی ہدایت پر سدھار میں آٹا اور چینی کے گودام پر چھاپہ
فیصل آباد(محمد اویس)ڈپٹی کمشنرمحمد علی کی ہدایت پر اسسٹنٹ کمشنر صدرعمر مقبول نے سدھار چوک میں 2500بیگ چینی اور آٹا کے 2ہزار بیگ سے ذخیرہ کیاگیا گودام سیل کردیا۔اسسٹنٹ کمشنر نے کہا کہ ذخیرہ اندوزی کے خلاف کریک ڈاؤن جاری رہے گا تاکہ عوام کو مصنوعی مہنگائی سے بچایا جاسکے۔
-
کیا بات ہوئی کہ وزیر اعلیٰ پنجاب نے اے سی کو معطل کر دیا
کیا بات ہوئی کہ وزیر اعلیٰ پنجاب نے اے سی کو معطل کر دیا
.باغی ٹی وی : وزیراعلی پنجاب عثمان بزدار کا اچانک دورہ.جڑانوالہ ، وزیراعلی کی اچانک آمد پر انتظامیہ کی دوڑیں لگ گئیں،وزیراعلی عثمان بزدار نے سستے بازار میں آٹے کی فراہمی کا جائزہ لیا-وزیراعلی پنجاب نے تحصیل ہیڈکوارٹرہسپتال کا وزٹ بھی کیا .وزیراعلی پنجاب نے تھانہ سٹی کا معائنیہ کیا،اور ناقص صفائی پر برہمی کا اظہارکیا-. تھانہ کی بلڈنگ کو اپ گریڈ کرنے کے احکامات صادر کردئیے–وزیر اعلی پنجاب نے اے سی سٹی جڑانوالہ اسسٹنٹ فوڈ کنٹرولر کو معطل کر دیا
.وزیراعلی پنجاب کی موجودگی میں رکن قومی اسمبلی ملک نواب شیروسیر اور رکن صوبائی اسمبلی چوہدری علی اختر کے مابین تلخ کلامی ہوئی .وزیراعلی کی سیکورٹی ٹیم نے میڈیا کو بات چیت سے روک دیا…وزیراعلی پنجاب کے سیکورٹی سٹاف کی ایم پی اے چوہدری علی اختر کیساتھ بھی تلخ کلامی ہوئی ..وزیراعلی پنجاب نے سستے بازار میں آٹے کے 15تھیلے فری تقسیم کیے- -
فیصل آباد ڈسٹرکٹ بار کے انتخابات میں امیدوار کے حامیوں کی ہوائی فائرنگ
فیصل آباد (محمد اویس) فیصل آباد میں ڈسٹرکٹ بار کے انتخابات کے نتائج کے موقع پر امیدواروں کے حامیوں کی جانب سے ہوائی فائرنگ کی گئی۔ فائرنگ کرنے والوں میں ایک خاتون وکیل بھی شامل تھی۔ ڈسٹرکٹ بار میں سالانہ انتخابات میں پولنگ ختم ہونے کے بعد ابھی ووٹوں کی گنتی کا سلسلہ جاری تھا کہ امیدواروں کے حامیوں کی جانب سے نعرے بازی اور ہوائی فائرنگ کا سلسلہ شروع کر دیا گیا۔ ہوائی فائرنگ کرنے پر پولیس نے کارروائی کی تو ساتھی وکلاء پولیس سے مزاحمت کر کے اپنے ساتھی وکلاء کو چھڑا کر لے گئے۔
دوسری جانب پولیس ترجمان کا کہنا ہے کہ فیصل آباد میں ہوائی فائرنگ کرنے والوں کے خلاف قانون کے مطابق کارروائی کی جائے گی۔