Category: فیصل آباد

فیصل آباد(محمد اویس ) فیصل آباد الیکٹرک سپلائی کمپنی (فیسکو) کے آئی ٹی ڈیپارٹمنٹ نے سکیورٹی کیمرے،میٹر ریڈنگ کیلئے ہینڈ ہیلڈ یونٹس اور ڈیٹا محفوظ رکھنے کے آلات خریدنے کا فیصلہ کیا ہے۔ اس سلسلے میں ڈائریکٹر ایم آئی ایس فیسکو نے سیلز ٹیکس اور این ٹی این رجسٹرڈ فرموں سے آلات کی خریداری اورتنصیب کی پیشکشیں طلب کر لی ہیں۔ ان آلات کی خریدار ی کامقصد سکیورٹی اور میٹر ریڈنگ کی کار کردگی کو مزید بڑھانا ہے۔

فیصل آباد( )سیکرٹری ٹرانسپورٹ پنجاب اسدرحمان گیلانی نے فیصل آباد کا دورہ کیا اور ڈویژنل کمشنر عشرت علی سے ان کے آفس میں ملاقات کی۔ڈپٹی کمشنر محمدعلی، سیکرٹری آر ٹی اے ضمیر حسین بھی موجود تھے۔ ڈویژنل کمشنر نے کہا کہ شہریوں کو کم اخراجات میں بہترین،آرام دہ اور باوقار سفری سہولیات کی فراہمی کے لئے جامع پلاننگ کی ضرورت ہے اس سلسلے میں پرانے روٹس کو بحال کرنے کے ساتھ نئی سفری سہولتیں بھی میسر آنی چاہیں۔انہوں نے کہا کہ ضلعی محکمہ ٹرانسپورٹ کو نئی بس سروس شروع کرنے کے سلسلے میں درکار لائحہ عمل تیار کرنے کے لئے ہدایت جاری کی گئی ہے۔سیکرٹری ٹرانسپورٹ پنجاب نے ڈویژنل کمشنر سے اتفاق کرتے ہوئے کہا کہ حکومت فیصل آباد سمیت دیگر شہروں میں مسافروں کو معیاری سفری سہولیات کی فراہمی یقینی بنانے کے لئے سنجیدہ اقدامات کررہی ہے۔دریں اثناء سیکرٹری ٹرانسپورٹ پنجاب اسد رحمان گیلانی نے ڈپٹی کمشنر محمد علی کے ہمراہ جنرل بس سٹینڈ کا دورہ کیا۔انہوں نے مسافر گاڑیوں کی پاسنگ،انکی فٹنس کی صورتحال،کرایوں کی وصولی سمیت مسافروں کی انتظار گاہ کا دورہ کرکے موجود مسافروں سے گفتگو بھی کی اور کرایوں کی وصولیوں کے بارے میں دریافت کیا۔انہوں نے پبلک ٹائلٹس میں صفائی ستھرائی کو ہمہ وقت یقینی بنانے کی تاکید کی۔سیکرٹری ٹرانسپورٹ نے کہا کہ پبلک ٹرانسپورٹس کی پاسنگ اور فٹ/ان فٹ کاجائزہ لینے کیلئے فیصل آباد میں وہیکل انسپکشن اینڈسر ٹیفیکیشن سسٹم لایا جا رہا ہے۔انہوں نے سٹی ٹرانسپورٹ ٹرمینل کا بھی دورہ کیا اوردستیاب سہولتوں کا جائزہ لیا۔انہوں نے پبلک ٹرانسپورٹس اڈوں میں کلین اینڈ گرین پنجاب پروگرام کے تحت پودے بھی لگائے۔انہوں نے صفائی ستھرائی کویقینی بنانے کی تاکید کرتے ہوئے کہا کہ دستیاب اراضی کو شجرکاری کے لئے بروئے کار لایا جائے۔سیکرٹری ٹرانسپورٹ پنجاب نے جھنگ روڈ پر پرتاب نگر میں آٹے کی چکی کو بھی چیک کیااور45روپے فی کلوگرام کے حساب سے فروخت کے عمل کاجائزہ اور صارفین سے گفتگو کرتے ہوئے کہا کہ حکومت پنجاب نے انہیں ضلع فیصل آباد میں آٹے کی دستیابی کی صورتحال کو مانیٹر کرنے کا ٹاسک بھی تفویض کیا ہے۔اس مقصد کے لئے وہ مختلف علاقوں میں آٹے کی چکیوں پر سرکاری گندم اور آٹا کی قیمت کو چیک کررہے ہیں۔ڈی ایف سی علی عمران نے صوبائی سیکرٹری کو آٹے کی صورتحال پر بریفنگ دی۔اسسٹنٹ کمشنر صدر عمر مقبول،اسسٹنٹ ایڈمنسٹریٹرجنرل بس سٹینڈ رانا حبیب اللہ بھی موجود تھے۔انہوں نے ڈی سی آفس میں ضلعی محکمہ ٹرانسپورٹ کی کارکردگی پر بریفنگ بھی لی اور سیکرٹری آرٹی اے کو ضروری ہدایت جاری کیں۔ڈپٹی کمشنر محمد علی نے بتایا کہ شہریوں کو سفر کی معیاری سہولیات کی فراہمی کویقینی بنانے کے لئے اقدامات جاری ہیں۔انہوں نے کہا کہ وہیکل انسپکشن اینڈ سر ٹیفکیشن سسٹم کی بدولت گاڑیوں کی فٹنس جانچنے سمیت دیگر امور میں مدد ملے گی۔انہوں نے بتایا کہ ڈی آر ٹی اے کی ماہانہ میٹنگ کرکے شعبہ ٹرانسپورٹ سے متعلقہ امور کا جائزہ بھی لیا جارہا ہے۔انہوں نے ضلع میں فلور ملز سے گندم کی سپلائی،آٹے کی فروخت کے امور،ٹرکنگ پوائنٹس،فیئرپرائس شاپس کے قیام کے حوالے سے آگاہ کرتے ہوئے بتایا کہ موثر مارنیٹرنگ سے آٹے کی صورتحال تسلی بخش ہے۔سیکرٹری آرٹی اے نے صوبائی سیکرٹری ٹرانسپورٹ کو محکمانہ کارکردگی کے بارے میں بریفنگ دی۔

فیصل آباد(محمد اویس ) ڈپٹی کمشنر محمد علی کی ہدایت پر اسسٹنٹ کمشنر صدر عمرمقبول نے ماڈل بازار جھنگ روڈ کا دورہ کیا اوراشیائے ضروریہ کی دستیابی اورقیمتوں کو چیک کیا۔انہوں نے کہا کہ سستے داموں اشیائے ضروریہ کی فراہمی کیلئے ہمہ جہت اقدامات کئے جارہے ہیں اس ضمن میں مارکیٹوں میں اشیاء کی قیمتوں کو کنٹرول میں رکھنے کے ساتھ ماڈل بازاروں میں سستے داموں معیاری اشیاء کی دستیابی کویقینی بنایا جارہا ہے۔انہوں نے مارکیٹ کمیٹی کے عملہ سے کہا کہ صارفین کی سہولیات کا خیال رکھیں اور ذمہ داری سے ڈیوٹی انجام دیتے ہوئے اشیاء کی سپلائی میں کوئی تعطل نہ آئے دیں اور ناپ تول کے پیمانے بھی درست رکھے جائیں۔انہوں نے کہا کہ ماڈل بازاروں کے انتظامات کی مانیٹرنگ جاری رہے گی اور عوامی شکایات کا فوری نوٹس لیکر ازالہ کیا جائے گا۔

فیصل آباد(محمد اویس)ڈائریکٹر جنرل ایف ڈی اے محمد سہیل خواجہ کی ہدایات پر غیر منظور شدہ ہاؤسنگ سکیموں کے خلاف جاری آپریشن کے سلسلے میں اسسٹیٹ آفیسر امتیاز گورایہ کی سربراہی میں ایف ڈی اے کی ٹیم نے کارروائی کرتے ہوئے تین غیر منظور شدہ ہاؤسنگ سکیموں کو سیل جبکہ غیر قانونی تعمیرات کومسمار کردیا۔تفصیلات کے مطابق دوران انسپکشن انکشاف ہوا کہ چک نمبر196رب کے علاقہ کی زمین پر رائل پام سٹی،بلال آرچرڈ اورچک نمبر117ج ب کی اراضی پر ابراہیم ویلی کی ایف ڈی اے اوردیگر متعلقہ اداروں سے منظوری حاصل نہیں کی گئی جس پر ان ہاؤسنگ سکیموں کو فوری طور پر سیل کردیا اورمنتظمین سے کہا گیا ہے کہ وہ متعلقہ شرائط،قواعدوضوابط اورقانونی تقاضوں کو پورا کرکے باقاعدہ منظوری حاصل کریں بصورت دیگر وہ پلاٹس کی فروخت اور تعمیرات جاری نہیں رکھ سکیں گے۔ڈائریکٹر جنرل ایف ڈی اے نے کہا کہ ڈویلپرز کی سہولت کے لئے خصوصی سیل کام کررہا ہے لہذا وہ منظوری کے لئے تمام کارروائی مکمل کریں اس ضمن میں کسی قسم کی تاخیر یا شکایت کی صورت میں ان سے رابطہ کیا جاسکتا ہے۔

فیصل آباد(محمد اویس)ڈائریکٹر جنرل اینٹی کرپشن گوہر نفیس کی ہدایات پر ڈائریکٹر اینٹی کرپشن عمران رضا عباسی کی زیرنگرانی اینٹی کرپشن ٹیموں نے کارروائی کرتے ہوئے فیصل آباد،جھنگ اورچنیوٹ میں اشٹام فروش،ایکسائز اینڈ ٹیکسیشن کے انسپکٹر اورنکاح خواں کے خلاف مقدمات درج کردئیے۔تفصیلات کے مطابق اینٹی کرپشن نے اقبال ٹاؤن فیصل آباد کے رہائشی دلدار حسین کاظمی کی شکایت پر اشٹام فروش محمد ناصر سندھو کو جعلی اشٹام پیپر تیارکرنے پر انکوائری کے بعد جرم ثابت ہونے پر مقدمہ درج کرکے تفتیش مقدمہ ریجنل انسپکٹر اینٹی کرپشن کے سپرد کردیا۔دوسری کارروائی کے دوران ضلع چنیوٹ کے نکاح خواں اللہ یارکیخلاف جعلی نکاح نامہ تیار کرنے پر مقدمہ درج کرادیا گیا۔ایک اورکارروائی کے دوران اینٹی کرپشن کی ٹیم نے محکمہ ایکسائز اینڈ ٹیکسیشن جھنگ کے انسپکٹر شاہ زیب کے خلاف دی گئی درخواست پر تحقیقات کی توقصوروار ثابت ہونے پر مقدمہ درج کرکے تفتیش ڈپٹی ڈائریکٹر تفتیش اینٹی کرپشن جھنگ کے سپرد کردی گئی۔

فیصل آباد(محمد اویس)حکومت پنجاب کی ہدایات پر ضلعی انتظامیہ کے زیراہتمام ضلع میں 5فروری یوم یکجہتی کشمیر کے حوالے سے مختلف تعلیمی اداروں اورمحکموں کے پروگرامز کوحتمی شکل دی جارہی ہے تاکہ مسئلہ کشمیرکو اجاگر کرنے کے ساتھ ساتھ کشمیریوں سے مکمل یکجہتی کا اظہار کیا جاسکے۔ڈپٹی کمشنر محمد علی کی ہدایت پر ایڈیشنل ڈپٹی کمشنر(جنرل)فضل ربی چیمہ کی زیر صدارت پروگرامز کے انعقاد کاجائزہ لینے کے لئے اجلاس منعقد ہوا جس میں چیف ٹریفک آفیسر سردار محمد آصف،اسسٹنٹ کمشنر سٹی وصدر زوہا شاکر،عمر مقبول،ایڈمن آفیسر ریاض حسین انجم،سی ای او ویسٹ مینجمنٹ کمپنی کاشف رضا اعوان کے علاوہ آرٹس کونسل،یونیورسٹیز،کالجز،سکول،ایف ڈی اے،میٹروپولیٹن کارپوریشن،واسا،پی ایچ اے پارکنگ کمپنی،پنجاب پولیس،سول ڈیفنس،1122ودیگر محکموں کے افسران موجود تھے۔اجلاس کو بتایا گیا کہ یوم یکجہتی کشمیر کے حوالے سے تعلیمی اداروں میں کشمیر کنونشن،سیمینارز،تقریری مقابلے،واکس،مشاعرے،موضوعاتی ڈرامے اوردیگر پروگرامز منعقد ہونگے جبکہ آرٹس کونسل کی طرف سے جدوجہد آزادی کشمیر اوربھارتی ظلم واستبداد پر مبنی تصویری نمائش کا بھی اہتمام کیاجا رہا ہے۔علاوہ ازیں کشمیری بھائیوں سے اظہار یکجہتی کے لئے ضلع بھر میں اہم عوامی مقامات پر کشمیریوں کی جدوجہد آزادی پر مشتمل بینرز،کشمیر کے جھنڈے اور شہداء کی تصاویر آویزاں کی جارہی ہیں جس کے لئے پی ایچ اے،میٹرو پولیٹن کارپوریشن،ویسٹ مینجمنٹ کمپنی،پارکنگ کمپنی،ایف ڈی اے اور میونسپل کمیٹیز کو ٹاسک سونپ دیا گیا ہے۔صدر اجلاس نے بتایا کہ 5فروری کویوم یکجہتی کشمیر بھرپورانداز میں منایا جائے گا تاہم اس سے قبل بھی کشمیر سے اظۃار یکجہتی کے لئے مختلف پرورگرامز منعقد ہونگے۔انہوں نے محکمہ سماجی بہبود سے کہا کہ وہ مختلف این جی اوز کو متحرک کرکے کشمیریوں سے اظہار یکجہتی کے لئے واکس اور ریلیز کا انعقاد کریں جبکہ ویسٹ مینجمنٹ کمپنی اور اسسٹنٹ کمشنرز کی طرف سے بھی اسی نوعیت کے پروگرامز منعقد کئے جائیں۔انہوں نے کہا کہ پبلک پارکوں میں کشمیریوں کی جدوجہد آزادی کی تحریک پر مشتمل ڈاکومنٹری،سپورٹس میچز کرانے کے علاوہ یونیورسٹیز میں مقبوضہ کشمیر کے زیرتعلیم طالب علموں کو بھی پروگرامز میں مدعو کریں۔انہوں نے تمام محکموں کو یوم یکجہتی کشمیر کے حوالے سے تقریبات کا شیڈول مرتب کرکے ایک روزمیں ڈی سی آفس بھجوانے کی ہدایت کی اورکہا کہ تمام پروگرامز اس انداز میں منائے جائیں کہ کشمیری بھائیوں سے یکجہتی کا پیغام واضح طور پراجاگر ہو.

فیصل آباد( )ڈپٹی کمشنر محمد علی کی ہدایات پر اسسٹنٹ کمشنر صدر عمر مقبول نے مہنگے داموں روٹی فروخت کرنے پر 15گرانفروشوں کو 25ہزارروپے جرمانہ اور ایک ہوٹل کی انتظامیہ کے خلاف مقدمہ درج کرادیا۔تفصیلات کے مطابق اسسٹنٹ کمشنر صدر نے مختلف علاقوں میں 64ہوٹلز پرروٹی کی قیمت اوروزن کو چیک کیا اور اوورچارجنگ/ وزن میں کمی پر موقع پر ہی جرمانہ کیا۔

فیصل آباد(محمد اویس)وزیراعلیٰ پنجاب سردارعثمان بزدار کی خصوصی ہدایات پر پینسرہ میں پہلی بار کھلی کچہری کا انعقاد کیا گیا جس میں ڈپٹی کمشنر محمد علی اور سی پی او کیپٹن (ر) سہیل چوہدری نے چک 275ج ب میں شہریوں کے تعلیم،صحت،مال ودیگر محکموں اورپولیس سے متعلقہ مسائل تفصیل سے سنے۔اسسٹنٹ کمشنر صدر عمر مقبول اور دیگر افسران بھی موجود تھے۔ڈپٹی کمشنر نے شہریوں کی بعض شکایات و مسائل پر اسسٹنٹ کمشنر صدر ودیگر متعلقہ افسران کو فوری دادرسی کرکے رپورٹ کرنے کی تاکید کی۔انہوں نے کہا کہ ضلع کی تحصیلوں سمیت دوردراز علاقوں میں کھلی کچہریاں لگانے کا مقصد عوامی مسائل دہلیز پر حل کرنے کے ساتھ انہیں ہرممکن ریلیف فراہم کرنا ہے جس کے لئے ضلعی انتظامیہ متحرک ہے۔انہوں نے پینسرہ میں صفائی کی صورتحال بہتر بنانے کی تاکید کی اور شہریوں سے کہا کہ ان کے مسائل کے حل کے لئے محکموں کو ہدایات جاری کی گئی ہیں جن کی مانیٹرنگ بھی کی جارہی ہے۔انہوں نے کہا کہ وہ وزیراعلیٰ پنجاب سردار عثمان بزدار کے احکامات پر ضلع کے کونے کونے میں جا کر عوامی مسائل سن اور ان کے ازالہ کیلئے ہرممکن اقدامات کررہے ہیں۔ڈپٹی کمشنر نے بعض درخواستوں پر افسران کو فون کرکے تعمیلی رپورٹ فراہم کرنے کی ہدایت کی۔سی پی او کیپٹن(ر)سہیل چوہدری نے شہریوں کی پولیس سے متعلقہ درخواستیں سنتے ہوئے پولیس افسران سے کہا کہ وہ عوام کو میرٹ کے مطابق انصاف کی فراہمی کویقینی بنائیں اور ان کی ہرممکن حد تک دادرسی ہونی چاہیے۔انہوں نے کہا کہ امن وامان کے قیام کے لئے ضلعی پولیس متحرک ہے اور منشیات فروشوں کے خلاف کریک ڈاؤن کے ساتھ قانون کی خلاف ورزی کرنے والوں کے خلاف کارروائیوں کا سلسلہ جاری ہے۔انہوں نے کہا کہ کھلی کچہریوں کے انعقاد کا سلسلہ جاری رہے گا تاکہ شہریوں کو ریلیف کی فراہمی میں تاخیر نہ ہو۔اس موقع پر موجوددرخواست گزاروں نے ضلعی وپولیس انتظامیہ کی طر ف سے کھلی کچہری کے انعقاد کو سراہا اور کہا کہ ایسے اقدامات سے ان کے مسائل ان کی دہلیز پر حل ہونگے۔کھلی کچہری کے دوران شہریوں کی طرف سے 50سے زائد درخواستیں پیش کی گئیں۔