Category: فیصل آباد

فیصل آباد (محمد اویس) وزیراعظم عمران خان کے کلین اینڈ گرین پاکستان پروگرام پر پورے عزم سے عملدرآمد کیا جارہا ہے اس سلسلے میں ایف ڈی اے سٹی میں دستیاب 12،ایکڑ اراضی پر اربن فاریسٹ قائم کیا گیا ہے جبکہ اس ہائوسنگ کالونی میں مختص 69 پارکس کی جگہوں پر وسیع شجرکاری کے تحت پھلداراورپھولدار پودے لگائے جائیں گے۔
یہ بات ڈائریکٹر جنرل ایف ڈی اے محمد سہیل خواجہ نے ایف ڈی اے سٹی کے اے سیون بلاک میں اربن فاریسٹ کے منصوبے کی پیشرفت اورپارکس کی جگہوں کا معائنہ کرتے ہوئے بتائی۔پراجیکٹ ڈائریکٹر ایف ڈی اے سٹی سہیل مقصود پنوں،ڈپٹی ڈائریکٹر یاسر چٹھہ اور دیگر افسران بھی ان کے ہمراہ تھے۔ڈائریکٹر جنرل نے بتایا کہ ایف ڈی اے سٹی کے منصوبے کی آبادکاری کے ساتھ ساتھ اسے سرسبز وشاداب بنانے کیلئے جامع اقدامات کئے جارہے ہیں۔

فیصل آباد (محمد اویس) تفصیلات کے مطابق وزیراعظم عمران خان فیصل آباد میں سی پیک کے پہلے صنعتی زون کا سنگ بنیاد رکھنے کے لئے پہنچے ،جہاں انہوں نے جنرل بس اسٹینڈ پرمدینہ فاؤنڈیشن کی تعمیرکردہ پہلی پناہ گاہ کا باضابطہ افتتاح کیا۔
اس موقع پر چیئر مین مدینہ فاؤنڈ یشن میاں محمد حنیف سمیت کئی اعلیٰ حکام وزیر اعظم عمران خان کے ہمراہ تھے،مذکورہ پناہ گاہ میں تین سو پچاس افراد کے ٹھہرنے کی گنجائش ہے۔

فیصل آباد (محمد اویس) وزیراعظم عمران خان نے فیصل آباد میں پناہ گاہ کا افتتاح کیا، اس موقع پر وزیراعلیٰ پنجاب عثمان بزدار اور وفاقی وزیر برائے منصوبہ بندی اسد عمر بھی وزیراعظم کے ہمراہ تھے۔
وزیراعظم عمران  خان نے افتتاح کے موقع پر پناہ گاہ کے مختلف حصوں کا جائزہ لیا اور دیگر لوگوں کے ساتھ بیٹھ کر کھانا بھی کھایا۔
وفاقی وزیر اسد عمر نے اس حوالے سے سوشل میڈیا پر بیان بھی جاری کیا ہے۔
اسد عمر نے ٹوئٹر پر لکھا کہ ‏فیصل آباد میں پناہ گاہ کے دورے پر کھانا کھانے کا موقع ملا، وزیراعظم اور مجھے دونوں کو آلو گوشت بہت پسند آیا۔
وفاقی وزیر نے مزید لکھا وزیراعظم کا کہنا تھا کہ یہ کھانا وزیراعظم ہاؤس سے بھی بہتر پکا ہوا ہے۔

فیصل آباد (محمد اویس) چیئرمین فیڈمک میاں کاشف اشفاق نے کہا ہے کہ سی پیک کے تحت قائم ہونے والے پاکستان کے پہلے سپیشل اکنامک زون علامہ اقبال انڈسٹریل سٹی کے لئے 3317 ایکڑ زمین حاصل کر لی گئی ہے۔  اس میں سے 700 ایکڑ سے زائد زمین کی فروخت کے معاہدے ہو چکے ہیں اور بہت سے غیر ملکی و مقامی سرمایہ کار رابطے میں ہیں۔ یہاں زمین لینے والی 12 کمپنیوں کو رواں ماہ ہی ذمین کا قبضہ دیدیا جائے گا تاکہ وہ صنعتی یونٹس کی تعمیر شروع کر سکیں۔ اس پراجیکٹ میں 400 ارب روپے کی سرمایہ کاری سے 400 صنعتیں لگیں گی اور تین لاکھ سے زائد لوگوں کو ملازمتیں ملیں گی۔ وہ فیڈمک کے زیر انتظام سی پیک کے تحت قائم کئے جانے والے پہلے سپیشل اکنامک زون علامہ اقبال انڈسٹریل سٹی کا سنگ بنیاد رکھنے کی تقریب سے خطاب کر رہے تھے۔ انہوں نے کہا کہ جب وہ فیڈمک کے چیئرمین بنے تو سرمایہ کار رابطہ کرتے تھے تو انہیں فراہم کرنے کے لئے زمین ہی موجود نہیں تھی لیکن اب زمین موجود ہے، گیس اور انفراسٹراکچر سمیت دیگر درکار سہولیات فراہم کر دی گئی ہیں۔ انہوں نے کہا کہ علامہ اقبال انڈسٹریل سٹی کو غیر ملکی اور مقامی سرمایہ کاروں میں جتنی پذیرائی حاصل ہو رہی ہے اس کی وجہ سے ان کا اندازہ ہے کہ آئندہ تین ماہ میں اس کی باقی زمین بھی فروخت ہو جائے گی اور پھر مزید اتنی ہی زمین مزید درکار ہو گی۔ انہوں نے وزیر اعظم کو مخاطب کرتے ہوئے کہا کہ انہیں اس پراجیکٹ کی کامیابی کے لئے وفاقی حکومت کا تعاون مل جائے تو وہ اس پراجیکٹ کو ایسا ماڈل بنا دیں گے جس کو پاکستان میں کہیں بھی دہرایا جا سکتا ھے

فیصل آباد (محمد اویس) صوبائی وزیر انڈسٹریز و سرمایہ کار میاں اسلم اقبال نے کہا ہے کہ علامہ اقبال انڈسٹریل سٹی سے پاکستان میں انڈسٹریلائزیشن کو فروغ ملے گا۔ چین اپنی انڈسٹری کی پاکستان میں "ری لوکیشن کے حوالے سے بہت تعاون کر رہا ہے۔ پنجاب انڈسٹریل پالیسی 2018 وزیر اعظم کے ویژن کی عکاس ہے جس سے صوبے میں سرمایہ کاری اور روزگار کی فراہمی میں اضافہ ہو گا۔ وہ فیڈمک کے زیر انتظام سی پیک کے تحت قائم کئے جانے والے پہلے سپیشل اکنامک زون علامہ اقبال انڈسٹریل سٹی کا سنگ بنیاد رکھنے کی تقریب سے خطاب کر رہے تھے۔ انہوں نے کہا کہ پاکستان کی عوام عمران خان کو ایک مسیحا کی شکل میں دیکھ رہی ہے اور وہ ان کی ٹیم کے ممبر ہونے کی حیثیت سے ان کے ویژن کو عملی شکل میں لانے کے لئے اپنی وزارت میں 20،20 گھنٹے لگاتار کام کر رہے ہیں۔ صوبائی وزیر نے کہا کہ پنجاب واحد صوبہ ہے جس نے 5 اکنامک زون بنائے ہیں اور ان کے علاوہ دو اکنامک زون پرائیویٹ سیکٹر نے بنائے ہیں جبکہ دو نئے اکنامک زونز پر کام جاری ہے۔ انہوں نے کہا کہ فیڈمک کے پراجیکٹ کی کامیابی کا ثبوت یہ ہے کہ اس کے آغاز ہونے سے قبل ہی دو ارب ڈالر کی بیرونی سرمایہ کاری ہو چکی ہے۔ انہوں نے کہا کہ وزیر اعظم کے ویژن کے مطابق نوجوانوں کو قرضوں کی فراہمی کا آغاز ہو چکا ہے، کاٹیج انڈسٹری کی بحالی کے لئے بھی قرضوں کی سکیم متعارف کروا دی گئی ہے جبکہ ٹیکنیکل ٹریننگ کے اداروں کو بھی ایک نظام کے تحت لانے کے لئے قانون سازی کی جا رہی ہے۔ انہوں نے کہا کہ اپوزیشن کے اس بیانیے میں کوئی حقیقت نہیں ہے کہ کاروبار بند ہو رہے ہیں۔ انہوں نے کہا کہ حقیقت اس کے برعکس ہے کیونکہ ایکسپورٹ بڑھ رہی ہے، نئی ملازمتیں پیدا ہو رہی ہیں۔ انہوں نے کہا کہ اپوزیشن والے وزیر اعظم کو اس لئے نااہل اور نالائق کہتے ہیں کہ انہیں کرپشن کرنی نہیں آتی، انہوں نے اپنے سمدھی کو وزیر خزانہ نہیں بنایا، انہوں نے اپنی بیٹی کو ایک ارب روپے کے فنڈ کی سربراہی نہیں دی ہے۔ انہوں نے کہا کہ وزیر اعلی پنجاب ایک گھر میں رہتے ہیں انہوں نے شہباز شریف کی طرح پانچ، چھ گھروں کو سرکاری رہائش گاہ قرار نہیں دیا ہوا ہے۔

فیصل آباد ( محمد اویس) وزیر اعلی پنجاب عثمان بزدار نے کہا ہے کہ پنجاب وہ پہلا صوبہ ہے جس نے سی پیک کے تحت پہلا سپیشل اکنامک زون بنایا ہے۔ مارچ میں قائد اعظم ایپرل پارک کا بھی افتتاح کر دیا جائے گا۔ صوبے میں 10 نئے اکنامک زون اور تین ٹیکنیکل یونیورسٹیاں بنائی جائیں گی۔ وہ فیڈمک کے زیر انتظام سی پیک کے تحت قائم کئے جانے والے پہلے سپیشل اکنامک زون علامہ اقبال انڈسٹریل سٹی کا سنگ بنیاد رکھنے کی تقریب سے خطاب کر رہے تھے۔ انہوں نے کہا کہ صوبائی حکومت نے اس اکنامک زون کی ڈویلپمنٹ کے لئے پانچ ارب روپے کے فنڈز مختص کئے ہیں جس سے ترقیاتی کام شروع ہو چکے ہیں اور انہیں بہت جلد مکمل کر لیا جائے گا۔ عثمان بزدار نے کہا کہ فیڈمک کے تحت قائم ایم تھری انڈسٹریل سٹی میں ڈیڑھ ارب ڈالر جبکہ علامہ اقبال انڈسٹریل سٹی میں دو ارب ڈالر کی سرمایہ کاری ہو چکی ہے۔ انہوں نے کہا کہ پنجاب حکومت نے ڈیڑھ ارب روپے سے ہنرمند نوجوان پروگرام شروع کیا ہے جس سے 10 لاکھ نوجوانوں کو ہنرمند بنایا جائے گا اور انہیں اپنے کاروبار کے آغاز کے لئے قرضوں کی مد میں چھ ارب روپے فراہم کئے جائیں گے۔ انہوں نے کہا کہ ان اقدامات سے معیشت کا پہیہ چلے گا اور خوشحالی آئے گی۔ انہوں نے کہا کہ وزیر اعظم عمران خان کے ویژن کو آگے بڑھاتےہوئے پنجاب انڈسٹریلائزیشن کےحوالے سے بھی ملک بھر میں لیڈ کرے گا۔

فیصل آباد (محمد اویس) وزیر اعظم عمران خان نے کہا ہے کہ سی پیک کے تحت بننے والے سپیشل اکنامک زون علامہ اقبال انڈسٹریل سٹی کے آغاز سے صنعتی ترقی اور روزگار کی فراہمی کے نئے دور کا آغاز ہو گا۔ نیب آرڈینس لا کر بیوروکریسی کے سر پر لٹکی تلوار ہٹا دی ہے اب ان کے پاس کام نہ کرنے کا کوئی بہانہ نہیں ہونا چاہیئے۔ آئی جی پنجاب دو سے تین ماہ کے اندر رسہ گیروں، ڈاکووں اور غنڈہ عناصر کا خاتمہ کریں۔ بیرونی سرمایہ کاری میں اضافے کے لئے گورننس کا نظام بہتر بنانا ہے۔ وہ فیڈمک کے زیر انتظام سی پیک کے تحت قائم کئے جانے والے پہلے سپیشل اکنامک زون کا سنگ بنیاد رکھنے کی تقریب سے خطاب کر رہے تھے۔ انہوں نے کہا کہ چین کی بہت سی انڈسٹری "ری لوکیٹ” ہو کر پاکستان آنا چاہتی ہے اس لئے ہمیں انفراسٹرکچر بہتر بنانی ہے۔ وزیر اعظم نے کہا کہ چینی صدر نے خود انہیں یقینی دہانی کروائی ہے کہ اگر پاکستان سرمایہ کاری کے لئے بہتر ماحول فراہم کرے تو وہ خود چینی صنعتکاروں کو اپنی صنعتیں پاکستان منتقل کرنے کی ہدایت کریں گے۔ انہوں نے کہا کہ چین سے صرف انڈسٹری نہیں آئے گی بلکہ ٹیکنالوجی ٹرانسفر بھی ہو گی۔ عمران خان نے کہا کہ چین نے بھی اس ماڈل کے تحت پہلے ایکسپورٹ زون بنا کر اپنی ایکسپورٹس کو بڑھایا اور گزشتہ 30 سال میں 70 کروڑ لوگوں کو غربت سے نکال کر ہمیں راستہ دکھایا ہے۔ انہوں نے کہا کہ 1960 کے عشرے میں پاکستان میں بھی انڈسٹری لگ رہی تھی لیکن 1970 کے عشرے میں یہ پالیسی تبدیل کر کے سرمایہ کار کو برا بنا کر پیش کیا گیا۔ وزیر اعظم نے کہا کہ ترقی کرنی ہے تو انڈسٹری لگانی ہے، ایکسپورٹ بڑھانی ہے اور زراعت کے شعبے میں پیداوار میں اضافہ کرنا ہے۔ انہوں نے کہا کہ سیاحت کے ذریعے بھی پاکستان بہت پیسہ کما سکتا ہے اس پر خصوصی توجہ دینے کی ضرورت ہے۔ انہوں نے انڈسٹریلائزیشن پر زور دیتے ہوئے کہا کہ تعلیم کو فروغ دینے اور فنی تعلیمی اداروں میں اضافہ کرنے کی شدید ضرورت ہے۔ انہوں نے فیڈمک کے چیئرمین میاں کاشف اشفاق کو مخاطب کرتے ہوئے کہا کہ وفاقی حکومت آپ سے پورا تعاون کرے گی۔ وزیر اعظم نے کہا کہ جب حالات مشکل ہوتے ہیں تو بچت ضروری ہو جاتی ہے تاکہ عوام کا پیسہ ضائع نہ ہو۔

سی پیک کے تحت وزیراعظم کریں گے اہم منصوبے کا افتتاح

باغی ٹی وی کی رپورٹ کے مطابق وزیر اعظم عمران خان آج ایک روزہ دورے پر فیصل آبادجائیں گے،وزیراعظم عمران خان فیصل آباد میں پناہ گاہ کا افتتاح کریں گے،وزیراعظم عمران خان کو کلین فیصل آبادمہم پر بریفنگ دیں گے،وزیر اعظم علامہ اقبال انڈسٹریل اسٹیٹ کا سنگ بنیاد رکھیں گے

پاک چین اقتصادی راہداری کے تحت 9 خصوصی اقتصادی زونز پرکام شروع ہو گیا ہے،ملکی و غیر ملکی کمپنیاں 400 ارب روپے کی خطیر سرمایہ کاری کریں گی،اقتصادی زون کے قیام سے 3 لاکھ افراد کیلئے نوکریوں کے مواقع پیدا ہوں گے، ابتدائی طور پرچین 125 بلین اور پاکستان 35 بلین روپے کی سرمایہ کاری کرے گا،اقتصادی زون میں ٹیکسٹائل، ادویات ،فارماسوٹیکل اورکیمیکل کے پلانٹ لگائے جائیں گے،تعمیراتی مٹیریل،آٹوموبائل،اسٹیل اورلائٹ انجنیئرنگ کی صنعتیں بھی قائم کی جائیں گی،حکومت نے اقتصادی زون کیلئےبجلی،پانی اور گیس کی بنیادی سہولیات مہیا کردیں

3200ایکڑپر مشتمل اقتصادی زون کا پہلا فیز 2 سال میں مکمل ہو گا،اقتصادی زون کامکمل تعمیراتی کام 5 سال میں پورا کر لیا جائے گا،اقتصادی زون میں ریسکیو1122اور سیکیورٹی کی سہولیات دستیاب ہوں گی،ووکیشنل ٹریننگ انسٹی ٹیوٹ اور اسکل ڈیویلپمنٹ مراکز بھی قائم کیے جائیں گے

فیصل آباد (محمد اویس) وفاقی پارلیمانی سیکرٹری ریلویز میاں فرخ حبیب نے کہا ہے کہ حکومت کی عوام دوست پالیسیوں سے ملک میں تعمیر و ترقی کا دور شروع ہو چکا ہے اور اس کے ثمرات عوام تک آنا شروع ہو گئے ہیں ۔یہ بات انہوںنے اپنے دفتر میں پارٹی عہدیداروں اور عمائدین حلقہ سے گفتگو کرتے ہوئے کہی ۔ انہوں نے کہا کہ حلقہ کی تعمیر و ترقی کے لئے میگا پراجیکٹس کا جلد آغاز کر دیا جائے گا ۔
ماضی میں نظر انداز کئے گئے علاقوں میں ترجیحی بنیادوں پر تعمیر و ترقی کے منصوبے شروع کئے جائیں گے ۔ انہوں نے کہا کہ جن علاقوں میں فراہمی و نکاسی آب کا مسئلہ ہے ان علاقوں کا سروے کیا جا چکا ہے ۔ انہیں جلد ہی پایہ تکمیل تک پہچایا جائے گا ۔ انہوں نے کہا کہ حلقہ میں صحت و صفائی کے نظام کو بہتر بنانے کے لئے تمام تر وسائل بروئے کار لائے جائیں گے انہوںنے کہا کہ فیصل آباد کو خوبصورت بنانے کے لئے بھی ماسٹر پلان پر عملدرآمد کیا جارہا ہے۔
کشمیر پل انڈر پاس کے منصوبے پر تیز رفتاری سے کام جاری ہے ۔ اس منصوبے کے مکمل سے ٹریفک کی روانگی میں بہتری آئے گی ۔ انہوں نے کہا کہ حلقہ کے عوام کو صاف پانی کی فراہم کے لئے واٹر فلٹریشن پلانٹس نصب کئے جارہے ہیں یونین کونسل کی سطح پر واٹر فلٹریشن پلانٹس لگائے جائیں گے ۔ انہوں نے کہا کہ ملک و قوم کی ترقی حکومت کی اولین ترجیحات ہیں جبکہ کے کرپشن کے خاتمے کے لئے موجودہ حکومت کرپٹ عناصر سے سختی سے نمٹ رہی ہے ملک میں جلد ہی کرپشن کا خاتمہ کر دیا جائے گا ۔ انہوں نے کہا کہ لوٹ مار کرنے والوں کے چہرے بے نقاب ہو چکے ہیں وہ حکومت کے خلاف سازشوں میں مصروف ہیں لیکن عوام کی طاقت سے ان کی کسی سازش کو کامیاب نہیں ہونے دیا جائے گا ۔

فیصل آباد(محمد اویس) سی پی او فیصل آباد کیپٹن (ر)محمد سہیل چوہدری کی ہدایت پرتھانہ جھنگ بازارپولیس نے جواء کھیلتی10جواری گرفتارکرلیا
تفصیلات کے مطابق تھانہ جھنگ بازارپولیس نے دوران گشت ریڈنگ پارٹی کے ہمراہ ریڈکرکے جواء کھیلتے ہوئے سجاد کو اس کی09ساتھی سمیت گرفتار کیاملزمان کے قبضہ سے داو پر لگی 29350 روپے برآمد کر لیے ملزمان کے خلاف مقدمہ نمبر 1100/19 بجرم 5 قمار بازی آرڈیننس کے تحت تھانہ جھنگ بازارمیں درج رجسٹر کر لیاگیا۔
سی پی او فیصل آباد نے تمام ایس ایچ اوز اور سی آئی اے کو جواء مافیا کیخلاف کاروائی کو مزید تیز کرنے کی ہدایت کی ہے اور حکم دیا ہے کہ جواریوں کی گرفتاری کیلئے خصوصی ٹیمیں تشکیل دی جائیں تاکہ معاشرے میں جواء جیسی بیماری کو ختم کیا جاسکے کیونکہ جواء بہت سے جرائم کی جڑ ہے ۔تمام ایس ایچ او ز دن رات محنت کریں تاکہ جرائم کو پنپنے کا موقع نہ مل سکے۔