Category: فیصل آباد

فیصل آباد (محمد اویس) میں نامعلوم وجوہات پر 15سالہ لڑکے نے گلے میں پھندا لیکر زندگی کا خاتمہ کر لیا، پولیس نے مرگ اتفاقیہ رپٹ درج کر لی، بتایاگیا ہے کہ صدیق نگر گلی نمبر2 میں کارپوریشن میں کام کرنے والے سلیم کا 15سالہ بیٹا مون ہیئرسیلون کا کام کرتا تھا اس کے گھر والے موجود نہیں تھے وہ نامعلوم وجوہات پر گلے میں پھندا لیکر چھت کے پنکھے سے جھول گیا، ورثاء کے کارروائی سے انکار پر پولیس نے نعش حوالے کردی۔

فیصل آباد(محمد اویس)ڈپٹی کمشنر محمد علی نے کہا ہے کہ خصوصی افراد کو قومی ترقی میں شامل رکھنے کے لئے معاشرے کو اپنی ذمہ داریاں پوری کرنی چاہیں تاکہ ان میں احساس محرومی نہ رہے اور وہ ذاتی واجتماعی زندگی کی کامیابی کے لئے اپنا بھرپور کردار ادا کرسکیں۔انہوں نے یہ بات مقامی این جی او”تنظیم اللسان“کے زیراہتمام خصوصی افراد کے عالمی دن کے حوالے سے ”ہماری شمولیت۔منزلیں آسان“کے موضوع پر منعقدہ تقریب سے خطاب کرتے ہوئے کہی۔ایم پی اے فردوس رائے،سوشل ویلفیئر آفیسر کاشف نثار،ڈپٹی ڈائریکٹر سوشل ویلفیئر(ریٹائرڈ)چوہدری سرفراز احمد،صدر تنظیم اللسان ڈاکٹر افتخار احمد،پرنسپل کلثوم افتخار،وائس پرنسپل صبا سعود،خصوصی بچے اور ان کے والدین تقریب میں موجود تھے۔تقریب کے دوران خصوصی بچوں نے خاکے اور ٹیبلو پیش کرکے حب الوطنی کے جذبوں اور خصوصی افراد کے عالمی دن کی اہمیت کی عکاسی کی۔ڈپٹی کمشنر نے متاثرہ سماعت اور دیگر خصوصی بچوں کی پروفارمنس اورصلاحیتوں کو سراہتے ہوئے کہا کہ انہیں تعلیم وتربیت کے وسیع مواقع فراہم کرکے معمول کی زندگی گزارنے کے قابل بنایا جاسکتا ہے جس کے لئے فلاحی اداروں کی خدمات قابل ستائش ہیں جو خصوصی تعلیم میں حکومت کا ہاتھ بٹا رہے ہیں۔انہوں نے کہا کہ حکومت اور ضلعی انتظامیہ خصوصی افراد کی بحالی اور فلاح وبہبود کے متعدد فلاحی منصوبوں پر عمل پیرا ہے تاکہ ان کی بقایاصلاحیتوں کو نکھارکر انہیں کامیاب اور مفید زندگی گزارنے کے قابل بنایا جاسکے۔اس ضمن میں معاشرتی رویوں میں بھی مثبت تبدیلی کی ضرورت ہے۔انہوں نے کہا کہ خصوصی افراد کا عالمی دن منانے کا مقصد مختلف معذوریوں میں مبتلا افراد کی ضروریات کا خیال رکھنے سے متعلق عوامی شعور اجاگر رکھنا ہے۔انہوں نے بتایا کہ ڈپٹی کمشنر کمپلیکس سمیت تمام پبلک اداروں میں خصوصی افراد کی سہولت کے لئے ریمپ،ٹائلٹس اور دیگر درکار تقاضوں کو پورا کرنے کے لئے اقدامات کئے گئے ہیں۔انہوں نے تنظیم اللسان کے زیراہتمام خصوصی بچوں کی تعلیم وتربیت،بحالی اور فلاح وبہبود کے لئے فراہم کی جانے والی گرانقدر خدمات کو خراج تحسین کیا اور کہا کہ ایسی فلاحی سرگرمیوں کے لئے ضلعی انتظامیہ بھرپور معاونت فراہم کرے گی۔ایم پی اے فردوس رائے نے خصوصی بچوں سے پیار ومحبت اور شفقت کا اظہار کرتے ہوئے کہا کہ ایسے بچوں کے والدین کا بوجھ بانٹنے میں بھرپور کردار اداکریں گے۔انہوں نے کہا کہ وزیراعظم عمران خان اور وزیراعلیٰ پنجاب سردار عثمان بزدار معاشرے کے تمام طبقات کی فلاح وبہبود کے لئے کوشاں ہیں جبکہ خصوصی افراد کوکسی صورت نظر انداز نہیں کیا جاسکتا۔انہوں نے تنظیم اللسان کی فلاحی خدمات کو سراہا۔تقریب کے دوران اشاروں کی زبان میں تقریر کرتے ہوئے متاثرہ سماعت خصوصی طالب علم عدنان ریاض نے کہا کہ اگر انہیں وسائل ومواقع فراہم کئے جائیں تو وہ معاشرے پر بوجھ بننے کی بجائے وطن عزیز کی ترقی میں میں اپنا بہترین کردارادا کرسکتے ہیں۔صدر تنظیم اللسان ڈاکٹر افتخار احمد نے مہمانوں کا شکریہ اداکرتے ہوئے خصوصی ا فراد کا عالمی دن منانے کے مقاصد پر روشنی ڈالی اور بتایا کہ دو ہزار کی تعداد میں خصوصی بچوں کو پلے گروپ سے لیکر ماسٹر ڈگری تک تعلیم وتربیت کے مواقع فراہم کرنے کے علاوہ ان کی فنی تربیت اور صحت کی بحالی پر بھی توجہ دی جارہی ہے۔
۔۔۔///۔۔۔

فیصل آباد(محمد اویس)خصوصی افراد کے عالمی دن کے حوالے سے ایک تقریب بدھ 4دسمبر کو 10بجے صبح زرعی یونیورسٹی کے اقبال آڈیٹوریم میں ہوگی۔ڈسٹرکٹ آفیسر سپیشل ایجوکیشن چوہدری عبدالحمید کے مطابق صوبائی وزیر سپیشل ایجوکیشن چوہدری محمد اخلاق مہمان خصوصی جبکہ ڈپٹی کمشنر محمد علی بطور مہمان اعزاز شرکت کریں گے۔تقریب میں ارکان اسمبلی،سرکاری افسران کے علاوہ خصوصی تعلیمی اداروں کے طالب علم بھی موجود ہونگے۔
۔۔۔///۔۔۔

فیصل آباد(محمد اویس)وزیراعظم پاکستان کے زرعی ایمرجنسی پروگرام کے تحت گندم کی پیداوار میں اضافہ کے قومی منصوبہ کے تحت پیداواری مقابلہ برائے گندم 2019-20کے لئے صوبہ بھر سے کسانوں کی درخواستیں طلب کی جارہی ہیں جو 15دسمبر سے 31جنوری 2020تک وصول کی جائیں گی۔ڈائریکٹر زراعت چوہدری عبدالحمید نے شرائط وضوابط سے آگاہ کرتے ہوئے بتایا کہ پانچ یا پانچ ایکڑ سے زیادہ قابل کاشت زرعی اراضی کے مالک مرد وخواتین کاشتکار درخواست دینے کے اہل ہونگے۔مشترکہ کھاتہ رکھنے والے کاشتکار بھی اہل ہیں نیز مزارعین/ٹھیکیداربھی دستاویزات کی تحصیل کمیٹی کی طرف سے تصدیق کرانے کے بعد درخواست دے سکتے ہیں۔انہوں نے بتایا کہ پیداواری مقابلہ میں حصہ لینے والے گندم کے کاشتکار5،ایکڑ متصل فصل گندم جس میں کوئی بھی منظوروتصدیق شدہ قسم کی کاشت کی گئی ہو مقابلہ کے لئے پیش کریں گے۔انہوں نے بتایا کہ مقابلہ میں حصہ لینے کے لئے شرائط درخواست فارم پر درج ہیں جو متعلقہ اسسٹنٹ ڈائریکٹر زراعت(توسیع)اور زراعت آفیسر(توسیع) کے دفاتر سے مفت یا محکمہ زراعت پنجاب کی ویب سائٹ www.agripunjab.gov.pkسے ڈاؤن لوڈ بھی کئے جاسکتے ہیں جبکہ فارم کی فوٹو کاپی بھی قابل قبول ہوگی۔انہوں نے بتایا کہ مکمل درخواستیں تحصیل کے متعلقہ اسسٹنٹ ڈائریکٹر(توسیع) کے دفاتر میں جمع ہونگی اور مقابلہ جات ضلع اور صوبائی سطح پر منعقد ہونگے۔ڈائریکٹر زراعت نے بتایا کہ ارکان اسمبلی،سینیٹرز،ان کے فیملی ممبرز اور گریڈ 17اوراوپر کے سرکاری افسران درخواست دینے کے اہل نہیں جبکہ محکمہ مال،زراعت کے تمام ملازمین بھی اس مقابلہ میں حصہ نہیں لے سکیں گے علاوہ ازیں ترقی پسند کسان جو ضلعی یا ڈویژنل کمیٹی کے ارکان مقرر ہونگے وہ بھی اس مقابلہ میں حصہ لینے کے اہل نہیں۔انہوں نے بتایا کہ صوبائی کمیٹی کا فیصلہ حتمی ہوگا۔
۔۔۔///۔۔۔

فیصل آباد (محمد اویس) میں ضلعی انتظامیہ اور ٹریفک پولیس کے اشتراک سے 25 نومبر سے ہیلمٹ پہننا ضروری قرار دیا گیا ، پابندی پر عملدرآمد کیلئے شہر کے 42 پٹرول پمپس مالکان کو ہدایت کی گئی کہ وہ بغیر ہیلمٹ موٹر سائیکل سواروں کو پٹرول فراہم نہ کریں ۔

مہم کے مطلوبہ نتائج تو نہ نکلے البتہ ٹریفک پولیس نے مختلف شاہراہوں پر سات روز میں 23 ہزار چالان کر کے شہریوں سے 22 لاکھ روپے جرمانہ وصول کر لیا ، ٹریفک افسران پر عزم ہیں کہ ہیلمٹ کے استعمال کو ضروری بنانے کا عمل ہر صورت کامیاب بنایا جائے گا۔

سی ٹی او کہتے ہیں کہ ہیلمٹ کی پابندی کیلئے قانونی اقدامات جاری رہیں گے جبکہ پٹرول پمپس پرفروخت بند کرنے کا عمل یقینی بنانے کیلئے ضلعی انتظامیہ کیساتھ رابطے میں ہیں۔

فیصل آباد(محمد اویس)ورثہ ایگری فارمز اینڈ سروسز اور ایگری ٹورازم ڈویلپمنٹ کارپوریشن کے اشتراک سے دو روزہ قومی ایگری ٹورازم میلہ اختتام پذیر ہوگیا۔ ورثہ ایگری فارم بہادری والا میں منعقدہ میلے میں ثقافتی و زرعی نمائش، گڑ میلہ، دیسی کھانے ، چاٹی کی لسی، تانگہ، بگھی، گھوڑا ڈانس، کشی رانی اور بچوں کیلئے جھولے وغیرہ کا اہتمام کیاگیا تھا۔ میلے کی افتتاحی تقریب کے مہمان خصوصی زرعی یونیورسٹی فیصل آباد کے وائس چانسلر پروفیسرڈاکٹر محمد اشرف تھے ۔ انہوں نے کہا شہروں میں تیزی سے بڑھتی ہوئی آبادی کے رجحان کی وجہ سے وہاں آلودگی اور گھٹن کے باعث لوگوں کیلئے رہنا مشکل تر ہوجاتا رہا ہے ۔ اس ضمن میں ضرورت اس امر کی ہے کہ دیہی علاقوں کو شہری سہولیات سے آراستہ کرکے آبادی کا پھیلاؤ شہروں تک بڑھانے کے عمل کو نہ صرف روکا جائے بلکہ نئی نسل کو فطرت کی خوبصورتیوں کے ساتھ جوڑنے کیلئے اس قسم کے میلے منعقد کئے جائیں۔ ایگری ورثہ فارم کے چیف ایگزیکٹو ڈاکٹر ظفر اقبال رندھاوا نے کہا اس طرح کے میلوں میں فیصل آباد کی مختلف جامعات اور سکولوں،کالجوں کے بچوں کو دعوت دی گئی ہے تاکہ وہ اپنی مٹی کے ساتھ محبت کو زیادہ مضبوط بنا سکیں۔ ایگری ٹورازم کارپوریشن کے چیف ایگزیکٹو آفیسر طارق تنویر نے بتایا انہوں نے سوات میں آڑو میلہ، اندرون سندھ میں کھجور میلہ اور مختلف ایکالوجیکل زونز میں میلے منعقد کروائے ۔

فیصل آباد(محمد اویس)سردیوں میں محکمہ ریلوے کا منافع بڑھانے کے لئے انوکھا فیصلہ،محکمہ ریلوے کی جانب سے مچھلی پارسل کرنے کے ریٹس میں کرائے کی مد میں 30 فیصد اضافہ کر دیا گیا اضا فے کا اطلاق بھی شروع کر دیا گیا سردی کے موسم میں مچھلی کی سپلائی کی ڈیمانڈ بڑھنے کے سبب محکمہ ریلوے نے بھی کرایوں میں 30 فیصد تک اضافہ کر دیا کراچی سے ٹرینوں کے ذریعے پورے پاکستان بھر میں مچھلی بھجوائی جاتی ہے جس سے محکمہ ریلوے کو روزانہ کی بنیاد پر لاکھوں روپے کا منافع ہوتا ہے تاہم محکمہ ریلوے کی جانب سے مچھلی پارسل کروانے کے کرائے میں 30 فیصد اضافے سے مچھلی کے تاجروں پر بوجھ پڑے گا محکمہ ریلوے کے چیف مارکیٹنگ منیجر محمد ریاض کی جانب سے جاری نوٹیفکیشن کے مطابق مچھلی کے کرایوں میں اضافے کا اطلاق فوری ہو گا مراسلے میں محکمہ ریلوے کراچی،سکھر ،کوئٹہ ،ملتان ،لاہور ،راولپنڈی اور پشاور کے ڈویژنل سپرنٹنڈنٹ کو ہدایات جاری کی گئی ہیں کہ وہ مچھلی کی بکنگ کے نئے کرایہ ناموں پر فوری عمل درآمد کروائیں ۔ذرائع کے مطابق کراچی میں روزانہ کی بنیاد پر مچھلی بک کروانے کا 5 سے 6 لاکھ روپے کرایہ بنتا ہے اسی طرح باقی شہروں سے بھی روزانہ کی بنیادپر لاکھوں روپے کرایہ مچھلی بک کروانے والے تاجر ریلوے کو ادا کرتے ہیں تاجروں کے مطابق ٹرینوں کے ذریعے مچھلی بھجو ائے جانے کے کرائے میں 30 فیصد اضافے سے ان پر بوجھ پڑے گا ۔اس معاملے پر ڈی ایس ریلوے لاہور ڈویژن عامر نثار کا کہنا تھا کہ کرایہ ناموں میں اضافہ ہیڈ کوارٹرز کی جانب سے کیا گیا ہے عمل درآمد کروانے کے پابند ہونگے ۔

فیصل آباد(محمد اویس)جماعت اسلامی کے صوبائی نائب امیرسردارظفرحسین خان نے کہا کہ چیف آف آرمی سٹاف کی توسیعی تقرری پر حکومت نے نااہلی اور غلطیوں کی انتہا کردی ہے ۔ چیف جسٹس آف پاکستان نے پاکستان کے آئین اور قانون کی روشنی میں مہلت عمل تو دے دی ہے لیکن وزرا اپنے بیانات سے معاملات کو پھر خراب کر رہے ہیں ۔ پوری صورتحال کو حکومتی نااہلی نے گدلا دیا ہے ۔ انہوں نے کہا حکومت نے اپنی نالائقی کی وجہ سے قومی ادارے کو بھی بدنام کیا ۔ ہر گزرتا دن حکومت کی ناکامی ثابت کر رہاہے ۔ موجودہ حکمرانوں کے روئیے نے سب کو مایوس کیاہے ۔ ان کی پالیسیوں سے نہیں لگتا کہ یہ افہام و تفہیم سے کوئی قدم آگے بڑھا سکیں گے ۔پنجاب میں بیوروکریسی ، پولیس اور انتظامی افسروں کو مسلسل پنجاب کی نااہل اور ناکارہ حکومت پر قربان کیا جارہاہے ۔ وقت ، حالات اور گورننس چیخ چیخ کر اعلان کر رہے ہیں کہ حکومتی تلوں میں تیل نہیں ، پنجاب میں گورننس کا برا حال ہے ۔ حکمران جماعت کی دھڑے بندی اور بدکلامی سماج کیلئے عذاب بن گئی ہے ۔