Category: فیصل آباد

فیصل آباد (محمد اویس)ڈائریکٹر جنرل ایف ڈی اے محمد سہیل خواجہ نے اپنے عہدے کا چارج سنبھال لیا۔انھوں نے ایف ڈی اے کے افسران سے تعارفی میٹنگ کی اور بعض دفتری وانتظامی امور کا جائزہ لیا۔انھوں نے ایڈیشنل ڈائریکٹر جنرل عامر عزیز،چیف انجینئر ایف ڈی اے شاہد محمود،ڈپٹی ڈائریکٹر انتظامیہ یاسر اعجازچٹھہ،پبلک ریلیشنز آفیسر ایف ڈی اے رانا لیاقت علی کے ہمراہ ایف ڈی اے کے شعبہ اسٹیٹ مینجمنٹ، ٹاؤن پلاننگ،فنانس ڈائریکٹوریٹ،کمپیوٹر سیکشن اور ون ونڈو کاؤنٹر کامعائنہ اور دفتری کام نمٹانے کی رفتار کا جائزہ لیا۔ایڈیشنل ڈائریکٹر جنرل عامرعزیزنے انھیں مختلف شعبہ جات کے بارے میں بریفنگ دی۔ڈائریکٹر جنرل ایف ڈی اے محمد سہیل خواجہ نے کہا کہ عوام کی درخواستوں اور شکایات کو بلاتاخیر حل کیا جاے۔انھوں نے ترقیاتی کام بروقت مکمل کرنے اور کام کے معیار کو بہتر رکھنے کی ہدایت کی۔انھوں نے اس موقع پر سرکاری فرائض کی ادائیگی میں غفلت اور لاپرواہی برتنے والوں کو متنبہ کیا کہ وہ اپنا قبلہ درست کرلیں اور دفتری قواعدوضوابط کا خصوصی خیال رکھیں۔

فیصل آباد( )وزیراعلی پنجاب کے معاون خصوصی برائے کھیل و امور نوجوانان ملک عمر فاروق نے کورین سپورٹس پروموشن فاؤنڈیشن کے تحت منعقد ہونے والے کورس ڈریم ٹوگیدر ماسٹر ایلومنائی میں نمایاں پوزیشن حاصل کی ہے۔ مذکورہ تربیتی کورس کی تکمیل پر کامیاب شرکاء کو اسناد سے نوازا گیا۔ ملک عمر فاروق کو شاندار کارکردگی پر اعلی پوزیشن حاصل کرنے پر خصوصی طور پر تعریفی سرٹیفکیٹ بھی دیا گیا۔ تقسیم اعزازات و اسناد کی اس تقریب میں کوریا سپورٹس پروموشن فاؤنڈیشن کے چیئرمین جیکی چو کے علاوہ سپورٹس ارگنائزیشنز کے اعلی عہدے داران اور حکومت کوریا کے کھیلوں سے منسلک نمائندوں نے بھی شرکت کی۔ ملک عمر فاروق نے تقریب میں موجود اپنے اساتذہ کا شکریہ ادا کرتے ہوئے اس عزم کا اظہار کیاکہ وہ کوریا سے حاصل ہونے والی اس بامقصد ٹریننگ اور تجربے کو اپنے ملک میں کھیلوں کے فروغ کے حوالے سے بروئے کار لائیں گے۔ واضح رہے کہ ملک عمر فاروق ان دنوں کورین حکومت کی خصوصی دعوت پرسپورٹس پرموشن آگنائزیشن کوریاکے تحت منعقد ہونے والے تربیتی کورس میں شرکت کے لیے کوریا کے دورہ پر ہیں۔
۔۔۔///۔۔۔

فیصل آباد(محمد اویس)ڈپٹی کمشنر محمد علی نے کہا ہے کہ ہفتہ صفائی مہم کے توسیعی ایام میں محکمہ صحت اور تعلیم کے اداروں میں صفائی ستھرائی کے مقابلہ جات منعقد ہوں گے جبکہ ایک یونین کونسل کوسرسبز وشادابی اور صفائی کے حوالے سے ماڈل بنایا جائے گا تاکہ صاف اور سرسبز فیصل آباد پروگرام کے مطلوبہ نتائج خاطر خواہ انداز میں حاصل کئے جاسکیں۔انہوں نے یہ بات ایک اجلاس کی صدارت کرتے ہوئے کہی جس میں کلین اینڈ گرین پروگرام کے تحت گزشتہ ہفتہ صفائی کے نتائج اور محکمانہ کارکردگی کاجائزہ لیاگیا۔اجلاس میں ایڈیشنل ڈپٹی کمشنر(فنانس)/فوکل پرسن عاصمہ اعجاز چیمہ،سی ای او فیصل آباد ویسٹ مینجمنٹ کمپنی کاشف رضا اعوان،ایڈیشنل ڈائریکٹر جنرل ایف ڈی اے عامر عزیز،تمام تحصیلوں کے اسسٹنٹ کمشنرزوہا شاکر،نازیہ موہل،فیصل سلطان،عمر دراز گوندل،اورنگزیب،خرم شہزاد بھٹی،سی ای او ایجوکیشن علی احمد سیان،سی ای او ہیلتھ ڈاکٹر مشتاق سپرا،ڈپٹی ڈائریکٹر لوکل گورنمنٹ سعید انور،چیف آفیسر میٹرو پولیٹن کارپوریشن سردار نصیر،ڈائریکٹر پی ایچ اے عبداللہ چیمہ ودیگر افسران موجود تھے۔ڈپٹی کمشنر نے ہفتہ صفائی کے دوران فیصل آباد ویسٹ مینجمنٹ کمپنی کی کارکردگی کو سراہتے ہوئے کہا کہ دیگر ادارے بھی اپنی موثر شرکت کرتے ہوئے واضح نتائج دکھائیں۔انہوں نے ضلع و تحصیل کی سطح پر سرکاری ہسپتالوں کے میڈیکل سپرنٹنڈنٹس سے کہا کہ وہ معیاری صفائی کویقینی بنائیں اس ضمن میں صفائی ستھرائی کی درجہ بندی کرکے اعلیٰ کارکردگی پر توصیفی شیلڈ دی جائے گی اسی طرح تمام سکولوں میں صفائی کے مقابلہ جات کروا کر درجہ بندی کی جائے۔ڈپٹی کمشنر نے ایف ڈی اے کو شہر میں کوڑا دانوں کی تعداد میں اضافہ کرکے شہری خوبصورتی کے لئے مزید اقدامات کرنے کی ہدایت کی۔انہوں نے اسسٹنٹ کمشنرز سے کہا کہ وہ ہفتہ صفائی کے نتائج سے آگاہ کریں اورآئندہ صفائی کے نظام کی بہتری کے لئے ٹھوس لائحہ عمل اختیار کریں اس ضمن میں تمام تحصیلوں وقصبوں میں گرین بیلٹس کو سرسبز رکھنے اوردیگر مقامات پر زیادہ شجرکاری کے علاوہ خصوصی طور پرمسافراڈوں پر صفائی نظر آنی چاہیے۔انہوں نے شجرکاری اور صفائی قائم رکھنے کے سلسلے میں عوامی بیداری کا پروگرام جاری رکھنے کی ہدایت کی اور کہا کہ صفائی کی اہمیت کو اجاگر کرنے اور ماحولیاتی تحفظ کی افادیت کا احساس دلانے کے لئے سیمینارز،واکس،ریلیز،تعلیمی اداروں میں لیکچرز اور دیگر آگاہی پروگرامز پر باقاعدگی سے عملدرآمد ہونا چاہیے۔
۔۔۔///۔۔۔

فیصل آباد( )پاکستان میں تمام مذاہب ومسالک کی قیادت نے ناروے میں قرآنِ کریم کو نذرِآتش کرنے کے واقعہ کی بھرپورمذمت کرتے ہوئے بین الاقوامی سطح پرقیامِ امن اور اسلام فوبیا کے خلاف”ورلڈ پیس کونسل“کے قیام کا اعلان کیا گیاہے اور29نومبر کو ملک بھر میں جمعہ کے خطبات میں عظمت قرآن کی عزت و تکریم بیان کی جائیگی۔یہ بات چیئرمین متحدہ علماء بورڈ پنجاب /مرکزی چیئرمین پاکستان علماء کونسل علامہ طاہر محمود اشرفی نے جامعہ عثمانیہ رضا آباد میں علماء ومشائخ اور دیگر مذاہب کے رہنماؤں کے ہمراہ پریس کانفرنس سے خطاب کرتے ہوئے کہی۔پیر فیض رسول رضوی،قاری حنیف بھٹی،علامہ طاہر الحسن،قاری جاوید اخترقادری،منشا سالک،قاری عصمت اللہ معاویہ،مولانا یسین،ڈاکٹر ممتاز حسین،مفتی یونس رضوی،مولانا حبیب،مولانا طیب گرمانی،فادر خالد رشید ودیگر بھی موجود تھے۔چیئرمین متحدہ علماء بورڈ پنجاب /مرکزی چیئرمین علماء کونسل علامہ طاہر محمود اشرفی نے کہاکہ ناروے میں قرآن کریم جلانے کاواقعہ افسوسناک ہے،ناروے حکومت کی طرف سے مجرم کی گرفتاری اورقانون سازی درست سمت قدم ہے، یورپی یونین اور اقوام متحدہ میں آسمانی کتابوں کے احترام کا قانون وقت کی ضرورت ہے۔انہوں نے کہا کہ اسلام امن و سلامتی کا دین ہے جو انتہاپسندی اور دہشت گردی کے خاتمے کا درس دیتا ہے،قرآن کریم اصلاح انسانیت کیلئیاللہ کریم کی نازل کردہ آخری کتاب ہے،قرآن کریم امن،سلامتی،اعتدال کا درس دیتا ہے،قرآن کریم کو جلانے کی جسارت کرنے والے امن و سلامتی کے دشمن ہیں۔انہوں نے ہندوستان میں بابری مسجد کی شہادت کے سانحہ پر عدالتی فیصلہ اور مقبوضہ کشمیر میں ہونے والے مظالم اور کرفیوکی بھرپور مذمت کرتے ہوئے کہا کہ مسئلہ کشمیر و فلسطین امت مسلمہ کے مسئلے ہیں اور ہندوستان و اسرائیل مسلمانوں اور مسیحیوں کے ساتھ جو ظلم کر رہا ہے اس کی پرزور مذمت کرتے ہیں۔انہوں نے کہا کہ اسلامی ممالک میں مفاہمت کے لیے وزیر اعظم عمران خان اور آرمی چیف کا کردار قابل تحسین ہے اور مسلم قائدین کو ان کوششوں کو عملی شکل دینی چاہیے۔انہوں نے حکومت پاکستان کی طرف سے ناروے کے مسئلہ پر موقف کو اہل پاکستان کی ترجمانی قرار دیا گیا۔مولانا محمد طاہر محمود اشرفی نے سیاسی قیادت سے اپیل کی کہ پاکستان کے حالات کا تقاضا کرتے ہوئے اختلافات چھوڑ کر باہمی اتفاق سے مسائل حل کریں۔علامہ طاہر الحسن،پیر فیض رسول رضوی،قاری حنیف بھٹی،ڈاکٹر ممتاز حسین ودیگر علماء کرام نے ناروے میں قرآن پاک کی بے حرمتی کی پرزور مذمت کرتے ہوئے ایسے فعل کو مسلمانوں کے اتحاد کے خلاف گھناؤنی سازش قرار دیا۔انہوں نے علامہ طاہر اشرفی کی فیصل آباد آمد پر انکا شکریہ ادا کیا۔فادر خالد رشید نے واقعہ کی مذمت کی اور کہا کہ یہودیوں کو اسلام اور مسیحت بھائی چارہ برداشت نہیں ہورہا،قرآن پاک جتنا متبرک مسلمانوں کیلئے ہے اتناہی ہم مسیحیوں کے لئے بھی ہے۔انہوں نے بتایا کہ پاپائے اعظم کو بھی مذمتی خط لکھ کرناروے کے افسوسناک واقعہ کی اطلاع کر دی گئی ہے۔پریس کانفرنس کے اختتام پر ملک وقوم کی ترقی وخوشحالی،امن وسلامتی،بھائی چارہ اور مسلم دشمنوں کے ناپاک عزائم سے محفوظ رہنے کی دعا بھی کی گئی۔
۔۔۔///۔۔۔