Category: فیصل آباد

فیصل آباد( محمد اویس)ڈویژنل کمشنر محمود جاوید بھٹی نے فیصل آباد ڈویژن کے چاروں اضلاع کی انتظامیہ سے کہا ہے کہ عوام کو اشیائے ضروریہ کی خود ساختہ مہنگائی سے بچانے کے لئے گرانفروشوں کے خلاف بھرپور آپریشن کو نتیجہ خیز بنائیں۔انہوں نے یہ بات ایک اجلاس کے دوران ڈویژن بھر میں مختلف اشیائے ضروریہ کی بازاری قیمتوں کا جائزہ لیتے ہوئے کہی۔آر پی او غلام محمود ڈوگر،ڈپٹی کمشنر محمدعلی،سی پی او اظہر اکرم ودیگر افسران بھی اس موقع پر موجود تھے جبکہ جھنگ،ٹوبہ ٹیک سنگھ اورضلع چنیوٹ کی انتظامیہ کے افسران نے ویڈیو لنک کے ذریعے اجلاس میں شرکت کی۔ڈویژنل کمشنر نے مختلف دالوں،بیسن،چاول،چینی،آٹا،گھی اور دیگر اشیائے ضروریہ کی سرکاری طور پر مقررکردہ نرخوں کاجائزہ لیا اور کہا کہ ڈپٹی کمشنرز کی طرف سے مقرر کردہ اشیاء کے نرخ حقیقت پسندانہ اور قابل قبول ہونے چاہیں اس سلسلے میں صارفین اور دکانداروں کے مفادات کا خیال رکھا جائے۔انہوں نے کہا کہ مقررکردہ نرخوں پر پوری طرح عملدرآمد کویقینی بنائیں اس سلسلے میں پرائس کنٹرول مجسٹریٹس فعال اور ذمہ دارانہ کردار ادا کریں تاکہ عوام کوحکومتی اقدامات کے واضح اثرات نظر آئیں۔انہوں نے کہا کہ چینی،آٹے اور گھی کی قیمتوں میں کسی جگہ فرق نہیں ہونا چاہیے۔انہوں نے کہا کہ جائز منافع دکانداروں کا حق ہے لیکن گرانفروشی کے ذریعے عوام کے لئے مشکلات پیدا کرنے والوں سے کوئی رعایت نہ کی جائے۔انہوں نے ناپ تول اور اشیاء کے معیار پر نظر رکھنے کی ہدایت کی اور کہا کہ ناجائز منافع خوری کیلئے اشیائے ضروریہ کی غیر قانونی ذخیرہ اندوزی پر قابو پائیں اورملاوٹ مافیا کو بھی نکیل ڈالی جائے۔اجلاس کے دوران ڈپٹی کمشنرز نے اپنے اپنے اضلاع میں مختلف اشیاء کی قیمتوں سے آگاہ کیا جن کا تقابلی جائزہ لیکر طلب ورسد کے لئے ضروری انتظامات کا فیصلہ کیاگیا۔آر پی او غلام محمود ڈوگر نے کہا کہ اشیائے ضروریہ کی گرانفروشی،ذخیرہ اندوزی اور ملاوٹ کی روک تھام کے لئے ریجنل پولیس بھرپور معاونت کرے گی اس سلسلے میں پوری قانونی قوت کا استعمال کیا جائے گا۔
۔۔۔///۔۔۔

فیصل آباد(محمد اویس)وزیراعظم عمران خان اور وزیر اعلیٰ پنجاب سردار عثمان بزدار کے ویژن کے مطابق کلین اینڈ گرین پاکستان کے تحت ضلعی انتظامیہ کے زیراہتمام 18سے 24 نومبر تک ہفتہ صفائی منایا جائے گا جسے”آئیں مل کر فیصل آباد سنواریں“کے تھیم سے موسوم کیا گیا ہے۔ہفتہ صفائی کا آغاز سوموار18نومبر کو خصوصی آگاہی واک سے ہوگا جس میں ضلعی انتظامیہ کے افسران،ارکان قومی وصوبائی اسمبلی،ویسٹ مینجمنٹ کمپنی اور پی ایچ اے سمیت دیگر محکموں واداروں کے افسران وسٹاف،این جی اوز اور سول سوسائٹی کے نمائندے شریک ہوں گے۔ڈپٹی کمشنر محمدعلی نے بتایا کہ ہفتہ صفائی کو پورے ضلع پر محیط کیا گیا ہے جس کے دوران ہر یونین کونسل کے علاقہ میں صفائی ستھرائی اور شجرکاری کی سرگرمیاں جاری رہیں گی۔انہوں نے بتایا کہ ہفتہ صفائی میں تمام سرکاری محکموں کے علاوہ ہسپتال،رورل وبنیادی مراکزصحت،تعلیمی ادارے،کاروباری وتجارتی تنظیمیں،این جی اوز اور سول سوسائٹی کے افراد حصہ لیں گے اور اس دوران شہریوں کی توجہ و دلچسپی کیلئے دیگررنگارنگ پروگرامز کا بھی اہتمام کیا گیا ہے۔انہوں نے بتایا کہ کلین اینڈ گرین پاکستان کے موضوع پر سکولوں،کالجوں اوریونیورسٹیز میں تقریری مقابلے،سیمینارز،واکس،ریلیز اور دیگر پروگرامز منعقد ہوں گے۔انہوں نے شہریوں سے کہا کہ وہ ہفتہ صفائی کے دوران نہ صرف سرکاری اداروں سے بھرپور تعاون کریں بلکہ خود بھی صفائی وشجرکاری مہم میں حصہ لیکر قومی فرض ادا کریں۔

فیصل آباد(محمد اویس)وزیراعلیٰ پنجاب سردار عثمان بزدار کی ہدایت پر صارفین کو اشیائے ضروریہ سستے داموں فروخت کرنے کے لئے شہر میں چار ماڈل بازار اور23میگا سٹورز پر فیئرپرائس کاؤنٹرز کام کررہے ہیں جہاں پر روزمرہ استعمال کی اشیاء ڈی سی ریٹ سے بھی کم نرخوں پر دستیاب ہیں۔ماڈل بازار ریاض شاہد چوک اسلام نگر،کلیم شہید پارک غلام محمد آباد،ماڈل بازار جھنگ روڈ اور فیضان مدینہ چوک مدینہ ٹاؤن میں فنکشنل ہیں جبکہ شہر کے جن میگا سٹور/مالز پر فیئرپرائس کاؤنٹرز قائم کئے گئے ہیں ان میں ایس بی سٹورزڈی گراؤنڈ،جھنگ روڈ،سمندری روڈ،سرگودھا روڈ،غلام محمد آباد،بیسٹ ڈیپارٹمنٹل سٹور غلام محمد آباد،دینوب مارٹ ملت روڈ گلستان کالونی،فیملی مارٹ ملت روڈ گلستان کالونی،پٹھان مارٹ گلستان کالونی،رچنا سپر سٹورملت روڈ گلستان کالونی،بیمینو مارٹ ڈی گراؤنڈ،سٹی کیش اینڈ کیری کینال روڈ،سٹی میگا مارٹ ڈی گراؤنڈ،ای مارٹ سوساں روڈ مدینہ ٹاؤن،سلیمی ہوم پلس کوہ نورروڈ،لاثانی مارٹ مسجد اسماعیل روڑ(ڈائیوروڈ)،مرحبا مارٹ کینال روڈ،قطر سپر سٹور کینال روڈ،511کیش اینڈکیری سرگودھا روڈ،ٹیمپو سٹور پیپلز کالونی،ایچ کیز سٹور،سعید مارٹ جناح کالونی اور مکہ کیش اینڈ کیری کلبرگ روڈ شامل ہیں۔ڈپٹی کمشنر محمد علی نے بتایا کہ ضلعی انتظامیہ کا خود ساختہ مہنگائی اور اشیاء ضروریہ کی ذخیرہ اندوزی کے خلاف بھرپور کریک ڈاؤن جاری ہے اس سلسلے میں خفیہ گوداموں پر دو مختلف چھاپوں کے دوران مختلف دالوں،چاولوں اور سرخ مرچوں کی 44ہزاربوریاں برآمد کرکے انہیں قبضہ میں لیا گیا ہے۔انہوں نے بتایا کہ خود ساختہ مہنگائی کو روکنے کے لئے ضلع بھر میں پرائس کنٹرول مجسٹریٹس سرگرم عمل ہیں اور رواں ماہ کے دوران قیمتوں کو چیک کرتے ہوئے زائد قیمتیں وصول کرنے پر 1156گرانفروشوں کو 11لاکھ 25ہزارروپے کے جرمانے کئے گئے ہیں۔ڈپٹی کمشنر نے کہا کہ سبزی منڈیوں میں پھلوں اورسبزیوں کی نیلامیوں کے عمل کی بھی مسلسل نگرانی کی جارہی ہے تاکہ قیمتوں میں بلاجواز اضافہ کو روکا جاسکے۔ڈپٹی کمشنر نے کہا کہ آٹا،چینی،گھی اوردیگر اشیاء کی قیمتوں پر گہری نظر رکھی جارہی ہے لہذا مہنگائی مافیا کے ہاتھوں عوام کا استحصال نہیں ہونے دیں گے۔
۔۔۔///۔۔۔

فیصل آباد(محمد اویس)وزیر اعلی پنجاب سردار عثمان بزدار کی ہدایات پر عوامی مسائل سے آگاہی اور ان کے حل کے لئے میٹروپولیٹن میونسپل کارپوریشن ہال میں ہفتہ وار کھلی کچہری کا انعقاد کیا گیا۔ ڈپٹی کمشنرمحمد علی نے عوامی مسائل سنے اور موقع پر ہی افسران کو داد رسی کی ہدایت کی۔ڈپٹی کمشنر نے کہا ہے کہ وزیراعلی پنجاب سردار عثمان بزدار کی ہدایت پر کھلی کچہری کا انعقاد کرکے عوامی مسائل ان کی دہلیز پر حل کئے جارہے ہیں۔انہوں نے درخواست گزاروں کے مختلف محکموں سے متعلقہ مسائل سنتے ہوئے موقع پر موجودافسران کو نہ صرف داد رسی بلکہ تعمیلی رپورٹ سے بھی آگاہ کرنے کی ہدایت کی۔انہوں نے کہا کہ کھلی کچہریوں کو نتیجہ خیز بنانے کے لئے اقدامات جاری ہیں اس سلسلے میں محکموں کی کارکردگی کی کڑی مانیٹرنگ کی جا رہی ہے۔انہوں نے کہا کہ حکومت پنجاب کی ہدایات پر لوگوں کے مسائل سے آگاہی اور ان کے حل کے لئے اوپن ڈور پالیسی پر عملدرآمدبھی جاری ہے۔کھلی کچہری کے دوران شہریوں نے تجاوزات کے خاتمہ سمیت محکمہ مال،صحت،ویسٹ مینجمنٹ کمپنی،واسااوردیگر محکموں واداروں سے متعلقہ شکایات پیش کیں جن کے حل کے لئے موقع پر ہی احکامات جاری کئے گئے۔
۔۔۔///۔۔۔