Category: فیصل آباد

فیصل آباد(محمد اویس)وزیراعلیٰ پنجاب سردار عثمان بزدار کی ہدایت پر ڈپٹی کمشنر محمد علی نے میونسپل کارپوریشن ہال میں کھلی کچہری لگا کر شہریوں کے مسائل سنے۔اس موقع پر ایم پی اے فردوس رائے،ایڈیشنل ڈپٹی کمشنر فنانس عاصمہ اعجاز چیمہ ودیگر افسران بھی موجود تھے۔ڈپٹی کمشنر نے شہریوں سے درخواستیں وصول کیں اور ان کے مسائل کے حل کے لئے متعلقہ محکموں کو احکامات جاری کئے۔انہوں نے افسران کو تاکید کی کہ لوگوں کی شکایات کو سنجیدگی سے لیتے ہوئے ان کے حل کے لئے تیز رفتار محکمانہ اقدامات کریں۔ڈپٹی کمشنر نے درخواست گزاروں کو یقین دلایا کہ ان کی درخواستوں پر محکمانہ کارروائی کی باقاعدگی سے مانیٹرنگ کی جائے گی تاکہ انہیں ریلیف فراہم کرنے میں تاخیر نہ ہو۔ڈپٹی کمشنر نے کہا کہ حکومت پنجاب کی اوپن ڈور پالیسی پربھی سختی سے عمل پیرا ہیں اس سلسلے میں مختلف محکموں کے افسران کی حاضری یقینی بنانے کے لئے اچانک انسپکشن کا سلسلسہ بھی جاری ہے۔کھلی کچہری کے دوران لوگوں نے صفائی ستھرائی،تجاوزات،زمینوں کے انتقالات،سیوریج کی درستگی اور دیگر محکموں سے متعلقہ اپنی شکایات پیش کیں۔
۔۔۔///۔۔۔

فیصل آباد (محمد اویس)اخوت کے زیراہتمام ای کریڈٹ سکیم کے تحت 500کاشتکاروں میں 3کروڑ روپے کے بلاسود قرضہ جات کے چیکس تقسیم کئے گئے اس سلسلے میں ایک تقریب کمشنر کمپلیکس کی جامع مسجد میں منعقد ہوئی۔ڈویژنل کمشنر محمود جاوید بھٹی اس موقع پر مہمان خصوصی تھے۔ڈائریکٹر زراعت چوہدری عبدالحمید،ریجنل مینجر اخوت خالد محمود،اسلم جاوید،ویلفیئر آفیسر تعلیمی بورڈ سردار بابر ڈوگر،چوہدری نذیر،چوہدری تنویر،خالد محمود شوق،احسان الہی،ڈاکٹر یاسین رندھاوا اور دیگر عہدیداران وکاشتکار بھی موجود تھے۔ڈویژنل کمشنر نے اظہار خیال کرتے ہوئے کہا کہ انسانیت کی خدمت اور معاشی بھلائی کے لئے اخوت بڑاادارہ ہے جسے اپنے فلاحی منصوبوں کے باعث دنیا بھر میں خصوصی مقام حاصل ہے۔انہوں نے کہا کہ تجربہ اور زمین کے حامل کاشتکاروں کو معاشی مسائل کا سامنا ہے جن کی فراہمی کے لئے اخوت نے قابل قدر بیڑااٹھایا ہے جس کی بدولت کسان اپنی فصلوں کی زیادہ پیداوار حاصل کرنے کے قابل ہونگے۔انہوں نے کہا کہ وسائل سے محروم خاندانوں کی معاشی حالت بہتر بنانے کے لئے چھوٹی سطح پربلاسود قرضوں کی فراہمی کا بڑا پروگرام شفافیت اور نیکی کے جذبے کے باعث کامیاب اور چراغ سے چراغ جلنے کا یہ سلسلہ جاری اورہمیشہ روشن رہنا چاہیے۔ڈویژنل کمشنر نے کہا کہ فلاحی اورمہذب معاشرے کا تقاضا ہے کہ معاشی طور پر کمزور اور مستحق افراد کا ہاتھ تھاما جائے جس کے لئے سماجی تنظیم اخوت نے اپنے فلاحی منصوبوں سے معاشرے میں عظیم انقلاب برپا کیا ہے۔انہوں نے قرضہ حاصل کرنے والے کاشتکاروں سے کہا کہ وہ انتہائی نیک نیتی اور دیانتداری سے محنت کرکے اپنے روزگار میں اضافہ کریں اورایمانداری سے قرض واپس کریں تاکہ دیگر بھی اس مائیکرو فنانس سکیم سے فائدہ اٹھا کر اپنے پاؤں پر کھڑے ہوسکیں۔انہوں نے خدمت خلق کے جذبے سے سرشار ہو کر خدمات انجام دینے والی اخوت کی پوری ٹیم کو مبارکباددی اور کہا کہ ڈویژنل انتظامیہ اس کارخیر میں ان کے شانہ بشانہ شریک رہے گی۔ڈائریکٹر زراعت نے کہا کہ اسلامی اصولوں کے مطابق قرضہ جات کی فراہمی سے کاشتکاروں کو معاشی ریلیف ملے گا۔انہوں نے کاشتکاروں سے کہا کہ وہ اخوت کی طرف سے قرضہ کی فراہمی کو احسن انداز میں بروئے کار لائیں۔ریجنل مینجر خالد محمود نے بتایا کہ 10ہزارروپے کے قرض حسنہ کی ادائیگی سے شروع ہونے والا سلسلہ اب 96،ارب روپے تک پہنچ چکا ہے جس سے ملک بھر کے 37لاکھ خاندان مستفید ہو رہے ہیں۔انہوں نے بتایا کہ پاکستان کے 350شہروں میں اخوت کی 817برانچز کام کررہی ہیں اور ریکوری سو فیصد ہے۔انہوں نے بتایا کہ فیصل آباد ڈویژن میں 3لاکھ 4ہزارخاندانوں سے مواخات کا رشتہ قائم ہے جن میں 8،ارب روپے بلا سود تقسیم کئے جاچکے ہیں۔انہوں نے بتایا کہ اخوت کے زیراہتمام ایجوکیشن پروگرام،تعلم بالغان،زرعی قرضہ جات،ٹیوٹا،خواجہ سراء سپورٹ پروگرام،اخوت کلاتھ بینک،اخوت فوڈ بینک،ہیلتھ اور دیگر شعبوں میں خدمات انجام دی جاری ہیں جبکہ سرگودھا،فاروق آباد اورلاہور میں تین فاؤنٹین ہاؤس بھی کام کررہے ہیں جہاں ذہنی امراض کے مریضوں کا علاج کیا جاتا ہے۔انہوں نے کہا کہ اخوت کا یہ انقلابی فلاحی سفر جاری رہے گا۔تقریب کے دوران سردار بابر ڈوگر،ڈاکٹر عبدالجبار،چوہدری نذیر احمد ودیگر نے بھی خطاب کیا اور کہا کہ اخوت کے اقدامات کی بدولت غربت میں کمی اور سود کے خلاف جہاد میں کامیابی حاصل ہوگی۔انہوں نے اخوت کی پوری ٹیم کا شکریہ ادا کرتے ہوئے قرض حسنہ لینے والوں کی کامیابی اوربرکت کے لئے دعا بھی کی۔اس موقع پر ڈویژنل کمشنر محمود جاوید بھٹی نے کاشتکاروں کے قریب جا کر انہیں قرض حسنہ کے چیکس دئیے۔
۔۔۔///۔۔۔

فیصل آباد(محمد اویس)ڈپٹی کمشنر محمد علی نے پرائس کنٹرول مجسٹریٹس کو ہدایت کی ہے کہ ضلع میں اشیائے ضروریہ کی بے جا مہنگائی اور گرانفروشی پر قابو پانے کے لئے جارحانہ اقدامات کئے جائیں اس سلسلے میں دکانداروں کو مقررہ نرخوں کی وصولی کا پابند بنانے کے ساتھ ساتھ اشیاء کی مصنوعی قلت،چور بازاری اور ملاوٹ کرنے والوں کا سختی سے محاسبہ کریں۔انہوں نے یہ ہدایت ضلع کے پرائس کنٹرول مجسٹریٹس کی میٹنگ کے دوران ان کی کارکردگی کاجائزہ لیتے ہوئے جاری کی۔ایڈیشنل ڈپٹی کمشنر جنرل میاں آفتاب احمد ودیگر افسران بھی موجود تھے۔ڈپٹی کمشنر نے کہا کہ حکومتی ہدایات کے مطابق اشیائے ضروریہ کی قیمتوں کو قابو میں رکھنا ضلعی انتظامیہ کی اولین ترجیح ہے تاکہ صارفین کو مہنگائی مافیا سے بچایا جاسکے۔انہوں نے کہا کہ اشیائے ضروریہ کی مقررہ نرخوں میں فروخت کے ساتھ ساتھ ان کے معیاراوروزن پر بھی گہری نظر رکھیں۔انہوں نے غلہ منڈی اورسبزی منڈیوں کے آڑھتیوں وتاجروں سے قریبی رابطہ رکھنے کی ہدایت کی اور کہا کہ سبزیوں،پھلوں اور کریانہ کی اشیاء کی طلب کے مطابق سپلائی میں تعطل نہیں آنا چاہیے اور کسی شے کی کمیابی کی صورت میں سپلائی کا فوری بندوبست ہونا چاہیے۔ڈپٹی کمشنر نے کہا کہ قیمتوں کی جانچ پڑتال کے ایسے باقاعدہ اورمنظم طریقہ کار پر عمل ہونا چاہئے کہ عام دکاندار ازخود اشیائے ضروریہ کے مقررہ نرخ وصول کریں جبکہ باربار خلاف ورزی کرنے والوں کو پابند سلاسل کیا جائے۔انہوں نے کہا کہ عوام کو معاشی ریلیف فراہم کرنے کے لئے ناجائز منافع خوروں سے کوئی رعایت نہیں ہونی چاہیے اس ضمن میں پرائس کنٹرول مجسٹریٹس کی روزانہ کی کارکردگی کاباقاعدگی سے جائزہ لیا جائے گا اور ناقص کارکردگی کے حامل افسران کے خلاف محکمانہ ایکشن ہوگا۔
۔۔۔///۔۔۔

فیصل آباد (محمد اویس ) صوبائی وزیر ایکسائز اینڈ ٹیکیشن حافظ ممتاز احمد نے کہا ہے کہ اشیائے ضروریہ کی سرکاری طور پر مقررہ قیمتوں پر فروخت کو ہر صورت یقینی بنایا جائے گا اور مہنگائی مافیا کو من مانی کے ذریعے عوام کا استحصال نہیں کرنے دیں گے۔ انہوں نے یہ بات وزیر اعلی پنجاب سردار عثمان بزدار کی ہدایات پر مختلف بازاروں اور سٹورز پر کھانے پینے کی اشیاء کی قیمتیں چیک کرتے ہوئے کہی۔ ڈپٹی کمشنر محمد علی بھی ان کے ہمراہ تھے جبکہ اسسٹنٹ کمشنر سٹی زوہا شاکر اور مارکیٹ کمیٹی کا سٹاف بھی موجود تھا۔ صوبائی وزیر اور ڈپٹی کمشنر ماڈل بازار جھنگ روڈ‘ ایس بی سٹور جھنگ روڈ اور دیگر علاقوں میں بازاروں و سٹورز پر گئے اور پھل‘ سبزیوں‘ دالوں‘ چاول‘ بیسن‘ آٹا‘چینی و دیگر اشیائے خورد و نوش کی مقرر کردہ قیمتوں کے مطابق فروخت کو چیک کیا۔ انہوں نے دکانداروں سے بعض پھلوں و سبزیوں کے ریٹس دریافت کرتے ہوئے تاکید کی کہ نرخناموں کے مطابق ہی اشیاء فروخت ہونی چاہیں بصورت دیگر جرمانوں اور دیگر سزاؤں سے گریز نہیں کیا جائے گا۔ انہوں نے ایس بی سٹور میں کچھ اشیاء پر نرخناموں کی عدم موجودگی پر وارننگ دی اور اپنی نگرانی میں دالوں و دیگر اشیاء کا وزن بھی چیک کیا۔ صوبائی وزیر نے کہا کہ وزیر اعلی پنجاب سردار عثمان بزدار نے بعض اشیاء کی قیمتوں پر سو فیصد عملدرآمد کرانے کی سخت ترین ہدایات جاری کی ہیں اس سلسلے میں وہ ضلع بھر میں مارکیٹوں‘ بازاروں‘ سٹوروں پر اشیائے ضروریہ کی قیمتوں کو چیک کر رہے ہیں جس کا سلسلہ مستقل بنیادوں پر جاری رہیگا۔ انہوں نے صارفین سے اشیاء کی قیمتوں اور کوالٹی کے بارے میں دریافت کرتے ہوئے کہا کہ غریب عوام کو ریلیف کی فراہمی پاکستان تحریک انصاف کی حکومت کی اولین ترجیح ہے۔ صوبائی وزیر نے ضلعی انتظامیہ کے افسران سے کہا کہ وہ مارکیٹوں‘ بازاروں کے باقاعدگی سے دورے کرکے قیمتوں کو چیک کریں اور اوورچارجنگ کرنے والوں کو پکڑ کر جیل بھجوائیں تاکہ کسی کو زائد قیمت وصول کرنے کی جرات نہ ہو۔ ڈپٹی کمشنر نے بتایا کہ ضلع بھر کے پرائس کنٹرول مجسٹریٹس کو اوورچارجنگ کی روک تھام کے لئے متحرک کر رکھا ہے جبکہ ان کی کارکردگی کو بھی تسلسل کے ساتھ چیک کیا جارہا ہے۔ انہوں نے بتایا کہ صبح سویرے پھل و سبزی منڈی کا دورہ کرکے پیاز‘ آلو‘ ٹماٹر و دیگر اشیاء کی نیلامیوں کے عمل کا بھی جائزہ لیاجارہا ہے۔ انہوں نے بتایا کہ ضلعی انتظامیہ کے زیر اہتمام ماڈل بازار جھنگ روڈ میں صارفین کو معاشی ریلیف فراہم کرنے کے لئے اشیائے ضروریہ عام بازاروں سے رعایتی نرخوں پر فروخت کی جارہی ہیں جس سے بڑی آبادی مستفید ہو رہی ہے۔انہوں نے کہا کہ حکومت پنجاب کے ویژن کے مطابق صارفین کو کنٹرول قیمتوں پر اشیاء ضروریہ کی دستیابی یقینی بنائے جائے گی۔
۔۔۔///۔۔۔

فیصل آباد(محمد اویس )ڈائریکٹر ٹاؤن پلاننگ ایف ڈی اے نے سرگودھا روڈ پرغیر منظور شدہ پرائیویٹ ہاؤسنگ سکیم موٹروے ویلی کو بجلی کی سروس فراہم نہ کرنے کے لئے فیسکو حکام کولیٹر جاری کردیا ہے جس کے مطابق ایف ڈی اے کی طرف سے چک نمبر5ج ب کمال پور کے قریب ہاؤسنگ سکیم،موٹروے ویلی کی منظوری نہیں دی گئی ہے لہذایہ ہاؤسنگ سکیم غیر قانونی ہے جسے بجلی کی سروس فراہم نہ کی جائے۔ایف ڈی اے کے مطابق اس ضمن میں فیسکو حکام کو قبل ازیں بھی متعدد بار لیٹر جاری کئے جاچکے ہیں اور فیسکو حکام سے کہاگیا ہے کہ اس سلسلے میں کسی وضاحت کی صورت میں ایف ڈی اے سے رابطہ کیا جاسکتا ہے۔