Category: فیصل آباد

فیصل آباد(محمد اویس )صوبائی وزیر کوآپریٹومہرمحمد اسلم بھروانہ نے کہا ہے کہ ضلع بھر میں مصنوعی مہنگائی پیدا کرنے والے عناصر کو قانون کے سخت شکنجے میں لائیں اس سلسلے میں پرائس کنٹرول مجسٹریٹس اپنی ذمہ داریوں کا ادراک کریں اور فیلڈ میں رہ کر سرکاری طور پر مقررہ قیمتوں پرعملدرآمد کو یقینی بنائیں تاکہ عوام کی جیبوں پر ڈاکہ ڈالنے والوں کا قبلہ درست ہو۔انہوں نے یہ بات ڈپٹی کمشنر آفس چنیوٹ میں ایک اجلاس کی صدارت کرتے ہوئے حکومتی اقدامات پر عملدرآمد کا جائزہ لیتے ہوئے کہی۔ڈپٹی کمشنر سید امان انور قدوائی اور ڈی پی او سید حسنن حیدر نے صوبائی وزیر کو ضلع میں پرائس کنٹرول میکنزم،ترقیاتی عمل،انسداد ڈینگی اقدامات اور امن وامان کے حوالے سے بریفنگ دی۔ایم پی اے تیمور امجد لالی کے علاوہ ایڈیشنل ڈپٹی کمشنرز طارق خان نیازی،عمران عصمت،اسسٹنٹ کمشنرز خضر حیات بھٹی،عدنان رشید،فضل عباس اور مختلف ضلعی محکموں کے سربراہان بھی موجود تھے۔صوبائی وزیرنے کہا کہ وزیر اعلیٰ پنجاب سردار عثمان بزدار نے سبزیوں سمیت اشیائے ضروریہ کی قیمتوں میں بے جا اضافے پر گہری تشویش کا اظہار کیا ہے اور صارفین کو منافع خوروں سے نجات دلانے کے لئے صوبائی کابینہ کے ارکان کو اضلاع و تحصیلوں کے دورے کرکے قیمتوں پر عملدرآمد کرانے کی سخت ترین ہدایات جاری کی ہیں اور وہ اسی سلسلے میں ضلع میں پرائس کنٹرول میکنزم کا جائزہ لے رہے ہیں۔انہوں نے گراں فروشوں کے خلاف کی گئیں کارروائیوں کا تفصیلی جائزہ لیتے ہوئے کہا کہ عوام کو ناجائز منافع خوروں اور ذخیرہ اندوزوں کے سپرد نہیں کیا جا سکتا۔انہوں نے کہا کہ مہنگائی کے مستقل سدباب کے لئے ایسا جامع اور قابل عمل میکنزم وضع کریں کہ عوام کو ریلیف نظر آئے۔ صوبائی وزیر نے پرائس کنٹرول مجسٹریٹس سے کہا کہ کاغذی کارروائیوں کا وقت گزرچکا ہے اب عملی طور پر اقدامات نظر آنے چاہیں جس میں معمولی سی بھی کوتاہی کی گنجائش نہیں۔انہوں نے کہا کہ مارکیٹوں اور بازاروں میں پھل،سبزیاں اور دیگر اشیا فروخت کرنے والوں کی دکانوں وریڑھیوں پر نرخنامے آویزاں ہونے چاہیں جبکہ اوورچارجنگ کی شکایت کے اندراج کے لئے ٹال فری نمبر 08000234کی بھی بھرپور تشہیر کی جائے۔انہوں نے پرائس کنٹرول مجسٹریٹس سے کہا کہ ان کی کارروائیوں کے واضح نتائج نظر آنے چاہیں۔صوبائی وزیر نے ڈپٹی کمشنر سے کہا کہ وہ قیمتوں پر عملدرآمد کے حوالے سے پرائس کنٹرول مجسٹریٹس کی کارکردگی کو روزانہ چیک کریں اور مطلوبہ نتائج نہ دکھانے والوں کے خلاف ایکشن لیں۔صوبائی وزیر نے ضلع میں انسداد ڈینگی اقدامات، ترقیاتی منصوبوں پر عملدرآمد کی پیشرفت کا بھی تفصیلی جائزہ لیا اور افسران کو وزیر اعظم پاکستان عمران خان کی ترجیحات سے آگاہ کرتے ہوئے کہا کہ دیانتداری سے محکمانہ فرائض انجام دیکر مطلوبہ اہداف حاصل کئے جائیں۔انہوں نے کہا کہ ٹیم ورک کے طور پر ذمہ داریاں نبھائیں اور عوامی مسائل کاحل اولین ترجیح ہونی چاہیے۔ڈپٹی کمشنر نے بریفنگ کے دوران بتایا کہ ضلع میں 19 پرائس کنٹرول مجسٹریٹ سرگرم عمل ہیں اور رواں سال اب تک پرائس چیکنگ کرتے ہوئے مارکیٹوں وبازاروں کے 5171 وزٹ کرکے اوورچارجنگ پر 4153 گرانفروشوں کو 53 لاکھ سے زائد جرمانے اور 234 کو پرائس کنٹرول ایکٹ کی سنگین خلاف ورزی پر جیل بھجوایا گیا۔انہوں نے بتایا کہ پھل وسبزی منڈی کی روزانہ نیلامی کا عمل بھی جاری ہے۔انہوں نے ترقیاتی منصوبوں کی تفصیلات سے آگاہ کرتے ہوئے بتایا کہ کمیونٹی ڈویلمپنٹ پروگرام کے تحت 20 کروڑ سے 24 سکیموں کا 65 فیصد،صوبائی ترقیاتی پروگرام کے تحت دو ارب 65 کروڑ سے 52 منصوبوں کا 72 فیصد تعمیراتی کام مکمل ہو چکا ہے۔انہوں نے بتایا کہ اب تک 25 کھلی کچہریاں لگا کر 325 لوگوں کی شکایات کا ازالہ کیا گیاہے جبکہ 75 درخواستوں پر محکمانہ اقدامات جاری ہیں۔ڈپٹی کمشنر نے بتایا کہ کلین اینڈ گرین پنجاب پروگرام کے تحت ضلع میں ڈیڑھ لاکھ سے زائد پودے لگائے جا چکے ہیں جبکہ ماحولیاتی آلودگی کے خاتمے کے لئے بھی موثر اقدامات جاری ہیں۔بعدازاں صوبائی وزیر کوآپریٹو مہر محمد اسلم بھروانہ نے میڈیا نمائندگان سے گفتگو کرتے ہوئے کہا کہ سرکاری محکموں کی کارکردگی کے معیار کو بہتر بنانے پر توجہ مرکوز ہے جس میں واضح پیشرفت ہورہی ہے۔انہوں نے کہا کہ ماحولیاتی تحفظ کو یقینی بنانے کے لئے دیگر اقدامات کے ساتھ کلین اینڈ گرین پنجاب پروگرام پر بھرپور عملدرآمد جاری ہے۔انہوں نے بتایاکہ وزیر اعلی پنجاب سردار عثمان بزدار کی ہدایات پر اشیا ضروریہ کے گرانفروشوں کے خلاف کریک ڈاؤن کیا جارہا ہے اور کسی کو من مانی قیمتیں وصول نہیں کرنے دیں گے۔انہوں نے کہا کہ وہ ضلع چنیوٹ میں حکومتی اقدامات پر عملدرآمد کا جائزہ لینے کے لئے تسلسل سے دورے بھی کریں گے۔

فیصل آباد (محمد اویس) ڈسٹرکٹ کوالٹی کنٹرول بورڈ نے ڈرگ ایکٹ کی مختلف خلاف ورزیوں کے مرتکب 12 میڈیکل سٹورز کے کیسز ڈرگ کورٹ کو بھجوانے جبکہ دو میڈیکل سٹور کے مالکان کے خلاف مقدمات درج کرانے کا فیصلہ کیا ہے۔ اس سلسلے میں ڈپٹی کمشنر محمد علی کی زیر صدارت ڈسٹرکٹ کوالٹی کنٹرول بورڈ کا اجلاس منعقد ہوا جس میں ایڈیشنل ڈپٹی کمشنر (جنرل) میاں آفتاب احمد بھی موجود تھے جبکہ اجلاس میں ڈپٹی پراسیکیوٹر سجیلہ نذیر، محکمہ صحت کے ڈاکٹر بلال احمد، سیکرٹری ڈسٹرکٹ کوالٹی کنٹرول بورڈ عارف شہزاد، دیگر ارکان کیپٹن ڈاکٹر محمد صدیق، غلام صابر انصاری، ڈرگ انسپکٹر خالد مصطفی، محسن اصغر، شہباز احمد و دیگر نے شرکت کی۔ اجلاس کے دوران میڈیکل سٹوروں کے خلاف کارروائیوں سے متعلق 28 کیسز زیر سماعت تھے جن میں ڈرگ لائسنس کے بغیر ادویات کی فروخت، مطلوبہ ریکارڈ نہ رکھنے اور مقررہ شرائط کی پابندی نہ کرنے والے 12 میڈیکل سٹورز کے مالکان کے کیسز ڈرگ گورٹ کو بھجوائے۔ رحمان میڈیکل سٹور غلام محمد آباد، الشفیع پنسار سٹور نہر بازار سمندری کے مالکان کے خلاف مقدمات درج کرنے کا فیصلہ جبکہ تسلی بخش دستاویزی ثبوت پیش کرنے پر پانچ میڈیکل سٹورز کے مالکان کو وارننگ دی گئی اس موقع پر 9 میڈیکل سٹورز کے خلاف سماعت آئندہ جلاس تک ملتوی کر دی گئی۔ ڈپٹی کمشنر نے ڈرگ انسپکٹر کی کارکردگی کا جائزہ لیتے ہوئے جعلی و غیر معیاری ادویات کی تیاری و فروخت کے گھناؤنے دھندے کا یکسر خاتمہ کے لئے انہیں دیانتداری اور محنت سے فرائض انجام دینے کی ہدایت کی۔ انہوں نے کہا کہ جعلی اور نشہ آور ادویات فروخت کرنے والے میڈیکل سٹورز کو فی الفور سیل کیا جائے۔ انہوں نے ڈرگ کورٹ میں زیر سماعت مقدمات کی موثر انداز میں پیروی کرنے کی تاکید کی اور کہا کہ انسانی صحت سے کھیلنے والوں کے خلاف کوئی رعایت نہیں ہونی چاہئے۔ ڈپٹی کمشنر نے واضح کیا کہ کسی قسم کی کرپشن یا بددیانتی برداشت نہیں کی جائے گی۔ انہوں نے کہا کہ ڈرگ انسپکٹرز کی کارکردگی کی سخت مانیٹرنگ ہو گی اور پرفارمنس کا تقابلی جائزہ لیا جائے گالہذا ان سے اچھے محکمانہ نتائج کی توقع ہے۔
—–////—-
فیصل آباد( )ڈپٹی کمشنر محمد علی نے ہدایت کی ہے کہ حکومت پنجاب کے کمیونٹی ڈویلپمنٹ پروگرام کے تحت جاری ترقیاتی سکیموں کو 15دسمبر تک سو فیصد مکمل کیا جائے اس سلسلے میں اضافی افرادی قوت لگا کر اہداف حاصل کئے جائیں تاکہ شہری جلد ان منصوبوں کے ثمرات سے مستفید ہوسکیں۔انہوں نے یہ ہدایت ایک اجلاس کی صدارت کرتے ہوئے جاری کی جس میں حکومت پنجاب کے کمیونٹی ڈویلپمنٹ پروگرام پرعملدرآمد کی پیشرفت کاجائزہ لیا گیا۔ڈپٹی ڈائریکٹر ڈویلپمنٹ ڈاکٹرنوید کے علاوہ دیگرمتعلقہ محکموں کے افسران موجود تھے۔اجلاس کو بتایا گیا کہ ضلع میں ایک ارب روپے کی لاگت سے لوکل گورنمنٹ،واسا،پبلک ہیلتھ انجینئرنگ اور روڈز کنسٹرکشن کی سکیموں کا مجموعی طور پر 65فیصد تعمیراتی کام مکمل ہوچکا ہے۔ڈپٹی کمشنر نے کمیونٹی ڈویلپمنٹ پروگرام پر عملدرآمد کی تفصیلات کا جائزہ لیتے ہوئے واضح کیا کہ وہ سکیموں کی پیشرفت کو خود مانیٹر کریں گے اور اگر سست روی سامنے آئی تو سخت محکمانہ کارروائی ہوگی۔انہوں نے کہا کہ شہریوں کو مختلف شعبوں میں مزید سہولیات کی فراہمی کے حوالے سے کمیونٹی ڈویلپمنٹ پروگرام انتہائی اہمیت کا حامل ہے لہذا متعلقہ محکمے اپنی ذمہ داریوں کا ادراک کریں اور ٹارگٹس کے حصول میں کوئی کسر نہ چھوڑی جائے۔انہوں نے کہا کہ منصوبوں پر عملدرآمد کے سلسلے میں اگر کسی جگہ رکاوٹ درپیش ہو تو فوری ان کے نوٹس میں لائیں تاکہ بروقت اقدامات کئے جاسکیں.

فیصل آباد(محمد اویس ) حکومت پنجاب شہریوں کو ممکنہ سموگ کے صحت پر نقصانات سے بچانے کے لئے ہنگامی اقدامات کررہی ہے تاہم احتیاط اور پرہیز بڑی اہمیت کی حامل ہے لہذا شہری ایسی صورتحال میں احتیاطی تدابیر پر ذمہ داری سے عمل پیرارہیں۔یہ بات میڈیکل سوشل آفیسر آسیہ فقیر حسین نے ہارٹ سیور فاؤنڈیشن کے زیر اہتمام فیصل آباد انسٹیٹیوٹ آف کارڈیالوجی کے مختلف شعبوں اور ملحقہ گراؤنڈ میں شہریوں میں حفاظتی ماسک اور احتیاطی تدابیر پر مشتمل پمفلٹس تقسیم کرتے ہوئے کہی۔جنرل سیکرٹری ہارٹ سیورفاؤنڈیشن کاشف فاروق،عاصمہ مزمل اور دیگر سٹاف ممبران بھی موجود تھے۔میڈیکل سوشل آفیسر نے کہا کہ دھواں،گرد،نمی اور دھند کی گہری تہہ سموگ کی موجب ہے جس سے صحت محفوظ رکھنے کے لئے احتیاطی تدابیر سے متعلق طرز زندگی میں تبدیلی لائیں۔انہوں نے شہریوں سے کہا کہ وہ خصوصاً موٹرسائیکل چلاتے وقت چہرے پرحفاظتی ماسک کا استعمال یقینی بنائیں تاکہ بیماریوں سے محفوظ رہا جاسکے۔جنرل سیکرٹری ہارٹ سیور فاؤنڈیشن نے ممکنہ سموگ سے محفوظ رہنے کے لئے احتیاطی تدابیر اپنانے کی ضرورت پر زور دیا۔انہوں نے کہا کہ سموگ سے گھبرانے کی نہیں بلکہ احتیاط کی ضرورت ہے۔