Category: فیصل آباد

فیصل آباد (اے پی پی):نشہ کے ناسور سے نوجوان نسل کو بچانے کے لئے ہر فرد کو اپنا کردار ادا کرنے کی ضرورت ہے تاکہ قوم کے معمار اس لعنت سے دور اور معاشرے کو اس برائی سے بچایا جاسکے۔یہ بات میڈیکل سوشل آفیسر ماڈل ڈرگ ایبویز ڈسٹرکٹ ہیڈ کوارٹرز ہسپتال رابعہ خالد نے انجمن انسداد منشیات کے زیراہتمام گورنمنٹ گرلز ہائی سکول نثار کالونی میں آگاہی سیمینار سے خطاب کرتے ہوئے کہی۔اینٹی نارکوٹکس فورس کے انسپکٹر محمد علی،جنرل سیکرٹری انجمن انسداد منشیات محمدانوارخان،سائیکالوجسٹ غلام مصطفی نیازی،محمد پرویز،میڈم شکیلہ کے علاوہ پرنسپل ادارہ،اساتذہ اور طالبات بھی موجود تھیں۔میڈیکل سوشل آفیسر نے کہا کہ تابناک مستقبل کے لئے نوجوان نسل کو اس لت سے دوررہنا چاہیے کیونکہ نشہ انسان کو تنزلی میں دھکیل دیتا ہے اور دین اسلام نے بھی اس سے باز رہنے کی تلقین کی ہے۔انہوں نے طالبات سے کہا کہ وہ اپنی تمام تر توجہ حصول علم پر مرکوز رکھیں اورنشہ سمیت دیگر برائیوں سے دوررہیں۔جنرل سیکرٹری نے انجمن انسداد منشیات کی کارکردگی سے آگاہ کیا اور کہا کہ معاشرے کو اس لعنت سے دور رکھنے کے لئے اقدامات جاری ہیں۔انہوں نے اپنے عزم کو دہراتے ہوئے کہا کہ نشہ کے خلاف جنگ جاری رہے گی۔سائیکالوجسٹ نے نشہ کی اقسام،اس کے معاشی اور معاشرتی زندگی پر اثرات اور اس سے پیداہونے والے بیماریوں کی تفصیلات سے آگاہ کیا اور کہا کہ ڈی ایچ کیو میں نشہ کے عادی افراد کی بحالی کے لئے سنٹر ہمہ وقت کام کررہا ہے جہاں ایسے افراد کی کونسلنگ کرکے انہیں معاشرے کا کارآمد شہری بنایا جارہا ہے۔انسپکٹر اینٹی نارکوٹکس نے منشیات فروشوں کے خلاف کاررائیوں جبکہ دیگر مقررین نے نشہ کے خلاف نفرت بیدار کرنے کے لئے آگاہی پروگرامز کا دائرہ وسیع کرنے کی ضرورت پر زور دیا۔

فیصل آباد۔ (اے پی پی) واٹر اینڈ سینیٹیشن ایجنسی فیصل آباد نے واسا کے عادی نادہندگان کے کنکشن مستقل طور پر منقطع کرنے کا اعلان کر دیا ہے اور کہا ہے کہ جن نادہندگان نے ابھی تک اپنے ذمہ واجب الادا بل جمع نہیں کروائے وہ فوری طور پر اپنے بقایا جات ادا کردیں بصورت دیگر ان کے خلاف سخت قانونی کاروائی عمل میں لائی جائے گی اور بعد ازاں کوئی عذر قابل قبول نہ ہو گا۔واسا کے ترجمان نے بتایا کہ محکمہ کا ریونیو کا شارٹ فال کم سے کم کرنے کی کوششوں کو نتیجہ خیز بنایا جا رہا ہے۔ انہوں نے ریکوری کی صورتحال پر عدم اطمینان کا اظہار کرتے ہوئے بتایا کہ متعلقہ حکام کی جانب سے ذمہ دار سٹاف کو سختی سے ہدائت کی گئی ہے کہ وہ اپنی کارکردگی بڑھانے اور محکمانہ واجبات کی سنجیدگی سے بھر پور وصولی کیلئے تمام وسائل بروئے کار لائیں تاکہ زیادہ سے زیادہ تعمیراتی و ترقیاتی منصوبوں پر عملدرآمد کیلئے اقدامات کئے جا سکیں۔ انہوں نے بتایا کہ واسا کے صرف 45سے 50فیصد صارف بل ادا کرتے ہیں جو کہ افسوسناک صورتحال ہے نیز گزشتہ ایام کے دوران سینکڑوں غیر قانونی کنکشنز کا سراغ بھی لگایا گیا ہے۔ انہوں نے بتایا کہ گزشتہ ایک ماہ میں سینکڑوں غیر قانونی کنکشنز کو بلنگ دائرے میں شامل کیا گیا ہے۔انہوں نے ایسے تمام افراد جنہوں نے غیر قانونی طور پر واسا کے کنکشن حاصل کر رکھے ہیں کو خبردار کیا ہے کہ وہ اپنے کنکشن فوری ریگولر کروا لیں ورنہ سخت قانونی کاروائی کے لئے تیار رہیں۔

فیصل آباد۔ (اے پی پی) انسپکٹر جنرل پولیس پنجاب عارف نواز خان کی خصوصی ہدایات کی روشنی میں سٹی ٹریفک پولیس فیصل آبا دنے ہیلمٹ پہننے اور عقبی شیشے لگانے کیلئے عوام میں شعوری آگاہی کی غرض سے ہزاروں پمفلٹس تقسیم کئے ہیں جبکہ ہیلمٹ نہ پہننے اور پیچھے دیکھنے والے شیشے نہ لگانے والے موٹر سائیکل، سکوٹر مالکان کے خلاف کاروائی کا آغا زکر دیا گیا ہے اور گذشتہ روزکئی افراد کے چالان بھی کئے گئے ہیں۔ سٹی ٹریفک پولیس کے ترجمان نے بتا یا کہ قبل ازیں آگاہی مہم شروع کی گئی تھی اور ہزاروں افراد کو ہیلمٹ نہ پہننے اور بیک ویو مرر نہ لگانے پر تحریری وارننگ سلپیں بھی جاری کی گئی تھیں۔ انہوں نے بتا یا کہ بیک ویو مر ر نہ ہونے کے باعث پیچھے سے آنے والی ٹریفک کو دیکھنا ممکن نہیں رہتا جس کے باعث حادثات کی شرح میں اضافہ ہو رہا ہے اور اس طرح کئی قیمتی جانیں بھی ضائع ہو جاتی ہیں۔ا نہوں نے کہا کہ آئندہ ہیلمٹ نہ پہننے اور بیک ویو مرر کے بغیر چلنے والی موٹر سائیکلوں کے ساتھ کوئی رعائت نہیں برتی جائے گی اور ان کے چالان کر کے بھاری جرمانہ بھی عائد کیا جائے گا۔

فیصل آباد۔ (اے پی پی) حکومتی ہدایات کی روشنی میں محکمہ تحفظ جنگلی حیات نے عقاب،تنور، باز و دیگر پرندوں کے غیر قانونی شکار اور سمگلنگ کو روکنے کیلئے خصوصی اقدامات کا آغاز کر دیا ہے جبکہ اس ضمن میں وائلڈ لائف ڈیپارٹمنٹ کے افسران کو خصوصی مانیٹرنگ کی بھی ہدایت کی گئی ہے جو شکاریوں اور پرندے پکڑنے، فروخت کرنے اور ان کی سمگلنگ میں ملوث افراد پر کڑی نظر رکھیں گے۔ محکمہ تحفظ جنگلی حیات کے ذرائع نے بتایاکہ جو افراد یا شکاری عقاب،تنور، باز و دیگر پرندوں کے غیر قانونی شکار یا سمگلنگ میں ملوث پائے گئے ان کے خلاف نہ صرف سخت کارروائی عمل میں لائی جائے گی بلکہ انہیں گرفتاری کے بعد بھاری جرمانے اور پانچ سال تک قید کی سزا بھی دی جا سکتی ہے۔