فیصل آباد، ڈویژنل کمشنر محمود جاوید بھٹی نے کہا ہے کہ ڈویژنل انتظامیہ کی طرف سے باصلاحیت اور ہونہار کھلاڑیوں کی جدید خطوط پر عمدہ تربیت کے علاوہ کھیلوں کا سامان فراہم کیا جا رہا ہے تاکہ انہیں اپنے کھیل کو نکھارنے میں کوئی کمی محسوس نہ ہو۔انہوں نے یہ بات ڈویژنل انتظامیہ کے زیراہتمام بوہڑانوالی گراؤنڈ میں انڈر17کرکٹ سمر ٹریننگ کیمپ میں شامل کھلاڑیوں میں کرکٹ کٹس تقسیم کرتے ہوئے کہی۔ایم پی اے چوہدری لطیف نذر،اسسٹنٹ کمشنر(جنرل)مصور نیازی،ڈویژنل سپورٹس آفیسر طارق نذیر،کرکٹ سٹار سعید اجمل،ایم این اے میاں فرخ حبیب کے بھائی میاں نبیل احمد،عبدالماجد،کرکٹ کوچ انجم مشتاق ودیگر بھی اس موقع پر موجود تھے۔ڈویژنل کمشنر نے کرکٹ کی تربیت اور مقابلوں میں بہترین کارکردگی کامظاہرہ کرنے پر کھلاڑیوں کو مبارکباد دی اور کہا کہ وہ بھرپور محنت کے ذریعے کرکٹ کے کھیل میں عبور حاصل کرکے ملک وقوم کا نام روشن کریں۔انہوں نے کہا کہ نوجوانوں کو صحت مند سرگرمیوں کی جانب راغب کرنے اور انہیں کھیلوں کی زیادہ سے زیادہ سہولیات فراہم کرنے کے حکومتی ویژن کے مطابق اقدامات کئے جارہے ہیں۔انہوں نے کہا کہ کرکٹ کے علاوہ دیگر کھیلوں کے فروغ کے لئے باصلاحیت کھلاڑیوں کو آگے لایا جائے گا جبکہ ڈویژن بھر میں کھیلوں کے گراؤنڈ کے قیام کیلئے مربوط انداز میں منصوبہ بندی کی جارہی ہے۔انہوں نے انڈر 17کرکٹ سمر ٹریننگ کیمپ کے کامیاب انعقاد کے سلسلے میں ڈویژنل سپورٹس آفیسر طارق نذیر اوران کی دیگر ٹیم کی کاوشوں کو سراہا اور کہا کہ کھیلوں کی سرگرمیوں میں مزید اضافہ کرنے کے لئے مختلف سطح کے مقابلوں کے انعقاد کا سلسلہ جاری رہنا چاہیے تاکہ نوجوانوں کو کھیلوں ہی میں مصروف رکھ کر صحت مند معاشرے کی بنیادوں کو مضبوط بنایا جاسکے۔ایم پی اے چوہدری لطیف نذر نے اظہار خیال کرتے ہوئے کرکٹ سمر ٹریننگ کیمپ کے انعقاد کو انتہائی خوش آئند قرار دیا اور کہا کہ کھیلوں کے میدان آباد کرنا وزیراعظم عمران خان کی قیادت میں پی ٹی آئی حکومت کا مشن ہے اس ضمن میں نوجوانوں کو مختلف معیاری کھیلوں میں شمولیت کے بھرپور مواقع فراہم کرنے کے مربوط پروگرام پر عملدرآمد کیا جارہا ہے۔انہوں نے کرکٹ کے فن کا بہترین اظہار کرنے پر انڈر 17کھلاڑیوں کو داددی اور کہا کہ کرکٹ کا سامان فراہم کرکے انہیں خود انحصار اورپر اعتماد بنایا گیا ہے۔کرکٹ سٹار سعید اجمل نے کرکٹ کے فروغ میں ڈویژنل کمشنر محمود جاوید بھٹی کی خصوصی دلچسپی کو سراہتے ہوئے کرکٹ سمر ٹریننگ کیمپ کو احسن قدم قرار دیا اور کرکٹ کی ہر اکیڈمی میں نوجوان کھلاڑیوں کو بلامعاوضہ تربیت فراہم کرنے کی پیش کش کی۔انہوں نے کرکٹ کے زیادہ سے زیادہ گراؤنڈ تیار کرنے کی ضرورت پر زور دیا اور کہا کہ وسیع سہولیات سے نوجوانوں کے ٹیلنٹ کو فروغ حاصل ہوگا۔ڈویژنل سپورٹس آفیسر طارق نذیر نے بتایا کہ ڈویژنل کمشنر کی ہدایت پرفیصل آباد ڈویژن کے انڈر17کھلاڑیوں کے لئے کرکٹ سمر ٹریننگ کیمپ ایک ماہ جاری رہا جس میں 200کھلاڑیوں میں سے منتخب ہونے والے 40ہونہار کھلاڑیوں نے شرکت کی۔ان کھلاڑیوں کی چار ٹیمیں تیار کرکے میچز کا انعقاد کیا گیا۔انہوں نے بتایا کہ کیمپ کے اختتام پر ان کھلاڑیوں میں کرکٹ بیٹ،پیڈ،گلوز اوردیگر سامان پر مشتمل کٹس فراہم کی گئی ہیں.
Category: فیصل آباد
فیصل آباد، ٹاسک فورس ٹیم نے چھاپہ مار کر 11 کے وی فیڈر سے ڈائریکٹ کنڈے اور ٹرانسفارمر کے ذریعے بجلی چوری پکڑ لی
فیصل آباد(نمائندہ باغی ٹی وی)فیسکو رحمے شاہ کی ٹاسک فورس ٹیم نے ایکسئین تاندلیانوالہ کی سربراہی میں چھاپہ مار کر 11کے وی فیڈر سے ڈائریکٹ کنڈے اور ٹرانسفارمر کے ذریعے بجلی چوری کا نیٹ ورک دھر لیا۔ چوری ہونے والی بجلی زیر زمین کیبل بچھا کر ملحقہ آبادی کے 10سے زائد گھروں کو مہیا کی جا رہی تھی۔ فیسکو ٹیم نے موقع سے کیبل اور25کے وی اے کا ٹرانسفارمر قبضہ میں لے لیا اور چوری میں ملوث محمد امین الیکٹریشن کے خلاف مقدمہ کے اندراج کیلئے پولیس تھانہ مریدوالا کو درخواست دے دی۔ الیکٹریشن نے فیسکو کی ٹیموں کو دھوکا دینے کیلئے گھر کی چھت پر سولر پینل بھی نصب کر رکھے تھے۔تفصیلات کے مطابق وزارت توانا ئی (پاور ڈویژن)اورچیف ایگزیکٹوفیسکومجاہداسلام باللہ کی خصوصی ہدایات پرفیسکوٹاسک فورسزاور انٹیلی جنس ٹیموں کا ریجن کے چاروں سرکلز میں بجلی چوروں کے خلاف بھرپورکریک ڈاؤن جاری ہے۔فیسکو ٹاسک فورس نے رحمے شاہ میں ڈائریکٹ کنڈا لگابجلی چوری پکڑی ہے۔ رحمے شاہ کے نواحی علاقے 544گ ب کے رہائشی الیکٹریشن محمد امین نے اپنی ورکشاپ کی چھت کے اوپر سے گزرنے والی 11کے وی کنجوانی فیڈر پر ڈائریکٹ کنڈے ڈال کر 25کے وی اے کے ایک ٹرانسفارمر کے ذریعے بجلی چوری کا نیٹ ورک بنا رکھا تھا اور بجلی پی وی سی کیبل زیر زمین بچھا کر ملحقہ آبادی کے 10گھروں کو مہیا کر رکھی تھی۔ فیسکو ٹیموں کو دھوکا دینے کیلئے اس نے چھت پر سولر پینل بھی نصب کر رکھے تھے اور یہ تاثر دے رہا تھا کہ وہ سولر سسٹم کے ذریعے پیدا ہونے والی بجلی ورکشاپ میں استعمال کر رہا ہے۔ ایس ڈی او رحمے شاہ سجاد علی نے شبہ ہونے پر فیسکو ٹاسک فورس کو اس کی ریکی پر لگا دیا۔ جنہوں نے 11کے وی فیڈر کنجوانی پر انتہائی باریک تار ڈال کر اسے 25کے وی اے ٹرانسفارمر سے جوڑ کر ہونے والی بجلی چوری کا سراغ لگا لیا۔ گذشتہ روز ایکسئین تاندلیانوالہ محمدعارف اور ایس ڈی اوسجاد نے ٹیم کے ہمراہ چھاپہ مار ا تو الیکٹریشن محمد امین نے مزاحمت کی کیبل اور ٹرانسفارمر اتارنے نہیں دیا۔ پولیس کو اطلاع دی گئی تو وہ ان کے آنے سے پہلے فرار ہو گیا۔ فیسکو ٹیم نے زیرزمین کیبل اور ٹرانسفارمر قبضہ میں لے لیا اور پولیس تھانہ مرید والا کو مقدمہ کے اندراج کیلئے درخواست دے دی ہے۔ فیسکو چیف مجاہد اسلام باللہ نے صارفین بجلی سے اپیل کی ہے کہ وہ ذمہ دار شہری ہونے کا ثبوت دیں اوراپنے گردونواح میں ہونے والی بجلی چوری کی اطلاع فوری طورپر وزارت توانائی پاور ڈویژن کی ہاٹ لائن 051-9103888،فیسکو کے ٹول فری نمبر 080066554یا اپنی متعلقہ سب ڈویژن کو دیں تاکہ بجلی چور صارفین کے خلاف فوری کارروائی کی جاسکے۔ انہوں نے کہا کہ بجلی چوری جیسے مکروہ قومی جرم کی سرکوبی کیلئے اپنا بھرپور کردار ادا کریں اورفیسکو ٹیموں کا ساتھ دیں تاکہ ملک سے اس جر م کا خاتمہ ہوسکے۔
اگر ملک اسی طرح عمران خان کے پاس رہا تو بہت نقصان ہو گا، احسن اقبال
پاکستان مسلم لیگ کے سینئر لیڈر احسن اقبال نے کہا ہے کہ اگرملک اسی طرح عمران خان کے پاس رہا توبہت نقصان ہو گا،
باغی ٹی وی کی رپورٹ کے مطابق سانگلہ ہل میں ورکرز کنونشن سے خطاب کرتے ہوئے احسن اقبال نے کہاکہ الیکشن میں ’’دھاندلا‘‘ ہوا لیکن ہم نے دھرنے نہیں دئیے، ہم نہیں چاہتے تھے کہ ملک کا نظام رک جائے، ہمیں بدنظمی سےبچناہے،ہم بہت صبروالے ہیں، ہم نے4سال میں12ہزارمیگاواٹ بجلی پیداکی.
احسن اقبال نے کہاکہ اناڑی وزیراعظم نےثابت کیاکہ ملک کوکسی دشمن کی ضرورت نہیں، سانگلہ ہل میں ہونے والے کنونشن میں شہریوں کی کثیر تعداد نے شرکت کی.
فیصل آباد، اشیائے ضروریہ کے سرکاری طور پر مقررکردہ نرخوں پر سختی سے عملدرآمد کرانے کی ہدایت
فیصل آباد، ضلعی انتظامیہ کی زیر نگرانی اشیائے ضروریہ کے سرکاری طور پر مقررکردہ نرخوں پر سختی سے عملدرآمد کرایاجائے گا اس ضمن میں قیمتوں میں بلاجواز اضافہ کے منفی رحجان کی حوصلہ شکنی کی جائے گی لہذا دکاندار صارفین سے طے شدہ قیمتیں ہی وصول کریں بصورت دیگر ناجائز منافع خوروں کو قانون شکنی پر سزا بھگتنا پڑے گی۔یہ بات ایڈیشنل ڈپٹی کمشنر(ریونیو)طارق خاں نیازی نے ڈسٹرکٹ پرائس کنٹرول کمیٹی کے اجلاس کی صدارت کرتے ہوئے کہی۔اسسٹنٹ کمشنرز شمائلہ منظور،نازیہ موہل،خرم شہزادبھٹی،فیصل سلطان،ڈپٹی ڈائریکٹر پنجاب فوڈ اتھارٹی مقدس رانی،ایکسٹرااسسٹنٹ ڈائریکٹر زرعی مارکیٹنگ عبدالرحمن،ڈی او انڈسٹریز خالد محمود،سیکرٹری مارکیٹ کمیٹیز،لائیوسٹاک،خوراک اور دیگر محکموں کے افسران کے علاوہ تاجر تنظیموں کے نمائندے راؤہاشم،شاہد ممتاز باجوہ اور صارفین کے نمائندے بھی موجود تھے۔اجلاس کے دوران مختلف اشیائے ضروریہ کی موجودہ بازاری قیمتوں اور ان کی دستیابی کے نرخوں کے اتار چڑھاؤ کا جائزہ لیا گیا اور صدر اجلاس نے کہا کہ تھوک وپرچون فروشوں،دکانداروں وتاجروں اور صارفین کی مشاورت سے اشیائے ضروریہ کی قیمتوں کو حتمی شکل دی جارہی ہے جس کی خلاف ورزی کسی صورت نہیں ہونی چاہیے۔انہوں نے دکانداروں کے نمائندوں سے کہا کہ وہ تعاون کریں تاکہ کارروائی کی نوبت نہ آئے۔
فیصل آباد، گھریلو کارکنان کی رجسٹریشن کا قانون لانے کا اعلان
فیصل آباد، صوبائی وزیر محنت وانسانی وسائل انصر مجید خاں نے کہا ہے کہ گھریلو کارکنان کی رجسٹریشن کا قانون موجود ہ پنجاب حکومت کا انقلابی قدم ہے جس کی بدولت نہ صرف گھروں میں کام کرنے والے کارکنوں کو سماجی تحفظ حاصل ہوگا بلکہ گھروں کے مالکان کو تصدیق شدہ/ رجسٹرڈ افراد کو ملازم رکھنے میں آسانی و سہولت ہوگی۔انہوں یہ بات گھریلو ملازمین کی رجسٹریشن کی افتتاحی تقریب سے خطاب کرتے ہوئے کہی جو جڑانوالہ روڈ پر ایک بینکوئٹ ہال میں منعقد ہوئی۔صوبائی پارلیمانی سیکرٹری برائے لیبر شکیل شاہد،ارکان صوبائی اسمبلی لطیف نذر،میاں وارث عزیز،کمشنر سوشل سیکورٹی ثاقب منان،ڈویژنل کمشنر محمود جاویدبھٹی،ایڈیشنل ڈپٹی کمشنر(فنانس)عاصمہ اعجاز چیمہ،اسسٹنٹ کمشنر(جنرل)مصور نیازی،ایس پی طارق سکھیرا،صدر چیمبر آف کامرس سید ضیاء علمدار حسین،ڈائریکٹرز سوشل سیکورٹی نارتھ،ایسٹ،ویسٹ محمد حسان،سردارشہزاد،احسان الحق،ڈائریکٹر لیبر ملک منور اعوان ودیگر افسران کے علاوہ مزدور رہنما بابا لطیف انصاری،محمد اسلم وفا ودیگر نمائندے اور مزدوروں و گھریلو ملازمین مرد و خواتین کی کثیر تعداد تقریب میں موجود تھی۔صوبائی وزیر محنت و انسانی وسائل نے کہا کہ گھریلو ملازمین کی رجسٹریشن کا قانون وزیر اعظم عمران خان کی غریب پروری اور کارکنوں کی فلاح وبہبود کے ویژن کی تکمیل ہے جسے ابتدائی طور پر فیصل آباد،لاہور،راولپنڈی اورملتان کے اضلاع سے شروع کیا جارہا ہے اور مستقبل قریب میں اسکا دائرہ پورے صوبہ پنجاب تک پھیل جائیگا۔انہوں نے بتایا کہ اس قانون کی بدولت گھریلو ملازمین کو دیگر ورکرز کی طرح صحت عامہ سمیت دیگرجملہ مراعات حاصل ہوں گی کیونکہ قبل ازیں یہ ورکرزگھروں کی چار دیواریوں کے اندر اپنی خواہشات کو دبا کر زندگی بسر کرنے پر مجبور تھے اب انہیں بھی سماجی حقوق حاصل ہوں گے۔انہوں نے کہا کہ گھریلو ملازمین کے حقوق کے تحفظ کا یہ سفر جاری رہے گا اور انہیں تعلیمی سہولیات کے علاوہ ان کی صحت کی سکریننگ اور مختلف متعدی بیماریوں سے بچاؤ کے لئے حفاظتی ٹیکے لگائے جائیں گے۔انہوں نے صنعتکاروں،تاجروں،کاروباری افراد سے کہا کہ وہ اس قانون پر عملدرآمد کے لئے تعاون کریں اور شہری گھریلو ملازمین کی رجسٹریشن ضرور کرائیں تاکہ آجر اور اجیر کے حقوق کا تحفظ ممکن ہوسکے۔صوبائی وزیر نے کہا کہ وزیراعظم عمران خان اور وزیراعلیٰ پنجاب سردار عثمان بزدار کی قیادت میں موجودہ حکومت مزدوروں کے مفادات کے تحفظ اور انہیں آسودہ زندگی بسر کرنے کے مواقع فراہم کرنے پر خصوصی توجہ دے رہی ہے کیونکہ ان ورکرز کے خون پسینے کی محنت سے ملک میں معیشت کا پہیہ چلتا ہے جنہیں کسی صورت نظر اندا زنہیں کیا جاسکتا۔انہوں نے کہا کہ مزدوروں کی فلاح وبہبود کے لئے ورکرز ویلفیئر فنڈ میں مزید اصلاحات لائیں گے جبکہ قانون سازی کے ذریعے کم سے کم اجرت کی ادائیگی کویقینی بنایا جائے گا۔انہوں نے کہا کہ کرپشن کا خاتمہ ہماری حکومت کی اولین ترجیح ہے اور انفارمیشن ٹیکنالوجی کے ذریعے لیبر ڈیپارٹمنٹ کے انتظامی امور کو جدت سے ہمکنار کیاجائے گا تاکہ شفافیت اور اعلیٰ نظم ونسق کو برقرار رکھا جاسکے۔انہوں نے یقین دلایا کہ لیبر قوانین پر عملدرآمد کویقینی بنائیں گے۔صوبائی وزیر محنت نے میڈیا نمائندگان سے بات چیت کرتے ہوئے کہا کہ گھریلو ملازمین کی رجسٹریشن کے قانون کی بدولت ملازمین پر تشدد کے واقعات پرقابو پایاجاسکے گا۔انہوں نے کہا کہ گھریلو ملازمین پر تشددیا چائلڈ لیبر کو برداشت نہیں کیا جاسکتا اس سلسلے میں ظلم و زیادتی کرنے والے قانون کی گرفت سے نہیں بچ سکتے اور کوئی بھی قانون سے بالا تر نہیں ہے۔کمشنر سوشل سیکورٹی ثاقب منان نے گھریلوملازمین کی رجسٹریشن کے قانون کے نمایاں پہلوؤں سے آگاہ کرتے ہوئے بتایا کہ اس قانون کا اطلاق انتہائی سادہ اور آسان بنایا گیا ہے اورگھریلو ملازمین کی موبائل اپلیکیشن کے ذریعے رجسٹریشن کرائی جاسکتی ہے۔انہوں نے بتایا کہ ایک اندازے کے مطابق پنجاب میں پونے سات لاکھ گھریلو ملازمین کام کررہے ہیں جنکی رجسٹریشن سے انہیں سماجی تحفظ حاصل ہوگا جنہیں قانون کے تحت ماہانہ تنخواہ،اوقات کار،چھٹیوں کا حق حاصل ہوگا اور آجرواجیر کے مابین تنازعات حل ہوسکیں گے۔انہوں نے بتایا کہ اب تک 1217گھریلو ملازمین کی رجسٹریشن کی جاچکی ہے اور تیزی سے عملدرآمد کے نتیجہ میں آئندہ ماہ کے اندر یہ تعداد 50ہزارہوجائیگی۔انہوں نے مستقبل کی منصوبہ بندی کے بارے میں بتایا کہ اس قانون پر موثر انداز میں عملدرآمد کے لئے صوبائی ٹاسک فورس کام کرے گی جبکہ دیگر متعلقہ اداروں کی معاونت بھی حاصل کی جائے گی۔صوبائی پارلیمانی سیکرٹری شکیل شاہد نے کہا کہ وزیراعظم عمران خاں اوروزیراعلیٰ پنجاب سردار عثمان بزدار مزدورں کی زندگی میں خوشحالی لانے کے لئے کوشاں ہیں کیونکہ یہی طبقہ معاشی وسماجی تبدیلی کے لئے انقلابی کردار ادا کررہا ہے۔انہوں نے گھریلو ملازمین کی رجسٹریشن کے قانون کو خوش آئندقرار دیتے ہوئے کہا کہ اس سے قبل کسی حکومت کو گھریلو کارکنوں کے حقوق کے تحفظ کا خیال نہیں آیا۔ڈویژنل کمشنر محمود جاوید بھٹی نے کہا کہ مہذب معاشرے میں جبری مشقت کا تصور نہیں کیا جاسکتا اور کارکنوں کے تحفظ کے قوانین پر عملدرآمد سے سماجی ترقی کی رفتاربہتر ہوگی۔انہوں نے بچوں کی تعلیم وتربیت اور بہترین پرورش کرنے کی ضرورت پر زور دیتے ہوئے کہا کہ بہبود آبادی کے پروگرام پر عمل کرکے بچوں کا مستقبل روشن بنایا جاسکتا ہے۔این جی او”پتن“کی نمائندہ پروین لطیف انصاری نے گھریلو کارکنان کی رجسٹریشن کے قانون کے نفاذ اور عملدرآمد کوقابل تحسین قدم قرار دیتے ہوئے کہا کہ اس ضمن میں آگاہی مہم کا دائرہ وسیع ہونا چاہیے۔اس موقع پر گھریلو ملازمین کی رجسٹریشن کے لئے خصوصی کیمپ لگایا گیا تھا جس پر ان کی رجسٹریشن کے طریقہ کار کے بارے میں آگاہی دی گئی۔
۔۔۔///۔۔۔فیصل آباد ٹیکسٹائل پر کوئی نیا ٹیکس نہیں لگایا، چیئرمین ایف بی آر
فیصل آباد: فیڈرل بورڈ آف ریونیو (ایف بی آر) کے چیئرمین شبر زیدی کا کہنا ہے کہ ٹیکسٹائل پر کوئی نیا ٹیکس نہیں لگایا، برآمدات کو پہلے بھی استثنیٰ تھا آج بھی ہے۔
تفصیلات کے مطابق فیڈرل بورڈ آف ریونیو کے چیئرمین شبر زیدی نے پریس کانفرنس کرتے ہوئے کہا کہ زیرو ریٹنگ کی مراعات پہلی مرتبہ ختم نہیں ہوئیں۔ آج جو ٹیکسٹائل سیکٹر کی صورتحال ہے اس کے مدنظر فیصلہ کیا گیا، یہاں آنے کا مقصد ہے کہ زیرو ریٹنگ مراعات کے خاتمے پر بات کی جائے۔
شبر زیدی کا کہنا تھا کہ ٹیکسٹائل سیکٹر کے مختلف اسٹیک ہولڈرز سے بات چیت ہوئی، جو بھی بہتر حل نکلے گا اس کی طرف جائیں گے۔ آگے بڑھنا ہے اور تمام وسائل بروئے کار لائیں گے۔ ایف بی آر میں بڑے پیمانے پر تقرر و تبادلے کیے گئے ہیں، نیا ایف بی آر ان ہی افراد سے بنے گا جو آج موجود ہیں۔
انہوں نے کہا کہ لوگوں کی شکایت ہے ایف بی آر کی جانب سے ہراساں کیا جاتا ہے، ایف بی آر والے کہتے ہیں ہم جائز ٹیکس کے لیے بات کرتے ہیں۔ جو بھی ہراساں کرنے میں ملوث ہوگا اسے ادارے میں نہیں رہنا چاہیئے، آہستہ آہستہ آٹو میشن پر جائیں گے، انسانی عمل دخل کم کریں گے۔ آتے ہی کہا تھا کسی کا بینک اکاؤنٹ بغیر وضاحت منجمد نہیں کیا جائے گا، سیلز ٹیکس رجسٹریشن سے متعلق بہت شکایات تھیں اسے آٹو میٹ کر دیا۔
شبر زیدی کا کہنا تھا کہ فیصل آباد کے ابھی بھی چند کیسز زیر التوا ہیں، پہلی والی ایمنسٹی اسکیم کراچی اسلام آباد کی بنیاد پر تھی۔ موجودہ ایمنسٹی اسکیم کی پذیرائی ملک بھر میں ہوئی ہے۔ کسی قسم کا نیا ٹیکس نہیں لگایا، لگایا ہے تو بتائیں۔ یہ تاثر غلط ہے کہ کوئی نیا ٹیکس لگایا ہے۔
انہوں نے کہا کہ ہمارا کام صرف وقتی طور پر چیزوں کو ٹھیک کرنا ہے، بڑا آسان طریقہ تھا کہ سیلز ٹیکس ریٹ بڑھا دیا جاتا مگر ہم نے ایسا نہیں کیا، روپے کی قدر میں کمی کے باعث مہنگائی ہوئی۔ روپے کی قدر میں کمی کی وجوہات گورنر اسٹیٹ بینک بتا سکتے ہیں۔ پاکستان کو تاریخی جاری اور تجارتی خساروں کا سامنا ہے۔فیصل آباد، پبلک ٹرانسپورٹس سٹینڈ میں مسافروں کے لئے ضروری سہولیات کی فراہمی کویقینی بنانے کی ہدایت
فیصل آباد، حکومت پنجاب کے احکامات اور ڈویژنل کمشنر محمود جاوید بھٹی کی ہدایات پر پبلک ٹرانسپورٹس سٹینڈ میں مسافروں کے لئے ضروری سہولیات کی فراہمی کویقینی بنانے کے لئے مانیٹرنگ کا عمل جاری ہے۔سیکرٹری آرٹی اے ضمیر حسین نے مختلف ٹرانسپورٹ اڈوں کا دورہ کیا اور نمایاں جگہوں پر کرایہ نامے آویزاں،صاف ستھرے پبلک ٹائلٹس،بزرگ ومعذورافراد کیلئے ریمپس اور دیگر سہولیات کو چیک کیا۔انہوں نے ٹرانسپورٹرز سے کہا کہ وہ مسافروں کی سہولیات کاخیال رکھیں جس میں کوتاہی کی کوئی گنجائش نہیں۔انہوں نے بتایا کہ چیکنگ کا عمل روزانہ کی بنیاد پر جاری رہے گا اور عدم تعمیل کی صورت میں کارروائی کی جائے گی۔انہوں نے مسافروں سے بھی ملاقات کی اور ان سے کرایوں پر عملدرآمد اور دیگر سہولیات کے بارے میں دریافت کرتے ہوئے کہا کہ وزیر اعلیٰ پنجاب سردار عثمان بزدار نے پبلک ٹرانسپورٹ اڈوں میں مسافروں کے بیٹھنے،پینے کے صاف پانی،کرایہ نامے آویزاں،صاف پبلک ٹائلٹس سمیت دیگر سہولیات کی فراہمی کویقینی بنانے کا حکم دیا ہے جس پر سو فیصد عملدرآمد کرایاجارہا ہے۔
بجٹ میں اضافے کیخلاف فیصل آباد میں تاجروں کی طرف سے مکمل ہرتال
فیصل آباد میں تاجر تنظیموں نے مہنگائی اور بجٹ میں نئے ٹیکسوں کے نفاذ کے خلاف دو روزہ شٹر ڈاؤن کی کال دیدی، شہر میں اہم کاروباری مراکز بند ہیں۔
فیصل آباد انجمن تاجران سپریم کونسل کی جانب سے 8 اور 9جولائی کو مکمل شٹر ڈاؤن ہڑتال کی کال دی گئی ہے جس پر آج شہر کے مرکزی آٹھ بازار، ملحقہ کپڑے کی بڑی مارکیٹیں، غلہ منڈی اور دیگر کاروباری مراکز بند ہیں تاہم کچھ مارکیٹیوں میں چند دکانیں اور ہوٹلز کھلے ہیں۔کونسل کے سرپرست اعلیٰ اسلم بھلی کا کہنا ہے کہ دو روزہ ہڑتال کا فیصلہ شہر بھر کے کاروباری مراکز کی نمائندہ تنظیموں کی مشاورت اور دکانداروں کے اصرار پر کیا ہے۔
انہوں نے کہا کہ 17 فیصد سیلز ٹیکس نافذ کرنے سے کاروبار ٹھپ ہو گئے ہیں، ہول سیلرز اور پرچون فروشوں کا شناختی کارڈ فراہم کرکے سیلز ٹیکس کے نظام میں فوری طور پر رجسٹرڈ ہونا ممکن نہیں ہے۔
فیصل آباد سے بھی حج پرواز روانہ
فیصل آباد سے حج آپریشن کا آغاز کردیا گیا 108عازمین حج کو لے کر پی آئی اے کی پہلی پرواز جدہ روانہ ہو گئی.
باغی ٹی وی رپورٹ کے مطابق فیصل آباد سے حج آپریشن کا آغاز کردیا گیا108عازمین حج کو لے کر پی آئی اے کی پہلی پرواز جدہ روانہ ہو گئی. پاکستان سے 78 ہزار سے زائدعازمین کو 300 پروازوں سے حجاز مقدس پہنچایا جائیگا جبکہ چار پروازوں سے ایک ہزار 300 عازمین حجاز مقدس روانہ ہونگے۔ اسکے علاوہ 300خصوصی حج اورشیڈول پروازیں جدہ و مدینہ کیلئے چلائی جا رہی ہیں۔
کراچی سے 62، اسلام آباد سے 46، لاہور سے 51، پشاور سے 29، سیالکوٹ سے 12، ملتان سے 21، فیصل آباد سے 17 اور کوئٹہ سے 56 پروازیں عازمین کو حجاز مقدس پہنچائیں گی۔
پی آئی اے کا قبل ازحج آپریشن پانچ اگست کو مکمل ہوجائے گا جبکہ بعد از حج آپریشن کا آغاز 17 اگست سے ہوگا اور اختتام 14 ستمبر کو ہوگا۔
شہریار آفریدی کی پریس کانفرنس جھوٹ کا پلندہ ہے، رانا ثناء اللہ کی اہلیہ نبیلہ کا ردعمل
مسلم لیگ ن کے رہنما رانا ثناءاللہ کی اہلیہ نبیلہ ثناءاللہ نے وزیرمملکت شہریارآفریدی کی پریس کانفرنس پرردِعمل ظاہر کرتے ہوئے کہا ہے کہ آج کی حکومتی پریس کانفرنس جھوٹ کا پلندہ ہے،
باغی ٹی وی کی رپورٹ کے مطابق نبیلہ ثناءاللہ نے کہاکہ میں اور میری بیٹی ہمیشہ دوسری گاڑی میں سفر کرتیں تھیں، آج جب رانا ثنا اللہ سے ملاقات کی تو اُنکی طبیعت ناساز تھی، چیک اپ کےلیےاُنکےذاتی ڈاکٹرزکوبھی بورڈمیں شامل ہوناچاہیے،
انہوں نے کہاکہ میں بُلٹ پروف گاڑی میں سفرنہیں کرتی میں بلڈپریشرکی مریضہ ہوں. الزام کی تردیدکرتی ہوں کہ میں نےکبھی رانا ثنا ءاللہ کی گاڑی میں لمبا سفر کیا ہو، واضح رہے کہ رانا ثناء اللہ کو گاڑی میں ہیروئن سمگل کرنے کے الزام میں گرفتار کیا گیا ہے اور اے این ایف کی جانب سے دعویٰ کیا گیا ہے کہ ان کی گاڑی سے کروڑوں روپے مالیت کی ہیروئن برآمد ہوئی ہے.
