Category: گوجرانوالہ

گوجرانوالہ،باغی ٹی وی( نامہ نگار محمد رمضان نوشاہی)الیکشن کمیشن آف پاکستان خواجہ سراء برادری کے حقوق کے تحفظ اور ان کی انتخابی عمل میں شمولیت کو یقینی بنانے کے لیے سنجیدہ اقدامات کر رہا ہے۔ ان خیالات کا اظہار ڈسٹرکٹ الیکشن کمشنر وزیر آباد عمران ظفر نے ووٹر ایجوکیشن کمیٹی کے اجلاس میں کیا، جس کا مقصد خواجہ سراء برادری کو انتخابی عمل میں فعال شرکت کی ترغیب دینا اور ان کے حقوق کے بارے میں آگاہی فراہم کرنا تھا۔

اجلاس میں ایرش خان (نمائندہ خواجہ سراء برادری) نے اپنے مسائل اور خدشات کا اظہار کیا، خاص طور پر شناختی کارڈ بنوانے کے عمل میں مشکلات پر روشنی ڈالی۔ اس موقع پر الیکشن کمیشن کے نمائندوں نے ان مسائل کے حل کے لیے اقدامات کی یقین دہانی کرائی اور خواجہ سراء برادری کو انتخابی عمل میں بھرپور شرکت کی اہمیت پر زور دیا۔

اس میٹنگ میں آفتاب احمد (الیکشن آفیسر)، مظفر جاوید بھٹی (ڈپٹی ڈائریکٹر لوکل گورنمنٹ)، نازیہ منشاء (ڈپٹی ڈائریکٹر ایجوکیشن)، راحت زمرد اور ارسلان چیمہ نے بھی شرکت کی اور الیکشن کمیشن کی ووٹر ایجوکیشن مہم کو سراہا۔

گوجرانوالہ،باغی ٹی وی( نامہ نگار محمد رمضان نوشاہی) کمشنر گوجرانوالہ سید نوید حیدر شیرازی نے کہا ہے کہ حکومت پنجاب کا فوکس گورننس کے معیار کو بہتر بنانا ہے، اور وزیر اعلیٰ پنجاب مریم نواز کے 83 انشی ایٹوز کے تحت اضلاع کی ہفتہ وار رینکنگ کی جاتی ہے۔ وہ سول سروسز اکیڈمی کے 52 ویں کامن کے زیر تربیت افسران سے خطاب کر رہے تھے، جس میں ڈپٹی کمشنر نوید احمد، ایڈیشنل کمشنر کوآرڈی نیشن محمد شفیق اور دیگر اعلیٰ حکام بھی موجود تھے۔

کمشنر سید نوید حیدر شیرازی نے کہا کہ گوجرانوالہ ڈویژن تاریخی اہمیت کا حامل ہے، یہاں سکھ برادری کے مقدس مقامات جیسے کرتار پور، چیلیاں والا اور روہڑی صاحب واقع ہیں، جہاں رواں سال ہزاروں سکھوں نے زیارت کی۔ انہوں نے مذہبی سیاحت کے فروغ کے لیے کرتار پور میں شاپنگ سنٹر، ہوٹل اور دیگر سہولتوں کی منصوبہ بندی کا بھی ذکر کیا۔

انہوں نے مزید بتایا کہ گوجرانوالہ ڈویژن میں 993 ترقیاتی منصوبوں پر کام جاری ہے جن میں 265 ارب روپے سے زائد کی لاگت آئی ہے، جبکہ رواں مالی سال کے لیے 45 ارب 66 کروڑ روپے کے فنڈز جاری کیے گئے ہیں۔ ان منصوبوں میں تعلیمی اداروں جیسے گوجرانوالہ یونیورسٹی، رسول یونیورسٹی، ویمن یونیورسٹی اور دیگر شامل ہیں۔

کمشنر نے کہا کہ تجاوزات کے خلاف بلا تفریق کارروائیاں جاری ہیں، اور سیف سٹی پراجیکٹ کی تکمیل سے امن و امان کی صورتحال مزید بہتر ہو گی۔ ساتھ ہی ساتھ، گوجرانوالہ میں جی ٹی روڈ کو سگنل فری کوریڈور بنانے اور جدید الیکٹرک بسوں کی فراہمی کا منصوبہ بھی جاری ہے۔

انہوں نے گوجرانوالہ میں صفائی کے نظام کو مزید بہتر بنانے کے لیے ستھرا پنجاب پروگرام کے تحت سالڈ ویسٹ مینجمنٹ سسٹم کو آؤٹ سورس کر دیا ہے، اور رورل علاقوں میں بھی صفائی کی سہولت فراہم کی جا رہی ہے۔

سیشن کے دوران زیر تربیت افسران نے مختلف شعبوں سے متعلق سوالات کیے، جن کا کمشنر نے تفصیل سے جواب دیا۔

گوجرانوالہ (باغی ٹی وی، نامہ نگار محمد رمضان نوشاہی) فتح والا مرکز، قلعہ دیدار سنگھ میں یومِ کاشتکاران کے سلسلے میں خصوصی پروگرام کا انعقاد کیا گیا، جس کی صدارت ڈپٹی ڈائریکٹر زراعت توسیع ڈاکٹر جاوید اختر اور پرنسپل ایگریکلچر آفیسر/ اسسٹنٹ ڈائریکٹر زراعت (توسیع) محمد اعظم مغل نے کی۔

اس تقریب میں ڈپٹی ڈائریکٹر زراعت توسیع ڈاکٹر جاوید اختر، ریجنل ہیڈ این آر ایس پی امجد علی بخآری، زرعی ماہرین حافظ عنایت اللہ سمیت علاقے بھر کے ترقی پسند کاشتکاروں نے بڑی تعداد میں شرکت کی۔

خطاب کرتے ہوئے ڈاکٹر جاوید اختر اور محمد اعظم مغل نے کہا کہ وزیر اعلیٰ پنجاب محترمہ مریم نواز شریف کسانوں کی فلاح و بہبود کے لیے متعدد اقدامات کر رہی ہیں، جن میں کسان کارڈ، گرین ٹریکٹر اسکیم، سولرائزیشن اور گندم کی پیداوار بڑھانے کے مقابلے شامل ہیں۔

ماہرین نے کسانوں کو ہدایت کی کہ محکمہ زراعت (توسیع) کی سفارشات پر عمل کرکے ہی بہتر پیداوار حاصل کی جا سکتی ہے۔

امجد علی بخآری نے اپنے خطاب میں کہا کہ ایسے تربیتی پروگرام کسانوں کے لیے نہایت اہم ہیں، کیونکہ ان میں اچھی پیداوار کے سنہری اصول بتائے جاتے ہیں۔ انہوں نے NRSP کے تحت کسانوں کے لیے جاری فلاحی منصوبوں پر بھی تفصیل سے روشنی ڈالی۔

محمد اعظم مغل نے کسانوں کو خشک سالی کے اثرات کم کرنے اور کھادوں کے مؤثر استعمال پر آگاہ کیا اور جدید زرعی تکنیکوں پر روشنی ڈالی۔

پروگرام کے آخر میں زرعی ماہرین نے کاشتکاروں کے سوالات کے جوابات دیے اور انہیں جدید زرعی طریقوں سے متعلق رہنمائی فراہم کی۔
یہ تقریب کسانوں کے لیے نہایت مفید ثابت ہوئی، جہاں انہیں جدید زرعی ٹیکنالوجی، حکومتی مراعات اور زیادہ پیداوار کے طریقے سیکھنے کا موقع ملا۔

گوجرانوالہ (باغی ٹی وی، نامہ نگار محمد رمضان نوشاہی)یونین کونسل راہوالی شرقی میں چند نام نہاد سیاسی اشرافیہ اور دیہاڑی بازوں کی جانب سے سیکرٹری یونین کونسل عابد وڑایچ کے خلاف ظلم و زیادتیوں کا سلسلہ عروج پر پہنچ چکا ہے۔ تفصیلات کے مطابق عابد وڑایچ نے ہمیشہ میرٹ کو ترجیح دی ہے اور غریب عوام کا حق دینے پر یقین رکھا ہے۔ ان کا کہنا ہے کہ "میرے لیے غریب و امیر سب برابر ہیں، اور جو غریب عوام کا حق ہے، وہ انہیں ضرور ملنا چاہیے۔”

سیاسی اشرافیہ کے مطابق، ان کا کہنا ہے کہ "ہمارے ٹیلی فون کے بغیر کسی کا کام نہ کیا جائے، اور جو ہم ترجیح دیں، اس کا کام کیا جائے۔” ان کا مقصد صرف اور صرف اپنے ذاتی مفادات کے لیے سیکرٹری یونین کونسل کو اپنا غلام بنانا ہے، جیسا کہ سابقہ ادوار میں ہوتا رہا کہ صرف منظور نظر افراد کے کام کیے جاتے تھے، جبکہ غریب عوام کے ساتھ ظلم کیا جاتا تھا۔ عابد وڑایچ نے اس روایتی سسٹم کو توڑتے ہوئے میرٹ پر کام کیا۔

گزشتہ روز راہوالی کی غیور عوام نے اس سیاسی اشرافیہ کے خلاف بھرپور احتجاج کیا، جس کی سربراہی عظیم شرافت اور انسانیت کے علمبردار رانا عظیم خان، حافظ سلمان نمبردار اور واجد کھوکھر نے کی۔ حافظ سلمان نمبردار نے کہا، "یہ جھوٹے چوہدری اب دہاڑی نہیں لگا پاتے، اور ان کا مقصد صرف میرٹ کو دبانا ہے۔” احتجاج کے دوران عوام نے ان نام نہاد سیاسی اشرافیہ کے خلاف نعرے بازی کی اور سیکرٹری یونین کونسل عابد وڑایچ کے حق میں بھی نعرے لگائے۔

عوام نے ایم پی اے بلال فاروق تارڑ اور ڈائریکٹر لوکل گورنمنٹ سے درخواست کی کہ عابد وڑایچ کو بحال کیا جائے اور ان مفاد پرست عناصر کے کہنے پر انہیں تبدیل نہ کیا جائے۔

گوجرانوالہ باغی ٹی وی (نامہ نگار محمد رمضان نوشاہی)سید محتشم حسین بخاری کنگ ایڈورڈ میڈیکل کالج میں 96.08% نمبروں کے ساتھ میرٹ پر سیلیکٹ

سید لعل حسین شاہ کے پوتے اور معروف ماہر تعلیم سید مقصود حسین شاہ کے صاحبزادے، سید محبوب حسین شاہ، سید مطلوب حسین شاہ، سید مخدوم حسین شاہ، سید مسعود حسین شاہ، سید محفوظ حسین شاہ اور ڈپٹی ڈائریکٹر تعلقات عامہ گوجرانوالہ منور حسین کے بھتیجے سید محتشم حسین بخاری نے 96.0879 فیصد نمبروں کے ساتھ پنجاب کے سرکاری میڈیکل کالجز میں ایم بی بی ایس کے داخلوں کی پہلی سلیکشن لسٹ میں میرٹ پر سیلیکٹ ہو کر ایک اہم سنگ میل عبور کیا ہے۔ وہ اوپن میرٹ سیٹوں پر کنگ ایڈورڈ میڈیکل کالج لاہور میں سب سے زیادہ 96.0727 فیصد نمبروں کے ساتھ سیلیکٹ ہوئے ہیں، جو کہ اس کالج کی پذیرائی اور معیار کی نشاندہی کرتا ہے۔

یاد رہے کہ امسال سرکاری میڈیکل کالجز کے لیے کم سے کم میرٹ 94.3621 فیصد تھا، اور سید محتشم حسین نے 96.0879 نمبروں کے ساتھ داخلے کے لیے منتخب ہو کر اپنے اہل خانہ اور علاقے کا نام روشن کیا ہے۔ بھتیجے کی شاندار کامیابی پر سید مطلوب حسین شاہ اور ڈپٹی ڈائریکٹر تعلقات عامہ منور حسین نے کنگ ایڈورڈ میڈیکل کالج میں داخلہ ملنے پر خوشی کا اظہار کرتے ہوئے کہا کہ یہ ایک بڑا اعزاز ہے کیونکہ حکومتی سیکٹر میں یہ ادارہ پہلے نمبر پر آتا ہے، جہاں صرف ذہین اور محنتی طلباء ہی میرٹ کی بنیاد پر داخلہ حاصل کر سکتے ہیں۔

انہوں نے سید مقصود حسین شاہ اور ان کے ہونہار صاحبزادے سید محتشم حسین بخاری کو دلی مبارکباد پیش کی اور ان کے لیے نیک تمناؤں کے ساتھ دعا گو ہوئے کہ اللہ پاک انہیں مستقبل میں مزید کامیابیوں سے نوازے اور دکھی انسانیت کی خدمت کے جذبے سے سرشار کرے۔ آمین۔

سرگودھا ،باغی ٹی وی(ملک شاہنواز جالپ)کمشنر جہانزیب اعوان کی زیر صدارت اجلاس، دھی رانی اور ستھراء پنجاب پروگرام کی پیشرفت کا جائزہ

کمشنر سرگودھا جہانزیب اعوان کی زیر صدارت ڈی سی آفس کے کمیٹی روم میں اہم اجلاس کا انعقاد کیا گیا جس میں حکومت پنجاب کے دہی رانی اور ستھراء پنجاب پروگرامز کی پیشرفت کا جائزہ لیا گیا۔ اجلاس میں ڈپٹی کمشنر فروہ عامر، ڈی پی او توقیر محمد نعیم، ایڈیشنل ڈپٹی کمشنر (ریونیو) عبدالستار خان، اسسٹنٹ کمشنر عثمان غنی، بیت المال کی آفیسر شعبانہ افضل، میونسپل کمیٹی اور میرج ہالز کی انتظامیہ نے شرکت کی۔

کمشنر سرگودھا نے اجلاس سے خطاب کرتے ہوئے کہا کہ ضلع میں صفائی ستھرائی کے انتظامات پر کسی قسم کی کوتاہی ہرگز برداشت نہیں کی جائے گی۔ انہوں نے مزید کہا کہ ہسپتالوں میں عوام الناس کو بہترین سہولتیں فراہم کی جائیں اور ڈاکٹرز کی حاضری اور صفائی کے نظام کو بھی یقینی بنایا جائے۔

ڈپٹی کمشنر فروہ عامر نے کمشنر جہانزیب اعوان کو دہی رانی پروگرام کی پیشرفت کے بارے میں تفصیلی بریفنگ دی اور پروگرام کی کامیابی اور اس کے اثرات پر روشنی ڈالی۔

گوجرانوالہ (نامہ نگار) باغی ٹی وی کی 13ویں سالگرہ کی تقریب مقامی دفتر میں منعقد ہوئی، جس کی میزبانی نامہ نگار محمد رمضان نوشاہی نے کی۔ تقریب میں سالگرہ کا کیک کاٹا گیا، جس میں معزز شخصیات نے شرکت کی، جن میں عطا الرحمن صدیقی (ورک آئس کریم والے)، اعجاز صاحب، محمد عامر سیٹھ، سیٹھ محمد مستنصر، استاد محمد طارق (سینٹری والے)، خرم شہزاد سوہل (سوہل یونائٹڈ سینٹری والے) اور منشی احد کریمی شامل تھے۔

اس موقع پر شرکاء نے کہا کہ باغی ٹی وی نے ہمیشہ مظلوموں کی آواز اعلیٰ ایوانوں تک پہنچانے میں نمایاں کردار ادا کیا ہے۔ انہوں نے محمد رمضان نوشاہی کی صحافتی خدمات کو سراہتے ہوئے کہا کہ وہ غریب اور مستحق افراد کے ساتھ کھڑے رہنے کی شاندار روایت کو برقرار رکھے ہوئے ہیں۔

تقریب کے دوران یہ بھی کہا گیا کہ باغی ٹی وی، مشہور اینکرپرسن اور سینئر صحافی مبشر لقمان کی قیادت میں، ڈیجیٹل میڈیا کے میدان میں نمایاں کامیابیاں حاصل کر رہا ہے اور عوامی مسائل اجاگر کرنے میں اہم کردار ادا کر رہا ہے۔