Category: گوجرانوالہ

گوجرانوالہ ،باغی ٹی وی( نامہ نگارمحمد رمضان نوشاہی )میونسپل اسٹیڈیم میں اصلاحی جماعت عالمی تنظیم العارفین کے زیر اہتمام سالانہ عظیم الشان محفل میلاد مصطفی ﷺ و حق باہو کانفرنس کا انعقاد ہوا۔ تقریب کی صدارت صاحبزادہ سلطان بہادر عزیز نے کی، جبکہ مرکزی ناظم اعلیٰ الحاج محمد نواز القادری نے خصوصی خطاب کیا۔

تقریب سے خطاب کرتے ہوئے الحاج محمد نواز القادری نے کہا کہ اللہ اور اس کے رسول ﷺ کی اطاعت کے بغیر زندگی بے مقصد ہے۔ انسان کی جسمانی تعلیم کے ساتھ ساتھ روحانی تربیت بھی ضروری ہے تاکہ ظاہر و باطن پاک ہو اور نوجوان نسل کی نظریاتی بنیاد مضبوط ہو۔ انہوں نے کہا کہ آج کے دور میں نوجوانوں کو دین کے قریب لانے اور معاشرے میں امن کے قیام کے لیے کام کرنے کی ضرورت ہے۔

انہوں نے مزید کہا کہ موجودہ دور میں دین سے دوری اور افتراق کے چیلنجز درپیش ہیں، اس لیے ہمیں اپنی اصلاح کے ساتھ دوسروں کی اصلاح کے لیے بھی میدان عمل میں آنا ہوگا تاکہ اسلام کے ابدی پیغام کو دنیا بھر میں پہنچایا جا سکے۔

تقریب میں معظم علی بھٹی ایڈوکیٹ، عثمان افضل چٹھہ ایڈوکیٹ، ملک علی رضا اعوان، رانا عدیل مقبول ایڈوکیٹ، جنید علی ایڈوکیٹ، رائے شکیل حسن ایڈوکیٹ، چوہدری احمد نواز تارڑ، اور اعجاز احمد مگل سمیت معززین، وکلاء، صحافی، اساتذہ، تاجروں اور شہریوں کی بڑی تعداد نے شرکت کی۔

گوجرانوالہ ،باغی ٹی وی (نامہ نگار محمد رمضان نوشاہی)گوجرانوالہ یونین آف جرنلسٹس (جی یو جے) ورکرز کا ہنگامی اجلاس پریس کلب کے حالیہ الیکشن کے معاملات پر منعقد ہوا۔ اجلاس کی صدارت جی یو جے ورکرز کے صدر افتخار علی بٹ نے کی، جس میں الیکشن سے متعلقہ گہرے تحفظات کا اظہار کیا گیا۔

ورکرز یونین نے ووٹر لسٹوں کی تیاری کو یکسر مسترد کرتے ہوئے ایک مخصوص گروپ پر مکمل عدم اعتماد کا اعلان کیا۔ اجلاس میں اس بات پر زور دیا گیا کہ اعتراضات کو دور کرکے جمہوری عمل کو شفاف اور تسلسل کے ساتھ جاری رکھا جائے۔

تحفظات کے ازالے کے لیے جی یو جے ورکرز نے صدر افتخار علی بٹ کی قیادت میں 6 رکنی مذاکراتی کمیٹی تشکیل دی۔ کمیٹی کے ارکان میں ممبر ایف ای سی عشرت الماس چوہدری، ایڈیشنل جنرل سیکریٹری حافظ شاہد ملک سمیت دیگر شامل ہیں۔

مذاکراتی کمیٹی دونوں گروپس، حافظ شاہد منیر گروپ اور طارق منیر بٹ گروپ، سے رابطہ کرکے اپنے تحفظات اور اعتراضات ان تک پہنچائے گی۔ اجلاس میں شرکا نے شفاف اور منصفانہ انتخابی عمل کو یقینی بنانے کے لیے ضروری اقدامات پر زور دیا۔

گوجرانوالہ (باغی ٹی وی، نامہ نگار محمد رمضان نوشاہی) ڈپٹی کمشنر گوجرانوالہ نوید احمد نے چیف آفیسر میونسپل کارپوریشن حیدر علی چٹھہ، سی ٹی او عائشہ بٹ، اور اے سی سٹی اقرا مبین گوندل کے ہمراہ حیدری انڈر پاس، جی ٹی روڈ شیرانوالہ باغ، سیالکوٹی انڈر پاس، اور ریل بازار کا دورہ کیا۔

ڈی سی نے چیف آفیسر میونسپل کارپوریشن کو حیدری انڈر پاس پر ماڈل ریڑھی بازار لگانے کی ہدایت دی، جبکہ جی ٹی روڈ کے فٹ پاتھ پر تجاوزات کے مکمل خاتمے کا حکم دیا۔ اس کے علاوہ، انہوں نے ریل بازار اور دیگر بازاروں کو تجاوزات سے پاک کرنے کی سخت ہدایات جاری کیں۔

ڈی سی کے وزٹ کے بعد میونسپل کارپوریشن کے انکروچمنٹ لینڈ سپرنٹنڈنٹ رحمت علی انصاری اور انسپکٹر عرفان نسیم بٹ نے اپنے عملے کے ہمراہ ریل بازار میں گرینڈ کلین اپ آپریشن کیا۔ بازار کے دونوں اطراف قائم تمام تجاوزات کو ختم کر دیا گیا اور اندرون شہر کے دیگر بازاروں میں بھی تجاوزات کے خاتمے کی مہم شروع کر دی گئی۔

تجاوزات ختم نہ کرنے والے دکانداروں کو سخت وارننگ دیتے ہوئے کہا گیا کہ آئندہ تجاوزات برقرار رکھنے پر ان کے خلاف قانونی کارروائی کی جائے گی۔ یہ اقدامات شہریوں کی سہولت اور بازاروں میں آسانی پیدا کرنے کے لیے کیے جا رہے ہیں۔

گوجرانوالہ (باغی ٹی وی، نامہ نگار محمد رمضان نوشاہی): پنجاب پولیس یوتھ انٹرن شپ پروگرام کے ایکسویں بیج کی اختتامی تقریب پولیس لائنز گوجرانوالہ میں منعقد کی گئی۔ اس تقریب میں ایس ایس پی آپریشنز ڈاکٹر رضا تنویر سپرا نے پروگرام میں شرکت کرنے والے طلباء و طالبات میں سرٹیفکیٹس تقسیم کیے اور فرینڈز آف پولیس کے بیجز بھی لگائے۔

پنجاب پولیس یوتھ انٹرن شپ پروگرام کا مقصد پولیس کے مثبت پہلوؤں کو فروغ دینا اور پولیس و عوام کے درمیان موجود فاصلے کو کم کرنا ہے۔ اس پروگرام میں مختلف تعلیمی اداروں کے طلبہ و طالبات نے حصہ لیا، جنہیں دو ہفتوں پر محیط انٹرن شپ کے دوران پولیس کی مختلف ورکنگ اور شعبوں کے بارے میں آگاہی دی گئی۔

ایس ایس پی آپریشنز ڈاکٹر رضا تنویر سپرا نے طلباء و طالبات سے خطاب کرتے ہوئے کہا کہ انٹرن شپ پروگرام کا مقصد پولیسنگ کی بہتر سمجھ بوجھ فراہم کرنا اور نوجوانوں کو پولیس کے جدید اقدامات اور کمیونٹی پولیسنگ کے حوالے سے آگاہ کرنا ہے۔ انہوں نے اس بات پر زور دیا کہ پروگرام میں طلباء و طالبات کے تعاون سے کمیونٹی پولیسنگ کو مزید بہتر بنایا جا سکے گا۔

انٹرن شپ کے دوران طلباء کو پولیس ورکنگ، میثاق سینٹر، ویمن انکلیو، انوسٹی گیشن، آپریشن، آئی ٹی، اور دیگر اہم دفاتر میں پولیس کی کارکردگی کے حوالے سے لیکچرز دیے گئے اور وزٹ کرائے گئے۔ پولیس کے سینئر افسران نے انٹرن شپ میں شریک طلباء کو پولیس کے تجدیدی اقدامات اور شہریوں کی خدمت میں پولیس کے کردار سے آگاہ کیا۔

اختتامی تقریب کے موقع پر طلباء و طالبات نے اس پروگرام کے انعقاد پر پنجاب پولیس کا شکریہ ادا کیا اور کہا کہ اس پروگرام سے انہیں پولیس کی ورکنگ کے بارے میں مفصل معلومات حاصل ہوئیں اور یہ کمیونٹی پولیسنگ کے فروغ میں اہم کردار ادا کرے گا۔

ایس ایس پی آپریشنز ڈاکٹر رضا تنویر سپرا نے اس عزم کا اظہار کیا کہ یوتھ انٹرن شپ پروگرام کا سلسلہ آئندہ بھی جاری رہے گا تاکہ نوجوانوں کو پولیسنگ کے شعبے میں مزید آگاہی حاصل ہو اور پولیس و عوام کے درمیان مثبت تعلقات قائم ہوں۔