Category: گوجرانوالہ

گوجرانوالہ (باغی ٹی وی،نامہ نگار محمد رمضان نوشاہی)ضلعی انتظامیہ اور محکمہ تحفظ ماحولیات عوام کو سموگ اور فضائی آلودگی کے خطرناک اثرات سے بچانے میں ناکام نظر آتے ہیں۔ علاقے میں قائم کینن انٹرپرائزز اینڈ میٹل ورکس کی بھٹیاں مسلسل زہریلا دھواں چھوڑ رہی ہیں، جبکہ دوسری طرف تعلیمی ادارے بند ہیں۔

اہلِ علاقہ اور قرب و جوار کے رہائشی سانس کی بیماریوں، دمہ، پھیپھڑوں کے امراض، آنکھوں میں چبھن، الرجی اور دل کے امراض جیسے شدید مسائل سے دوچار ہیں۔ انہوں نے وزیرِ اعلیٰ پنجاب سے فوری نوٹس لینے اور مؤثر اقدامات کرنے کا مطالبہ کیا ہے۔

رہائشیوں کا کہنا ہے کہ ضلعی انتظامیہ اور محکمہ تحفظ ماحولیات شہر کو سموگ اور آلودگی سے پاک کرنے اور صنعتی یونٹس کو رہائشی علاقوں سے باہر منتقل کرنے میں مکمل ناکام ہو چکے ہیں۔ کینن انٹرپرائزز اینڈ میٹل ورکس اور شیخوپورہ روڈ پر قائم دیگر فیکٹریاں زہریلا دھواں چھوڑ کر عوام کی صحت کے لئے خطرہ بن چکی ہیں۔

عوامی شکایات کے مطابق متعدد فیکٹریوں اور صنعتی یونٹس کو سیل کیے جانے کے بعد کچھ ہی دیر میں دوبارہ کھول دیا جاتا ہے۔ بااثر فیکٹری مالکان ضلعی انتظامیہ اور محکمہ تحفظ ماحولیات کے افسران کو مبینہ طور پر رشوت دے کر کارروائی سے بچ جاتے ہیں۔

عوام نے وزیرِ اعلیٰ پنجاب، چیف سیکرٹری، ڈی جی ماحولیات اور سیکرٹری ہیلتھ سے فوری نوٹس لے کر غفلت برتنے والے افسران کے خلاف سخت قانونی کارروائی کا مطالبہ کیا ہے تاکہ سموگ اور فضائی آلودگی کے اس عذاب سے نجات حاصل کی جا سکے۔

گوجرانوالہ (باغی ٹی وی، نامہ نگار محمد رمضان نوشاہی)گراں فروشوں کے خلاف کریک ڈاؤن، جرمانے اور اشیاء کی قیمتوں میں نمایاں کمی
وزیراعلیٰ پنجاب کے احکامات پر گوجرانوالہ کی ضلعی انتظامیہ نے ناجائز منافع خوروں اور گراں فروشوں کے خلاف بھرپور کارروائیاں شروع کر دی ہیں۔ ڈپٹی کمشنر نوید احمد نے کہا کہ ضلعی انتظامیہ گراں فروشی پر قابو پانے کے لیے مکمل طور پر متحرک ہے اور سبزی و پھل منڈیوں کے ساتھ ساتھ دیگر مارکیٹوں میں بھی قیمتوں کی کڑی نگرانی کی جا رہی ہے۔ ان اقدامات کے نتیجے میں اشیاء خوردونوش کی قیمتوں میں نمایاں کمی ہوئی ہے جس کا براہ راست فائدہ عوام کو پہنچ رہا ہے۔

ڈپٹی کمشنر کے مطابق حالیہ کارروائیوں کے دوران چکن کی قیمت میں خاطر خواہ کمی ہوئی ہے جو 519 روپے فی کلو سے کم ہو کر 504 روپے فی کلو تک آگئی ہے۔ علاوہ ازیں سبزیوں کی قیمتوں میں بھی واضح کمی دیکھی گئی ہے ٹماٹر کی قیمت میں 10 روپے، لہسن میں 20 روپے، ادرک میں 37 روپے اور گاجر میں 10 روپے کی کمی کی گئی ہے۔ مزید برآں گوبھی کی قیمت 14 روپے، شملہ مرچ 39 روپے، مٹر 5 روپے اور ہری مرچ کی قیمت میں 15 روپے کمی دیکھی گئی ہے۔

ڈپٹی کمشنر نوید احمد کے مطابق ضلعی انتظامیہ نے رواں ماہ میں اب تک گراں فروشوں کے خلاف 2 کروڑ روپے کے قریب جرمانے عائد کیے ہیں اور 330 افراد کو حراست میں لیا گیا ہے۔ مزید برآں قیمتوں کی خلاف ورزی کرنے والے 200 کے قریب دکانوں کو سیل کیا گیا ہے۔ انہوں نے بتایا کہ حکومت پنجاب کی ہدایات کے مطابق یہ کارروائیاں جاری رہیں گی تاکہ عوام کو مہنگائی سے ریلیف دیا جا سکے۔

ڈپٹی کمشنر نے کہا کہ انتظامیہ سبزی و پھل منڈیوں، کریانہ اسٹورز اور دیگر دکانوں کی قیمتوں کی مسلسل نگرانی کر رہی ہے۔ حکام نے شہریوں کو بھی ترغیب دی کہ وہ منافع خوروں کی نشاندہی کریں اور سرکاری قیمتوں کے مطابق خریداری کریں۔ انتظامیہ کی یہ کوشش ہے کہ عوام کو اشیاء خوردونوش مناسب داموں پر فراہم کی جائیں اور قیمتوں میں استحکام برقرار رکھا جائے۔

ڈپٹی کمشنر نوید احمد نے گوجرانوالہ کی عوام سے اپیل کی ہے کہ وہ قیمتوں کے حوالے سے اپنی شکایات متعلقہ حکام کو درج کروائیں تاکہ انتظامیہ ان کے مسائل کا بروقت ازالہ کر سکے۔

گوجرانوالہ (باغی ٹی وی،نامہ نگارمحمدرمضان نوشاہی) گوجرانوالہ کے تھانہ صدر کے علاقے تلونڈی موسیٰ خان میں افسوسناک واقعہ پیش آیا جہاں نامعلوم مسلح افراد نے ایک گھر میں داخل ہو کر اندھا دھند فائرنگ کی۔ فائرنگ کے نتیجے میں 50 سالہ طاہرہ اور 35 سالہ منزہ موقع پر جاں بحق ہو گئیں، جبکہ 60 سالہ رستم شدید زخمی ہو گیا۔

عینی شاہدین کے مطابق حملہ آور اچانک گھر میں گھسے اور فائرنگ کرکے فرار ہو گئے۔ اطلاع ملنے پر پولیس فوری طور پر موقع پر پہنچ گئی اور جائے وقوعہ کا محاصرہ کر لیا۔ تحقیقاتی ٹیموں نے شواہد اکٹھے کرتے ہوئے جائے حادثہ سے گولیوں کے خول اور دیگر مواد جمع کر لیا ہے۔

پولیس ذرائع کے مطابق ابتدائی تفتیش میں فائرنگ کے واقعے کو دیرینہ دشمنی کا نتیجہ قرار دیا جا رہا ہے تاہم دیگر محرکات پر بھی تحقیقات جاری ہیں۔ پولیس نے بتایا کہ علاقے کے لوگوں سے پوچھ گچھ اور سی سی ٹی وی فوٹیج کی مدد سے ملزمان کی تلاش شروع کر دی گئی ہے۔

زخمی رستم کو فوری طور پر طبی امداد کے لیے قریبی ہسپتال منتقل کر دیا گیا، جہاں اس کی حالت تشویشناک بتائی جا رہی ہے۔ اہلِ خانہ اور قریبی رشتہ داروں میں غم و غصے کی فضا قائم ہے، جنہوں نے انصاف کا مطالبہ کیا ہے۔

پولیس حکام کا کہنا ہے کہ تمام زاویوں سے واقعے کی تحقیقات کی جا رہی ہیں اور جلد ہی ملزمان کو گرفتار کرکے قانون کے کٹہرے میں لایا جائے گا۔

گوجرانوالہ(باغی ٹی وی ،نامہ نگارمحمدرمضان نوشاہی) معمولی جھگڑے کے بعد بہن بھائی کی خودکشی

تفصیل کے مطابق گوجرانوالہ کے علاقے قلعہ دیدار سنگھ میں ایک افسوسناک واقعے میں بہن بھائی نے معمولی تلخ کلامی کے بعد زہر کھا کر اپنی جان لے لی۔

اہل خانہ کا کہنا ہے کہ جب بھائی نے اپنی بڑی بہن کو گولیاں کھاتے دیکھا تو اس نے بھی ایک گولی چھین کر خود نگل لی۔ دونوں کی حالت تشویشناک ہو گئی اور انہیں فوری طور پر ہسپتال لے جایا گیا لیکن وہاں پہنچنے سے پہلے ہی وہ دم توڑ گئے۔

پولیس کا کہنا ہے کہ اہل خانہ نے قانونی کارروائی سے انکار کر دیا ہے مگر واقعے کے مختلف پہلوؤں پر تفتیش جاری ہے۔

گوجرانوالہ(باغی ٹی وی ،نامہ نگارمحمدرمضان نوشاہی) ایک دل دہلا دینے والے واقعے میں چائلڈ پروٹیکشن ٹیم نے پولیس کے ہمراہ ایک گھر پر چھاپہ مار کر 4 سالہ گھریلو ملازمہ بچی کو بازیاب کروالیا ہے۔ متاثرہ بچی نے بتایا کہ گھر کی مالکن اسے بہت زیادہ تشدد کرتی تھی۔

پولیس نے اس واقعے میں ملوث گھر کے مالک ہمایوں شہزاد اور بچی کے والد عرفان کو گرفتار کرلیا ہے۔ چائلڈ پروٹیکشن آفیسر کی مدعیت میں گھریلو ملازمہ پر تشدد کا مقدمہ درج کرلیا گیا ہے۔

پولیس کے مطابق 4 سالہ مسکان کو اس کے والد نے 12 ہزار روپے ایڈوانس اور ماہانہ تنخواہ پر ہمایوں شہزاد کے گھر ملازمہ کے طور پر دیا تھا۔ بازیابی کے بعد متاثرہ بچی کو چائلڈ پروٹیکشن بیورو کے سپرد کردیا گیا ہے۔

گوجرانوالہ (باغی ٹی وی ،نامہ نگارمحمدرمضان نوشاہی) تھانہ لدھیوالہ وڑائچ کی پولیس ٹیم نے ڈی ایس پی قلعہ دیدار سنگھ عبدالجبار کی زیر نگرانی ایک بڑی کامیاب کارروائی میں تاش پر جواء کھیلنے والے 12 ملزمان کو گرفتار کیا۔

ایس ایچ او انصر سیویا کی قیادت میں ہونے والی اس کارروائی کے دوران ملزمان سے 21,350 روپے نقدی اور 156 تاش کے پتے برآمد کیے گئے۔ گرفتار ملزمان میں محمد شہباز، تعظیم احمد، محمد یٰسین، قمر، عرفان، بلال، مظفر، فیاض، بلال مقصود، رضوان، سہیل اور عمر فاروق شامل ہیں۔

ملزمان کے خلاف قانونی کارروائی جاری ہے، اور قمار بازی میں ملوث افراد کے خلاف مزید چھاپے مارے جا رہے ہیں۔ سٹی پولیس آفیسر (سی پی او) محمد ایاز سلیم نے پولیس ٹیم کی کارکردگی کی تعریف کرتے ہوئے کہا کہ ضلع بھر میں جرائم پیشہ افراد کے خلاف کارروائیاں تیز کی جا رہی ہیں اور کوئی رعایت نہیں برتی جائے گی۔ انہوں نے ایس ایچ او انصر سیویا اور ان کی ٹیم کو اس کامیاب کارروائی پر شاباش دیتے ہوئے کہا کہ اس طرح کے آپریشنز کا مقصد علاقے کو جرائم سے پاک کرنا ہے۔

علاقہ مکینوں نے پولیس کی اس موثر کارروائی کو سراہا اور امید ظاہر کی کہ اس سے علاقے میں جرائم کی شرح میں نمایاں کمی آئے گی۔