Category: گوجرانوالہ

گوجرانوالہ،باغی ٹی وی (نامہ نگار محمدرمضان نوشاہی)گوجرانوالہ کے علاقے کامونکی میں ڈی ایس پی آفس کے باہر ایک نوجوان نے خود کو آگ لگا لی۔ اس واقعے کا نوٹس لیتے ہوئے سٹی پولیس آفیسر محمد ایاز سلیم نے ایس پی صدر سے رپورٹ طلب کر لی ہے۔

جھلسنے والے نوجوان کا نام عبید الرحمن ہے جسے طبی امداد کے لیے فوری طور پر ہسپتال منتقل کیا گیا ہے،عبید الرحمن نے اپنے بیان میں اپنی بیوی کے اغواء کا مقدمہ سٹی کامونکی تھانہ میں درج کروایا تھا۔عبید الرحمن نے اغواء کے مقدمے میں ثاقب، عاقب اور صائمہ بی بی کو نامزد کیا ہے۔

نامزد ملزم ثاقب عمرہ کی ادائیگی کے لیے بیرون ملک ہے، عاقب نشے کا عادی ہے اور میاں افضل ہسپتال میں زیر علاج ہے جبکہ صائمہ کی گرفتاری التواء میں ہے۔فریقین کی گزشتہ چند سالوں سے باہمی مقدمہ بازی چل رہی ہے۔

سی پی او کی ہدایت پر ایس ایس پی آپریشنز اور ایس ایس پی انویسٹیگیشن موقع پر پہنچے۔واقعہ کی مختلف پہلوؤں سے انکوائری کی جا رہی ہے۔
اگر کسی پولیس آفیسر کی غلطی ثابت ہوئی تو اس کے خلاف سخت محکمانہ کارروائی کی جائے گی۔

سی پی او محمد ایاز سلیم کا کہنا ہے کہ اس واقعے کی ہر پہلو سے گہرائی سے تحقیقات کی جا رہی ہیں اور کسی بھی قسم کی کوتاہی برتنے والے افسر کے خلاف سخت کارروائی کی جائے گی۔

گوجرانوالہ(باغی ٹی وی رپورٹ)شادی کی خوشی غم میں بدلی،نکاح خواں سیوریج نالے میں گر کر لاپتہ،تلاش جاری

تفصیل کے مطابق گوجرانوالہ میں واقع ایک شادی ہال کے قریب دل دہلا دینے والا واقعہ پیش آیا ہے جہاں 75 سالہ ایک نکاح خواں، قاری آصف، سیوریج نالے میں گر کر لاپتہ ہو گئے ہیں۔

ریسکیو ذرائع کے مطابق قاری آصف پاؤں پھسلنے کی وجہ سے نالے میں گر گئے۔ وہ وزیر آباد سے بارات کے ہمراہ شادی میں شرکت کرنے آئے تھے۔

واقعہ کے مطابق، نکاح پڑھانے کے بعد جب قاری آصف شادی ہال سے باہر نکل رہے تھے تو یہ حادثہ پیش آیا۔ اطلاع ملتے ہی ریسکیو اہلکار فوری طور پر موقع پر پہنچے اور لاپتہ نکاح خواں کی تلاش کے لیے ریسکیو آپریشن شروع کر دیا۔

گوجرانوالہ (باغی ٹی وی نامہ نگار محمد رمضان نوشاہی): مین جی ٹی روڈ پر دو نامعلوم موٹر سائیکل سوار ڈاکوؤں نے اسلحے کے زور پر ایک تاجر کو لوٹ لیا۔ واقعہ تھانہ کھیالی کے علاقے کوکا کولا فیکٹری کے قریب پیش آیا۔

تفصیلات کے مطابق ڈاکوؤں نے تاجر امان اللہ سے پانچ لاکھ روپے نقد اور موبائل فون چھین کر فرار ہو گئے۔ سی سی ٹی وی فوٹیج میں یہ واضح طور پر دیکھا جا سکتا ہے کہ ڈاکو کس طرح اسلحے کے زور پر تاجر سے رقم اور موبائل فون چھین رہے ہیں۔اس ڈکیتی کی سی سی ٹی وی فوٹیج بھی سامنے آگئی ہے۔

پولیس نے واقعے کی اطلاع پر فوری کارروائی شروع کر دی ہے اور ڈاکوؤں کی گرفتاری کے لیے چھاپے مارے جا رہے ہیں۔

گوجرانوالہ (باغی ٹی وی نامہ نگار محمد رمضان نوشاہی): منشیات فروشوں کے خلاف جنگ ،14 کلو سے زائدچرس ،ہیروئن برآمد،6 گرفتار

گوجرانوالہ پولیس نے منشیات فروشی کے خلاف کامیاب کارروائیاں کرتے ہوئے چھ افراد کو گرفتار کیا ہے اور ان کے قبضے سے 13.520 کلو گرام چرس، 1.040 کلو گرام ہیروئن، 100 بوتل شراب اور 150 کین بیر برآمد کی ہے۔

سٹی پولیس آفیسر محمد ایاز سلیم نے ضلع بھر میں منشیات فروشوں کے خلاف سخت کارروائیاں کرنے کے احکامات جاری کیے تھے۔ انہی احکامات کے پیش نظر تھانہ واہنڈو، تھانہ پیپلز کالونی اور تھانہ باغبانپورہ پولیس نے مشترکہ کارروائی کرتے ہوئے یہ کامیابی حاصل کی ہے۔

تھانہ واہنڈو پولیس نے عرفان علی نامی شخص کو 11 کلو گرام چرس کے ساتھ گرفتار کیا گیا۔تھانہ پیپلز کالونی پولیس نے بلال عرف بلالو سمیت تین افراد کو ایک کلو سے زائد ہیروئن اور ڈھائی کلو سے زائد چرس کے ساتھ گرفتار کیا گیا،تھانہ باغبانپورہ پولیس نے شہرون عرف سلیمان کو 100 بوتل شراب اور 150 کین بیر کے ساتھ گرفتار کیا گیا۔

ملزمان سے مزید تفتیش جاری ہے۔ سماجی و سیاسی تنظیموں اور علاقے کے مکینوں نے گوجرانوالہ پولیس کو اس کامیابی پر خراج تحسین پیش کیا ہے۔

گوجرانوالہ (باغی ٹی وی نامہ نگار محمد رمضان نوشاہی): گوجرانوالہ پولیس نے ڈکیتوں کے خلاف کامیاب کارروائی کرتے ہوئے حماد عرف حمادو ڈکیت گینگ کے دو افراد کو گرفتار کر لیا ہے۔

پولیس نے ملزمان کے قبضے سے تین لاکھ پندرہ ہزار روپے نقدی، پانچ موٹرسائیکلیں، تین موبائل فون اور ناجائز اسلحہ بھی برآمد کیا ہے۔

یہ کارروائی ایس پی سٹی شاہدرشید کی ہدایت پر ڈی ایس پی قلعہ دیدار سنگھ میاں عبدالجبار کی زیر نگرانی انجام دی گئی۔ ایس ایچ او تھانہ لدھیوالہ وڑائچ انسپکٹر عنصر سیویا نے اپنی پولیس ٹیم کے ہمراہ اعلیٰ کارکردگی کا مظاہرہ کرتے ہوئے ملزمان کو گرفتار کیا۔

گرفتار ملزمان میں حماد عرف حمادو اور یاسر شامل ہیں۔ یہ گینگ ڈکیتی اور موٹرسائیکل چوری جیسے جرائم میں ملوث تھا۔

سٹی پولیس آفیسر محمد ایاز سلیم نے کہا کہ ڈکیتوں کے خلاف بلاامتیاز کارروائیاں جاری رہیں گی۔ انہوں نے ایس ایچ او تھانہ لدھیوالہ وڑائچ انسپکٹر عنصر سیویا اور ان کی پولیس ٹیم کو شاباش دی۔

گوجرانوالہ (باغی ٹی وی نامہ نگارمحمدرمضان نوشاہی): پولیس کی کامیاب کارروائی: ڈکیتی گینگ کے تین افراد گرفتار، لاکھوں روپے اور اسلحہ برآمد

تفصیل کے مطابق گوجرانوالہ پولیس نے ڈکیتوں کے خلاف اپنی مہم میں ایک اور بڑی کامیابی حاصل کی ہے۔ سٹی پولیس آفیسر محمد ایاز سلیم کی ہدایت پر ایس پی سٹی شاہدرشید کی زیر نگرانی، ڈی ایس پی کوتوالی حافظ امتیاز اور ایس ایچ او تھانہ کوتوالی سب انسپکٹر وکیل احمد کی پولیس ٹیم نے مشترکہ کارروائی کرتے ہوئے عرفان عرف پھانوڈکیت وچور گینگ کے تین ارکان کو گرفتار کر لیا ہے۔

گرفتار ملزمان میں فرمان، عمر حیات اور بابر شامل ہیں۔ پولیس نے ملزمان کے قبضے سے چار لاکھ پچاس ہزار روپے نقدی، چار موٹر سائیکلیں، چار موبائل فون اور ناجائز اسلحہ برآمد کیا ہے۔

سٹی پولیس آفیسر محمد ایاز سلیم نے کہا ہے کہ ڈکیتوں اور موٹر سائیکل چوروں کے خلاف بلاامتیاز کارروائیاں جاری رہیں گی۔ انہوں نے ایس ایچ او تھانہ کوتوالی سب انسپکٹر وکیل احمد اور ان کی پولیس ٹیم کو اس کامیاب کارروائی پر مبارکباد دی ہے۔

علاقہ مکینوں نے پولیس کی اس کارروائی کو سراہا ہے اور کہا ہے کہ اس سے علاقے میں امن و امان کی صورتحال بہتر ہوگی۔

گوجرانوالہ (باغی ٹی وی نامہ نگارمحمدرمضان نوشاہی): شہر میں ڈکیتی اور موٹرسائیکل چوری کے واقعات میں اضافے کے بعد، سٹی پولیس آفیسر محمد ایاز سلیم نے ضلع بھر میں کریک ڈاؤن کا حکم دیا تھا۔ ان کے احکامات پر عمل کرتے ہوئے سی آئی اے انسپکٹر عنصر جاوید موہل کی قیادت میں ایک اہم کارروائی انجام دی گئی۔

پولیس ٹیم نے گزشتہ چند دنوں میں شہر کے مختلف علاقوں میں چھاپے مار کر پانچ مختلف گروہوں کے 12 ارکان کو گرفتار کر لیا۔ گرفتار ملزمان نے اعتراف کیا ہے کہ وہ گوجرانوالہ اور اس کے اطراف میں گزشتہ کئی مہینوں سے ڈکیتی اور موٹرسائیکل چوری کے واقعات کو انجام دیتے آ رہے تھے۔

پولیس نے ملزمان کے قبضے سے چھ لاکھ بیس ہزار روپے نقدی، اسلحہ اور چوری شدہ موٹرسائیکلیں بھی برآمد کی ہیں۔

اس موقع پر سی پی او محمد ایاز سلیم نے کہا کہ "ہم نے شہر کو جرم سے پاک بنانے کے لیے عزم مصمم کر لیا ہے۔ ڈکیتوں اور چوروں کے خلاف کارروائی جاری رہے گی۔” انہوں نے سی آئی اے انسپکٹر اور ان کی ٹیم کو ان کی کامیابی پر مبارکباد دی۔

مقامی لوگوں نے پولیس کی اس کارروائی کو سراہا ہے اور کہا ہے کہ انہیں اب شہر میں زیادہ محفوظ محسوس ہو رہا ہے۔

گوجرانوالہ ،باغی ٹی وی(نامہ نگارمحمدرمضان نوشاہی)کمشنر کا ناجائز تجاوزات کے خاتمے کاحکم اور سنگین کرپشن کے الزامات

گوجرانوالہ میں ناجائز تجاوزات کے خلاف سخت کارروائی کا آغاز ہو گیا ہے۔ کمشنر نے 18 اگست تک تمام غیر قانونی تعمیرات کو ہٹانے کا حکم جاری کیا ہے۔ تاہم اس کے ساتھ ہی کرپشن کے سنگین الزامات بھی سامنے آئے ہیں۔

میونسپل کارپوریشن کے ایک اہلکار کے مطابق، گزشتہ دو سالوں میں کرین کے کرایے اور پٹرول کے نام پر کروڑوں روپے کا غبن کیا گیا ہے۔ انہوں نے الزام لگایا ہے کہ بعض افسران نے مل کر من پسند ٹھیکیداروں کے ساتھ گٹھ جوڑ کر سرکاری خزانے کو لوٹا ہے۔

شہریوں نے بھی اس معاملے پر تشویش کا اظہار کیا ہے اور حکومت سے مطالبہ کیا ہے کہ کرپشن میں ملوث افراد کے خلاف سخت کارروائی کی جائے اور گزشتہ دو سال کا آڈٹ کرایا جائے۔

ملوث عناصر کا کڑااحتساب کیا جائے اور انہیں قرار واقعی سزائیں دی جائیں.