Category: گوجرانوالہ

گوجرانوالہ (باغی ٹی وی،نامہ نگار محمد رمضان نوشاہی) وزیر اعلیٰ پنجاب مریم نواز شریف کے ویژن کے مطابق اور ڈپٹی کمشنر گوجرانوالہ/ وزیر آباد محمد طارق قریشی کی ہدایت پر ناجائز منافع خوری کے خلاف بھرپور کارروائی کی جا رہی ہے۔

اسسٹنٹ کمشنرز اور پرائس کنٹرول مجسٹریٹس نے یکم ستمبر سے اب تک 5 ہزار 608 کارروائیاں کی ہیں۔ ان کارروائیوں کے دوران 144 افراد کو 10 لاکھ 13 ہزار روپے سے زائد کے جرمانے عائد کیے گئے ہیں۔ علاوہ ازیں، 37 افراد کو گرفتار کیا گیا اور 5 کاروباری مراکز کو سیل کردیا گیا۔ اس کے علاوہ 10 افراد کو تنبیہ بھی کی گئی ہے۔

ڈپٹی کمشنر نے تمام پرائس کنٹرول مجسٹریٹس کو ہدایت کی ہے کہ وہ فیلڈ میں رہ کر زیادہ سے زیادہ چھاپہ مار کارروائیاں کریں اور مصنوعی مہنگائی اور ناجائز منافع خوری کے خلاف فوری کارروائی کریں۔ انہوں نے کہا کہ بازاروں، مارکیٹوں اور سبزی و پھل منڈیوں کی مسلسل مانیٹرنگ کی جائے گی۔

گوجرانوالہ (باغی ٹی وی نامہ نگارمحمدرمضان نوشاہی)سٹی پولیس آفیسر محمد ایاز سلیم کی ہدایت پر ضلع بھر میں منشیات فروشوں کے خلاف جاری کریک ڈاؤن کے دوران سول لائن پولیس نے ایک بڑی کامیابی حاصل کی ہے۔ ایس پی سول لائن فرحت عباس کی زیر نگرانی ایک مشترکہ آپریشن میں تھانہ پیپلز کالونی پولیس نے ایک خاتون سمیت دو منشیات فروشوں کو گرفتار کرلیا ہے۔

پولیس نے ملزمان کے قبضے سے ایک کلو چارسواسی گرام آئس اور ایک کلو ایک سو چالیس گرام ہیروئن برآمد کی ہے۔ گرفتار ملزمان میں ریکارڈ یافتہ منشیات فروش کیف عرف کیفی اور ملزمہ نواب بی بی شامل ہیں۔

سٹی پولیس آفیسر محمد ایاز سلیم نے پولیس کی اس کامیابی پر انہیں مبارکباد دیتے ہوئے کہا کہ جرائم پیشہ عناصر کے خلاف ضلعی پولیس کی تندہی سے انجام دی جانے والی کوششیں قابل ستائش ہیں۔ انہوں نے کہا کہ نوجوان نسل کے محفوظ مستقبل کے لیے منشیات سے پاک معاشرے کی تشکیل میں پولیس اپنا موثر کردار ادا کرتی رہے گی۔

اس آپریشن میں اعلیٰ کارکردگی کا مظاہرہ کرنے پر ایس ایچ او تھانہ پیپلز کالونی انسپکٹر مدثر رفیق اور ان کی پولیس ٹیم کو خصوصی طور پر سراہا گیا۔

گوجرانوالہ (باغی ٹی وی نامہ نگارمحمدرمضان نوشاہی): سٹی پولیس آفیسر محمد ایاز سلیم کی ہدایت پر ضلع بھر میں ڈکیتوں اور چوروں کے خلاف جاری کریک ڈاؤن میں ایک اور بڑی کامیابی حاصل ہوئی ہے۔ سی آئی اے انسپکٹر عنصر جاوید موہل کی قیادت میں ایک آپریشن کے دوران ڈکیتی اور لوٹ مار کی متعدد وارداتوں میں ملوث ایک خطرناک گینگ کے چھ افراد کو گرفتار کرلیا گیا ہے۔

پولیس نے ملزمان کے قبضے سے 18 لاکھ 75 ہزار روپے نقدی، ایک ٹریکٹر ٹرالی (جس کی مالیت 22 لاکھ روپے بتائی جاتی ہے) اور ایک موٹرسائیکل برآمد کی ہے۔ ابتدائی تحقیقات میں سامنے آیا ہے کہ یہ گینگ شاہراہوں پر ڈکیتی کے علاوہ لوگوں کے گھروں اور فیکٹریوں میں بھی ڈکیتی کی وارداتیں کرتا تھا۔

سٹی پولیس آفیسر محمد ایاز سلیم نے پولیس ٹیم کی اس کامیابی پر انہیں مبارکباد دی اور کہا کہ وہ ڈکیتوں اور مجرمانہ ذہن رکھنے والے عناصر کے خلاف اپنا آپریشن جاری رکھیں گے تاکہ شہریوں کو امن و امان کی فضا فراہم کی جا سکے۔

گوجرانوالہ (باغی ٹی وی،نامہ نگارمحمدرمضان نوشاہی)کمشنر اور ایڈمنسٹریٹر میٹروپولیٹن کارپوریشن گوجرانوالہ، سید نوید حیدر شیرازی نے شہر میں شہریوں کو بہترین سہولیات فراہم کرنے کے لئے مختلف اقدامات اٹھانے کی ہدایت دی ہے۔ ان کا کہنا تھا کہ تجاوزات، وال چاکنگ، غیر فعال سٹریٹ لائٹس اور غیر قانونی پارکنگ سٹینڈز کے خلاف فوری کارروائی کی جائے گی۔

کمشنر نے میٹروپولیٹن کارپوریشن کے متعلقہ محکموں کے افسران کو ہدایت دیتے ہوئے کہا کہ شہر میں موجود مسائل کو بلا امتیاز حل کرنے کے لیے ترجیحی بنیادوں پر اقدامات کیے جائیں۔ اس موقع پر ڈپٹی کمشنر محمد طارق قریشی بھی موجود تھے، جبکہ چیف آفیسر حیدر علی چٹھہ اور دیگر افسران بھی ان کے ہمراہ تھے۔

کمشنر شیرازی نے مزید کہا کہ سستی اور غفلت ہرگز برداشت نہیں کی جائے گی۔ انہوں نے صفائی کے نظام کو بہتر بنانے اور سٹریٹ لائٹس کو فعال کرنے کی ہدایت دی۔ علاوہ ازیں، غیر قانونی مذبحہ خانوں کے خلاف کریک ڈاؤن کرنے کا حکم بھی دیا گیا اور سی سی او کارپوریشن کو ادارے کی کارکردگی کو بہتر بنانے کی ہدایت کی گئی۔

گوجرانوالہ (باغی ٹی وی ،نامہ نگارمحمدرمضان نوشاہی): شہر میں قانون کی حکمرانی بحال کرنے کے لیے پولیس کی کامیاب کارروائی میں دو خطرناک ڈاکو ہلاک ہوگئے۔ تفصیلات کے مطابق تھانہ فیروزوالہ کے علاقے دھیرووالی میں چند روز قبل دو ڈاکوؤں نے ایک شہری کو قتل کرکے اس کی کار چھین لی تھی۔ پولیس نے فوری کارروائی کرتے ہوئے دونوں ملزمان کو گرفتار کرلیا تھا۔

ملزمان کو میڈیکل چیک اپ کے لیے گوجرانوالہ میڈیکل کالج لے جایا جا رہا تھا کہ لوہیانوالہ نہر کے قریب نامعلوم افراد نے پولیس وین پر فائرنگ کرتے ہوئے ملزمان کو چھڑانے کی کوشش کی۔ پولیس نے جوابی فائرنگ کی جس کے نتیجے میں دو ڈاکو ہلاک ہوگئے۔ پولیس کا کہنا ہے کہ ہلاک ہونے والے ڈاکو وہی ہیں جنہیں پولیس نے قتل کے مقدمے میں گرفتار کیا تھا۔

اس حوالے سے بات کرتے ہوئے سٹی پولیس آفیسر محمد ایاز سلیم نے کہا کہ پولیس نے شہر میں امن و امان قائم رکھنے کے لیے کمر کس لی ہے۔ ڈاکوؤں اور دیگر جرائم پیشہ عناصر کے خلاف کریک ڈاؤن جاری رہے گا۔ انہوں نے پولیس ٹیم کو اس کامیاب کارروائی پر مبارکباد دی۔

شہر کے شہریوں نے پولیس کی اس کارروائی کا خیرمقدم کیا ہے اور کہا ہے کہ پولیس نے شہر کو خطرناک عناصر سے پاک کرنے کا بہترین کام کیا ہے۔