Category: گوجرانوالہ

گوجرانوالہ (باغی ٹی وی،نامہ نگارمحمدرمضان نوشاہی): گزشتہ ماہ چیانوالی روڈ پر دوران واردات ایک کمسن بچی سے زیادتی کرنے والا درندہ صفت ملزم تھانہ صدر گوجرانوالہ پولیس کے ساتھ مقابلے میں ہلاک ہو گیا ہے۔

تفصیلات کے مطابق، تھانہ صدر گوجرانوالہ پولیس کی گاڑی روٹین گشت کے دوران مراد ہسپتال کینال روڈ پر ناکہ بندی پر موجود تھی۔ اسی دوران تین نامعلوم افراد موٹر سائیکل پر آ رہے تھے جنہوں نے پولیس گاڑی دیکھ کر فائرنگ شروع کر دی۔ جوابی فائرنگ میں ایک ملزم ہلاک ہو گیا جبکہ دیگر دو فرار ہو گئے۔

ہلاک ہونے والے ملزم کی شناخت عمر فاروق کے نام سے ہوئی ہے جو راہزنی اور زیادتی کے متعدد مقدمات میں ملوث تھا۔ سی پی او گوجرانوالہ نے فرار ہونے والے ملزمان کو گرفتار کرنے کے لیے خصوصی ٹیمیں تشکیل دے دی ہیں۔

سی پی او محمد ایاز سلیم نے کہا کہ شریف شہریوں کی عزت سے کھیلنے والے اور جرائم پیشہ عناصر معاشرے کے ناسور ہیں اور ان کے خلاف سخت کارروائی کی جائے گی۔

گوجرانوالہ(باغی ٹی وی رپورٹ)گکھڑ گرڈ سٹیشن کی مین پاور کیبل کو آگ لگ گئی، کئی شہرتاریکی میں ڈوب گئے

تفصیل کے مطابق گکھڑ گرڈ سٹیشن کی مین پاور کیبل میں آگ لگنے کے باعث شہر سمیت اطراف کے علاقوں میں بجلی کا شدید بحران پیدا ہوگیا ہے۔ آگ لگنے کے نتیجے میں تقریباً 10 فیڈر ٹرپ کر گئے جس کی وجہ سے گوجرانوالہ، راہوالی، گکھڑ، وزیر آباد، سوہدرہ، احمد نگر اور علی پور کے علاقے مکمل طور پر تاریکی میں ڈوب گئے ہیں۔

شدید گرمی کی اس صورتحال میں بجلی کی عدم دستیابی کے باعث عوام کو شدید مشکلات کا سامنا ہے۔ بچے، بوڑھے اور خواتین اس گرمی میں بے چین ہیں۔ گیپکو عملہ کی جانب سے ابھی تک بجلی بحالی کے لیے کوئی خاطر خواہ اقدامات نہیں کیے گئے ہیں۔

گیپکو حکام کا کہنا ہے کہ مین پاور کیبل میں آگ لگنے کی وجہ سے فیڈر ٹرپ ہوئے اور بجلی بحالی کے لیے کام شروع کر دیا گیا ہے۔ امید ہے کہ آئندہ چند گھنٹوں میں بجلی بحال ہو جائے گی۔

گوجرانوالہ( باغی ٹی وی،نامہ نگارمحمدرمضان نوشاہی )علاقہ تھانہ باغبانپورہ میں پولیس اہلکارسمیت 4 ڈاکو گرفتار

تفصیل کے مطابق کانسٹیبل اویس اور اس کے 3 ساتھیوں نے پیٹرول پمپ کے مالک کا پیچھا کیا اور اس سے رقم چھینی ،پیٹرول پمپ کے مالک نے 15 پر کال کی کہ 4 ملزمان نے میرے ساتھ واردات کی ہے۔ جن میں سے دو نے پولیس کی وردی پہنی ہوئی تھی۔

سی پی او محمد ایاز سلیم نے واقعہ کا نوٹس لیکر فوری مقدمہ درج کرنے کا حکم دیا،ایس پی سٹی سے رپورٹ طلب کر کے واقعہ میں ملوث ملزمان کو فوری گرفتار کرنے کا حکم دیا، مقامی پولیس نے پولیس کانسٹیبل اویس اور اس کے 2 ساتھیوں کو گرفتار کر لیا۔

سی پی او محمد ایاز سلیم نے کہا کہ محکمہ کی بدنامی کا باعث بننے والے ملازمین کے لیے محکمہ پولیس میں کوئی جگہ نہیں ہے ،اختیارات سے تجاوز اور مجرمانہ سرگرمیوں  میں ملوث کالی بھیڑوں سے کسی قسم کی رعایت نہیں برتی جائے گی

گوجرانوالہ،باغی ٹی وی (نامہ نگارمحمدرمضان نوشاہی) غیر معیاری کھاد فروخت کرنے والے کے خلاف کارروائی کی گئی ہے۔ پرنسپل ایگریکلچر آفیسر/اسسٹنٹ ڈائریکٹر زراعت (توسیع) محمد اعظم مغل نے مرکز ایمن آباد کے گاؤں اکبریاں کا دورہ کیا اور ایک دکاندار کے خلاف غیر معیاری کھاد فروخت کرنے پر مقدمہ درج کرایا۔
محمد اعظم مغل نے گاؤں اکبریاں کے مختلف علاقوں کا دورہ کیا اور کھاد کی دکانوں کا معائنہ کیا۔ اس دوران انہیں ایک دکاندار غیر معیاری کھاد فروخت کرتے ہوئے پایا گیا۔جس پراسسٹنٹ ڈائریکٹر زراعت (توسیع) نے فوری طور پر اس دکاندار کے خلاف مقدمہ درج کرا دیا۔

پرنسپل ایگریکلچر آفیسر کا کہنا ہے کہ کھادوں کے معیار پر کوئی سمجھوتہ نہیں کیا جائے گا اور غیر معیاری کھاد فروخت کرنے والوں کے خلاف سخت کارروائی کی جائے گی۔

انہوں نے بتایا کہ تحصیل گوجرانوالہ میں خصوصی ٹیمیں تشکیل دے دی گئی ہیں جو کھاد کی دکانوں کا باقاعدہ معائنہ کریں گی اور غیر معیاری کھاد فروخت کرنے والوں کے خلاف کارروائی کریں گی۔تاکہ غیر معیاری کھاد سے فصلوں کو نقصان نہ پہنچے اور کاشتکاروں کو مالی نقصان بھی نہ ہو.

گوجرانوالہ،باغی ٹی وی (نامہ نگارمحمدرمضان نوشاہی)صوبے میں امن و امان کی صورتحال کا جائزہ، شہدائے کربلا کے چہلم اور کرکٹ سیریز کے لیے خصوصی انتظامات

تفصیل کے مطابق صوبائی وزیر صحت اور چیئرمین کابینہ کمیٹی برائے امن و امان خواجہ سلمان رفیق کی زیر صدارت محکمہ داخلہ میں لاء اینڈ آرڈر کا 11واں اجلاس منعقد ہوا۔ اجلاس میں صوبے بھر میں امن و امان کی صورتحال کا تفصیلی جائزہ لیا گیا اور شہدائے کربلا کے چہلم اور پاکستان اور بنگلہ دیش کے درمیان ہونے والی کرکٹ سیریز کے لیے خصوصی سکیورٹی انتظامات کرنے کا فیصلہ کیا گیا۔

اجلاس میں صوبائی وزیر چوہدری شافع حسین اور صوبائی وزیر بلال اکبر خان نے ویڈیو لنک کے ذریعے شرکت کی۔ سیکرٹری داخلہ پنجاب نور الامین مینگل اور متعلقہ افسران نے اجلاس میں بریفنگ دی۔

اجلاس میں فیصلہ کیا گیا کہ شہدائے کربلا کے چہلم کے موقع پر صوبے بھر میں 514 جلوسوں اور 917 مجالس پر سکیورٹی کے غیر معمولی انتظامات کیے جائیں گے۔ اس سلسلے میں پاک آرمی اور رینجرز کی 43 کمپنیاں فرائض سرانجام دیں گی۔

اجلاس میں بنگلہ دیش سے کرکٹ سیریز کے دوران سکیورٹی کے انتہائی سخت انتظامات کرنے کی ہدایت کی گئی۔ صوبائی وزیر نے کہا کہ صوبے کے امن و امان کو یقینی بنانا حکومت کی اولین ترجیح ہے۔

اجلاس میں دیگر اہم فیصلے بھی لیے گئے جن میں 5 قیدیوں کی پیرول پر رہائی کی منظوری، مختلف اضلاع کے لیے پرائس کنٹرول مجسٹریٹس کی تعیناتی اور محکمہ داخلہ پنجاب میں خصوصی مانیٹرنگ کے لیے کنٹرول روم قائم کرنا شامل ہیں۔

اجلاس میں سیکرٹری داخلہ پنجاب نور الامین مینگل، سپیشل سیکرٹری داخلہ فضل الرحمان، آئی جی جیل خانہ جات میاں فاروق نذیر، ایڈیشنل آئی جی چوہدری سلطان، سی سی پی او لاہور بلال صدیق کمیانہ اور دیگر متعلقہ افسران نے شرکت کی۔

گوجرانوالہ ،باغی ٹی وی (نامہ نگار محمدرمضان نوشاہی): گوجرانوالہ ٹیچنگ ہسپتال منیر چوک میں تعمیراتی کاموں میں بڑے پیمانے پر کرپشن کا انکشاف ہوا ہے۔ حالیہ بارشوں کے بعد یہ بات سامنے آئی ہے کہ ہسپتال کی عمارت ناقص تعمیر کی وجہ سے زمین بوس ہونے کے خطرے میں ہے۔

تفصیلات کے مطابق سابق وزیر اعلیٰ پنجاب محسن نقوی اور سابق سیکرٹری ہیلتھ علی جان خان کے دور میں ہسپتال کی تعمیر و مرمت کے لیے 87 کروڑ روپے کی لاگت سے ایک ٹھیکہ مبینہ طور پر سفارشی ٹھیکیدار افتخار گھمن کو دیا گیا تھا۔ ٹھیکیدار نے ہسپتال انتظامیہ کو خاطر میں نہ لاتے ہوئے مختلف وارڈز اور سیوریج سسٹم کی تعمیر میں وسیع پیمانے پر ناقص مواد کا استعمال کیا۔

حالیہ بارشوں نے اس ناقص تعمیر کا پول کھول دیا ہے۔ ہسپتال کی عمارت میں دراڑیں پڑ چکی ہیں، سیوریج سسٹم لیک ہو رہا ہے اور عمارت کی بنیادوں میں پانی داخل ہو رہا ہے۔ اس کے علاوہ، شعبہ امراض قلب کی چھتوں میں دراڑیں پڑنے اورلیکیج کے باعث ایکو کارڈیو گرافی مشین اور ائر کنڈیشنر بھی ناکارہ ہو چکے ہیں۔

ہسپتال انتظامیہ کے مطابق سابق سیکرٹری ہیلتھ علی جان خان اور کمشنر نوید حیدر شیرازی نے ٹھیکیدار کے معاملات میں دخل اندازی کرنے سے منع کیا تھا۔ اس لیے ہسپتال انتظامیہ ٹھیکیدار کے خلاف کوئی کارروائی نہیں کر سکی۔

ڈاکٹرز اور ہسپتال کے ملازمین نے اس واقعے پر شدید تشویش کا اظہار کیا ہے اور وزیر اعلیٰ پنجاب، چیف سیکرٹری پنجاب اور سیکرٹری ہیلتھ سے مطالبہ کیا ہے کہ وہ اس معاملے کا نوٹس لیں اور مبینہ سفارشی ٹھیکیدار کے خلاف کارروائی کریں۔