Category: گوجرانوالہ

گوجرانوالہ (باغی ٹی وی، نامہ نگار محمد رمضان نوشاہی) نیشنل ہائی ویز اینڈ موٹر ویز پولیس کے زیر اہتمام یونیورسٹی آف چناب گجرات میں روڈ سیفٹی سیمینار منعقد کیا گیا۔ ڈی آئی جی افضال احمد کوثر کی ہدایت پر ایس پی فرخ رضا کی نگرانی میں منعقدہ سیمینار میں مہمان خصوصی ڈی ایس پی اشفاق احمد (کلیر لائنز ہیڈکوارٹر) تھے۔ اس موقع پر ڈی ایس پی طاہر حسین، اسسٹنٹ ڈائریکٹر اسٹوڈنٹس افیئرز عمران ارشد، یونیورسٹی کے اساتذہ اور طلبہ کی بڑی تعداد نے شرکت کی۔

سیمینار کا مقصد نوجوانوں میں روڈ سیفٹی اور ٹریفک قوانین سے متعلق شعور بیدار کرنا تھا۔ انسپکٹر عثمان حیدر، انسپکٹر شمریز اقبال، انسپکٹر عابد طور اور انسپکٹر عمرانہ نے شرکا کو سیفٹی ہیلمٹ، سیٹ بیلٹ کے استعمال، لین ڈسپلن، اوور اسپیڈنگ اور رانگ سائیڈ ڈرائیونگ جیسے اہم موضوعات پر بریفنگ دی۔ ڈرائیونگ لائسنس کی قانونی اہمیت اور ذمہ دارانہ ڈرائیونگ پر بھی روشنی ڈالی گئی۔

ڈی ایس پی اشفاق احمد نے کہا کہ طلبہ ملک کا سرمایہ ہیں، انہیں چاہیے کہ وہ ٹریفک قوانین کی مکمل پابندی کرتے ہوئے نہ صرف اپنی بلکہ دوسروں کی جانوں کو بھی محفوظ رکھیں۔ عمران ارشد نے کہا کہ اس قسم کے پروگرام وقتاً فوقتاً ہونے چاہییں تاکہ معاشرے میں محفوظ ڈرائیونگ کا شعور پیدا ہو۔

شرکا نے سیمینار کو مفید قرار دیتے ہوئے موٹر وے پولیس کی اس کوشش کو سراہا اور ایسے مزید پروگرامز کے انعقاد کی خواہش ظاہر کی۔

گوجرانوالہ (باغی ٹی وی، نامہ نگار محمد رمضان نوشاہی) وزیراعلیٰ پنجاب مریم نواز شریف کے ہیلتھ ریفارمز پروگرام کے تحت ڈپٹی کمشنر گوجرانوالہ نوید احمد نے تحصیل ہیڈکوارٹر ہسپتال کامونکی کا اچانک دورہ کیا، جہاں انہوں نے ہسپتال میں طبی سہولیات، ڈاکٹرز و طبی عملے کی حاضری، ادویات کی فراہمی اور صفائی ستھرائی کے انتظامات کا تفصیلی جائزہ لیا۔

ڈپٹی کمشنر نے مریضوں سے ملاقات کر کے ان سے سہولیات کے بارے میں دریافت کیا اور ڈاکٹرز و عملے کو سختی سے ہدایت کی کہ وہ اپنے فرائض ایمانداری، احساس ذمہ داری اور خوش اخلاقی سے سرانجام دیں۔ انہوں نے اس موقع پر واضح کیا کہ مریضوں کے ساتھ کسی قسم کی بدسلوکی یا علاج میں غفلت کسی صورت برداشت نہیں کی جائے گی۔

اس موقع پر ایم ایس THQ ڈاکٹر سعد احمد خان نے ڈپٹی کمشنر کو ہسپتال میں دستیاب سہولیات، درپیش مسائل اور انتظامی امور سے آگاہ کیا۔ میڈیا سے گفتگو کرتے ہوئے ڈاکٹر سعد احمد خان نے کہا کہ دکھی انسانیت کی خدمت سے جو قلبی سکون حاصل ہوتا ہے، وہ الفاظ میں بیان نہیں کیا جا سکتا۔ انہوں نے کہا کہ ایک اچھا ڈاکٹر وہی ہے جو مریضوں کے درد کو سمجھے اور ان کے لیے نرم دلی اور حساسیت کا مظاہرہ کرے۔

ڈاکٹر سعد احمد خان نے ہسپتال کی انتظامیہ اور طبی عملے کو ہدایت دی کہ ہسپتال آنے والے ہر مریض کو مکمل عزت، توجہ اور بہترین سہولیات فراہم کی جائیں۔ انہوں نے واضح کیا کہ بدتمیزی، کوتاہی یا علاج سے انکار کی شکایت پر فوری کارروائی عمل میں لائی جائے گی۔

ڈپٹی کمشنر نوید احمد نے کہا کہ وزیراعلیٰ پنجاب مریم نواز شریف کی اولین ترجیح عوام کو معیاری طبی سہولیات کی فراہمی ہے، اور اس سلسلے میں کسی قسم کی غفلت برداشت نہیں کی جائے گی۔ انہوں نے ہسپتال میں موجود پیرامیڈیکل اسٹاف اور سکیورٹی گارڈز سے متعلق موصول ہونے والی شکایات پر فوری ایکشن لینے کا اعلان کرتے ہوئے خبردار کیا کہ غیرذمہ دار عناصر کو ملازمت سے فوری برطرف کیا جائے گا۔

ڈاکٹر سعد احمد خان کی شفاف، نڈر اور ہمہ وقت متحرک قیادت میں ہسپتال میں مریضوں کو درپیش مسائل کو عقابی نگاہ سے مانیٹر کیا جا رہا ہے، اور ان کے حل کے لیے سنجیدہ کوششیں جاری ہیں۔

گوجرانوالہ (باغی ٹی وی، نامہ نگار محمد رمضان نوشاہی) سٹی پولیس آفیسر محمد ایاز سلیم کی ہدایت پر گوجرانوالہ پولیس کی جانب سے تعلیمی اداروں میں ہنگامی صورتحال سے نمٹنے کے لیے موک ایکسرسائز کا باقاعدہ آغاز کر دیا گیا ہے۔ اس اقدام کا مقصد ناگہانی اور دہشت گردی کے ممکنہ خطرات کے دوران فوری ردعمل کی صلاحیت کو بہتر بنانا ہے۔

موک ایکسرسائز میں ضلع پولیس، ریسکیو 1122، اور دیگر متعلقہ اداروں کے افسران و جوانوں نے بھرپور شرکت کی۔ اس دوران ایک فرضی ایمرجنسی صورتحال تخلیق کی گئی، جس میں پولیس اور ریسکیو ٹیموں نے فوری اور مشترکہ ردعمل کا مظاہرہ کیا۔ اسکول کے طلبہ، اساتذہ اور انتظامیہ کو بھی اس مشق میں شامل کیا گیا تاکہ وہ عملی تربیت کے ذریعے ہنگامی حالات میں درست اقدامات سیکھ سکیں۔

سٹی پولیس آفیسر محمد ایاز سلیم نے اس موقع پر کہا کہ موجودہ حالات میں ایسے اقدامات وقت کی اہم ضرورت ہیں۔ انہوں نے کہا کہ پولیس شہریوں کی جان و مال کے تحفظ کے لیے پرعزم ہے، اور تمام اداروں کو ایک صفحے پر لا کر ہنگامی صورتحال سے نمٹنے کی صلاحیت میں اضافہ کیا جا رہا ہے۔

گوجرانوالہ پولیس کا یہ اقدام نہ صرف ادارہ جاتی ہم آہنگی کا مظہر ہے بلکہ عوامی تحفظ کے لیے ایک مثبت قدم ہے، جسے آئندہ بھی تسلسل سے جاری رکھا جائے گا۔

گوجرانوالہ (باغی ٹی وی، نامہ نگار محمد رمضان نوشاہی) ریجن پولیس گوجرانوالہ اور اپیکس گروپ آف کالجز کے مابین پولیس ملازمین کے بچوں کو معیاری تعلیم کی فراہمی کے لیے مفاہمتی یادداشت (ایم او یو) پر دستخط کیے گئے۔ ریجنل پولیس آفیسر طیب حفیظ چیمہ اور اپیکس گروپ آف کالجز کے ریجنل ڈائریکٹر نے معاہدے پر دستخط کیے۔

اس موقع پر آر پی او طیب حفیظ چیمہ نے کہا کہ پولیس ملازمین کے بچوں کو اعلیٰ تعلیمی اداروں میں معیاری تعلیم کی سہولت دینا ان کی اولین ترجیح ہے۔ معاہدے کے تحت پولیس شہداء کے بچوں کو اپیکس کالجز میں مکمل مفت تعلیم دی جائے گی، جبکہ حاضر سروس، دوران سروس وفات پانے والے، ریٹائرڈ اور غازی ملازمین کے بچوں کو داخلہ، ٹیوشن فیس اور دیگر اخراجات پر 60 فیصد رعایت دی جائے گی۔

آر پی او نے ہدایت کی کہ ریجن بھر کے تمام پولیس ملازمین کو اس سہولت سے آگاہ کرنے کے لیے خصوصی اقدامات کیے جائیں۔ انہوں نے اپیکس کالجز کے اس اقدام کو سراہتے ہوئے اسے پولیس اہلکاروں کے لیے قابلِ قدر تعاون قرار دیا۔

اس موقع پر اپیکس گروپ آف کالجز کے پرنسپل نے کہا کہ ریجن پولیس گوجرانوالہ شہریوں کے جان و مال کے تحفظ میں اہم کردار ادا کر رہی ہے اور یہ ادارہ فخر محسوس کرتا ہے کہ وہ پولیس ملازمین کے بچوں کو تعلیم کے زیور سے آراستہ کرنے میں کردار ادا کر رہا ہے۔

گوجرانوالہ (باغی ٹی وی، نامہ نگارمحمد رمضان نوشاہی) انسپکٹر جنرل آف پولیس پنجاب کی اوپن ڈور پالیسی کے تحت ریجنل پولیس آفیسر گوجرانوالہ طیب حفیظ چیمہ نے نماز جمعہ کے بعد جامع مسجد عمر فاروق سیٹلائٹ ٹاؤن میں کھلی کچہری کا انعقاد کیا جہاں انہوں نے شہریوں کے مسائل سنے اور فوری حل کے احکامات جاری کیے۔

آر پی او طیب حفیظ چیمہ نے کہا کہ کھلی کچہری کا مقصد عوام اور پولیس کے درمیان فاصلوں کو کم کرنا اور معاشرے کو امن کا گہوارہ بنانا ہے۔ انہوں نے شہریوں سے اپیل کی کہ وہ پولیس کی آنکھ اور کان بنیں اور منشیات فروشی، ناجائز اسلحہ اور دیگر جرائم کے خاتمے میں پولیس کا بھرپور ساتھ دیں۔

آر پی او نے کہا کہ ہر شہری کو حق حاصل ہے کہ وہ اپنی شکایات درج کروانے کے لیے کسی بھی وقت پولیس دفاتر کا رخ کر سکتا ہے کیونکہ عوام کے لیے دفاتر کے دروازے دن رات کھلے ہیں۔ انہوں نے گوجرانوالہ کو امن پسند شہر قرار دیتے ہوئے کہا کہ یہاں کے تمام مکاتب فکر کے لوگ رواداری اور محبت کے ساتھ زندگی گزار رہے ہیں۔

ریجنل پولیس آفیسر نے زور دیا کہ عوام اور پولیس کے درمیان فاصلوں کو کم کر کے انصاف کے تقاضے پورے کیے جائیں اور امن قائم رکھا جائے۔

گوجرانوالہ (باغی ٹی وی، محمد رمضان نوشاہی)سی پی او گوجرانوالہ محمد ایاز سلیم نے عوامی رابطہ مہم کے تحت ایس پی سٹی آفس، سرکل آفس ماڈل ٹاؤن، کوتوالی اور پانچ دیگر تھانوں میں کھلی کچہریاں لگائیں جہاں شہریوں کی شکایات سنی گئیں اور ان کے فوری ازالہ کے لیے متعلقہ افسران کو ہدایات جاری کی گئیں۔ اس موقع پر ایس پی سٹی شاہد رشید، ایس ڈی پی او ماڈل ٹاؤن انصرفاروق مان، ایس ڈی پی او کوتوالی حافظ امتیاز اور دیگر اعلیٰ پولیس افسران بھی موجود تھے۔

سی پی او نے کہا کہ کمیونٹی کے تعاون کے بغیر پولیس کا وجود بے معنی ہو جاتا ہے، اور شہریوں کا فرض ہے کہ وہ جرائم پیشہ افراد کی نشاندہی کر کے امن و امان قائم کرنے میں پولیس کی مدد کریں۔ انہوں نے پولیس افسروں پر زور دیا کہ وہ اپنے رویوں میں بہتری لائیں اور ایمانداری و دیانتداری سے عوام کی خدمت کے لیے خود کو وقف کریں تاکہ امن و امان کی فضا قائم کی جا سکے۔