Category: اسلام آباد

‎صوبائی وزیر تعلیم پنجاب رانا سکندر حیات نے اسکولوں میں جمعہ کی چھٹی سے متعلق گردش کرنے والی خبروں کی وضاحت کرتے ہوئے کہا ہے کہ یہ چھٹی مستقل نہیں رہے گی اور جلد ختم کر دی جائے گی۔ ان کے مطابق تعلیمی اداروں کو دوبارہ معمول کے ہفتہ وار شیڈول پر لایا جا رہا ہے۔
‎وزیر تعلیم نے اپنے بیان میں واضح کیا کہ جمعہ کی چھٹی کو مستقل بنانے کی خبریں درست نہیں ہیں۔ انہوں نے کہا کہ آنے والے ہفتوں میں یہ سہولت مکمل طور پر ختم کر دی جائے گی اور طلبہ کو روایتی شیڈول کے مطابق اسکول آنا ہوگا۔
‎انہوں نے بتایا کہ اس حوالے سے صوبائی حکومت وفاقی حکومت کے ساتھ مسلسل رابطے میں ہے تاکہ فیصلے کو بہتر انداز میں نافذ کیا جا سکے۔ حکام کے مطابق یہ اقدام عارضی نوعیت کا تھا جسے مخصوص حالات کے تحت متعارف کروایا گیا تھا۔
‎رانا سکندر حیات نے موسم گرما کی تعطیلات سے متعلق بھی وضاحت کی اور کہا کہ چھٹیوں کے دورانیے یا شیڈول کے بارے میں حتمی فیصلہ 15 مئی کے بعد کیا جائے گا۔ اس حوالے سے کوئی بھی اعلان وزیراعلیٰ پنجاب مریم نواز شریف کی منظوری کے بعد سامنے آئے گا۔
‎یاد رہے کہ عالمی سطح پر توانائی بحران اور پیٹرول و ڈیزل کی بڑھتی ہوئی قیمتوں کے باعث تعلیمی اداروں میں جمعہ کی چھٹی دی گئی تھی، جس کے تحت طلبہ کو آن لائن کلاسز لینے کی ہدایت کی گئی تھی۔ اب حالات میں بہتری کے بعد حکومت نے تعلیمی نظام کو مکمل طور پر بحال کرنے کا فیصلہ کیا ہے۔

وزیرِ اعظم محمد شہباز شریف نے پاکستان میں قیمتی پتھروں کی کان کنی و پراسیسنگ کی بین الاقوامی معیار سے ہم آہنگی اور انکی برآمدات میں اضافے کا عزم کیا ہے،
ملک میں تین سینٹر آف ایکسیلینس کے قیام پر جائزہ اجلاس کی صدارت وزیراعظم شہباز شریف نے کی، وزیراعظم کا کہنا تھا کہ پاکستان کو اللہ تعالی نے قیمتی پتھروں سمیت قدرتی وسائل کی دولت سے مالا مال کیا ہے،یہ ایک ایسا شعبہ ہے جس میں مقامی وسائل سے برآمدات میں اضافہ کیا جا سکتا ہے. معاون خصوصی ہارون اختر اور انکی ٹیم کے شعبے کی ترقی کیلئے اقدامات قابل ستائش ہیں. سینٹرز آف ایکسیلینس کے قیام میں شفافیت کے عنصر کو اہمیت دی جائے.

وزیرِ اعظم نے پاکستانی قیمتی پتھروں کی پراسیسنگ کے بعد برآمدات میں اضافے کیلئے لائحہ عمل مرتب کرنے کی ذمہ داری وزارت منصوبہ بندی کو سونپ دی. وزارت منصوبہ بندی جلد جامع لائحہ عمل مرتب کرکے وزیرِ اعظم کو پیش کرے گی.

اجلاس کو قیمتی پتھروں کی پراسیسنگ اور کان کنی کے جدید طریقوں کو رائج کرنے کے حوالے سے بریفنگ دی گئی. اجلاس کو بتایا گیا کہ قیمتی پتھروں کی کٹائی، تراش خراش اور انہیں زیورات میں مزین کرنے کے قابل بنانے کے حوالے سے حکومت تین سینٹرز آف ایکسیلینس کا قیام عمل میں لارہی ہے. گلگت بلتستان اور آزاد جموں و کشمیر میں سینٹرز کیلئے اراضی کی نشاندہی کی جا چکی. علاوہ ازیں اسلام آباد میں سینٹر کے قیام کیلئے اراضی کی نشاندہی پر کام جاری ہے. اجلاس کو بتایا گیا کہ ان سینٹرز آف ایکسیلینس میں قیمتی پتھروں کی بین الاقوامی معیار کی پراسیسنگ کیلئے تربیت فراہم کی جائے گی. اجلاس کو بتایا گیا کہ جولائی 2026 میں پاکستان میں قیمتی پتھروں کے حوالے سے پہلی بین الاقوامی نمائش کا انعقاد بھی کیا جا رہا ہے. اس کے علاوہ سری لنکا اور چین کے تعاون سے مخصوص قیمتی پتھروں کی پراسیسنگ کے حوالے سے افرادی قوت کی تربیت کیلئے اقدامات کئے جا رہے ہیں.

اجلاس کو قیمتی پتھروں کی کم سے کم ضیاع کے ساتھ کان کنی کے حوالے سے وزارت پیٹرولیم کے اقدامات پر بھی بریفنگ دی گئی. اجلاس کو بتایا گیا کہ مقامی آبادیوں کو اعتماد میں لے کر اس حوالے اشتراکی منصوبوں کا اجراء کیا جارہا ہے. ایک ہزار لوگوں کو قیمتی پتھروں کی بین الاقوامی معیار سے ہم آہنگ کان کنی کی تربیت بھی دی جارہی ہے. وزیرِ اعظم کو منصوبوں کے مراحل اور انکی تکمیل کی معینہ مدت پر بھی بریفنگ دی گئی. وزیرِ اعظم کی شعبے کی برآمدات میں اضافے کیلئے وزرات منصوبہ بندی کو جامع لائحہ عمل مرتب کرکے جلد پیش کرنے کی ہدایت.

اجلاس میں وفاقی وزراء احسن اقبال، ڈاکٹر مصدق ملک، جام کمال خان، علی پرویز ملک، وزیرِ مملکت بلال اظہر کیانی، معاون خصوصی ہارون اختر، گورنر اسٹیٹ بینک جمیل احمد، گلگت بلتستان اور آزاد جموں و کشمیر کے چیف سیکریٹریز اور متعلقہ اعلی حکام نے شرکت کی.

وفاقی آئینی عدالت سے حکومت کو بڑا ریلیف مل گیا، آئینی عدالت نے پاسپورٹ اینڈ امیگریشن رولز کی کالعدم شدہ دفعات بحال کردیں، دفعات بحالی سے شہریوں کے نام پاسپورٹ کنٹرول لسٹ میں شامل کرنے کا اختیار بحال ہوگیا۔

رپورٹ کے مطابق عدالت نے حکومت کا شہریوں کے پاسپورٹ غیرفعال قرار دینے کا اختیار بھی بحال کردیا۔
آئینی عدالت نے لاہور ہائیکورٹ کا فیصلہ معطل کردیا، حکومتی اپیل سماعت کیلئے منظور کرلی۔جسٹس حسن اظہر رضوی کی سربراہی میں 2 رکنی بینچ نے فریقین کو نوٹس جاری کردیئے۔ جسٹس حسن اظہر رضوی نے سوال کیا کہ کیا یہ ڈنکی لگا کر جانے والوں کا کیس ہے؟۔ ایڈیشنل اٹارنی جنرل نے کہا کہ فرحان علی نامی شہری غیرقانونی طور پر ایران گیا جہاں سے ڈی پورٹ ہوا تھا، غیرقانونی اقدامات پر پاسپورٹ کنٹرول لسٹ میں نام شامل کیا گیا۔

عامر رحمان نے بتایا کہ پاسپورٹ کنٹرول لسٹ میں نام کی شمولیت اور پاسپورٹ غیرفعال ہونا چیلنج کیا گیا۔ جسٹس حسن نے کہا کہ یہ خود باہر جانے والا تھا یا لوگوں سے پیسہ لے کر اٹلی بھیجتا تھا؟، ایف آئی اے نے اب تک کیا تفتیش کی ہے؟۔ایڈیشنل اٹارنی جنرل نے جواب دیا کہ اس حوالے سے ایف آئی اے سے معلومات نہیں لیں، لاہور ہائیکورٹ نے پاسپورٹ اینڈ امیگریشن کے رول 3 اور 10 کالعدم قرار دے دیئے۔وفاقی آئینی عدالت نے لاہور ہائی کورٹ کا فیصلہ معطل کرتے ہوئے سماعت غیر معینہ مدت تک ملتوی کردی۔

راولپنڈی کی انسدادِ دہشت گردی کی عدالت نے 26 نومبر کے احتجاج سے متعلق درج 29 مقدمات میں بشریٰ بی بی کی عبوری ضمانت میں 18 مئی تک توسیع کر دی ہے۔

انسدادِ دہشت گردی کی عدالت کے جج امجد علی شاہ نے کیس کی سماعت کی، جس کے دوران بشریٰ بی بی کے وکیل فیصل ملک اور قانونی ٹیم عدالت پیش ہوئے۔عدالت میں سماعت کے دوران تفتیشی افسران کی عدم دستیابی کے باعث کارروائی کو آگے نہ بڑھایا جا سکا، جس پر عدالت نے کیس کی سماعت ملتوی کرتے ہوئے آئندہ تاریخ 18 مئی مقرر کر دی۔واضح رہے کہ یہ مقدمات 26 نومبر کو ہونے والے احتجاج سے متعلق درج کیے گئے تھے، جن میں مختلف الزامات کے تحت کارروائی جاری ہے۔

‎پاکستان کے قرض پروگرام کے حوالے سے ایک اہم پیش رفت سامنے آئی ہے، جہاں عالمی مالیاتی فنڈ کے ایگزیکٹو بورڈ کا اجلاس 8 مئی کو طلب کر لیا گیا ہے۔ اس اجلاس میں پاکستان کے لیے قرض کی اگلی قسط کی منظوری متوقع ہے، جسے ملکی معیشت کے لیے اہم قرار دیا جا رہا ہے۔
‎ذرائع کے مطابق اس اجلاس میں پاکستان کو 1.2 ارب ڈالر سے زائد رقم کی منظوری دی جا سکتی ہے، جو 7 ارب ڈالر کے توسیعی فنڈ سہولت پروگرام اور آر ایس ایف کے تحت فراہم کی جائے گی۔ اس رقم کا مقصد پاکستان کی معاشی صورتحال کو مستحکم کرنا اور مالیاتی دباؤ کو کم کرنا ہے۔
‎رپورٹس کے مطابق اگر تیسرا جائزہ کامیابی سے مکمل ہو جاتا ہے تو پاکستان کو تقریباً 1 ارب ڈالر کی قسط ملنے کا امکان ہے، جبکہ آر ایس ایف کے دوسرے جائزے کے بعد مزید 210 ملین ڈالر فراہم کیے جا سکتے ہیں۔ یہ فنڈز زرمبادلہ کے ذخائر کو بہتر بنانے اور مالیاتی استحکام کے لیے اہم سمجھے جا رہے ہیں۔
‎یاد رہے کہ پاکستان اور آئی ایم ایف کے درمیان 27 مارچ کو اسٹاف لیول معاہدہ طے پایا تھا، جس کے بعد اب اس پروگرام کو اگلے مرحلے میں لے جانے کے لیے ایگزیکٹو بورڈ کی منظوری درکار ہے۔
‎ماہرین معاشیات کے مطابق اس قسط کی منظوری پاکستان کے لیے مثبت اشارہ ہوگی، جس سے نہ صرف عالمی مالیاتی اداروں کا اعتماد بڑھے گا بلکہ سرمایہ کاری کے مواقع بھی بہتر ہوں گے۔

‎ایرانی وزیر خارجہ عباس عراقچی نے اسلام آباد میں فیلڈ مارشل عاصم منیر سے اہم ملاقات کی، جس میں خطے کی موجودہ صورتحال اور جنگ کے خاتمے کے لیے جاری سفارتی کوششوں پر تفصیلی تبادلہ خیال کیا گیا۔
‎ذرائع کے مطابق ملاقات میں دونوں رہنماؤں نے امن و استحکام کے قیام کے لیے مشترکہ حکمت عملی پر غور کیا اور اس بات پر زور دیا کہ تنازعات کے حل کے لیے مذاکرات اور سفارت کاری کو ترجیح دی جانی چاہیے۔ اس موقع پر باہمی تعاون اور علاقائی سیکیورٹی کے امور بھی زیر بحث آئے۔
‎ایرانی میڈیا کے مطابق عباس عراقچی کا یہ دورہ دراصل مشاورت کے سلسلے کی کڑی ہے، جس کا مقصد خطے میں بڑھتی ہوئی کشیدگی کو کم کرنا اور مختلف ممالک کے ساتھ رابطوں کو مضبوط بنانا ہے۔ اطلاعات ہیں کہ اس سے قبل بھی ایرانی وزیر خارجہ مختلف ممالک کے دورے کر چکے ہیں تاکہ سفارتی سطح پر پیش رفت ممکن بنائی جا سکے۔
‎ملاقات میں اس امر پر بھی اتفاق کیا گیا کہ خطے میں پائیدار امن کے لیے مسلسل رابطہ اور مشاورت ناگزیر ہے۔ دونوں جانب سے اس عزم کا اظہار کیا گیا کہ کشیدگی کو کم کرنے اور مسائل کے پرامن حل کے لیے کوششیں جاری رکھی جائیں گی۔

‎وفاقی وزیر پیٹرولیم علی پرویز ملک نے ڈیزل کی قیمت کے فارمولے میں تبدیلی سے متعلق وضاحت کرتے ہوئے کہا ہے کہ یہ فیصلہ کسی دباؤ کے تحت نہیں بلکہ باہمی رضامندی سے کیا گیا ہے۔ انہوں نے بتایا کہ پیٹرولیم ڈویژن اور ملکی ریفائنریز کے درمیان رضاکارانہ معاہدہ طے پایا ہے جس کے بعد یہ نیا فارمولا متعارف کرایا گیا۔
‎وزیر پیٹرولیم کے مطابق اس حوالے سے ماہرین اور ریسرچ ٹیم سے مشاورت کے بعد ایک عبوری فارمولا تیار کیا گیا ہے، جس کا مقصد نہ صرف موجودہ نظام کو بہتر بنانا ہے بلکہ مستقبل میں ریفائنریز کو جدید خطوط پر استوار کرنا بھی ہے۔ انہوں نے کہا کہ حکومت کا ہدف ریفائننگ سیکٹر کو اپ گریڈ کر کے مکمل ڈی ریگولیشن کی طرف لے جانا ہے۔
‎علی پرویز ملک نے اس بات پر زور دیا کہ پیٹرولیم مصنوعات کی قیمتوں کو طویل مدت تک مستحکم رکھنے کے لیے عالمی سطح پر تنازعات کا حل بھی انتہائی اہم ہے، کیونکہ بین الاقوامی مارکیٹ میں اتار چڑھاؤ براہ راست مقامی قیمتوں کو متاثر کرتا ہے۔
‎انہوں نے مزید کہا کہ پاکستان کی معاشی بہتری کے لیے پالیسیوں کا تسلسل ضروری ہے اور توانائی کے شعبے میں مستقل مزاجی سے فیصلے کرنے ہوں گے۔ ان کے مطابق نئے فارمولے کے تحت قیمتوں کی ادائیگی کا نظام مقامی ریفائنریز کو علاقائی سطح پر مسابقت کے قابل بنائے گا اور انہیں دیگر ممالک، خصوصاً بھارت کی ریفائنریز کے برابر لانے میں مدد دے گا۔
‎وزیر پیٹرولیم کا کہنا تھا کہ اس تبدیلی کا ایک اہم مقصد ویلیو ایڈڈ مصنوعات کی پیداوار میں اضافہ کرنا ہے تاکہ ملک کو زیادہ اقتصادی فائدہ حاصل ہو سکے۔ ان کے مطابق مسابقتی ماحول پیدا ہونے سے نہ صرف صنعت ترقی کرے گی بلکہ صارفین کے مفادات کا بھی بہتر تحفظ ممکن ہو سکے گا۔
‎ماہرین کا کہنا ہے کہ اگر اس پالیسی پر مؤثر عمل درآمد کیا گیا تو توانائی کے شعبے میں مثبت تبدیلیاں آ سکتی ہیں اور معیشت کو استحکام مل سکتا ہے۔