Category: اسلام آباد

پاکستان نے بھارتی طیاروں کیلئے اپنی فضائی حدود کی بندش میں مزید ایک ماہ کی توسیع کر دی ہے، جس کے بعد یہ پابندی دوسرے سال میں داخل ہو گئی ہے۔ پاکستان ایئر پورٹ اتھارٹی کی جانب سے نیا نوٹم جاری کر دیا گیا ہے۔

نوٹم کے مطابق بھارتی رجسٹرڈ، لیز پر حاصل کردہ، کمرشل اور فوجی طیارے آئندہ ایک ماہ تک بھی پاکستانی فضائی حدود استعمال نہیں کر سکیں گے۔ اعلامیے میں کہا گیا ہے کہ یہ پابندی 24 مئی 2026 صبح 5 بجے تک برقرار رہے گی۔یاد رہے کہ پاکستان نے بھارتی طیاروں کیلئے اپنی فضائی حدود 23 اپریل 2025 سے بند کر رکھی ہے، جس کے بعد اب یہ بندش مسلسل دوسرے سال میں داخل ہو چکی ہے۔ماہرین کے مطابق پاکستانی فضائی حدود کی بندش کے باعث بھارتی ایئرلائنز کو طویل راستے اختیار کرنا پڑ رہے ہیں، جس سے ایندھن، آپریشنل اخراجات اور سفری اوقات میں نمایاں اضافہ ہوا ہے۔ ذرائع کا کہنا ہے کہ اس فیصلے سے بھارتی فضائی کمپنیوں کو اربوں روپے کا نقصان ہو چکا ہے۔

وفاقی وزیر ریلوے حنیف عباسی نے اعلان کیا ہے کہ پاکستان سے ایران تک ریلوے ٹریک کو جلد فعال کیا جا رہا ہے، جس سے خطے میں تجارتی، معاشی اور سفری روابط کو نئی جہت ملے گی۔ یہ منصوبہ مستقبل میں توسیع پا کر یورپ کے ریلوے نیٹ ورک سے بھی منسلک ہو سکتا ہے، جس سے پاکستان کو بین الاقوامی ٹرانزٹ حب بنانے میں مدد ملے گی۔

اپنے بیان میں وفاقی وزیر نے کہا کہ اس منصوبے پر ماضی میں بھی مختلف مراحل میں پیش رفت ہو چکی ہے، خصوصاً سرحدی رابطوں اور فریٹ ٹرانسپورٹ کے حوالے سے تکنیکی سطح پر کام جاری رہا ہے، جسے اب مزید تیزی سے آگے بڑھایا جائے گا۔ انہوں نے واضح کیا کہ حکومت اس اہم منصوبے کو ترجیحی بنیادوں پر مکمل کرنے کے لیے پرعزم ہے۔حنیف عباسی کے مطابق روہڑی سے نوکنڈی تک تقریباً 900 کلومیٹر جبکہ نوکنڈی سے تافتان تک 87 کلومیٹر طویل ریلوے سیکشن کی بحالی اور اپگریڈیشن پر بھی کام جاری ہے۔ ان کا کہنا تھا کہ اس سے پاکستان کو ایران کی سرحد کے ساتھ مؤثر ریلوے رابطے میسر آئیں گے اور خطے میں لاجسٹکس، تجارت اور سفری سہولیات میں نمایاں بہتری آئے گی۔

وفاقی وزیر نے مزید کہا کہ ریلوے نظام کی بہتری ملکی معیشت کے لیے ناگزیر ہے، کیونکہ مضبوط ریلوے نیٹ ورک نہ صرف اندرونی رابطوں کو بہتر بناتا ہے بلکہ علاقائی تجارت کو بھی وسعت دیتا ہے۔ انہوں نے زور دیتے ہوئے کہا کہ اگر ریلوے نہیں چلے گی تو پاکستان نہیں چلے گا۔

اسلام آباد ایک بار پھر عالمی سفارت کاری کے مرکز میں آنے جا رہا ہے، جہاں امریکا اور ایران کے اعلیٰ سطحی وفود کی آمد متوقع ہے۔

اطلاعات کے مطابق امریکی وفد، جس کی قیادت جے ڈی وینس کر رہے ہیں، آج پاکستانی وقت کے مطابق شام 6 بجے واشنگٹن سے اسلام آباد روانہ ہوگا۔دوسری جانب ایرانی وفد بھی اپنی اعلیٰ قیادت سے حتمی منظوری ملنے کے بعد چند گھنٹوں میں روانگی اختیار کرے گا۔ ذرائع کے مطابق دونوں وفود کی آمد سے خطے میں سفارتی سرگرمیوں میں نمایاں تیزی آئے گی۔مبصرین کا کہنا ہے کہ اگر یہ مذاکرات کامیاب ہوتے ہیں تو نہ صرف امریکا اور ایران کے تعلقات میں بہتری آسکتی ہے بلکہ مشرق وسطیٰ اور جنوبی ایشیا کی مجموعی صورتحال پر بھی مثبت اثرات مرتب ہوں گے۔

حکومتی و سفارتی حلقوں کے مطابق تمام نظریں اب اسلام آباد پر مرکوز ہیں، جہاں اہم ملاقاتوں اور ممکنہ پیش رفت کے امکانات روشن ہو گئے ہیں۔ یوں پاکستان کا دارالحکومت ایک مرتبہ پھر عالمی اسٹیج پر نمایاں حیثیت اختیار کرنے جا رہا ہے۔

آج مفکرِ پاکستان حضرت علامہ محمد اقبالؒ کی برسی عقیدت و احترام کے ساتھ منائی جا رہی ہے

اقبالؒ نے اپنی فکر اور شاعری کے ذریعے برصغیر کے مسلمانوں کو ایک الگ قوم ہونے کا شعور دیا،شاعر مشرق کی فکری رہنمائی نے قیامِ پاکستان کی جدوجہد کو ایک مضبوط نظریاتی بنیاد فراہم کی،کشمیراقبالؒ کی سوچ کا اہم مرکز رہا جس کو بار ہا انہوں نے اپنی شاعری میں سمویا،اقبالؒ کے نزدیک کشمیر محض ایک خطہ نہیں بلکہ امتِ مسلمہ کے احساس اور بیداری کی علامت تھا،کشمیری نوجوانوں کی پاکستان سے وابستگی و قربانیاں اقبالؒ کے نظریے اور فکر کے تسلسل کو ظاہر کرتی ہیں،حضرت علامہ اقبالؒ کا پیغام آج بھی امتِ مسلمہ کے لیے رہنمائی اور بیداری کا ذریعہ بنا ہوا ہے

پاکستان کو سعودی عرب کی جانب سے مزید ایک ارب ڈالرز کے فنڈ موصول ہو گئے۔

اسٹیٹ بینک نے سعودی وزارت خزانہ کی جانب سے ایک ارب ڈالر کے فنڈز موصول ہونے کی تصدیق کر تے ہوئے بتایا گیا کہ یہ رقم سعودی حکومت کی جانب سے اعلان کردہ 3 ارب ڈالرز ڈپازٹ کی دوسری قسط ہے،پاکستان کے مرکزی بینک کا کہنا ہے کہ سعودی عرب کی جانب سے 15 اپریل کو 2 ارب ڈالر پہلے ہی موصول ہو چکے ہیں،سعودی عرب کی جانب سے پاکستان کو 3 ارب ڈالر فنڈز کی یقین دہائی کروائی گئی تھی۔

دوسری جانب چند روز قبل وزیر خزانہ محمد اورنگزیب نے کہا تھا کہ 5 ارب ڈالرز کے ڈپازٹ کی بھی سالانہ رول اوور کے بجائے 3 سال کی توسیع ہو جائے گی، سالانہ رول اوور کے بجائے اس کی میچورٹی 2028ء تک جائے گی،پاکستان نے متحدہ عرب امارات کو گزشتہ ہفتے 2 ارب ڈالر ڈپازٹس 45 کروڑ سود کے ساتھ ادا کیے تھے جبکہ متحدہ عرب امارات کے ایک ارب ڈالر کی ادائیگی 23 اپریل کو ہونی ہے۔

‎پاکستان نے امریکا اور ایران کے درمیان ممکنہ مذاکرات کے آغاز کے لیے اپنی سفارتی سرگرمیاں تیز کر دی ہیں، جس سے خطے میں ایک اہم پیش رفت کی توقع پیدا ہو گئی ہے۔ امریکی خبر ایجنسی کے مطابق پاکستان نے دونوں ممالک کے ساتھ رابطوں میں تیزی لاتے ہوئے کشیدگی کم کرنے اور مذاکرات کی راہ ہموار کرنے کی کوششیں شروع کر دی ہیں۔
‎ذرائع کے مطابق پاکستان نے اتوار کے روز سے امریکا اور ایران کے حکام کے ساتھ بیک چینل اور باضابطہ سفارتی رابطے بڑھا دیے ہیں۔ ان رابطوں کا مقصد دونوں ممالک کو ایک بار پھر مذاکرات کی میز پر لانا اور جاری تنازعات کو پرامن طریقے سے حل کرنے کی جانب پیش رفت کرنا ہے۔
‎سفارتی ماہرین کا کہنا ہے کہ پاکستان خطے میں ایک اہم کردار ادا کرنے کی صلاحیت رکھتا ہے، خاص طور پر ایسے وقت میں جب مشرق وسطیٰ میں کشیدگی بڑھ رہی ہو۔ پاکستان کے ایران کے ساتھ قریبی تعلقات اور امریکا کے ساتھ سفارتی روابط اسے ایک مؤثر پل کا کردار ادا کرنے میں مدد دیتے ہیں۔
‎یہ پیش رفت ایسے وقت میں سامنے آئی ہے جب عالمی برادری امریکا اور ایران کے درمیان بڑھتی ہوئی کشیدگی پر تشویش کا اظہار کر رہی ہے۔ اگر مذاکرات کا عمل دوبارہ شروع ہوتا ہے تو اس سے نہ صرف خطے میں امن کے امکانات بڑھیں گے بلکہ عالمی معیشت کو بھی ممکنہ خطرات سے بچایا جا سکے گا، خاص طور پر تیل کی قیمتوں اور توانائی کی سپلائی کے حوالے سے۔
‎حکام کا کہنا ہے کہ پاکستان کی کوشش ہے کہ دونوں ممالک کے درمیان اعتماد کی فضا بحال کی جائے اور ایک ایسا ماحول پیدا کیا جائے جہاں بات چیت کے ذریعے مسائل کا حل ممکن ہو۔ آنے والے دنوں میں ان سفارتی کوششوں کے نتائج سامنے آنے کی توقع ہے۔