Category: اسلام آباد

وفاقی حکومت نے دارالحکومت اسلام آباد کے ریڈ زون میں واقع تمام سرکاری دفاتر کے لیے اہم فیصلہ کرتے ہوئے آج پیر 20 اپریل 2026 کو ورک فرام ہوم کا اعلان کر دیا ہے۔

کابینہ سیکرٹریٹ کی جانب سے جاری نوٹیفکیشن کے مطابق ریڈ زون میں قائم تمام وزارتیں، ڈویژنز اور دیگر وفاقی ادارے آج گھر سے کام کریں گے جبکہ اس دوران ریڈ زون میں داخلہ بھی بند رہے گا، تمام افسران اور سیکرٹریٹ اسٹاف اپنے اسٹیشن پر موجود رہیں اور ضرورت پڑنے پر مختصر نوٹس پر دفتر پہنچنے کے لیے تیار رہیں، یہ فیصلہ انتظامی ضروریات اور سیکیورٹی صورتحال کے پیش نظر کیا گیا ہے تاکہ ریڈ زون میں غیر ضروری آمد و رفت کو محدود رکھا جا سکے۔

ترجمان اسلام آباد پولیس نے شہریوں کے لیے لائسنسنگ سہولیات سے متعلق اہم ایڈوائزری جاری کر دی، ترجمان کے مطابق 20 اپریل 2026 سے تاحکم ثانی بعض پولیس خدمت مراکز میں لائسنسنگ سہولیات معمول کے مطابق جاری رہیں گی، جبکہ بعض مراکز میں یہ سرگرمیاں عارضی طور پر معطل کر دی گئی ہیں پولیس خدمت مرکز ایف-6، پولیس خدمت مرکز گلبرگ گرین اور کیس کیڈ ڈپلومیٹک انکلیو میں لائسنسنگ سے متعلق تمام سہولیات بدستور دستیاب ر ہیں گی۔

دوسری جانب فیض آباد ٹریفک ہیڈ کوارٹر سمیت دیگر پولیس خدمت مراکز میں لائسنسنگ سے متعلق سرگرمیاں معطل رہیں گی اسلام آباد پولیس نے شہریوں سے درخواست کی ہے کہ وہ لائسنسنگ سہولیات کے حصول کے لیے جاری کردہ ایڈوائزری پر عمل کریں۔

پاکستان علما کونسل، انٹرنیشنل تنظیمِ حرمین شریفین کونسل اور دارالافتا پاکستان نے حجاج کرام اور عمرہ زائرین کے لیے ایک جامع ضابطہ اخلاق جاری کیا ہے-

لاہور میں پریس کانفرنس کرتے ہوئے چیئرمین پاکستان علما کونسل حافظ محمد طاہر محمود اشرفی، مولانا حافظ محمد طارق محمود، مولانا اسعد زکریا، علامہ طاہر الحسن اور دیگر علما و مشائخ نے زائرین کو سعودی وزارتِ حج و عمرہ کی ہدایات پر عمل کی اپیل کی ضابطہ اخلاق میں واضح کیا گیا کہ حجاج کرام رش کے ایام میں حدودِ حرم میں جہاں بھی نماز ادا کریں گے، انہیں ایک لاکھ نماز کا ثواب ملے گا، لہٰذا ازدحام سے بچنے کے لیے حدودِ حرم کا خیال رکھیں۔

علما نے سخت تنبیہ کی کہ سعودی عرب میں مقیم افراد بغیر اجازت نامے (حج پرمٹ) کے حج نہ کریں، کیونکہ یہ شرعی اور قانونی طور پر جائز نہیں ہے، اس لیے حج و عمرہ پر روانگی سے قبل مکمل معلومات حاصل کریں اور کسی بھی غیر رجسٹرڈ یا غیر قانونی آن لائن گروپ سے بکنگ نہ کروائیں۔ اگر معلومات نہ ہوں تو سفر کے دوران کسی جاننے والے یا وزارتِ مذہبی امور کے نمائندوں سے رہنمائی لیں تاکہ کسی قسم کی گھبراہٹ کا شکار نہ ہونا پڑے۔

ضابطہ اخلاق میں زائرین کو ہدایت کی گئی ہے کہ وہ اپنی نیت کو خالص اللہ کے لیے رکھیں کیونکہ حج و عمرہ دنیا کی نمود و نمائش کے لیے نہیں ہے، اس لیے عبادت کے دوران ویڈیوز اور تصاویر بنانے سے حتی الامکان اجتناب کریں اور ایئرپورٹ پر روانگی میں تاخیر پر پریشان ہونے کے بجائے ذکر و اذکار اور درود شریف پڑھیں۔

دورانِ حج سیاسی میدان سجانے یا کسی ایسی کوشش کا حصہ بننے کی بھی سختی سے ممانعت کی گئی ہے جس سے حرمین کے امن میں خلل پڑے، اور زائرین کو ایسے افراد یا گروہوں سے مکمل دور رہنے کی تاکید کی گئی ہے۔ منیٰ، عرفات اور مزدلفہ میں قیام کے دوران اپنے گروپ قائد کی ہدایات پر عمل کریں، افواہوں پر توجہ نہ دیں اور رمی جمرات کے دوران جلد بازی سے کام نہ لیں کیونکہ کسی بھی حادثے کی صورت میں ذمہ دار کون ہوگا۔

رمی جمرات کے معاملے میں معذوروں، بیماروں اور خواتین کے لیے دی گئی شرعی رخصت اور سہولیات کو مدنظر رکھا جائے اور بلاوجہ مشکلات پیدا نہ کی جائیں، مزید برآں، یہ واضح کیا گیا کہ مملکتِ سعودی عرب میں بھیک مانگنا، منشیات لے جانا یا کسی بھی قسم کی غیر قانونی سرگرمی میں ملوث ہونا بہت بڑا جرم ہے جس سے زائرین کو مکمل طور پر دور رہنا چاہیے۔

کانفرنس کے دوران ایک قرارداد بھی منظور کی گئی جس میں پاکستان کے تمام مکاتبِ فکر کے علما، مشائخ اور سیاسی و مذہبی قائدین نے حجاج و زائرین کے لیے سعودی عرب کی خدمات اور انتظامی تبدیلیوں کو خراجِ تحسین پیش کیا قرارداد میں واضح کیا گیا کہ پاکستان سمیت تمام ممالک کے حجاج، منتظمین اور حکومتیں مملکتِ سعودی عرب کی حج پالیسی پر عمل درآمد کی پابند ہیں۔

پریس کانفرنس میں مفتی محمد انتخاب، مولانا اسد اللہ فاروق، حافظ مقبول احمد، مولانا محمد اسلم صدیقی، قاری عبدالحکیم اطہر، مولانا محمد اشفاق پتافی اور دیگر اکابرین بھی شریک تھے۔

وزیر خارجہ سینیٹر محمد اسحاق ڈار نے آج پولینڈ کے نائب وزیر اعظم و وزیر خارجہ راڈوسواف سیکورسکی سے ٹیلی فونک گفتگو کی۔

گفتگو میں دونوں رہنماؤں نے پاکستان اور پولینڈ کے درمیان تعلقات میں مثبت پیش رفت کو سراہا اور باہمی دلچسپی کے شعبوں میں تعاون مزید مضبوط بنانے کے عزم کا اعادہ کیا،گفتگو کے دوران علاقائی اور عالمی صورتحال پر بھی تفصیلی تبادلہ خیال کیا گیا۔

پولینڈ کے وزیر خارجہ نے ایران اور امریکا کے درمیان جنگ بندی میں سہولت کاری کے لیے پاکستان کی کوششوں کو سراہا اور خطے میں امن و استحکام کے فروغ کے لیے پاکستان کے مذاکرات اور سفارتکاری پر مبنی مؤقف کی تعریف کی انہوں نے اسحاق ڈار کو جون 2026 میں پولینڈ کے دورے کی دعوت بھی دی۔

اسلام آباد سے روٹ ٹو مکہ کی پہلی حج پرواز 270 عازمین کو لے کر مدینہ منورہ روانہ ہوگئی،اسلام آباد سے روانہ ہونے والے پاکستانی عازمین حج نے حکومت پاکستان کی کاوشوں پر شکریہ ادا کیا۔

سعودی ایئرلائن کی پرواز ایس وی 5723 دن 11 بجے روانہ ہوئی وفاقی وزیر مذہبی امور سردار محمد یوسف، سعودی ڈپٹی ہیڈ مشن محمد ال علی اور جوائنٹ سیکرٹر ی حج محمد بخش سانگی نے عازمین حج کو رخصت کیا سردار محمد یوسف نے بہترین سہولیات کی فراہمی و تعاون پر خادم حرمین شریفین، ولی عہد محمد بن سلمان، سعودی وزیر حج عمرہ ڈاکٹر توفیق بن ربیعہ اور سعودی سفیر نواف بن سعید المالکی کو زبردست خراج تحسین پیش کیا –

وفاقی وزیر مذہبی امور سردار محمد یوسف نے تقریب سے خطاب کرتے ہوئے کہا کہ آج 2026 کی پہلی حج پرواز ہے، عازمین کو سرزمین حجاز روانہ کر دیا گیا، ہر حاجی کے لیے یہ لمحہ زندگی کے یادگار ترین لمحات میں سے ایک ہےانہوں نے سعودی وژن 2030 اور وزیر حج ڈاکٹر توفیق الربیعہ کی کاوشوں کا اعتراف کیا۔

سردار یوسف نے کہا کہ پاکستان اور سعودی عرب کے مثالی تعاون سے حج انتظامات مکمل کیے گئے، حکومت پاکستان کی اولین ترجیح عازمین کو سہولت اور باوقار سفر کی فراہمی ہےانہوں نے روڈ ٹو مکہ منصوبے کو عازمین کے لیے انقلابی سہولت قرار دیتے ہوئے کہا کہ اسلام آباد ایئرپورٹ پر سعودی امیگریشن اور سفری مراحل مکمل کیے جا رہے ہیں، اس سہولت سے عازمین براہ راست اپنی رہائش گاہوں تک پہنچ سکیں گے۔

سردار یوسف نے بتایا کہ اسلام آباد سے 36 ہزار اور کراچی سے 29ہزار 800 عازمین مستفید ہوں گے جبکہ پہلی بار لاہور سے بھی 30 ہزار عازمین روڈ ٹو مکہ سہولت حاصل کریں گے، مجموعی طور پر 95ہزار 800 پاکستانی عازمین اس جدید سہولت سے فائدہ اٹھائیں گے، کل عازمین کا 80 فیصد روڈ ٹو مکہ منصوبے سے مستفید ہوگا۔

انہوں نے کہا کہ وزیراعظم شہباز شریف کی ہدایت پر حج انتظامات مزید بہتر بنائے گئے، ہر 188 عازمین کے ساتھ تربیت یافتہ ناظم مقرر کیا گیا منیٰ، عرفات اور مزدلفہ میں عازمین کی مکمل رہنمائی یقینی بنائی جائے گی جبکہ ہر حاجی کو سعودی عرب پہنچتے ہی مفت سعودی سم فراہم کی جائے گی۔ لانگ حج کے لیے 40 جی بی انٹرنیٹ سہولت دی جائے گی۔

وفاقی وزیر مذہبی امور کا کہنا تھا کہ 24 ہزار حجاج کو ہائی اسپیڈ ٹرین کے ذریعے سفر کی سہولت فراہم کی جائے گی، مکہ اور مدینہ کے درمیان جدید ٹرین سروس کا آغاز کیا گیا ہے اس سال 1 لاکھ 19 ہزار سرکاری حجاج کے لیے خصوصی انتظامات کیے گئے، تمام سرکاری حجاج کو مدینہ میں مرکزیہ کے قریب رہائش دی جا ئے گی، حج صرف عبادت نہیں بلکہ روحانی تربیت کا ذریعہ ہے۔

سردار یوسف نے حجاج کرام کو صبر اور نظم و ضبط کے ساتھ حج مکمل کرنے کی ہدایت کرتے ہوئے سعودی قوانین کی پابندی ہر حاجی پر لازم قرار دے، انہو ں نےخدام الحجاج کی ہدایات پر عمل کرنے کی تاکید بھی کی حجاج پاکستان کے سفیر ہیں، مثبت کردار ادا کریں انہوں نے سعودی قیادت کا حجاج کی خد مت پر خصوصی شکریہ ادا جبکہ شاہ سلمان کی سرپرستی میں حجاج کی خدمت کو سراہا گیا۔

ایران امریکا مذاکرات کے تناظر میں وفاقی دارالحکومت اسلام آباد اور جڑواں شہر راولپنڈی میں سیکیورٹی ہائی الرٹ کر دی گئی ہے۔

ذرائع کے مطابق غیرملکی وفود کی آمد کے باعث غیرمعمولی اقدامات اٹھاتے ہوئے ایک طرف اسلام آباد میں سخت حفاظتی حصار قائم کیا گیا ہے تو دوسر ی جانب راولپنڈی میں کاروباری سرگرمیاں تاحکمِ ثانی معطل کر دی گئی ہیں اسلام آباد میں آنے والے معزز مہمانوں کو سرینا ہوٹل میں ٹھہرایا جائے گا، جہاں سیکیورٹی کے انتہائی سخت انتظامات کیے گئے ہیں، ذرائع کے مطابق ڈیوٹی پر موجود پولیس افسران کو موبائل فون استعمال کرنے کی اجازت نہیں ہوگی جبکہ تمام اہلکاروں کو اینٹی رائٹ کٹس پہننا لازمی قرار دیا گیا ہے۔

سیکیورٹی کے لیے مجموعی طور پر 18 ہزار اہلکار تعینات کیے جا رہے ہیں، جن میں سے 7 ہزار نفری پنجاب سے اسلام آباد پہنچ چکی ہے اسلام آباد کے ساتھ پاکستان رینجرز اور فرنٹئیر فورس بھی ڈیوٹی انجام دیں گے، جبکہ پاکستان آرمی اسلام آباد پولیس کے ساتھ مشترکہ ناکوں پر تعینات ہوگی ائیرپورٹ سے سرینا ہوٹل تک اہم عمارتوں پر رینجرز کے سنائپرز تعینات کیے جائیں گے اور روٹ کے اطراف گرین بیلٹس اور سروس روڈز کو مکمل طور پر کلیئر رکھا جائے گا۔

سیکیورٹی کو مؤثر بنانے کے لیے پنجاب پولیس کو وائرلیس سیٹس بھی فراہم کر دیے گئے ہیں، جبکہ روٹ پر بغیر سروس کارڈ کے کسی اہلکار کو داخلے کی اجاز ت نہیں ہوگی سرینا ہوٹل کے اطراف پولیس اور آرمی کی مشترکہ 24 چوکیاں قائم کی گئی ہیں جبکہ ٹریفک کی روانی برقرار رکھنے کے لیے ٹریفک پولیس کو مختلف مقامات پر تعینات کیا گیا ہے۔ اسپیشل برانچ کی جانب سے بھی انٹیلیجنس معاونت فراہم کی جا رہی ہے اور شہر بھر خصوصاً روٹ ایریا میں سڑکوں کی مرمت مکمل کر لی گئی ہے۔

دوسری جانب راولپنڈی میں بھی غیرملکی وفود کی آمد کے باعث سخت پابندیاں عائد کر دی گئی ہیں۔ پولیس حکام کے مطابق تمام بازار، شاپنگ مالز، ہوٹلز، کاروباری مراکز اور پارکس آج رات 12 بجے سے تاحکمِ ثانی بند رہیں گے اور خلاف ورزی کرنے والوں کے خلاف سخت کارروائی کی جائے گی۔

تعلیمی اداروں میں بھی احتیاطی اقدامات کیے گئے ہیں۔ پیر مہر علی شاہ ایریڈ ایگریکلچر یونیورسٹی سمیت تمام بوائز اور گرلز ہاسٹلز بند کر دیے گئے ہیں اور طلبہ کو گھروں کو واپس جانے کی ہدایت جاری کی گئی ہے۔

اس سے قبل سٹی پولیس آفیسر خالد حمدانی کی زیر صدارت اجلاس میں سیکیورٹی انتظامات کا جائزہ لیا گیا، جس میں بتایا گیا کہ راولپنڈی میں 10 ہزار سے زائد پولیس اہلکار تعینات کیے گئے ہیں جبکہ شہر کے داخلی و خارجی راستوں کی سخت نگرانی جاری ہے۔

حکام کا کہنا ہے کہ یہ تمام اقدامات سیکیورٹی کو یقینی بنانے کے لیے کیے گئے ہیں اور شہریوں سے اپیل کی گئی ہے کہ وہ قانون نافذ کرنے والے اداروں کے ساتھ مکمل تعاون کریں۔