Category: اسلام آباد

اسلام آباد: نائب وزیراعظم اور وزیر خارجہ سینیٹر اسحاق ڈار نے ایرانی ہم منصب عباس عراقچی کے حالیہ بیان کا خیر مقدم کرتے ہوئے اسے مثبت پیش رفت قرار دیا ہے۔

سماجی رابطے کی ویب سائٹ پر جاری اپنے بیان میں اسحاق ڈار نے کہا کہ وہ اپنے "بھائی” عباس عراقچی کی جانب سے پاکستان سے متعلق وضاحت کو سراہتے ہیں۔ انہوں نے اس بیان کو دونوں ممالک کے درمیان اعتماد اور سفارتی تعاون کے فروغ کی جانب ایک اہم قدم قرار دیا۔

اس سے قبل ایرانی وزیر خارجہ عباس عراقچی نے اپنے بیان میں واضح کیا تھا کہ ایران نے کبھی بھی مذاکرات کے لیے اسلام آباد جانے سے انکار نہیں کیا۔ انہوں نے جنگ بندی کے لیے پاکستان کی کوششوں کو سراہتے ہوئے اس پر شکریہ بھی ادا کیا۔عباس عراقچی کا کہنا تھا کہ ایران اس بات پر زور دیتا ہے کہ جنگ کا خاتمہ جامع اور مستقل بنیادوں پر ہونا چاہیے۔ انہوں نے الزام عائد کیا کہ امریکی میڈیا ایران کے مؤقف کو غلط انداز میں پیش کر رہا ہے، جس سے حقائق مسخ ہو رہے ہیں۔

صدرِ مملکت آصف علی زرداری نےشہید ذوالفقار علی بھٹو کی برسی پر خصوصی پیغام میں کہا ہے کہ شہید ذوالفقار علی بھٹو کی 47ویں برسی آج منائی جا رہی ہے،سپریم کورٹ کی رائے ہے کہ بھٹو کو منصفانہ ٹرائل نہیں ملا ،

صدر مملکت آصف علی زرداری کا کہنا تھا کہ سپریم کورٹ کے مطابق بھٹو کیس میں قانونی تقاضے نظر انداز کیے گئے، عدالتی مشاہدہ ہے کہ بھٹو کیس میں اپیل کا حق متاثر کیا گیا، 1973 کا آئین بھٹو دور کی بڑی کامیابی ہے، انصاف اور قانون کی بالادستی ناگزیر ہے، جنرل ضیاء کے مارشل لا کے بعد کیس دوبارہ کھولا گیا، انصاف کی عدم فراہمی کے اثرات عوام پر پڑتے ہیں، محترمہ بینظیر بھٹو کی جمہوری جدوجہد کو خراجِ تحسین پیش کرتے ہیں، اداروں کو قانون اور انصاف کی پاسداری کرنا ہوگی، عالمی رہنماؤں نے بھی بھٹو ٹرائل پر تشویش ظاہر کی تھی، جمہوریت کی مضبوطی انصاف سے مشروط ہے

نامور برطانوی جریدے فنانشل ٹائمز کے مطابق مشرق وسطیٰ میں کشیدگی کم کرنے کے لیے پاکستان کی قیام امن کی کوششیں بھارت کے لیے دھچکا ہیں۔

فنانشل ٹائمز میں بھارتی دفاعی تجزیہ کار سوشانت سنگھ کی جانب سے لکھے گئے مضمون میں کہا گیا ہے کہ حالیہ جنگ کے دوران پاکستان امریکا اور ایران کے درمیان اہم ثالث کے طور پر سامنے آیا جبکہ بھارت مشرق وسطیٰ مذاکرات سے خارج اور امریکا میں اثر و رسوخ کھو رہا ہے۔انہوں نے لکھا کہ پاکستان، ترکیے، مصر اور سعودی عرب پر مشتمل بلاک علاقا ئی اثر و رسوخ میں تبدیلی کا اشارہ ہے جو بھارت کواپنی خارجہ پالیسی پرنظرثانی کرنے پر مجبورکر رہا ہے۔بھارتی دفاعی تجزیہ کار نے اپنے مضمون میں کہا کہ پاکستان نے چین کے ساتھ بھی تعلقات برقرار رکھے ہیں اور صدرٹرمپ پاکستان کے فیلڈ مارشل کو ثالث کے طور پر ترجیح دیتے ہیں جبکہ بھارتی وزیراعظم نریندر مودی کو سفارتی ہزیمت کا سامنا ہے۔


وزیراعظم شہباز شریف نے کہا ہے کہ حکومت نے قومی وسائل سے 129 ارب روپے خرچ کر کے مہنگائی کے طوفان کو عوام تک پہنچنے سے روکا اور گزشتہ تین ہفتوں کے دوران تیل کی قیمتوں میں اضافے کا بوجھ عوام پر منتقل نہیں کیا۔
اپنے خطاب میں وزیراعظم نے بتایا کہ فیلڈ مارشل، وفاقی وزرا اور چاروں صوبوں کے وزرائے اعلیٰ کی موجودگی میں اہم فیصلے کیے گئے ہیں، اور حکومت اس وقت تک اپنی ذمہ داریاں ادا کرتی رہے گی جب تک معاشی مشکلات میں کمی نہیں آتی۔
‎انہوں نے کہا کہ مشرقِ وسطیٰ میں جاری جنگ کے باعث عالمی سطح پر تیل کی قیمتوں میں غیر معمولی اضافہ ہوا ہے جس کے اثرات پاکستان سمیت دنیا بھر میں محسوس کیے جا رہے ہیں۔ ان کے مطابق اس صورتحال میں عام آدمی، کسان اور کم آمدنی والے طبقات شدید مشکلات کا سامنا کر رہے ہیں۔
‎وزیراعظم کا کہنا تھا کہ حکومت نے محدود وسائل کے باوجود عوام کو ریلیف فراہم کرنے کی بھرپور کوشش کی اور اسی مقصد کے تحت پیٹرولیم قیمتوں میں اضافے کو وقتی طور پر برداشت کیا گیا۔
‎انہوں نے اعلان کیا کہ موٹرسائیکل سواروں کے لیے فی لیٹر 100 روپے سبسڈی دی جائے گی جبکہ ٹرانسپورٹ اور زرعی شعبے کے لیے بھی خصوصی اقدامات کیے جا رہے ہیں تاکہ مہنگائی کے اثرات کم کیے جا سکیں۔
‎شہباز شریف نے یہ بھی بتایا کہ پیٹرول پر لیوی میں 80 روپے فی لیٹر کمی کی گئی ہے جس کے بعد پیٹرول کی قیمت کم ہو کر 378 روپے فی لیٹر ہو جائے گی۔
‎وزیراعظم نے کہا کہ حکومت عوام کو ریلیف دینے اور خطے میں امن کے قیام کے لیے اپنی کوششیں جاری رکھے گی۔


پاکستان سمیت خطے میں زلزلے کے شدید جھٹکے محسوس کیے گئے جن کی شدت 6.2 ریکارڈ کی گئی ہے، جبکہ اس کا مرکز افغانستان کے ہندوکش کا علاقہ تھا۔
محکمہ موسمیات کے مطابق زلزلہ 3 اپریل 2026 کو رات 9 بج کر 13 منٹ پر آیا، جس کی گہرائی 190 کلومیٹر ریکارڈ کی گئی۔ زلزلے کے محل وقوع کے مطابق اس کا مرکز 36.48 شمالی عرض بلد اور 70.84 مشرقی طول بلد پر واقع تھا۔
زلزلے کے جھٹکے اسلام آباد، پشاور، چترال، سوات، شانگلہ اور دیگر علاقوں میں محسوس کیے گئے، جس کے باعث شہری خوفزدہ ہو کر گھروں اور عمارتوں سے باہر نکل آئے۔
عینی شاہدین کے مطابق زلزلہ چند سیکنڈ تک جاری رہا تاہم اس کی شدت کافی محسوس کی گئی جس نے لوگوں میں خوف و ہراس پیدا کر دیا۔
ابتدائی اطلاعات کے مطابق کسی بڑے جانی یا مالی نقصان کی اطلاع نہیں ملی، تاہم حکام صورتحال کا جائزہ لے رہے ہیں۔
ماہرین کے مطابق زلزلے کی گہرائی زیادہ ہونے کے باعث اس کے جھٹکے وسیع علاقے میں محسوس کیے گئے۔

اسلام آباد: پیٹرولیم مصنوعات کی قیمتوں میں غیر معمولی اضافے کے بعد ملک بھر میں ٹرانسپورٹ کرایوں میں اضافے کا سلسلہ شروع ہو گیا ہے، جہاں پاکستان گڈز ٹرانسپورٹ الائنس نے کرایوں میں نمایاں اضافہ کرنے کا اعلان کر دیا ہے۔

صدر پاکستان گڈز ٹرانسپورٹ الائنس ملک شہزاد کا کہنا ہے کہ پیٹرولیم مصنوعات کی قیمتوں میں حالیہ اضافہ ناقابل قبول ہے اور اس کے نتیجے میں ملک میں مہنگائی کا شدید طوفان آئے گا۔ انہوں نے حکومت کی پالیسیوں کو تنقید کا نشانہ بناتے ہوئے کہا کہ غلط فیصلوں کے باعث لاکھوں افراد بیروزگار ہو رہے ہیں۔ ان کا مزید کہنا تھا کہ اگر فوری طور پر پالیسیوں پر نظرثانی نہ کی گئی تو ملک میں ٹرانسپورٹ کا نظام مکمل طور پر مفلوج ہو سکتا ہے۔

دوسری جانب پاکستان پبلک ٹرانسپورٹ اونر ایسوسی ایشن نے بھی ڈیزل کی قیمتوں میں اضافے پر شدید تحفظات کا اظہار کرتے ہوئے آج ہنگامی اجلاس طلب کر لیا ہے۔ ایسوسی ایشن کے مطابق ڈیزل کی قیمتوں میں اس قدر اضافہ ہونے کے باوجود موجودہ تناسب سے کرایوں میں اضافہ ممکن نہیں، اور اگر یہی صورتحال برقرار رہی تو ٹرانسپورٹرز کو کاروبار بند کرنے پر مجبور ہونا پڑے گا۔

واضح رہے کہ حکومت نے گزشتہ رات پیٹرولیم مصنوعات کی قیمتوں میں تاریخ کا سب سے بڑا اضافہ کیا ہے۔ وزیر پیٹرولیم علی پرویز ملک اور وزیر خزانہ نے مشترکہ پریس کانفرنس میں اعلان کیا کہ پیٹرول کی قیمت میں 137 روپے 24 پیسے فی لیٹر اضافہ کیا گیا ہے، جس کے بعد نئی قیمت 458 روپے 41 پیسے فی لیٹر ہو گئی ہے۔ اسی طرح ڈیزل کی قیمت میں 184 روپے 49 پیسے فی لیٹر اضافہ کیا گیا ہے۔