Category: اسلام آباد

‎وفاقی حکومت نے ملک بھر میں اسمارٹ لاک ڈاؤن نافذ کرنے کا فیصلہ کر لیا ہے جبکہ اس حوالے سے مکمل پلان تیار کر لیا گیا ہے اور اس کا باضابطہ اعلان کل متوقع ہے۔
‎ذرائع کے مطابق بازار رات ساڑھے 9 بجے بند کیے جائیں گے جبکہ شادی ہالز کو رات 10 بجے تک محدود رکھنے کی تجویز دی گئی ہے۔ شادی تقریبات میں ون ڈش اور زیادہ سے زیادہ 200 افراد کی اجازت ہوگی۔
‎حکومت کی جانب سے توانائی اور فیول کی بچت کے لیے ہائبرڈ ورکنگ پالیسی بھی متعارف کرانے کی تیاری کی گئی ہے، جسے ابتدائی طور پر ایک ماہ کے لیے نافذ کیا جائے گا۔
‎سرکاری دفاتر میں ہفتے کے تین دن حاضری اور دو دن آن لائن کام ہوگا جبکہ سروسز دفاتر میں چار دن دفتر اور دو دن آن لائن کام کرنے کا شیڈول تجویز کیا گیا ہے۔ دفاتر میں 50 فیصد اسٹاف روٹیشن سسٹم کے تحت کام کرے گا۔
‎آن لائن حاضری کے لیے باقاعدہ مانیٹرنگ سسٹم قائم کیا جائے گا اور ہر افسر کے لیے کم از کم 65 فیصد حاضری لازمی قرار دی جائے گی۔ ہفتہ وار آڈٹ بھی لازم ہوگا۔
‎پرائیویٹ دفاتر کو بھی 50 فیصد آن لائن ورکنگ اپنانے کی ہدایت دی جائے گی تاکہ آمدورفت اور بجلی کے استعمال میں کمی لائی جا سکے۔
‎گاڑیوں کے استعمال پر بھی سخت پابندیاں عائد کرنے کی تجویز ہے، جس کے تحت سرکاری گاڑیوں کا نجی استعمال ممنوع ہوگا اور خلاف ورزی پر گاڑی ضبطی اور فیول ریکوری جیسے اقدامات کیے جائیں گے۔
‎توانائی بچت کے تحت صبح 10:30 بجے سے پہلے اے سی کے استعمال پر پابندی ہوگی جبکہ 60 دن کے اندر 50 فیصد دفاتر کو سولر توانائی پر منتقل کرنے کی ہدایت دی گئی ہے۔
‎تعلیمی اداروں میں ہفتے کے تین دن آن لائن اور تین دن فزیکل کلاسز کا نظام متعارف کرایا جائے گا، جبکہ ابتدائی طور پر مزید 15 دن مکمل آن لائن کلاسز کا امکان بھی ظاہر کیا گیا ہے۔
‎مزید برآں حکومت ٹیکس نظام میں بھی تبدیلی پر غور کر رہی ہے، جس میں انٹرنیٹ اور ٹیلی فون ٹیکس میں کمی جبکہ پراپرٹی اور گاڑیوں کی خرید و فروخت پر ٹیکس میں اضافہ شامل ہے۔ ٹول ٹیکس میں 50 روپے اضافے اور ریلوے ٹکٹوں پر 15 فیصد رعایت کی تجویز بھی زیر غور ہے۔
‎حکام کا کہنا ہے کہ ان اقدامات کا مقصد توانائی بحران پر قابو پانا اور معیشت کو مستحکم کرنا ہے۔

‎پاکستان بھر میں فضائی سفر کرنے والے مسافروں کو کرایوں میں نمایاں اضافے کا سامنا ہے کیونکہ جیٹ فیول کی قیمتوں میں غیر معمولی اضافہ ہوا ہے۔ اگرچہ بنیادی ٹکٹ قیمتیں برقرار رکھی گئی ہیں، لیکن فیول سرچارج نے مجموعی اخراجات کو کافی بڑھا دیا ہے۔
‎جیٹ فیول کی قیمت 176 روپے فی لیٹر سے بڑھ کر 417 روپے فی لیٹر تک پہنچ گئی ہے، جس کے باعث خدشہ ظاہر کیا جا رہا ہے کہ فضائی سفر عام افراد کی پہنچ سے مزید دور ہو سکتا ہے۔
‎ایئرلائنز نے بنیادی کرایوں میں تبدیلی نہیں کی، لیکن فیول ایڈجسٹمنٹ کے باعث ٹکٹ کی مجموعی قیمتوں میں نمایاں اضافہ ہو گیا ہے۔
‎پاکستان انٹرنیشنل ایئرلائن (پی آئی اے) کے ترجمان کے مطابق کئی ایئرلائنز نے فیول سرچارج کے ذریعے کرایوں میں 100 فیصد تک اضافہ کیا ہے، جبکہ تمام ایئرلائنز نے اپنی قیمتوں میں ایندھن کی بنیاد پر ردوبدل کیا ہے۔
‎پی آئی اے نے مختلف روٹس پر نئے سرچارجز نافذ کر دیے ہیں۔ اندرون ملک پروازوں پر 10 ڈالر اضافی چارج کیا جا رہا ہے، جبکہ بین الاقوامی پروازوں پر اس سے زیادہ اضافہ دیکھنے میں آیا ہے۔
‎کینیڈا جانے والی پروازوں پر 100 ڈالر تک، برطانیہ کے لیے 75 ڈالر اور سعودی عرب و دیگر خلیجی ممالک کے لیے 50 ڈالر تک اضافی چارجز عائد کیے گئے ہیں۔
‎نجی ایئرلائنز نے بھی اسی رجحان کو اپناتے ہوئے ٹکٹوں پر 15 سے 150 ڈالر تک اضافی فیس عائد کر دی ہے، جو مختلف روٹس اور ایئرلائنز کے حساب سے مختلف ہے۔

‎وزیراعظم شہباز شریف نے کہا ہے کہ ہر شہری کو اپنا گھر فراہم کرنا حکومت کی اولین ترجیح ہے اور اس مقصد کے لیے آسان شرائط پر قرضوں کی فراہمی کو یقینی بنایا جائے گا۔
‎اسلام آباد میں وزیراعظم کی زیر صدارت ہاؤسنگ اور تعمیراتی شعبے میں سرمایہ کاری کے فروغ سے متعلق ایک اہم اجلاس منعقد ہوا جس میں مختلف تجاویز پر غور کیا گیا۔
‎اجلاس میں تعمیرات اور ہاؤسنگ سیکٹر پر قائم ٹاسک فورس اور ورکنگ گروپس نے اپنی سفارشات پیش کیں جبکہ کم لاگت گھروں کی فراہمی اور اس شعبے میں روزگار کے مواقع بڑھانے پر بھی تفصیلی بات چیت کی گئی۔
‎وزیراعظم نے کہا کہ تعمیراتی سرگرمیوں میں تیزی سے نہ صرف رہائشی مسائل حل ہوں گے بلکہ ملک میں لاکھوں نئے روزگار کے مواقع بھی پیدا ہوں گے۔
‎انہوں نے اس عزم کا اظہار کیا کہ سمندر پار پاکستانیوں اور غیر ملکی سرمایہ کاروں کا اعتماد بحال کیا جائے گا اور ان کی سرمایہ کاری کو مکمل تحفظ فراہم کیا جائے گا۔

الیکشن کمیشن نے تحریک انصاف کے رہنما مراد سعید کو نااہل قرار دیتے ہوئے انہیں سینیٹ کی نشست سے ڈی نوٹیفائی کردیا۔

الیکشن کمیشن کی جانب سے جاری نوٹیفکیشن کے مطابق سینیٹ رکن مراد سعید نااہل قرار دیے گئے ہیں۔ انسداد دہشت گردی عدالت کےفیصلےکی بنیاد پر انہیں نااہل قرار دیا گیا ہے،مراد سعید کو 10 سال قید کی سزا سنائی گئی، آرٹیکل 63 ون ایچ کے تحت مراد سعید کو نااہل قرار دیا گیا ہے، خیبرپختونخوا سے سینیٹ کی نشست خالی قرار دے دی گئی ہے۔

خیال رہےکہ مراد سعید جولائی 2025 میں خیبرپختونخوا سے سینیٹر منتخب ہوئے تھے تاہم وہ روپوش ہونےکے باعث سینیٹ کی نشست پر حلف نہیں لے سکے تھے،فروری کے وسط میں مراد سعید نے اپنا استعفیٰ چیئرمین سینیٹ کے نام خط میں بھیج دیا تھا۔

‎مارکیٹنگ ایسوسی ایشن کے رہنما علی حیدر نے کہا ہے کہ قیمتوں میں اضافے کے پیچھے صرف دکاندار نہیں بلکہ مارکیٹنگ کمپنیز اور ڈسٹری بیوٹرز بھی شامل ہیں۔
‎ان کا کہنا تھا کہ سپلائی چین کے مختلف مراحل پر قیمتوں میں اضافہ کیا جا رہا ہے جس کا بوجھ براہ راست صارفین پر پڑ رہا ہے۔
‎دوسری جانب ترجمان اوگرا نے واضح کیا ہے کہ ادارے کو کہیں سے بھی قیمتوں میں اضافے کی کوئی باضابطہ اطلاع موصول نہیں ہوئی۔
‎اوگرا کے مطابق اگر کوئی دکاندار سرکاری نرخ سے زائد قیمت وصول کر رہا ہے تو اس کے خلاف کارروائی کرنا متعلقہ صوبائی حکومت کی ذمہ داری ہے۔
‎حکام نے شہریوں کو بھی ہدایت کی ہے کہ وہ زائد قیمت وصول کرنے والوں کی نشاندہی کریں تاکہ قانونی کارروائی عمل میں لائی جا سکے۔

‎اسلام آباد میں ایوانِ صدر میں صدر آصف علی زرداری کی زیر صدارت ایک اہم مشاورتی اجلاس منعقد ہوا جس میں ملک میں تیل کی ممکنہ قلت اور پیٹرولیم مصنوعات کی بڑھتی ہوئی قیمتوں پر تفصیلی غور کیا گیا۔
‎اجلاس میں مجموعی معاشی صورتحال اور توانائی کے شعبے کو درپیش چیلنجز کا جائزہ لیا گیا جبکہ خطے کی سیکیورٹی صورتحال بھی زیر بحث آئی۔
‎اس اہم اجلاس میں وزیراعظم شہباز شریف اور چیف آف ڈیفنس فورسز فیلڈ مارشل سید عاصم منیر نے شرکت کی۔
‎اس کے علاوہ نائب وزیراعظم اسحاق ڈار، چیئرمین پیپلز پارٹی بلاول بھٹو زرداری اور وزیر داخلہ محسن نقوی بھی اجلاس میں شریک ہوئے۔
‎اجلاس میں وزیر خزانہ محمد اورنگزیب، وزیر توانائی علی پرویز ملک اور احسن اقبال بھی موجود تھے جہاں توانائی اور معیشت سے متعلق اہم امور پر تبادلہ خیال کیا گیا۔