Category: اسلام آباد

وزیر داخلہ محسن نقوی کی 3 اتحادی جماعتوں کے وفاقی وزراء سے ملاقات ہوئی ہے

وزیرداخلہ نے تینوں جماعتوں کے رہنماؤں کو کے پی کے اور بلوچستان کی صورتحال سے آگاہ کیا،وزیرداخلہ محسن نقوی نے تینوں وفاقی وزراء کو قیام امن کیلئے کئے جانے والے اقدامات بارے بھی بتایا ۔سالک حسین، خالد مقبول صدیقی اور خالد مگسی نے قیام امن کیلئے فیلڈ مارشل جنرل عاصم منیر کی مخلصانہ کاوشوں کو سراہا ،تینوں رہنماؤں نے دوٹوک اعلان کیا کہ ہماری جماعتیں پاکستان میں دہشت گردی کے خاتمے کے لیے سیکیورٹی فورسز کے ساتھ شانہ بشانہ کھڑی ہیں اور ہمیشہ ساتھ کھڑا رہیں گی۔وفاقی وزراء نے امن کے قیام اور دہشت گردی کے خاتمے کے لیے مل کر ساتھ چلنے کے عزم کا اعادہ کیا،چاروں وفاقی وزراء نے قیام امن کیلئے سکیورٹی فورسز کی دلیرانہ کارروائیوں کو خراج تحسین پیش کیا،

وفاقی وزراء نے فتنہ الخوارج کے دہشتگردوں کے خلاف بہادری سے لڑتے ہوئے جام شہادت نوش کرنے والے بہادر سپوتوں کو خراج عقیدت پیش کیا اور کہا کہ شہداء کے خاندانوں کے ساتھ کھڑے ہیں اور ہمیشہ ساتھ رہیں گے۔

ریاستی اداروں پر گمراہ کن الزامات اور ساکھ متاثر کرنے کے کیس میں عدم حاضری پر وزیراعلیٰ خیبرپختونخوا سہیل آفریدی کے ناقابل ضمانت وارنٹ گرفتاری جاری کردیئے گئے۔

اسلام آباد کی مقامی عدالت نے وزیراعلیٰ خیبرپختونخوا سہیل آفریدی کے وارنٹ گرفتاری جاری کیے، ڈسٹرکٹ اینڈ سیشن کورٹ نے سہیل آفریدی کو 9 مارچ کو گرفتار کرکے پیش کرنے کا حکم دیدیا۔سینئر سول جج عباس شاہ نے مقدمے کی سماعت کی، سہیل آفریدی کے خلاف پیکا ایکٹ کے تحت این سی سی آئی اے نے مقدمہ درج کر رکھا ہے۔

راولپنڈی،عوامی مسلم لیگ کے سربراہ، سابق وفاقی وزیر شیخ رشید احمد نے عمرہ ادائیگی کے لیے سعودی عرب جانے کی اجازت حاصل کرنے کی غرض سے انسدادِ دہشت گردی عدالت میں باضابطہ درخواست دائر کر دی ہے۔

تفصیلات کے مطابق عوامی مسلم لیگ کے سربراہ اور سابق وفاقی وزیر داخلہ شیخ رشید احمد کی جانب سے یہ درخواست ان کے وکیل سردار شہباز ایڈووکیٹ نے انسداد دہشت گردی عدالت راولپنڈی میں جمع کرائی۔ درخواست میں مؤقف اختیار کیا گیا ہے کہ شیخ رشید احمد مختلف مقدمات میں باقاعدگی سے عدالتوں میں پیش ہوتے رہے ہیں اور انہوں نے کبھی بھی اپنی ضمانت کا غلط استعمال نہیں کیا۔درخواست کے متن میں کہا گیا ہے کہ شیخ رشید احمد عمرہ کی سعادت حاصل کرنے کے ساتھ ساتھ مسجد الحرام اور مسجد نبوی کی زیارت کرنا چاہتے ہیں۔ مزید کہا گیا ہے کہ وہ مقررہ مدت کے اندر وطن واپسی کو یقینی بنائیں گے اور عدالت کی جانب سے عائد کی جانے والی ہر شرط کی مکمل پابندی کریں گے۔درخواست گزار نے عدالت سے استدعا کی ہے کہ انسانی اور مذہبی بنیادوں پر عمرہ ادائیگی کی اجازت دی جائے تاکہ وہ اپنی مذہبی ذمہ داری ادا کر سکیں۔

ذرائع کے مطابق عدالت آئندہ سماعت پر درخواست پر فریقین کے دلائل سننے کے بعد فیصلہ سنائے گی۔ قانونی ماہرین کا کہنا ہے کہ عدالت ملزم کی حاضری کے ریکارڈ، ضمانت کی شرائط اور مقدمات کی نوعیت کو مدنظر رکھتے ہوئے فیصلہ کرے گی کہ بیرونِ ملک سفر کی اجازت دی جائے یا نہیں۔

سابق وزیراعلیٰ خیبرپختونخوا علی امین گنڈاپور اور شریک ملزم اسد فاروق پر آڈیو لیک کیس میں فرد جرم عائد کردی گئی، گنڈاپور کے عدالت میں پیش ہونے پر وارنٹ گرفتاری معطل اور اشتہاری کی کارروائی ختم کردی گئی۔

اسلام آباد کی مقامی عدالت میں سابق وزیراعلیٰ خیبرپختونخوا علی امین گنڈاپور کیخلاف آڈیو لیک کیس کی سماعت ہوئی، علی امین گنڈاپور اور شریک ملزم اسد فاروق پر فرد جرم عائد کردی گئی۔علی امین گنڈاپور ڈسٹرکٹ اینڈ سیشن کورٹ اسلام آباد میں پیش ہوئے، جس پر ان کے وارنٹ گرفتاری معطل اور اشتہاری کی کارروائی ختم کردی گئی۔علی امین گنڈاپور نے مؤقف اختیار کیا کہ سیکیورٹی صورتحال کے باعث عدالت میں پیش نہیں ہوسکا۔

سپریم کورٹ نے عدالتی فیصلے پر عملدرآمد کرانے کیلئے کسی بھی شہری کا شناختی کارڈ بلاک کرنا غیرقانونی قرار دے دیا۔

جسٹس منیب اختر کے فیصلے میں قرار دیا گیا کہ شناختی کارڈ کوئی عیاشی نہیں، بنیادی ضرورت ہے، شناختی کارڈ سے محروم کرنا زندگی کا بنیادی حق چھیننے کے مترادف ہے۔سپریم کورٹ نے سندھ ہائی کورٹ کا فیصلہ کالعدم قرار دیتے ہوئے عدالتی فیصلے پر عمل کرانے کیلئے شناختی کارڈ بلاک کرنا غیرقانونی قرار دیدیا۔جسٹس منیب اختر نے 3 صفحات پر مشتمل تحریری فیصلہ جاری کردیا، جس میں کہا گیا ہے کہ شناختی کارڈ کوئی لگژری نہیں، بنیادی ضرورت ہے، شناختی کارڈ سے محروم کرنا زندگی چھیننے کے مترادف ہے۔فیصلے میں کہا گیا ہے کہ عدالتیں رقم واپسی کیلئے بجلی پانی کے کنکشن کاٹنے کا حکم بھی دیں گی؟، واضح قانونی حکم کے بغیر شناختی کارڈ بلاک نہیں کیا جاسکتا۔

فیصلے کے مطابق ضابطہ دیوانی کے سیکشن 51 کے تحت شناختی کارڈ بلاک کرنے کی کوئی گنجائش نہیں، قانون میں واضح حکم کے بغیر کوئی عدالت کسی کا شناختی کارڈ بلاک نہیں کرسکتی۔رقم کی عدم ادائیگی پر 2016ء میں ٹرائل کورٹ نے درخواست گزار کے خلاف ڈگری جاری کی، اور درخواست گزار کا شناختی کارڈ بلاک کرنے کا حکم دیا، اپیل کرنے پر سندھ ہائیکورٹ نے بھی ٹرائل کورٹ کا فیصلہ برقرار رکھا تھا۔

سوشل میڈیا کو کنٹرول کرنے کیلئے نصب فائر وال منصوبہ ناکام ہوگیا، حکومت نے فائیو 5 اسپیکٹرم کی نیلامی سے پہلے فائروال مستقل طور پر بند کردی۔

سرکاری ذرائع کا کہنا ہے کہ فائروال منصوبہ ناکام ہونے سے قومی خزانے کو اربوں روپے کا نقصان پہنچا، یہ فائر وال 2024ء میں نصب کی گئی تھی۔نجی ٹی وی کے مطابق حکومت نے سوشل میڈیا کی نگرانی کیلئے لگائی گئی فائر وال بند کردی، تکنیکی مسائل سے فائر وال ٹیلی کام انفراسٹرکچر سے ہم آہنگ نہ ہوسکی۔سرکاری حکام کا کہنا ہے کہ فائروال کے مطلوبہ نتائج نہ ملنے پر مستقل بند کرنا پڑی، فائر وال کی وجہ سے انٹرنیٹ سست، لاکھوں فری لانسرز، ہزاروں کمپنیوں کی ڈیجیٹل سروسز متاثر ہوئی تھیں۔ماہرین نے آئی ٹی و ٹیلی کام سیکٹر سرمایہ کاری کے فروغ کیلئے فائر وال بند کرنے کی سفارش کی تھی، فائر وال کی بندش پر وزارت آئی ٹی نے مؤقف دینے سے گریز کیا۔

اسلام آباد ہائیکورٹ کا اقدام قتل کیس میں بڑا فیصلہ سامنے آیا ہے جس میں عدالت نے اقدامِ قتل کے ملزم کی ضمانت بعد از گرفتاری کی درخواست خارج کردی۔

اسلام آباد ہائیکورٹ کے جسٹس خادم حسین نے اقدامِ قتل کے ملزم کی ضمانت بعد از گرفتاری کی درخواست خارج کی، ملزم پر مدعی کی اہلیہ اور بیٹے پر فائرنگ کرکے انہیں زخمی کرنے کا الزام ہے،عدالت نے کہا کہ ایک بار ٹریگر دبا دیا جائے اور نشانہ لگ جائےتو ملزم کا ارادہ واضح ہو جاتا ہے، ملزم اپنی ناقص نشانے بازی کو ضمانت کے لیے رعایت کی بنیاد نہیں بنا سکتا، دستیاب شواہد اور جرم کی سنگینی کو مدنظر رکھتے ہوئے ملزم ضمانت کی رعایت کا حقدار نہیں،ریکارڈ کے مطابق مدعیہ کے بیٹے کو اس واقعے کے دوران 3گولیاں لگیں، دورانِ تفتیش ملزم سے وارادت میں استعمال پستول بھی برآمد کر لیا گیا، زخمیوں کو پہلے اسپتال منتقل کرنا ایک قدرتی عمل ہے، چند گھنٹوں کی تاخیر سےکیس پر کوئی فرق نہیں پڑتا، گولی کا رخ حملہ آور کے اختیار میں نہیں ہوتا، پولیس فائل کے مطابق ملزم فواد کے خلاف پہلے بھی 4 دیگر مقدمات درج ہیں،ریکارڈ پر موجود مواد ملزم کو جرم سے جوڑنے کے لیےکافی ہے، وہ ضمانت کا حقدار نہیں، یہ مشاہدات عارضی نوعیت کے ہیں ٹرائل کورٹ میرٹ پر فیصلہ کرتے وقت ان سے متاثر نہ ہو۔

‎وفاقی وزیر برائے منصوبہ بندی و ترقی احسن اقبال کی جانب سے جاری رپورٹ کے مطابق پاکستان میں قومی غربت کی شرح گزشتہ سات سال کے دوران 7 فیصد اضافے کے بعد 28.9 فیصد تک پہنچ گئی ہے۔
‎وزیر نے کہا کہ اس میں بنیادی عوامل پالیسی میں تسلسل کی کمی، عالمی وباء کووڈ-19، اور بین الاقوامی مالیاتی فنڈ (IMF) کے سخت پروگرام ہیں۔ احسن اقبال نے واضح کیا کہ قومی اقتصادی ایجنڈے پر مستقل عمل درآمد کے بغیر غربت کے خاتمے کا ہدف ناممکن ہے۔
‎رپورٹ میں شہری اور دیہی علاقوں دونوں میں شدید اضافہ دیکھا گیا۔ شہری غربت 11 فیصد سے بڑھ کر 17.4 فیصد ہو گئی، جبکہ دیہی علاقوں میں جو پہلے ہی مشکلات کا شکار تھے، وہاں شرح 28.2 فیصد سے بڑھ کر 36.2 فیصد ہو گئی۔ وزیر نے کہا کہ روپے کی قدر میں کمی نے مہنگائی میں اضافہ کر کے عام شہری کی خریداری کی طاقت کو بری طرح متاثر کیا ہے۔
‎صوبائی تفصیلات کے مطابق صورتحال یوں ہے:
بلوچستان: 41.8% سے بڑھ کر 47%
خیبر پختونخوا: 28.7% سے بڑھ کر 35.3%
سندھ: 24.5% سے بڑھ کر 32.6%
پنجاب: 16.5% سے بڑھ کر 23.3%
احسن اقبال نے کہا کہ "آڑان پاکستان” پروگرام معیشت کو مستحکم کرنے کے لیے ضروری نظم و ضبط فراہم کرے گا، تاہم اس کی کامیابی سیاسی اور پالیسی استحکام پر منحصر ہے۔

‎خیبر پختونخوا کاؤنٹر ٹیررازم ڈیپارٹمنٹ نے 6 فروری کو اسلام آباد میں ہونے والے خودکش حملے کی تحقیقات میں اہم پیش رفت کی ہے۔ حکام کے مطابق حملے میں ملوث تقریباً 80 فیصد مشتبہ افراد کو گرفتار کر لیا گیا ہے اور دہشت گردی کی منصوبہ بندی کو افغانستان سے جوڑا گیا ہے۔
‎سی ٹی ڈی حکام کے مطابق گرفتار ملزمان نے حملے کے منصوبے کو حتمی شکل دینے اور ہم آہنگی کے لیے بار بار افغانستان کا سفر کیا۔ مزید تحقیقات سے یہ بات بھی سامنے آئی کہ اسلام آباد دھماکے میں استعمال ہونے والا خودکش جیکٹ باجوڑ قبائلی ضلع سے لایا گیا تھا۔
‎گرفتار ملزمان کی تفتیش سے خیبر پختونخوا میں پہلے کیے گئے 20 دیگر دہشت گردانہ حملوں کے راز بھی حل ہو گئے ہیں۔ حکام نے بتایا کہ یہ کارروائیاں باہم جڑی ہوئی ہیں اور ایک وسیع سرحد پار نیٹ ورک کی نشاندہی کرتی ہیں۔
‎سی ٹی ڈی نے بتایا کہ باقی ماندہ مشتبہ افراد کی گرفتاری کے لیے وسیع پیمانے پر کاؤنٹر ٹیررازم آپریشن جاری ہے تاکہ دہشت گرد نیٹ ورک کو مکمل طور پر توڑا جا سکے۔