حکومت سندھ نے کل سے ہرشہری کورونا ویکسین لگانے کا فیصلہ کیا ہے۔سندھ حکومت کل سےتمام لوگوں کیلئے ویکسی نیشن شروع کرے گی۔ محکمہ صحت سندھ کے مطابق18سال سے اوپرکےشہری کورونا ویکسین کیلئےاہل ہوں گے۔ایکسپوسینٹرمیں قائم ویکسی نیشن سینٹرکو ہفتہ بھر24 گھنٹےکھلا رکھنےکا فیصلہ کیا گیا ہے۔ وزیراعلیٰ سندھ سید مراد علی شاہ کی زیر صدات کورونا وائرس سے متعلق ٹاسک فورس کا اجلاس ہوا۔
سید مراد علی شاہ نے کہا کہ سندھ میں کورونا کے مثبت کیسز کی شرح10.2 فیصد ہے۔ کراچی میں 16.82 فیصد کیسز آئے ہیں۔انہوں نے کہا کہ سندھ میں عید الفطر کے بعد کیسز بڑھ رہے ہیں۔ صوبے میں نرمی کرنا مشکل ہوتا ہوا لگ رہا ہے۔کورونا کے سبب سندھ میں 4 ہزار854 اموات ہوئی ہیں اور3 لاکھ 3ہزار323 کیسز رپورٹ ہوئے۔پاکستان میں کورونا کی ویکسینیشن جاری ہے اور 40 سال سے زیادہ عمر والے افراد کو ویکسین لگائی جا رہی ہے۔ملک بھر میں ایڈلٹ ویکسینیشن مراکز قائم کیے جا چکے ہیں اور ویکسینیشن کا تمام تر عمل ڈیجیٹل میکنزم سے کنٹرول کیا جارہا ہے ویکسینیشن کے لیے پنجاب میں 189 اور سندھ میں 14 مراکز قائم کیے گئے ہیں جبکہ خیبر پختونخوا میں 280، بلوچستان میں 44 اور اسلام آباد میں 14 ویکسینیشن سینٹر قائم کیے جا چکے ہیں۔ آزاد کشمیر میں 25 اور گلگت بلتستان میں بھی 16 مراکز کے ذریعے ویکسینیشن کی جا رہی ہے۔

پی ایس ایل ٹیم کراچی کنگز کے مالک اور اے آر وائی نیٹ ورک کے سی ای او سلمان اقبال کا کہنا ہے کہ پی ایس ایل میچز سے متعلق جو لاجسٹک معاملات رہ گئے ہیں ان پر بات چیت ضروری ہے۔
تفصیلات کے مطابق متحدہ عرب امارات حکومت کی جانب سے ابوظہبی میں پی ایس ایل سکس کے بقیہ میچز کرانے کی تحریری اجازت دینے کے بعد اظہار خیال کرتے ہوئے کراچی کنگز کے مالک سلمان اقبال نے کہا کہ پی ایس ایل انتظامیہ کی تین بجےمیٹنگ ہے، جو لاجسٹک معاملات رہ گئے ہیں ان پربات چیت ضروری ہے۔کراچی کنگز کے مالک سلمان اقبال نے کہا کہ یو اے ای میں گرمی بڑھ گئی ہے ، اجلاس میں موسم کی صورتحال پربھی بات چیت ہوگی، کیونکہ گرمی کی وجہ سے کھلاڑیوں کےمسائل کے خدشےکو سامنےرکھناہوگا ۔کراچی کنگز کے مالک کا کہنا تھا کہ ہم نے پی ایس ایل میچز کراچی میں بھی کرانےکی تجویز دی تھی، میچز یو اے ای منتقل ہونے سے مجموعی طور پر لاگت میں اضافہ ہوگا۔سلمان اقبال کا مزید کہنا تھا کہ لوگ گزشتہ بارہ، چودہ ماہ سےبری خبریں سن رہے ہیں، ہم نے ہمیشہ کہا کہ کرکٹ کو واپس آنا چاہیے، کرکٹ ہمارے ملک اور خطے کیلئے مثبت رجحان کا باعث ہے، گذشتہ سال پاکستان میں کرکٹ ہورہی تھی تو ملک میں مثبت صورتحال تھی، جب کرکٹ ہورہی تھی تو ملک بھر میں ایک اچھا ماحول بناہوا تھا۔

سندھ میں بلاول زرداری کی شکل میں کرپٹوکرنسی کا راج ہے،خرم شیر زمان

پی ٹی آئی رہنما خرم شیر زمان نے اپنے ایک ٹوئٹر پیغام میں کہا کہ سندھ میں بلاول زرداری کی شکل میں کرپٹوکرنسی کا راج ہے۔انھوں نے مزید کہا کہ ‏بلاول ہاؤس میں بھینسوں کے باڑے کی موجودگی پر عوام وزیر کے بیان پر یقین کریں یا مشیر کے, بلاول ہاؤس میں شاہی ملازمین کیلئے دودھ کی نہریں بہنے لگیں ہیں اور یہاں بھینسوں اونٹوں بکریوں کی چائے کا بوفے لگا ہوا ہے ویسے پیپلز پارٹی کی بےشرمی کی۔ کوئی بھی معیاد نہیں.‏پی پی کی سیاست جھوٹ اور عوام کو تکلیف پہنچانے پر ختم ہوتی بلاول ہاؤس کے ارد گرد مکین باڑے کے تعفن سے پریشان ہیں یہ عوام کو کسی بیماری میں مبتلا کرکے دم لیں گے اس وقت سندھ میں بلاول زرداری کی شکل میں کرپٹوکرنسی کا راج ہے اللہ تعالیٰ عوام کی حفاظت فرمائے۔
یاد رہے کہ گزشتہ روز پی ٹی آئی کے پارلیمانی لیڈر حلیم عادل شیخ نے بھی بلاول ہاؤس میں موجود بھیسوں کے بارے کی نشان دہی کرتے ھوئے کہا تھا کہ تھر کے بچے بھوک سے مر رہے ہیں اور یہاں بلاول ہاؤس میں بھینسیں پیڑیں کھا رہی ہیں۔

عمران خان اور ان کے حواری لوٹ مار کےبعد ملک کو تباہ کرکے لندن بھاگ جائیں گے، بلاول بھٹو

پیپلزپارٹی کے چیئرمین بلاول بھٹو زرداری کا کہنا ہے کہ عمران خان کا ملک کو خیراتی ادارے کی طرز پر چلانے کا تجربہ بری طرح ناکام ہوچکاہے۔قیام پاکستان سے لے کر اب تک ملک میں مجموعی طور پر اتنی تباہی نہ ہوئی کہ جتنی تباہی ایک اکیلے عمران خان پھیلاچکے ہیں۔تفصیلات کے مطابق بلاول بھٹو کا اپنے بیان میں مزید کہنا تھا کہ عمران خان اور ان کے حواری پرویز مشرف کی طرح لوٹ مار کے بعد ملک کو تباہ کرکے لندن بھاگ جائیں گے۔خدشہ ہے کہ اگر عمران خان کا اقتدار اپنی مدت پوری کرگیا تو ملک دیوالیہ نہ ہوجائے۔ انہوں نے مزید کہا کہ عمران خان ملک کو اتنا بدحال کرچکے ہیں کہ آئندہ آنے والی حکومتیں دہائیوں تک ان زخموں کا ہرجانہ بھرتی رہیں گی۔آئندہ کئی نسلوں نے عمران خان کی تبدیلی کی خوف ناک قیمت ادا کرنا ہے۔بلاول بھٹو کا کہنا تھا کہ ملک کی معاشی تباہی کے ذمہ دار عمران خان کاسب سے بڑا جرم ملک کے نوجوانوں کی امیدوں کا قتل ہے۔ عمران خان کو معاشی بحران ورثے میں نہیں ملا بلکہ سلیکٹڈوزیراعظم نے ملک میں معاشی بحران پیدا کیا ہے۔ایک ایسا حکمران کیسے ملک چلاسکتاہےکہ جسکی باتوں کو کوئی سنجیدہ لینے تک کو تیار نہیں۔ کرونا وائرس کی وبا تو بعد میں آئی ہے، عمران خان اس سے پہلے ہی ملکی معیشت کا جنازہ نکال چکے تھے۔پی ٹی آئی کے منتخب نمائندے اپنے انتخابی حلقوں میں مہنگائی کےمارے عوام سے منہ چھپاتے پھررہے ہیں۔عمران خان کے دور حکومت میں پاکستان بدترین سیاسی، انتظامی اور مالی بحران کا شکار ہوگیا ہے۔

وزیراعلیٰ سندھ مراد علی شاہ کا کہنا ہے کہ سندھ میں کیسز بڑھ رہے ہیں، صوبے میں نرمی کرنا مشکل ہوتا ہوا لگ رہا ہے۔
وزیراعلیٰ سندھ مراد علی شاہ کی زیر صدات کورونا وائرس کے صوبائی ٹاسک فورس کا اجلاس ہوا، جس میں صوبائی وزراء، چیف سیکریٹری، آئی جی پولیس، ایڈیشنل چیف سیکریٹری داخلہ، کمشنر کراچی، ایڈیشنل آئی جی کراچی، کور فائیو، رینجرز اور ڈبلیو ایچ او کے نمائندے بھی شریک ہوئے۔مراد علی شاہ کا کہنا تھا کہ کل 20421 ریکارڈ کورونا ٹیسٹ کیے گئے جس میں 9000 صرف کراچی کے تھے، ان میں سے 2 ہزار 76 کیسز مثبت آئے جو 10 اعشاریہ 2 فیصد ہے، صرف کراچی میں 16 اعشاریہ 82 فیصد کیسز مثبت آئے۔
وزیراعلیٰ سندھ نے کہا کہ عید الفطر 13 مئی کو ہوئی اس دن صوبے میں 1232 کیسز تھے، عید کے بعد 19 مئی کو 2076 کیسز آئے جو 10.2 فیصد ہیں، اس سے ظاہر ہوتا ہے کہ سندھ میں کیسز بڑھ رہے ہیں، ہمیں صوبے میں نرمی کرنا مشکل ہوتا ہوا لگ رہا ہے۔
ترجمان وزیراعلیٰ سندھ کے مطابق ٹاسک فورس کے ممبران اور ماہرین نے وزیراعلیٰ سندھ کو موجودہ بندش کو جاری رکھنے کا مشورہ دیا، اور کہا کہ ہوسکے تو مزید سخت فیصلے کریں۔ اجلاس میں ٹاسک فورس نے حالیہ بندشوں کو برقرار رکھنے کا فیصلہ کرلیا گیا۔ترجمان نے بتایا کہ ہفتے کو ٹاسک فورس کا دوبارہ اجلاس ہوگا، جس میں صورتحال کا جائزہ لیا جائے گا، اگر کیسز کی شرح کم ہوئی تو نرمی اور اگر بڑھ گئے تو مزید سختی کریں گے۔ وزیراعلیٰ سندھ نے ٹاسک فورس کے ممبران کو ہدایت کی کہ صورتحال کا جائزہ لیکر مزید اقدامات کے لئے اپنی تجاویز دیں۔ جب کہ ڈبلیو ایچ او کے نمائندے بھی ہفتے کے اجلاس میں اپنی سفارشات دیں گے۔

حب ڈیم سے ملحقہ نہروں میں نہانے کے دوران ڈوب کر جاں بحق ہونے کے 2 واقعات میں 4 نوجوان زندگی کی بازی ہار گئے جبکہ ایک خاتون کو بے ہوشی کی حالت میں نکال لیا گیا۔حب ڈیم ریسٹ ہاؤس کے قریب نہر میں نہاتے ہوئے 2 نوجوان ڈوب گئے جس کی اطلاع پر ایدھی کے غوطہ خوروں نے موقع پر پہنچ کر سخت جدوجہد کے بعد دونوں نوجوانوں کی لاشوں کو نکال کر ضابطے کی کارروائی کے لیے عباسی شہید اسپتال پہنچایا جہاں ان کی شناخت 20 سالہ علی محمد اور 21 سالہ حسین شاہ کے نام سے کی گئی متوفیان گلستان جوہر کے رہائشی بتائے جاتے ہیں اور جو شہر میں جاری گرمی کی شدت کے باعث نہر میں نہانے کے دوران ڈوب گئے۔
ڈی ایس پی منگھوپیر عرفان احمد سے رابطہ کیا گیا تو انھوں نے بتایا کہ نوجوانوں کے ڈوبنے کا واقعہ حب ساکران کے علاقے میں پیش آیاہے، منگھوپیر تھانے کی حدود ہمدرد یونیورسٹی کے قریب نہر میں نہاتے ہوئے ماں اور 2 بیٹے ڈوب گئے جس کی اطلاع پر ایدھی کے غوطہ خوروں نے موقع پر پہنچ کر خاتون کو بے ہوشی کی حالت میں نکال کر طبی امداد کے لیے عباسی شہید اسپتال پہنچایا، ڈوب کر جاں بحق ہونے والے دونوں نوجوانوں کی لاشیں تلاش کر کے عباسی شہید اسپتال پہنچائیں۔
ریسکیو حکام کا کہنا ہے کہ متوفیان کی شناخت 18 سالہ احمد اور 17 سالہ عبید کے نام سے کی گئی جبکہ ڈوب کر بے ہوش ہونے والی خاتون متوفیان کی والدہ ہے جس کی شناخت 45 سالہ سکینہ کے نام سے ہوئی ہے جسے طبی امداد فراہم کی جا رہی ہے۔ریسکیو حکام کا کہنا ہے کہ متاثرہ خاندان بلدیہ ٹاؤن 7 نمبر کا رہائشی ہے ، پولیس نے ضابطے کی کارروائی کے بعد متوفیان کی لاشیں ورثا کے حوالے کر دیں جبکہ واقعے کے بعد متوفیان کی رہائش گاہوں پر رشتے داروں اور اہل محلہ کی بڑی تعداد جمع ہوگئی اور افسوسناک واقعے پر اپنے غم و افسوس کا اظہار کیا اس موقع پر کئی رقت انگیز مناظر بھی دیکھنے میں آئے جس میں خواتین شدت غم سے نڈھال ہوگئیں۔