Category: کراچی

‎شہر قائد کے علاقے یونیورسٹی روڈ کے نزدیک نصیر ٹاور کے قریب ایک شخص کی کرسی پر بیٹھے ہوئے موت واقع ہو گئی۔ پولیس کے مطابق جاں بحق شخص کے چہرے پر چوٹوں کے نشانات موجود ہیں اور ابتدائی شبہے کے مطابق وہ رات گئے کسی حادثے کا شکار ہو کر زخمی حالت میں کرسی پر بیٹھ گیا تھا، جہاں اس کی موت واقع ہوئی۔
‎متوفی کے پاس سے کوئی دستاویز یا شناختی چیز برآمد نہیں ہوئی، جس کی وجہ سے پولیس اس کی شناخت کے لیے تفتیش کر رہی ہے۔ لاش کو قانونی کارروائی کے لیے جناح اسپتال منتقل کر دیا گیا ہے اور واقعے کی مختلف پہلوؤں سے تحقیقات جاری ہیں۔


سانحہ گل پلازہ کی تحقیقات کے لیے قائم جوڈیشل کمیشن کے اجلاس میں چیف فائر آفیسر کی جانب سے انکشاف کیا گیا کہ اگر عمارت کی بجلی بروقت بند کر دی جاتی اور لوگوں کو فوری انخلا کا اعلان کیا جاتا تو متعدد انسانی جانیں بچائی جا سکتی تھیں۔
جسٹس آغا فیصل کی سربراہی میں ہونے والے اجلاس میں ڈی جی ریسکیو 1122 واجد صبغت اللہ کمیشن کے روبرو پیش ہوئے اور واقعے کی تفصیلات بیان کیں۔ جسٹس آغا فیصل نے استفسار کیا کہ حادثے کی رات کیا پیش آیا، جس پر ڈی جی ریسکیو نے بتایا کہ رات 10 بج کر 35 منٹ پر گل پلازہ میں آگ لگنے کی اطلاع موصول ہوئی جبکہ فائر بریگیڈ 10 بج کر 52 منٹ پر موقع پر پہنچ گئی تھی۔
‎انہوں نے بتایا کہ ابتدائی طور پر سیڑھی کے ذریعے آگ بجھانے کا عمل شروع کیا گیا جس کی ویڈیو بھی موجود ہے۔ بعد ازاں کے ایم سی کی فائر بریگیڈ گاڑیاں اور اسنارکل بھی موقع پر پہنچ گئیں۔
‎ڈی جی ریسکیو کے مطابق گراؤنڈ فلور، میزنائن اور پہلی منزل پر موجود افراد یہ سمجھ رہے تھے کہ آگ پر جلد قابو پا لیا جائے گا، اسی وجہ سے کئی دکاندار باہر نکلنے کے بجائے اپنا سامان نکالنے میں مصروف رہے۔
‎انہوں نے بتایا کہ کے الیکٹرک کو بجلی منقطع کرنے کی درخواست کی گئی تھی، تاہم وہ اس فیصلے میں شامل نہیں تھے۔ کمیشن کو آگاہ کیا گیا کہ جب ریسکیو ٹیم موقع پر پہنچی تو آگ گراؤنڈ فلور پر شدت اختیار کر چکی تھی اور اوپری منزلوں میں پھنسے افراد کو بچانے کی کوششیں فوری شروع کی گئیں، مگر اندر داخل ہونے کا راستہ دستیاب نہیں تھا۔
‎کمیشن کے سوال پر ڈی جی ریسکیو نے بتایا کہ ریسکیو ٹیم کے پاس گرل کاٹنے کے آلات موجود تھے، تاہم کئی کھڑکیاں بند تھیں اور بعض مقامات پر لوہے کی گرلز لگی ہوئی تھیں جس سے امدادی کارروائیوں میں مشکلات پیش آئیں۔

کراچی میں پانی کا بحران مزید شدت اختیار کر گیا ہے کیونکہ پورٹ قاسم کے قریب پھٹنے والی مرکزی پانی کی لائن کی مرمت 30 گھنٹے گزرنے کے باوجود مکمل نہ ہو سکی، جس کے باعث شہر کے مختلف علاقوں میں پانی کی فراہمی بدستور معطل ہے۔
‎تفصیلات کے مطابق شہر گزشتہ ایک ہفتے سے شدید پانی کی قلت کا سامنا کر رہا ہے۔ ایک جانب اہم پائپ لائنیں پھٹنے کے واقعات پیش آئے جبکہ دوسری جانب بجلی کے بریک ڈاؤن نے پانی کی ترسیل کا نظام مزید متاثر کر دیا۔
‎حکام کے مطابق پہلے 84 انچ قطر کی مرکزی لائن متاثر ہوئی اور اس کے بعد پورٹ قاسم کے قریب 54 انچ قطر کی لائن پھٹ گئی، جس کے نتیجے میں کراچی کے بڑے حصے کو پانی کی سپلائی بند ہو گئی۔
‎مرمت کا کام تاخیر کا شکار ہونے سے لانڈھی، کورنگی، ملیر، شاہ فیصل کالونی، گلشن اقبال اور صدر ٹاؤن سمیت کئی علاقوں کے شہری شدید مشکلات کا سامنا کر رہے ہیں اور پانی کے حصول کے لیے پریشان ہیں۔
‎کراچی واٹر اینڈ سیوریج کارپوریشن نے دھابیجی پمپنگ اسٹیشن پر بجلی کی خرابی کا ذمہ دار کے الیکٹرک کو قرار دیا ہے۔ ادارے کی جانب سے کے الیکٹرک کو ارسال کیے گئے مراسلے میں خبردار کیا گیا ہے کہ اگر 11 کے وی فیڈرز کی خرابی فوری دور نہ کی گئی تو رمضان المبارک کے دوران پانی کا بحران مزید سنگین ہو سکتا ہے۔
‎حکام کے مطابق لائنیں پھٹنے سے اب تک ہزاروں گیلن پانی ضائع ہو چکا ہے جبکہ لانڈھی اور شیر پاؤ ہائیڈرنٹس مکمل طور پر بند ہیں، جس سے ٹینکر سروس بھی متاثر ہوئی ہے۔
‎واٹر کارپوریشن نے عندیہ دیا ہے کہ اتوار کو متاثر ہونے والی لائن کی مرمت منگل تک مکمل کر لی جائے گی، تاہم شہریوں کا کہنا ہے کہ ماضی کے تجربات کے مطابق مرمت کے بعد بھی پانی کی فراہمی معمول پر آنے میں وقت لگتا ہے۔

‎کراچی کی لی مارکیٹ میں تجاوزات کے خلاف آپریشن کے دوران اسسٹنٹ کمشنر ہاظم بنگوار پر پیٹرول بم سے حملہ کیا گیا، تاہم وہ محفوظ رہے۔
میڈیا سےگفتگو میں ہاظم بنگوار نے بتایا کہ آپریشن کے دوران نامعلوم شخص نے ان پر پیٹرول بم پھینکا، جس کے نتیجے میں ایک دکان میں آگ لگ گئی۔ انہوں نے کہا کہ حملے میں ملوث تین افراد کو حراست میں لیا گیا ہے۔
ہاظم بنگوار نے مزید بتایا کہ آگ پر فوری قابو پایا گیا اور تجاوزات کے خلاف آپریشن کامیابی کے ساتھ مکمل کیا گیا۔

‎کراچی پولیس نے دعویٰ کیا ہے کہ سونے کے زیورات کی دکان پرنس جیولرز میں 13 فروری کو ہونے والی چوری کے تمام ملزمان کو گرفتار کر لیا گیا ہے اور 30 کروڑ روپے سے زائد مالیت کا سامان برآمد کیا گیا ہے۔
‎واردات کراچی کے علاقے اورنگی کی اقبال مارکیٹ میں ہوئی۔ دکان کے مالک محمد ایوب خان نے 14 فروری کو مقدمہ درج کروایا تھا۔ مقدمے میں بتایا گیا کہ صبح تقریباً پونے نو بجے دکان کے کاریگر نے اطلاع دی کہ چوری ہو گئی ہے۔ دکان کھولنے پر دیکھا گیا کہ پیچھے کی دیوار ٹوٹی ہوئی تھی اور 606 تولے سونا اور 20 سے 25 لاکھ روپے مالیت کے ہیرے موجود نہیں تھے۔
‎ڈی آئی جی عرفان بلوچ نے پریس کانفرنس میں بتایا کہ پولیس نے تمام ملزمان کو گرفتار کر لیا ہے اور تحقیقات جاری ہیں، تاہم یہ تفصیل نہیں بتائی گئی کہ ملزمان تک رسائی کیسے حاصل کی گئی۔