Category: کراچی

کراچی: جوڈیشل مجسٹریٹ جنوبی کی عدالت میں منشیات کے مقدمے میں نامزد ملزمہ انمول عرف پنکی کے کیس کی سماعت ہوئی، جس میں وومن جیل سپرنٹنڈنٹ عدالت کے روبرو پیش ہوئیں۔

دورانِ سماعت جیل حکام کی جانب سے ملزمہ کو ویڈیو لنک کے ذریعے پیش کرنے کی درخواست دائر کی گئی درخواست میں مؤقف اختیار کیا گیا کہ ملزمہ کو آج تھانہ گارڈن میں درج مقدمے کے سلسلے میں عدالت میں پیش کیا جانا تھا، تاہم سیکیورٹی خدشات کے باعث اسے عدالت لانا ممکن نہیں، ملزمہ کو عد الت میں پیش کرنے سے نقصِ امن کا خطرہ ہے لہٰذا مقدمے کے لیے نئی تاریخ مقرر کی جائے۔

جیل حکام نے عدالت کو یقین دہانی کرائی کہ آئندہ سماعت پر ملزمہ کو جیل سے آن لائن ویڈیو لنک کے ذریعے پیش کیا جائے گا، جس کے لیے تمام ضروری وسائل بروئے کار لائے جائیں گے۔

واضح رہے کہ ملزمہ انمول عرف پنکی کے خلاف منشیات کا مقدمہ تھانہ گارڈن میں درج ہے۔

کراچی: آج سے شارع فیصل پر لین کی خلاف ورزی کرنے والے ڈرائیورز کے خلاف ای چالان کا نظام نافذ کر دیا گیا ہے۔

ٹریفک پولیس کے ترجمان کے مطابق ابتدائی مرحلے میں یہ اقدام صرف شارع فیصل تک محدود رکھا گیا ہے، تاہم آئندہ مرحلوں میں اس نظام کو شہر کی دیگر اہم سڑکوں اور شاہراہوں تک بھی توسیع دی جائے گی اس اقدام کا مقصد شارع فیصل پر ٹریفک کے نظام کو مزید منظم اور مؤثر بنانا ہے شہریوں سے اپیل کی گئی ہے کہ وہ اپنی گاڑیاں مقررہ لین میں چلائیں تاکہ ٹریفک کی روانی برقرار رہے اور حادثات میں کمی لائی جا سکے سڑکوں پر نصب کیمروں کی مدد سے لین کی خلاف ورزی کرنے والوں کی نشاندہی کی جائے گی، جس کے بعد ای چالان متعلقہ افراد کو موبائل فون یا گھر کے پتے پر بھیج دیا جائے گا۔

ٹریفک حکام کا کہنا ہے کہ اس منصوبے کے آغاز سے قبل عوامی آگاہی مہم بھی چلائی گئی تھی تاکہ شہریوں کو نئے نظام سے متعلق معلومات فراہم کی جا سکیں، ٹریفک نظم و ضبط برقرار رکھنے میں عوام کا تعاون انتہائی اہم ہے لین ڈسپلن کو یقینی بنانے سے سڑکوں پر ٹریفک کی روانی بہتر ہوگی، جبکہ حادثات میں کمی اور محفوظ سفر کو فروغ ملے گا۔

سینئر وزیر سندھ شرجیل انعام میمن نے کہا ہے کہ ایم کیو ایم بے بنیاد الزامات اور پرانی فرسودہ کہانیوں کے سہارے اپنی سیاست زندہ کرنے کی ناکام کوشش کر رہی ہے۔

ایم کیو ایم پاکستان کے رہنماؤں کی پریس کانفرنس پر ردعمل دیتے ہوئے شرجیل انعام میمن نے کہا کہ ایم کیو ایم کی سیاست ہمیشہ نعروں، الزامات اور بحران پیدا کرنے کے گرد گھومتی رہی ہے، آج بھی وہی پرانا طرزِ عمل دہرایا جا رہا ہے، صوبائی خود مختاری، آئینی اختیارات اور بلدیاتی نظام کو سب سے زیادہ ایم کیو ایم نے متنازع بنانے کی کوشش کی۔

شرجیل انعام میمن نے کہا کہ کراچی میں جاری ترقیاتی منصوبے زمینی حقائق ہیں جنہیں کسی بھی پروپیگنڈے سے جھٹلایا نہیں جا سکتا، یلو لائن، شاہراہ بھٹو اور دیگر منصوبے ثبوت ہیں کہ سندھ حکومت عملی کام پر یقین رکھتی ہے، کسی بھی عوامی مقام کے حوالے سے اگر کوئی قانونی یا انتظامی مسئلہ ہے تو اس کا حل عدالتوں اور متعلقہ اداروں کے ذریعے ہونا چاہئے۔

صوبائی وزیر نے کہا کہ افسوس ہے کہ جو عناصر برسوں اپنی ناکام انتظامیہ اور مفاداتی سیاست کے ذریعے شہر کے مسائل بڑھاتے رہے، آج دوبارہ خود کو نجات دہندہ بنا کر پیش کر رہے ہیں، سندھ حکومت نے بلدیاتی اداروں کو نہ صرف اختیارات دیے ہیں بلکہ مالی وسائل اور قانونی سپورٹ بھی فراہم کی ہے،کراچی کسی ایک جماعت کی جاگیر نہیں بلکہ پاکستان کا معاشی مرکز ہے، جو عناصر ترقی کے ہر قدم پر تنقید کو اپنا سیاسی ہتھیار بناتے ہیں، وہ دراصل خود اپنے سیاسی زوال کا اعتراف کر رہے ہوتے ہیں۔

متحدہ قومی موومنٹ (ایم کیو ایم) پاکستان کے سینئر رہنما فاروق ستار نے الزام عائد کیا ہے کہ سابق گورنر سندھ کامران ٹیسوری کو ان کے عہدے سے اس لیے ہٹایا گیا کیونکہ وہ پیپلز پارٹی کے مبینہ غیر قانونی کاموں میں رکاوٹ بن رہے تھے۔

کراچی میں ایم کیو ایم پاکستان کے دیگر رہنماؤں کے ہمراہ پریس کانفرنس کرتے ہوئے فاروق ستار نے کہا کہ کامران ٹیسوری کو گورنر سندھ کے منصب سے ہٹانے کی اصل وجوہات عوام کے سامنے آنی چاہئیں انہوں نے سوال اٹھایا کہ اگر حکومت کو کامران ٹیسوری سے کوئی مسئلہ نہیں تھا، جیسا کہ رانا ثناء اللہ کہہ رہے ہیں، تو پھر انہیں عہدے سے کیوں ہٹایا گیا،پیپلز پارٹی نے کامران ٹیسوری کو اس لیے ہٹایا کیونکہ وہ ان کے مبینہ غیر قانونی اقدامات اور مفادات کی راہ میں رکاوٹ بن رہے تھے، بلدیاتی انتخابات سے قبل کامران ٹیسوری کو دوبارہ گورنر سندھ بنایا جانا چاہیے تاکہ صوبے میں شفاف اور منصفانہ سیاسی ما حول یقینی بنایا جا سکے۔

انہوں نے کہا کہ سندھ بالخصوص اندرون سندھ میں بھی پیپلز پارٹی کی سیاسی گرفت کمزور ہو رہی ہے اور مستقبل قریب میں اس جماعت کا خاتمہ شروع ہو جائے گا آئین کے آرٹیکل 140-A پر عملدرآمد ایم کیو ایم پاکستان کا گزشتہ 30 برس سے بنیادی مطالبہ ہے جبکہ 28ویں آئینی ترمیم بھی ان کی جماعت کا پیش کردہ تصور ہے، جسے آج نہیں تو کل نافذ کرنا پڑے گا، مقامی حکومتوں کے اختیارات کے معاملے پر دیگر سیاسی جماعتیں بھی ایم کیو ایم کے مؤقف کی تائید کر رہی ہیں۔

رہنما ایم کیو ایم نے کراچی میں زمینوں پر قبضوں اور مبینہ غیر قانونی تعمیرات کے حوالے سے بھی سخت تحفظات کا اظہار کیا انہوں نے سوال اٹھایا کہ ہائیکور ٹ کے فیصلے کے باوجود بعض منصوبوں کو این او سی کیسے جاری کیے گئے 62 ایکڑ پر مشتمل ہل پارک کی زمین کو قانونی جواز فراہم کرنے کی کوشش کی گئی، تا ہم اب ایسے اقدامات مزید برداشت نہیں کیے جائیں گے۔

فاروق ستار نے مطالبہ کیا کہ کراچی کی تمام زمینوں کی لیز کا اختیار کراچی میٹروپولیٹن کارپوریشن (کے ایم سی) کے پاس ہونا چاہیے کراچی کو وفاق کے زیر انتظا م دینے کی بحث نئی نہیں، کیونکہ 1947 سے 1970 تک یہ شہر وفاقی نگرانی میں رہا ہے قبضہ مافیا نے شہر کے وسائل کو نقصان پہنچایا اور اب کراچی کے عوام ایسے عناصر کو معاف نہیں کریں گے، ایم کیو ایم قبضہ مافیا کو کھلا چیلنج دیتی ہے اور شہر میں جہاں کہیں بھی زمینوں پر قبضے اور غیر قانونی سرگرمیاں ہوں گی، ان کے خلاف آواز بلند کی جائے گی،بعض جماعتیں، خصوصاً جماعت اسلامی، قبضوں کے بعض معاملات پر خاموش کیوں ہیں؟-

انہوں نے الزام عائد کیا کہ گزشتہ 18 برس کے دوران کراچی کو قبضہ مافیا کے رحم و کرم پر چھوڑ دیا گیا، پی ای سی ایچ ایس سمیت مختلف علاقوں میں زمینوں پر قبضے کیے جا رہے ہیں جبکہ شہر کی پہاڑیوں کو کاٹ کر پلاٹ نکالے جا رہے ہیں اور انہیں مہنگے داموں فروخت کیا جا رہا ہے کراچی بتدریج جرائم پیشہ عناصر کی آماجگاہ بنتا جا رہا ہے انہوں نے دعویٰ کیا کہ لوگوں کو پہاڑ فروخت کر دیے گئے اور بعد میں انہیں خود ہی پہاڑ کاٹنے کا کہا گیا۔

انہوں نے میئر کراچی سے مطالبہ کیا کہ وہ قبضہ مافیا کے خلاف مؤثر کارروائی کریں ان کا الزام تھا کہ کے ایم سی کے بعض افسران قبضہ مافیا کے ساتھ مل کر کام کر رہے ہیں فاروق ستار نے یاد دلایا کہ جب وہ خود میئر کراچی تھے تو انہوں نے ہل پارک کی اراضی پر ہونے والے قبضے ختم کرائے تھے ایم کیو ایم آئندہ بلدیاتی انتخابات میں بھرپور تیاری کے ساتھ حصہ لے گی اور کراچی کے حقوق، اختیارات اور وسائل کے تحفظ کے لیے اپنی جدوجہد جاری رکھے گی۔