Category: کراچی

‎کراچی پورٹ ٹرسٹ (KPT) نے اپنی 138 سالہ تاریخ میں ایک نیا ریکارڈ قائم کرتے ہوئے صرف 24 دنوں میں 8,313 ٹرانس شپمنٹس ہینڈل کر کے غیر معمولی کارکردگی کا مظاہرہ کیا ہے۔ اس پیش رفت کو ملکی بحری تجارت کے لیے اہم قرار دیا جا رہا ہے، تاہم ماہرین اس کے ساتھ کچھ اہم سوالات بھی اٹھا رہے ہیں۔
‎تفصیلات کے مطابق کراچی پورٹ نے نہ صرف کم وقت میں زیادہ کارگو ہینڈل کیا بلکہ ایک ہی دن میں 31 جہازوں کو سنبھال کر ایک اور ریکارڈ بھی قائم کیا۔ پورٹ حکام کے مطابق یہ کامیابی جدید ڈیجیٹل نظام اور مسلسل 24 گھنٹے کام کرنے کی پالیسی کا نتیجہ ہے، جس کے تحت عید کی تعطیلات میں بھی آپریشن جاری رکھا گیا۔
‎حکام کا دعویٰ ہے کہ ڈیجیٹل اپ گریڈیشن کے باعث پورٹ کے نظام میں تیزی آئی اور کارکردگی بہتر ہوئی، جس سے بین الاقوامی شپنگ کمپنیوں کا اعتماد بھی بڑھا ہے۔ یہی وجہ ہے کہ حالیہ دنوں میں غیر ملکی کمپنیوں کی دلچسپی میں اضافہ دیکھنے میں آیا ہے۔
‎تاہم ماہرین کے مطابق اس ریکارڈ کارکردگی کے باوجود کچھ اہم پہلوؤں پر غور ضروری ہے۔ سوال یہ بھی اٹھایا جا رہا ہے کہ آیا یہ اضافہ مستقل بنیادوں پر برقرار رکھا جا سکے گا یا یہ صرف وقتی دباؤ اور اضافی اوقات کار کا نتیجہ ہے۔ مزید یہ کہ 24/7 آپریشنز کے دوران عملے پر پڑنے والے دباؤ اور وسائل کے استعمال کا بھی جائزہ لینا ہوگا۔
‎اقتصادی ماہرین کا کہنا ہے کہ اگر اس کارکردگی کو مستقل بنیادوں پر برقرار رکھا گیا تو یہ پاکستان کی بحری تجارت اور معیشت کے لیے مثبت ثابت ہو سکتا ہے، لیکن اس کے لیے انفراسٹرکچر، پالیسی اور افرادی قوت میں مزید بہتری ضروری ہوگی۔

کراچی: سندھ حکومت نے کفایت شعاری پالیسی کے تحت صوبے بھر میں کاروباری اوقات کار محدود کرنے کا فیصلہ کرتے ہوئے دکانوں، شاپنگ مالز، ہوٹلز اور شادی ہالز کے نئے اوقات کا اعلان کر دیا ہے۔

حکومت سندھ کی جانب سے جاری کردہ نوٹیفکیشن کے مطابق کراچی سمیت تمام ڈویژنل ہیڈکوارٹرز میں دکانیں، مارکیٹس اور شاپنگ مالز رات 9 بجے بند ہوں گے، جبکہ دیگر اضلاع میں یہ اوقات رات 8 بجے تک محدود کر دیے گئے ہیں۔نوٹیفکیشن میں بتایا گیا ہے کہ ہوٹلز اور فوڈ آؤٹ لیٹس کو شام 7 بجے سے رات 11 بج کر 30 منٹ تک کھلا رکھنے کی اجازت ہوگی، تاہم ہوم ڈیلیوری اور ٹیک اوے سروس پر کسی قسم کی پابندی عائد نہیں ہوگی۔اسی طرح شادی ہالز اور بینکوئٹس کو رات 8 بجے سے 12 بجے تک تقریبات منعقد کرنے کی اجازت دی گئی ہے۔حکومت نے واضح کیا ہے کہ تندور، دودھ کی دکانیں، بیکریز، میڈیکل اسٹورز، لیبارٹریز، کلینکس، اسپتال اور پیٹرول پمپس ان پابندیوں سے مستثنیٰ ہوں گے۔نوٹیفکیشن کے مطابق کفایت شعاری پالیسی پر فوری طور پر عمل درآمد شروع کر دیا گیا ہے، اور متعلقہ اداروں کو ہدایات جاری کر دی گئی ہیں کہ نئے اوقات کار پر سختی سے عمل یقینی بنایا جائے۔

سندھ کے سینئر صوبائی وزیر، وزیر اطلاعات شرجیل انعام میمن نے کہا ہے کہ خطے کی موجودہ صورتحال اور پیٹرولیم قیمتوں میں اضافے کے پیش نظر سندھ حکومت نے فوری اور عملی اقدامات کیے ہیں۔ صدرِ مملکت کی مشاورت کے بعد غریب کسانوں کے لیے بڑا ریلیف فراہم کیا گیا ہے، جس کے تحت 25 ایکڑ سے کم زمین رکھنے والے کسانوں کو فی ایکڑ 1500 روپے دیے جا رہے ہیں، اور یہ عمل بینظیر ہاری کارڈ کے ڈیٹا کی بنیاد پر تیزی سے جاری ہے۔

پریس کانفرنس کرتے ہوئے شرجیل میمن کا کہنا تھا کہ اسی طرح موٹر سائیکل استعمال کرنے والے شہریوں کے لیے بھی ریلیف کا اعلان کیا گیا ہے، جس کے تحت ہر رجسٹرڈ بائیک پر 2000 روپے فراہم کیے جا رہے ہیں۔ صوبے میں 67 لاکھ سے زائد موٹر سائیکل رجسٹرڈ ہیں، جبکہ ٹرانسفر فیس مکمل طور پر ختم کر دی گئی ہے۔ عوامی سہولت کے لیے ایکسائز دفاتر کو ہفتے کے ساتوں دن صبح 8 بجے سے رات 12 بجے تک کھلا رکھا گیا ہے۔سندھ واحد صوبہ ہے جو سرکاری ٹرانسپورٹ ساتھ ساتھ پرائیویٹ ٹرانسپورٹ کو بھی سبسڈی فراہم کر رہا ہے تاکہ عوام پر مہنگائی کا بوجھ کم کیا جا سکے۔ ایکسائز ایپ کو عوام کی جانب سے بھرپور پذیرائی ملی، جہاں پریس کانفرنس کے دوران ہی 1500 رجسٹریشنز ہوئیں، جبکہ ایک ہی دن میں 15,000 سے زائد افراد نے اندراج کروایا، اور ہزاروں شہریوں کو ادائیگیاں بھی موصول ہو چکی ہیں۔مزید برآں، منشیات کے خلاف ایک بڑی کارروائی میں 500 کلو سے زائد آئس (مالیت تقریباً 5 ارب روپے) ضبط کی گئی، جو اس بات کا واضح ثبوت ہے کہ سندھ کو اس ناسور سے پاک کرنے کے لیے سنجیدہ اور مؤثر اقدامات جاری ہیں۔یہ تمام اقدامات عوامی ریلیف، سہولت اور ایک بہتر، محفوظ اور خوشحال سندھ کی جانب واضح پیش رفت کی عکاسی کرتے ہیں۔