Category: کراچی

جماعت اسلامی کراچی کے تحت گزشتہ روز قائد آباد تا گورنر ہاؤس ’’حق دو کراچی ریلی ‘‘اور گورنر ہاؤس پر رات گئے تک جاری رہنے والے دھرنا اختتام پذیر ہوا اور 17نکاتی اعلامیہ بھی جاری کیا گیا ۔دھرنے سے امیرجماعت اسلامی کراچی حافظ نعیم الرحمن نے اختتامی خطاب کرتے ہوئے اعلان کیا کہ اہل کراچی کے گھمبیر مسائل حل نہ ہوئے اور تین کروڑ عوام کو ان کے جائز و قانونی حقوق نہ ملے ،مطالبات نہ پورے کیے گئے اور شہر کی ابتر حالت میں بہتری نہ آئی توجماعت اسلامی عید الفطر کے بعد یا رمضان المبارک میں بھی وزیر اعلیٰ ہاؤس پر زبردست دھرنا دے گی۔ اعلامیہ میں کہا گیا ہے کہ کراچی کے گھمبیر مسائل کے حل اور تین کروڑ سے زائد عوام کے جائز اور قانونی حقوق کے لیے ضروری ہے کہ وفاقی حکومت فوری طور پر کراچی میں درست مردم شماری کرائے اور حکومت سندھ اس کے انعقاد میں اپنا کردار ادا کرے۔کراچی کی آبادی کسی بھی صورت 3 کروڑ سے کم نہیں لہذا کراچی کی قومی اور صوبائی اسمبلی کی نشستیں اور یو نین کو نسلوں کی تعداد اسی حساب سے متعین کی جائے۔ کوٹہ سسٹم فوری طور پر ختم کیا جائے اور ہر سیٹ پر داخلے اور نوکریاں صرف اور صرف میرٹ کی بنیاد پر دی جائیں۔ سرکاری اداروں میں کراچی کے نوجوانوں کو ملازمتیں دی جائیں۔ کراچی کی اسامیوں پر جعلی ڈومیسائل کی بنیاد پر بھرتی بند کی جائے اور کراچی کے اداروں میں مقامی افراد کو اسامیوں پر تعینات کیا جائے۔
Kالیکٹرک کراچی کے عوام کے لئے انتہائی اذیت رساں ادارہ بن گیا ہے۔ Kالیکٹرک کراچی کے شہریوں کو بجلی کی فراہمی میں مکمل ناکام ہو گیا ہے۔ اس ادارے کی بنیاد بے ایمانی اور بد دیانتی پر قائم ہے۔ حکومت فوری طور پر اس کا کنٹرول سنبھال کر Kالیکٹرک کا فرانزک آڈٹ کرائے اور لوٹی ہوئی رقم برآمد کی جائے۔ کراچی سے بجلی اور گیس کی لوڈشیڈنگ ختم کی جائے، اسٹیل مل اور برطرف شدہ ملازمین کو بحال کیا جائے۔ ملازموں کو ان کی حقوق دیئے جائیں اور برطرفی بند کی جائے۔ PIA کے دفاتر کی کراچی سے منتقلی روکی جائے۔ اس طرح نکاسی آب کے منصوبہ 3-S کو بھی فوری طور پر مکمل کیا جا ئے۔ وفاقی اور صوبائی حکومت اس پر سیاست کرنے کے بجائے اپنا اپنا حصہ فوری ادا کریں۔ ہنگامی بنیادوں پر کراچی کی سڑکیں، بجلی، پانی اور سیوریج کے نظام کی بحالی کے انتظامات کئے جائیں۔ تجاوزات کے نام پر ڈھائی گئی دکانوں کا متبادل فراہم کیا جائے۔ کرونا سے متاثر و تاجروں کو مختلف ٹیکسوں میں چھوٹ دی جائے۔ تعلیمی اداروں میں فیسوں میں کمی کی جائے، باصلاحیت طالب علموں کو تعلیم کے لیے مالی وسائل فراہم کئے جائیں۔ ملیر ایکسپریس کی فوری تعمیر کرائی جائے۔ ۔ کراچی میں پولیس اور تھانہ کا نظام درست کیا جائے۔ عدالتی نظام کو فعال اور موثر بنایا جائے تاکہ بلا تاخیر انصاف کی فراہمی ممکن ہو سکے۔ شہر میں بے گناہ قتل ہونے والے افراد مخصوص سانحہ 12 مئی، 9 اپریل سانحہ طاہر پلازہ میں اور بلدیہ فیکٹری میں جلائے جانے والے شہداء کے قاتلوں کو حکومت کیفر کردار تک پہنچایا جائے۔ ۔ رفاہی پلاٹوں پر قائم ہسپتالوں کو مریضوں سے لوٹ مار سے روکا جائے۔ ۔ کچی آبادیوں میں بنیادی انسانی سہولتوں کی فراہمی کو یقینی بنایا جائے۔ نوجوانوں میں صحت مندانہ رجحانات کے فروغ کے لیے حکومت کھیلوں اور غیر نصابی سرگرمیوں کی سر پرستی اور حوصلہ افزائی کرے، تباہ حال کھیلوں کے میدان اور پارکس فوری بحال کئے جائیں۔ تجاوزات کے نام پر نالوں اور مختلف مقامات سے بے دخل افرادوانسان اور پاکستانی شہری ہیں کسی بھی طور متبادل جگہ اور معاوضہ کے بغیر بے دخل نہ کیا جائے۔

منگل کے روز 30 مارچ 2021 کو قائد حزب اختلاف سندھ اسمبلی حلیم عادل شیخ کی وفاقی وزیر داخلہ شیخ رشید سے ملاقات حلیم عادل شیخ نے شیخ رشید سے ملاقات ان کی رہائش گاہ میں۔حلیم عادل شیخ نے سیاسی جھوٹے مقدمات میں مدد کرنے پر شیخ رشید کا شکریہ ادا کیا حلیم عادل شیخ نے شیخ رشید کو بتایا کہ سندھ میں ان پر غیر قانونی طور پر ان پر دہشتگردی کے مقدمات بنائے گئے ہیں۔ حلیم عادل شیخ نے شیخ رشید کو ان پر درج دہشتگردی کے مقدمات پر جی آئی ٹی بنانے کی درخواست بھی دی سندھ میں پولیس حکومت کے ایما پر سیاسی مخالفین پر جھوٹے کیسز بنا رہی ہے۔انہوں نے کہا سندھ پولیس سندھ میں غیر قانونی کام کر رہی ہے جھوٹے مقدمات پر جی آئی ٹی بنائی جائے حلیم عادل شیخ نے وزیر داخلا شیخ رشید کو سندھ کے دورے کی دعوت بھی دی۔

رکن سندھ اسمبلی راجہ اظہر کا وزیراعظم عمران خان کو خط.خط میں لکھا گیا کہ کراچی جناح ہسپتال اور دیگر سرکاری ہسپتالوں میں مریضوں کے عزیز و اقارب کیلئے شیلٹر ہوم بنانے کی درخواست کراچی جناح ہسپتال غریب عوام کو صحت کی سہولیات فراہم کرنے میں اہم کردار کررہا ہے،مریض علاج کیلئے زیادہ تر اندرون سندھ اور بلوچستان سے آتے ہیں،عموماً مریض کے ہمراہ آئے عزیز و اقارب کے پاس رہنے کے لیے کوئی جگہ نہیں ہوتی،مریض کے ہمراہ آئے لوگ سڑک پر رات گزارنے پر مجبور ہوتے ہیں، ان غریب طبقے کے لوگوں کیلئے سندھ حکومت کی طرف سے کوئی شیلٹر ہوم نہیں بنایا گیا، یہاں تک کہ انہیں پینے کا پانی اور واش روم کی سہولیات بھی فراہم نہیں کی جاتیں، وفاق ان غریبوں کیلئے شیلٹر ہوم کی فراہمی یقینی بنانے جہاں وہ بآسانی آرام کرسکیں،وزیراعظم کا ریاست مدینہ کی جانب یہ بہترین قدام ثابت ہوگا.

صوبہ سندھ کے دارالحکومت کراچی کے گنجان آباد علاقے لیاقت آباد میں فرنیچر کے کارخانے میں آتشزدگی کےباعث لاکھوں روپے کا نقصان ہوگیا تفصیلات کے مطابق فرنیچر کے کارخانے کےتہہ خانے میں لگنے والی آگ نے تین منزلہ عمارت کو لپیٹ میں لے لیا۔گنجان علاقے اور تنگ گلیوں کے باعث فائر بریگیڈ کے عملے کو آگ بجھانے کیلئے کافی مشکلات کا سامنا رہا تاہم فرنیچر مارکیٹ میں لگی آگ پر تین گھنٹے بعد قابو لیا گیا۔ فائر فائٹرز نے کولنگ عمل شروع کر دیا ۔ فائر بریگیڈ کی 5 گاڑیوں نے آگ بجھانےکے عمل میں حصہ لیا۔

شہر قائد میں آج سے گرمی کی شدت کا امکان ہیں، ہیٹ اسٹروک ہوگا یا نہیں؟ اس معاملے پر محکمہ موسمیات نے اپنا موقف دے دیا ہے محکمہ موسمیات کی جانب سے جاری بیان کے مطابق آج سے شہر میں گرمی کی شدت میں اضافےکا امکان ہیں جس کے باعث زیادہ سے زیادہ درجہ حرارت 40ڈگری سینٹی گریڈ تک جانے کا امکان ہے، اس وقت ہوا میں نمی کا تناسب 78فیصد ہےموسم کا حال بتانے والے ادارے کا کہنا ہے کہ اس وقت شمال مغربی سمت سے ہوا کی رفتار 11کلو میٹر فی گھنٹہ ریکارڈ کی گئی ہے مگر دن کے وقت سمندری ہوائیں بند رہیں گی، ہوا کی سمت تبدیل ہونےسےگرمی کی شدت میں اضافےکا امکان ہیں۔محکمہ موسمیات کے واضح کیا کہ کراچی میں فی الحال ہیٹ ویو کا خدشہ نہیں ہے،گرمی کی شدت چار سےپانچ روز تک برقرار رہے گی۔

شہر کراچی میں شب برأت نہایت عقیدت و احترام اور مذہبی جوش و جذبے کے ساتھ منائی گئی۔مساجد میں شب برأت کے حوالے سے روح پرور اجتماعات منعقد ہوئے جس میں علمائے کرام نے شب برأت کی فضیلت بیان کی۔شہر کی مختلف مساجد میں پیر کو بعد نماز مغرب چھ خصوصی نوافل اداکئے گئے۔ سو رہ یسین کی تلاوت اور دعا ئے نصف شعبا ن کا ورد کیا گیا۔
بعد نماز عشاء مسا جد میں علمائے کرام نے شب برأت کے فضائل بیان کیے۔مساجد میں صلوة لتسبیح، محافل ذکر و نعت،درود شریف اور خصوصی دعائوں کااہتمام کیا گیا۔اس حوالے سے اللہ تعا لی کے حضو ر گنا ہوں سے تو بہ، بخشش ومغفر ت ، ایما ن و سلامتی ، رزق کی کشادگی ، آفات و بلیات ، مصیبت ، محتا جی ، تنگ دستی ، وبا سے صحت و عا فیت ، عالم اسلام ، مظلوم مسلمانوں اور پاکستان کی ترقی واستحکام کے لیے خصوصی دعائیں مانگی گئیں۔ شہر میں شب برأت کے بڑے اجتماعات میں فیضان مدینہ ، کنزالایمان مسجد ، میمن مسجد کھارادر، بہار شریعت مسجد ، نور مسجد کاغذی بازار سمیت مختلف مساجد میں منعقد ہوئے۔ شہریوں نے اپنے مرحومین کی قبروں پر فاتحہ خوانی کے لیے قبرستانوں کا رخ کیا۔ اپنے پیارے مرحومین کی قبروں کی ازخود صفائی کی اور ان پر پانی ڈالا ۔گلاب کے پھول ڈالے اور چاردیں چڑھائیں ۔ ۔قبرستانوں کے باہر بڑی تعداد میں گلاب، اگربتی ، عرق گلاب اور دیگر اشیا کی فروخت کے لیے عارضی اسٹالز لگائے گئے جس سے بڑی تعداد میں لوگوں کو عارضی روزگار حاصل ہوا ۔ان اسٹالز پر گلاب کی پتیاں اور پھول 150 سے لے کر 300 سے زائد روپے فی کلو تک فروخت کی گئیں ۔ قبرستانوں کے باہر مختلف سماجی ،سیاسی اور مذہبی جماعتوں جن میں جماعت اہلسنت، پاکستان سنی تحریک، تحریک لبیک پاکستان، منہاج القرآن، عوامی تحریک، متحدہ قومی موومنٹ، مہاجر قومی موومنٹ، پاکستان تحریک انصاف سمیت دیگر کی جانب سے شہریوں کی سہولت کے لیے سبیل اور رہنمائی کے لیے کیمپس لگائے گئے۔ مختلف عوامی رہنمائی کے کیمپس پر شہریوں کو شربت پلایا گیا اور پھولوں کی پتیاں بھی مفت تقسیم کی گئیں۔ شب برأت کے موقع پر بڑے پیمانے پر نظر ونیاز کا اہتمام اور لنگر تقسیم کیا گیا۔

وزیراعلیٰ سندھ سید مراد علی شاہ نے کورونا وائرس کی صورتحال بیان کرتے ہوئے کہا کہ گزشتہ 24 گھنٹوں میں 4 مریض انتقال کرگئے جبکہ 269 نئے کیسز رپورٹ ہوئے جو کہ تشخیص کی شرح کا 3 فیصد ہے۔ اور 183 افراد صحتیاب ہوئے ہیں۔ انہوں نے کہا کہ گزشتہ 24 گھنٹوں میں 4 مریض انتقال کرگئے جس سے اموات کی مجموعی تعداد 4495 ہوگئی ہے جوکہ اموات کی شرح کا 1.7 فیصد ہے۔ انہو ں نے کہا کہ اس وقت 4710 مریض زیر علاج ہیں جن میں سے 4416 گھروں میں ،8 آئسولیشن سینٹرز میں اور 286 مریض مختلف اسپتالوں میں زیر علاج ہیں۔ انہوں نے کہا کہ 259 مریضوں کی حالت تشویشناک بتائی گئی ہے جن میں سی 39 مریض وینٹی لیٹرز پر ہیں۔انہوں نے کہا کہ 269 نئے کیسز میں سی99 کا تعلق کراچی سے ہے جن میں ضلع شرقی 34 ، ضلع جنوبی 24 ، ضلع وسطی 15، ملیر12 ، کورنگی اورضلع غربی سے 7 نئے کیسزرپورٹ ہوئے ہیں۔ وزیراعلیٰ سندھ نے کراچی کے عوام کوتاکید کی پے کہ ایس او پیز پر عمل کریں اور محفوظ رہیں۔

ثانوی تعلیمی بورڈ کراچی کے اعلامیہ کے مطابق گورنمنٹ آف سندھ کے دیئے گئے امتحانی شیڈول کے مطابق جماعت نہم و دہم کے عملی امتحانات جون 2021ء میں لئے جائیں گے۔ اعلامیہ میں کہا گیا کہ بورڈ سے الحاق شدہ اسکولوں کے سربراہان کوکہا جاتا ہے کہ جن اسکولوں نے ابھی تک عملی امتحانات 2021 ء کے پریکٹیکل پرفارما بورڈ میں جمع نہیں کروائے ہیں وہ جلد از جلد بورڈ کے متعلقہ سیکشن کمرہ نمبر47 دوسری منزل بلاک Bمیں لازمی جمع کرا دیں۔

تفصیلات کے مطابق پیرکواینٹی انکروچمنٹ ٹریبونل میں تجاوزات کی آڑ میں لیز مکانات مسمار کرنے کے خلاف گجر نالے کے اطراف میں مقیم مزید 34 مکینوں نے ٹربیونل سے رجوع کرلیا،اینٹی انکروچمنٹ ٹریبونل نے فریقین سے 31 مارچ کو جواب طلب کرلیا ٹربیونل کا سندھ حکومت، کمشنر کراچی، محکمہ کچی آبادی اور دیگر کو جواب جمع کرانے کا حکم جاری۔ ٹربیونل نے اپنے حکم میں کہا ہے کہ بتایا جائے لیز مکانات کو کیوں توڑا جارہا ہے درخواست میں موقف اختیار کیا گیا تھا کہ کے ایم سی اینٹی انکروچمنٹ نے گجر نالے پر تجاوزات کی آڑ میں لیز مکانات کو مسمار کرنا شروع کردیا لیز مکانات کو بغیر پیشگی نوٹس کے مسمار کیا جارہا ہے متعلقہ اداروں کو لیز گھروں کے خلاف غیر قانونی اقدام کرنے سے روکا جائے

تفصیلات کے مطابق کراچی میں فائیواسٹارچورنگی پر پولیس اہلکار کی جانب سے موٹرسائیکل چھیننے کا معمہ حل ہوگیا ، شہری سے مبینہ موٹرسائیکل چھیننے والا سب انسپکٹر نکلا۔ ذرائع کا کہنا ہے کہ سب انسپکٹر کامران کی حالیہ تعیناتی بلاول ہاؤس میں ہے ، ملزم نے پکڑے جانے پر خود کو ساؤتھ انویسٹی گیشن کا افسر ظاہر کیا۔تفتیشی ذرائع کا کہنا تھا کہ ملزم نے اپنا نام پہلے علی شاہ بتایا، تاہم مزیدتفتیش کرنے پر پتہ چلا ملزم کانام کامران ہے اور سیکیورٹی زون 2 میں سب انسپکٹر ہے ۔ شہری کے مطابق کامران اس سے موٹر سائیکل چھین رہا تھا اور شلوارقمیض میں ملبوس ایک اور شخص اس کے ساتھ تھا۔ سیکیورٹی زون ٹو کے مطابق مبینہ اہلکار ان کے پاس تعینات نہیں جبکہ مبینہ اہلکار ایس ایس یو کے ماتحت بھی کام نہیں کر رہا لیکن انکوائری کمیٹی نے کہا ہے کہ وہ سکیورٹی زون ٹو کا اہلکار ہے اور بلاول ہاؤس پر تعینات ہے، جلد تحقیقات کرکے اصلیت سامنے لائیں گے۔یاد رہے 5 اسٹار چورنگی پر پولیس اہلکار کی شہری سے مبینہ طور پر موٹر سائیکل چھیننے کی ویڈیو وائرل ہوئی تھی ، موٹر سائیکل چھیننے پر متاثرہ شہری نے شور مچایا تو عوام کا رش لگ گیا، جس کی وجہ سے شہری کی موٹرسائیکل بچ گئی۔