Category: کراچی

کراچی: ہل پارک میں پہاڑ کی کٹائی اور مبینہ غیر قانونی تعمیرات کے معاملے پر اہم پیش رفت سامنے آئی ہے، جہاں کے ایم سی کی جانب سے تعمیرات مسمار کیے جانے کے خلاف عدالت میں درخواست دائر کردی گئی ہے۔

درخواست گزار سہیل اقبال صدیقی کے وکیل نے مؤقف اختیار کیا کہ مذکورہ پلاٹ ان کے مؤکل کی قانونی ملکیت ہے، تاہم کراچی میٹروپولیٹن کارپوریشن (کے ایم سی) نے 2 جون کو بغیر کسی قانونی نوٹس اور اختیار کے پلاٹ کی باونڈری وال مسمار کر دی۔وکیل درخواست گزار کے مطابق پی ای سی ایچ ایس کی جانب سے جاری کردہ خط میں واضح کیا گیا ہے کہ متنازع پلاٹ ہل پارک کی حدود میں شامل نہیں ہے اور یہ مکمل طور پر پی ای سی ایچ ایس کے دائرۂ اختیار میں آتا ہے۔ انہوں نے عدالت کو بتایا کہ اراضی کا مکمل ریکارڈ بھی پی ای سی ایچ ایس کے پاس موجود ہے۔

درخواست گزار کے وکیل نے مزید مؤقف اختیار کیا کہ کے ایم سی نے 21 اپریل کو اسی پلاٹ پر باونڈری وال کی تعمیر کے لیے این او سی جاری کی تھی، اس کے باوجود بعد ازاں باونڈری وال کو مسمار کر دیا گیا، جو غیر قانونی اور اختیارات سے تجاوز کے مترادف ہے۔درخواست میں عدالت سے استدعا کی گئی ہے کہ باونڈری وال کی مسماری میں ملوث ذمہ دار افسران کے خلاف انکوائری اور محکمانہ کارروائی کا حکم دیا جائے، جبکہ متعلقہ حکام کو پلاٹ میں کسی بھی قسم کی مزید مداخلت یا بے دخلی کی کارروائی سے روکا جائے۔درخواست میں سندھ حکومت، کے ایم سی کے ڈائریکٹر لینڈ، میونسپل کمشنر کے ایم سی، ڈپٹی ڈائریکٹر ہل پارک، ڈپٹی ڈائریکٹر اینٹی انکروچمنٹ سمیت دیگر متعلقہ حکام کو فریق بنایا گیا ہے۔

عدالت نے درخواست پر ابتدائی سماعت کے بعد سندھ حکومت، کے ایم سی، پی ای سی ایچ ایس اور دیگر فریقین کو نوٹس جاری کرتے ہوئے 11 جون تک جواب طلب کر لیا ہے۔

‎کراچی کے علاقے اورنگی ٹاؤن سیکٹر ساڑھے 11 میں گھریلو تنازع ایک افسوسناک واقعے میں تبدیل ہو گیا، جہاں ایک شخص نے مبینہ طور پر اپنی بیوی کو قتل کرنے کے بعد خود پولیس تھانے پہنچ کر جرم کا اعتراف کر لیا۔ واقعے نے علاقے میں تشویش کی لہر دوڑا دی جبکہ مقتولہ کے چار بچے ماں کی شفقت سے محروم ہو گئے۔
‎پولیس کے مطابق ملزم بیوی کو قتل کرنے کے بعد براہ راست تھانے پہنچا اور واقعے کی اطلاع دی۔ اطلاع ملتے ہی پولیس فوری طور پر جائے وقوع پر پہنچی اور خاتون کی لاش کو تحویل میں لے کر قانونی کارروائی کا آغاز کیا۔ موقع سے مبینہ آلہ قتل، لوہے کی راڈ بھی برآمد کر لی گئی۔
‎عدالت میں پیشی کے دوران پولیس نے مؤقف اختیار کیا کہ ملزم ابتدائی تفتیش میں جرم کا اعتراف کر چکا ہے۔ تفتیشی حکام کے مطابق مزید شواہد اکٹھے کرنے، آلہ قتل کی فرانزک جانچ اور ملزم کے ممکنہ کریمنل ریکارڈ کی پڑتال کے لیے جسمانی ریمانڈ درکار ہے۔ عدالت نے ملزم کو دو روزہ جسمانی ریمانڈ پر پولیس کے حوالے کر دیا۔
‎پولیس حکام کا کہنا ہے کہ ابتدائی تحقیقات کے مطابق میاں بیوی کے درمیان گھریلو جھگڑے چل رہے تھے۔ مبینہ طور پر اسی تنازع کے دوران ملزم نے لوہے کی راڈ سے وار کر کے خاتون کو قتل کر دیا۔ ڈیوٹی افسر کے مطابق ملزم نے ذاتی رنجش اور گھریلو اختلافات کی بنیاد پر قتل کا اعتراف بھی کیا ہے۔
‎مقتولہ چار بچوں کی ماں تھی، جن میں دو بیٹے اور دو بیٹیاں شامل ہیں۔ پولیس کے مطابق واقعے کے وقت گھر میں کوئی اور فرد موجود نہیں تھا، جس کی وجہ سے قتل کی واردات بغیر کسی مزاحمت کے انجام دی گئی۔
‎قانون نافذ کرنے والے ادارے مختلف پہلوؤں سے تفتیش کر رہے ہیں تاکہ واقعے کی مکمل وجوہات اور پس منظر سامنے لایا جا سکے۔ پولیس کا کہنا ہے کہ شواہد اور فرانزک رپورٹس کی روشنی میں چالان مکمل کر کے عدالت میں پیش کیا جائے گا۔
‎سماجی حلقوں نے واقعے پر افسوس کا اظہار کرتے ہوئے گھریلو تنازعات کے حل کے لیے مؤثر مشاورت اور آگاہی پروگراموں کی ضرورت پر زور دیا ہے تاکہ ایسے المناک واقعات کی روک تھام ممکن بنائی جا سکے۔

ترجمان سندھ حکومت ارسلان شیخ کا کہنا ہے کہ کیپٹن صفدر نے سندھ کی ثقافت پر حملہ کیا، وہ سندھ کے عوام سے معافی مانگیں۔

میئر سکھر اور ترجمان حکومت سندھ ارسلان شیخ نے کراچی میں پریس کانفرنس کرتے ہوئے کہا کہ گلگت بلتستان کی الیکشن مہم کے دوران نامناسب الفاظ استعمال کئے جارہے ہیں، گلگت بلتستان میں اسٹیٹ ایکٹرز اور جوکرز کو روکا جائے۔ان کا کہنا ہے کہ کیپٹن صفدر نے سندھ کی ثقافت پر حملہ کیا ہے، کیپٹن صفدر سندھ کے عوام سے معافی مانگیں، اگر کوئی شک ہے تو کیپٹن صفدر سندھ سے الیکشن لڑکر دیکھ لیں، پیپلزپارٹی سندھ کے عوام کے دلوں میں بستی ہے، کیپٹن صفدر کو عوام سے دور رکھا جائے۔ ،صفدر عوان صاحب صرف ایک دن کے لیے سندھ تو ائیں اور سندھ کے لوگوں کے مسئلے سنیں ،جس مقام پر مریم نواز اور شہباز شریف ہیں ان کی ذمہ داری ہے کہ وہ کیپٹن صفدر جیسے جوکرز کو عوام سے دور رکھیں۔ انہوں نے سندھ کی ثقافت پر حملہ کیا ہے، کیپٹن صفدر ریاست اور پاکستان کے لیے خطرہ ہیں،گلگت بلتستان میں غیر اخلاقی تنقید کی جارہی ہے، کیپٹن صفدر پیپلز پارٹی کی کارکردگی پر تنقید کر رہے ہیں، سندھ کے لوگ باشعور ہیں آپ ہاتھ جوڑ کر یہاں کی عوام سے معافی مانگیں۔ مراد علی شاہ اور بلاول صاحب کی کارکردگی سب کے سامنے ہے، عوامی مینڈیٹ کے ذریعے اس صوبے میں حکومت جاری ہے، ہمارا ہاتھ جوڑ کر لوگوں کو خوش آمدید کہنا ثقافت کا حصہ ہے،

انسدادِ دہشت گردی محکمہ (سی ٹی ڈی) نے انمول عرف پنکی سے مبینہ روابط کے الزام میں دو پولیس اہلکاروں کو ملازمت سے برخاست کر دیا ہے۔ برخاست کیے جانے والوں میں ایک کانسٹیبل اور ایک اے ایس آئی شامل ہیں۔

سی ٹی ڈی ذرائع کے مطابق دونوں اہلکاروں پر گزشتہ چند برسوں کے دوران انمول عرف پنکی سے رابطے رکھنے کا الزام تھا۔ تحقیقات کے دوران یہ بات سامنے آئی کہ ایک اہلکار نے ایک رائیڈر کی گرفتاری کے بعد ملزمہ سے روابط بڑھائے تھے،ذرائع کا کہنا ہے کہ مکمل انکوائری رپورٹ کے بعد دونوں اہلکاروں کے خلاف محکمانہ کارروائی عمل میں لائی گئی اور انہیں ملازمت سے فارغ کر دیا گیا،چند روز قبل اہلکار علی قریشی اور کفیل کو حراست میں لے کر ان سے تفتیش بھی کی گئی تھی۔ دورانِ تحقیقات دونوں اہلکاروں کے باضابطہ بیانات قلمبند کیے گئے۔

سی ٹی ڈی ذرائع کے مطابق شواہد اکٹھے کرنے کے لیے دونوں اہلکاروں کے موبائل فونز کا فرانزک تجزیہ بھی کیا گیا، جبکہ ان کے بینک اکاؤنٹس کی تفصیلات بھی حاصل کرکے جانچ پڑتال کی گئی۔ذرائع کا مزید کہنا ہے کہ تحقیقات کے مختلف پہلوؤں کا جائزہ لینے کے بعد انکوائری مکمل کی گئی، جس کی روشنی میں دونوں اہلکاروں کو ملازمت سے برخاست کرنے کا فیصلہ کیا گیا

‎کراچی میں آوارہ کتوں کی بڑھتی ہوئی تعداد شہریوں کے لیے سنگین خطرہ بن گئی ہے۔ سرکاری اسپتالوں کے اعداد و شمار نے ایک تشویشناک صورتحال کی نشاندہی کی ہے، جس کے مطابق شہر کے مختلف اسپتالوں میں روزانہ آوارہ کتوں کے کاٹنے کے 150 سے زائد کیسز رپورٹ ہو رہے ہیں۔
‎تفصیلات کے مطابق شہر کے مختلف علاقوں میں آوارہ کتوں کے حملوں میں مسلسل اضافہ دیکھنے میں آ رہا ہے، جس کے باعث خواتین، بزرگوں اور خصوصاً بچوں کی جانیں خطرے میں پڑ گئی ہیں۔ شہریوں کا کہنا ہے کہ متعدد علاقوں میں کتوں کے غول دن اور رات کے اوقات میں آزادانہ گھومتے نظر آتے ہیں، لیکن ان کی روک تھام کے لیے مؤثر اقدامات دکھائی نہیں دیتے۔
‎حال ہی میں کورنگی انڈسٹریل ایریا میں پیش آنے والے ایک افسوسناک واقعے نے اس مسئلے کی سنگینی کو مزید اجاگر کر دیا۔ گلی میں اپنے گھر کے باہر کھیلنے والی ایک کمسن بچی پر آوارہ کتوں کے ایک غول نے حملہ کر دیا۔ حملے کے نتیجے میں بچی کے چہرے اور جسم کے مختلف حصوں پر گہرے زخم آئے۔ اہل خانہ نے فوری طور پر بچی کو اسپتال منتقل کیا جہاں اسے طبی امداد فراہم کی گئی۔
‎اسپتال ذرائع کے مطابق کتوں کے کاٹنے کے سب سے زیادہ واقعات کورنگی، لانڈھی اور حب چوکی کے علاقوں سے رپورٹ ہو رہے ہیں۔ طبی ماہرین کا کہنا ہے کہ آوارہ کتوں کے حملوں کے بعد فوری علاج اور ریبیز سے بچاؤ کی ویکسین انتہائی ضروری ہوتی ہے، کیونکہ تاخیر جان لیوا ثابت ہو سکتی ہے۔
‎دستاویزات اور طبی ریکارڈ کے مطابق رواں سال اب تک آوارہ کتوں کے حملوں کے نتیجے میں 10 افراد جان کی بازی ہار چکے ہیں، جبکہ 40 ہزار سے زائد شہری زخمی ہو کر مختلف اسپتالوں میں علاج کروا چکے ہیں۔ یہ اعداد و شمار شہری انتظامیہ اور متعلقہ اداروں کے لیے ایک بڑا چیلنج بن چکے ہیں۔

‎آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے سندھ کے ضلع سانگھڑ میں تیل اور گیس کے ایک نئے ذخیرے کی دریافت کا اعلان کیا ہے، جسے ملکی توانائی کے شعبے کے لیے ایک اہم پیش رفت قرار دیا جا رہا ہے۔
‎او جی ڈی سی ایل کے ترجمان کے مطابق بوبی ڈیپ ون نامی کنویں سے یومیہ تقریباً 2 ہزار بیرل خام تیل حاصل ہوا ہے، جبکہ اسی مقام سے روزانہ 1.1 ایم ایم سی ایف ڈی (ملین مکعب فٹ یومیہ) گیس کی پیداوار بھی ریکارڈ کی گئی ہے۔ ابتدائی نتائج سے ظاہر ہوتا ہے کہ یہ دریافت مستقبل میں توانائی کے مزید ذخائر کی تلاش کے امکانات کو بھی مضبوط بنا سکتی ہے۔
‎ترجمان کا کہنا ہے کہ نئی دریافت نہ صرف سانگھڑ کے علاقے میں مزید تلاش اور ترقیاتی سرگرمیوں کی راہ ہموار کرے گی بلکہ ملک میں تیل و گیس کے مجموعی ذخائر اور پیداوار میں بھی اضافہ کرے گی۔ توانائی کے شعبے کے ماہرین کے مطابق مقامی سطح پر تیل اور گیس کی پیداوار بڑھنے سے ملکی معیشت کو فائدہ پہنچ سکتا ہے اور توانائی کی ضروریات پوری کرنے میں مدد مل سکتی ہے۔
‎او جی ڈی سی ایل کے مطابق اس دریافت سے درآمدی ایندھن پر انحصار کم کرنے میں بھی معاونت ملے گی۔ پاکستان ہر سال تیل اور گیس کی درآمدات پر بھاری زرمبادلہ خرچ کرتا ہے، اس لیے مقامی ذخائر کی دریافت ملکی درآمدی بل میں کمی لانے کے لیے اہم سمجھی جاتی ہے۔
‎ماہرین کا کہنا ہے کہ توانائی کے نئے ذخائر کی دریافت نہ صرف صنعتی سرگرمیوں کو تقویت دے سکتی ہے بلکہ مستقبل میں توانائی کے شعبے میں سرمایہ کاری کے مزید مواقع بھی پیدا کر سکتی ہے۔ اس کے ساتھ ساتھ مقامی پیداوار میں اضافہ توانائی کے تحفظ اور پائیدار معاشی ترقی کے لیے بھی مثبت پیش رفت تصور کیا جا رہا ہے۔
‎او جی ڈی سی ایل نے اس عزم کا اظہار کیا ہے کہ ملک کے مختلف حصوں میں تیل و گیس کی تلاش کا عمل جاری رکھا جائے گا تاکہ توانائی کے مقامی وسائل کو مزید بروئے کار لایا جا سکے اور قومی ضروریات کو پورا کرنے میں مدد ملے۔

سندھ حکومت نے بیرسٹر غلام شبیر شاہ کو صوبے کا نیا پراسیکیوٹر جنرل مقرر کر دیا ہے، جس کا باقاعدہ نوٹیفکیشن محکمہ قانون سندھ کی جانب سے جاری کر دیا گیا۔

سرکاری اعلامیے کے مطابق بیرسٹر غلام شبیر شاہ سندھ کے وزیر بلدیات ناصر حسین شاہ کے صاحبزادے ہیں۔ ان کی تعیناتی ایسے وقت میں عمل میں آئی ہے جب پراسیکیوٹر جنرل سندھ کا عہدہ گزشتہ کچھ عرصے سے خالی تھا۔یہ عہدہ اس وقت خالی ہوا تھا جب سابق پراسیکیوٹر جنرل فیض شاہ کو سندھ ہائی کورٹ کا جج مقرر کیا گیا۔ ان کی تعیناتی کے بعد ایڈیشنل پراسیکیوٹر جنرل منتظر مہدی قائم مقام پراسیکیوٹر جنرل سندھ کے طور پر فرائض سرانجام دے رہے تھے۔

بیرسٹر غلام شبیر شاہ کی بطور پراسیکیوٹر جنرل تقرری کے بعد صوبے کے اہم قانونی معاملات اور فوجداری مقدمات میں استغاثہ کی سربراہی اب ان کے سپرد ہوگی۔ ان کی تعیناتی کو سندھ کے قانونی و عدالتی حلقوں میں اہم پیش رفت قرار دیا جا رہا ہے۔