Category: کراچی

سندھ کے سینئر وزیر شرجیل میمن نے کہا ہے کہ پاکستان کسٹمز نے سندھ حکومت کی سرکاری گاڑی کو نان کسٹم پیڈ کا دعویٰ کرکے ضبط کرلیا۔

شرجیل میمن کا کہنا ہے کہ متعلقہ حکام کو گاڑی سے متعلق تمام سرکاری دستاویزات دکھائی گئیں لیکن اس کے باوجود سرکاری گاڑی ضبط کر لی گئی،ضبط کی گئی گاڑی محکمہ اطلاعات سندھ کی ملکیت ہے،گاڑی انڈس موٹر کمپنی کے آفیشل آؤٹ لیٹ سے خریدی گئی تھی،صوبائی حکومت کےادارے کےساتھ ایسا رویہ قبول نہیں کیا جاسکتا، پاکستان کسٹمز فوری طور پر گاڑی کو محکمے کے سپرد کرے اور معاملے پر تحریری معذرت جاری کرے۔

دوسری جانب سینئر وزیر شرجیل انعام میمن نے عید الفطر کے موقع پر زائد کرایوں کے خلاف مہم شروع کرنے کی ہدایات دی ہیں،پولیس، تمام اضلاع کی انتظامیہ، این ایچ اے، ٹریفک اور ٹرانسپورٹ سمیت تمام متعلقہ حکام کو کارروائیوں کی ہدایات دیتے ہوئے شرجیل میمن کا کہنا تھا کہ بعض ٹرانسپورٹرز کی جانب سے خودساختہ طور پر کرایوں میں اضافہ مسافروں پر اضافی مالی بوجھ پڑتا ہے،عوام کو زیادہ سے زیادہ سہولت فراہم کرنا اور بغیر اجازت کرایوں میں اضافہ روکنا متعلقہ اداروں کی بنیادی ذمہ داری ہے،تمام افسران کو ہدایت کی گئی ہے کہ اپنے اپنے دائرہ اختیار میں زائد کرایہ وصول کرنے والے ٹرانسپورٹرز کے خلاف فوری کارروائی کریں،روزانہ کی بنیاد پر کارروائیوں کی رپورٹ محکمہ کو ارسال کی جائے، زائد کرایہ وصول کرنے والوں کے خلاف بلاامتیاز کارروائی کی جائے رہی ہے، مسافروں کو سرکاری مقررہ کرایوں پر محفوظ اور سہل سفر کی سہولت فراہم کرنا حکومت کی اولین ترجیح ہے، تمام متعلقہ ادارے فیلڈ میں متحرک رہیں، عوامی شکایات کا فوری ازالہ یقینی بنائیں،

کراچی: پاکستان مسلم لیگ (ن) کے رہنما نہال ہاشمی نے گورنر سندھ کے عہدے کا باضابطہ حلف اٹھا لیا۔ سندھ ہائیکورٹ کے چیف جسٹس ظفر احمد راجپوت نے نہال ہاشمی سے گورنر کے عہدے کا حلف لیا۔

تقریب حلف برداری میں وزیراعلیٰ سندھ سید مرادعلی شاہ، مرتضیٰ وہاب اور مسلم لیگ (ن) سندھ کے صدر بشیر میمن سمیت مختلف سیاسی و سماجی شخصیات، سرکاری حکام اور کارکنان نے شرکت کی۔ تقریب کے دوران مہمانوں نے نئے گورنر کو مبارکباد دی اور ان کے لیے نیک خواہشات کا اظہار کیا۔اس موقع پر صوبائی قیادت نے امید ظاہر کی کہ نئے گورنر صوبے کی ترقی کے لیے مثبت اقدامات کریں گے۔

یاد رہے کہ صدر مملکت آصف علی زرداری نے گزشتہ روزنہال ہاشمی کی بطور گورنر سندھ تعیناتی کی منظوری دی تھی، جس کے بعد آج باقاعدہ طور پر ان کی حلف برداری کی تقریب منعقد کی گئی۔


حکومت سندھ نے توانائی کے ممکنہ چیلنجز کے پیش نظر کفایت شعاری اقدامات مزید سخت کرنے کا فیصلہ کرتے ہوئے سرکاری افسران کے فیول میں 50 فیصد کمی کا اعلان کر دیا ہے۔
سینیئر وزیر شرجیل انعام میمن کی زیر صدارت قائم کفایت شعاری کمیٹی کا اجلاس ہوا جس میں توانائی کے مؤثر استعمال، سرکاری اخراجات میں کمی اور انتظامی امور پر تفصیلی غور کیا گیا۔
‎اجلاس میں فیصلہ کیا گیا کہ سرکاری محکموں کے ساتھ بلدیاتی اداروں کی گاڑیوں کے ایندھن میں بھی 50 فیصد کمی کی جائے گی جبکہ سرکاری گاڑیوں کا تقریباً 60 فیصد حصہ فوری طور پر گراؤنڈ کر دیا جائے گا۔
‎کفایت شعاری کمیٹی نے سیکرٹری جنرل ایڈمنسٹریشن کو ہدایت دی ہے کہ وہ روزانہ کی بنیاد پر عملدرآمد سے متعلق رپورٹ پیش کریں۔ اس مقصد کے لیے گراؤنڈ کی جانے والی گاڑیوں کے نمبرز اور دیگر تفصیلات جمع کرنے کے لیے ایک خصوصی پروفارما بھی تیار کیا جائے گا۔
‎اجلاس میں یہ بھی فیصلہ کیا گیا کہ اگر کوئی محکمہ جاری ہدایات کی خلاف ورزی کرے گا تو متعلقہ گاڑی کو سرکاری تحویل میں لے لیا جائے گا۔
‎شرجیل انعام میمن نے کہا کہ موجودہ حالات میں حکومت سندھ وسائل کے محتاط استعمال کو یقینی بنا رہی ہے اور ان اقدامات کا مقصد عوامی خدمات کو متاثر کیے بغیر توانائی کے استعمال میں کمی لانا ہے۔


پاکستان اسٹاک ایکسچینج میں آج کاروبار کا آغاز منفی رجحان کے ساتھ ہوا جہاں ابتدائی ٹریڈنگ کے دوران 100 انڈیکس میں 1178 پوائنٹس کی کمی ریکارڈ کی گئی۔
تاہم کچھ ہی دیر بعد مارکیٹ میں تیزی دیکھنے میں آئی اور سرمایہ کاروں کی خریداری کے باعث صورتحال بدل گئی۔ بعد ازاں 100 انڈیکس میں 1036 پوائنٹس کا اضافہ ہوا اور انڈیکس 156894 کی سطح پر ٹریڈ کرتا رہا۔
‎ماہرین کے مطابق مارکیٹ میں بہتری کی ایک بڑی وجہ عالمی مالیاتی ادارے کی جانب سے پاکستان کے بارے میں مثبت اشارے ہیں۔
‎آئی ایم ایف نے پاکستان کے ساتھ تیسرے جائزہ مذاکرات کے بعد اعلامیہ جاری کیا جس میں معاشی اصلاحات اور ماحولیات کے شعبے میں پاکستان کی کارکردگی کو سراہا گیا ہے۔
‎تجزیہ کاروں کا کہنا ہے کہ عالمی مالیاتی ادارے کے مثبت مؤقف سے سرمایہ کاروں کا اعتماد بہتر ہوا ہے جس کے اثرات اسٹاک مارکیٹ میں بھی نظر آ رہے ہیں۔