Category: کراچی

کراچی: جنوبی کراچی کی جوڈیشل مجسٹریٹ کی عدالت میں مصطفی عامر کے قتل کیس کی سماعت کے دوران ملزم ارمغان نے اعترافِ جرم کرنے کے بعد پھر اس سے انکار کر دیا، جس پر عدالت نے ملزم کے اعترافی بیان کی درخواست کو خارج کر دیا۔

عدالت کے جج نے اپنے ریمارکس میں کہا کہ ملزم کی ذہنی حالت ایسی نہیں ہے کہ اس کا اعترافی بیان ریکارڈ کیا جا سکے۔ انہوں نے مزید کہا کہ ملزم نے پہلے جرم کا اعتراف کیا تھا لیکن بعد میں اس سے انکار کر دیا۔عدالت نے اپنی بات کو واضح کرتے ہوئے کہا کہ ملزم چاہے جرم کا اعتراف کرے یا نہ کرے، اسے بہرحال جیل بھیج دیا جائے گا۔

سماعت کے دوران ملزم ارمغان نے عدالت میں دیے گئے اپنے بیان میں کہا کہ وہ کوئی اعترافِ جرم نہیں کرنا چاہتا۔ اس بیان کے بعد عدالت نے مزید کارروائی کرتے ہوئے ملزم کے اعترافی بیان کی درخواست کو مسترد کر دیا۔اس کیس میں مصطفی عامر کے قتل کی تحقیقات جاری ہیں اور ملزم کی ذہنی حالت کی مزید جانچ پڑتال کی جائے گی۔ عدالت نے مزید کہا کہ ملزم کے اعترافِ جرم سے متعلق کوئی فیصلہ نہیں کیا جا سکتا جب تک اس کی ذہنی حالت کا مکمل جائزہ نہ لیا جائے۔

کراچی۔ پیپلز پارٹی سندھ نے سندھو دریائے پر 6 کینالوں کے منصوبے کے خلاف احتجاجی تحریک شروع کرنے اور 25 مارچ منگل کو سندھ بھر کے تمام ضلعی ہیڈ کوارٹرز میں احتجاج کا اعلان کردیا ہے۔

یہ اعلان پیپلز پارٹی سندھ کے صدر نثار احمد کھوڑو نے وقار مھدی اور عاجز دھامراہ کے ہمراہ جمعے کے روز سندھ اسمبلی میں پریس کانفرنس کرتے ہوئے کیا۔نثار کھوڑو نے کہا کے پیپلز پارٹی کیجانب سے متنازعہ 6 کینال منصوبے کے خلاف 25 مارچ منگل کو سندھ کے تمام ضلعی ہیڈکوارٹرز میں ریلیاں نکالی جائینگی اور احتجاجی مظاھرے کئے جائینگے۔انہوں نے کہا کے متنازعہ کینال منصوبے کے خلاف احتجاجی جلسے بھی کرینگے اور گلی گلی احتجاج بھی کرینگے۔انہوں نے کہا کے 6 کینالوں کے منصوبے کے خلاف احتجاج کرنے والی جماعتوں اور عوام کو سلام پیش کرتا ہوں اور ان کی جدوجھد کی حمایت کرتا ہوں۔انہوں نے کہا کے سندھ کی عوام کو اپیل کرتے ہیں کے آئیں مل کر ان کینالوں کے خلاف مشترکہ جدوجھد کریں تاہم سیاسی جماعتوں سے شکوہ ہے کے وہ پیپلز پارٹی پر تو تنقید کر رہے ہیں مگر کینالوں کے منصوبے کے خلاف ریلیاں نہیں نکالی ہیں۔

نثار کھوڑو نے کہا کے 6 کینال منصوبے کے خلاف سندھ کا ایک آواز اثر کرے گا اس لئے پیپلز پارٹی احتجاجی تحریک کے سلسلے میں تمام سیاسی جماعتواں اور قومپرستوں سے بھی رابطے کرکے ملاقات کرے گی تاکےمشترکہ جدوجھد کے ذریعے سندھ کے خلاف منصوبے کو ختم کراسکیں۔ انہوں نے کہا کے کسی بھی آئینی فورم کی منظوری کے بنا چولستان کینال کی تعمیر کا کام شروع کراکے وفاقی حکومت نے آمریت کی یاد تازہ کردی ہے۔ ماضی میں آمر پرویز مشرف نے آئینی فورمز کی منظوری کے بغیر تھل کینال تعمیر کروایا اور اب ن لیگ کی وفاقی حکومت چولستان کینال سمیت 6 کینال منصوبے پر آمرانہ کردار ادا کر رہی ہے۔انہوں نے کہا کے پنجاب حکومت نے چولستان کینال کے لئے بجٹ مختص کرکے غیر آئینی کام کیا ہے۔انہوں نے کہا کے پیپلز پارٹی 6 کینالوں کے منصوبے کے خلاف تمام آئینی فورمز، ایوانوں اور سڑکوں پر جدوجھد کرے گی مگر دریائے سندھ پر کسی کو بھی کینال نکالنے نہیں دے گی۔

نثار کھوڑو نے کہا کے چولستان کینال منصوبہ کالاباغ ڈیم سے بھی زیادہ خطرناک ہے جس سے سندھ بنجر بن جائے گا۔ جس طرح ماضی میں ن لیگ کی حکومت کو کالاباغ ڈیم سے دستبرداری کا اعلان کرنا پڑا اسی طرح موجودہ ن لیگ کی حکومت کو ان 6 کینال منصوبوں سے دستبرداری کا اعلان کرنا پڑے گا۔ نثار کھوڑو نے ایک سوال کے جواب میں کہا کے کینالوں کے معاملے کو صدر آصف زرداری نے وفاقی حکومت کا یکطرفہ فیصلہ قرار دے کر یہ ثابت کردیا ہے کے صدر زرداری کینالوں کے معاملے میں ملوث نہیں ہے۔انہوں نے کہا کے پیپلز پارٹی سے وفاقی حکومت سے علیحدگی کے مطالبے تو ہو رہے ہیں تاہم پیپلز پارٹی وفاقی حکومت کا حصہ نہیں ہے تاہم کینالوں کے معاملے پر پیپلز پارٹی کے ملوث ہونے کے الزامات لگا کر قومی حکومت بنانے کی سازش ہو رہی ہے تاکے ملک میں جمھوری حکومت ختم ہو اور قومی حکومت بن جائے جس کا فواد چودھری اشارہ بھی دے چکے ہیں۔ انہوں نے کہا کہ ماضی میں آمر پرویز مشرف نے ایگزیکٹو آرڈر کے تحت گریٹر تھل کینال بنوایا جس کی پیپلز پارٹی سمیت تمام جماعتوں نے مخالفت کی اور اب آمریت کا دور نہیں ہے اس لئے پیپلز پارٹی ان متنازعہ کینال منصوبے کے خلاف تمام جماعتوں سے مل کر مشترکہ جدوجھد کے لئے تیار ہے جس کے لئے سیاسی جماعتوں سے رابطے اور ملاقاتیں کی جائینگی۔انہوں نے کہا کے پیپلز پارٹی نے سندھ اسمبلی میں 6 کینالوں کے منصوبے کے خلاف سندھ اسمبلی میں قرارداد منظور کرادی ہے اور ہر فورم پر ان کینالوں کے خلاف سندھ کا کیس لڑے گی اور اب سڑکوں پر بھی سندھ کا کیس لڑینگے۔

کراچی: کراچی کی عدالت نے صحافی فرحان ملک کو ایف آئی اے (فیڈرل انویسٹی گیشن ایجنسی) کے حوالے کر دیا ہے اور ان کا 4 روزہ جسمانی ریمانڈ منظور کر لیا ہے۔ یہ پیشی کراچی میں واقع جوڈیشل مجسٹریٹ شرقی کی عدالت میں ہوئی، جہاں ایف آئی اے نے صحافی کو پیش کیا۔

ایف آئی اے کی درخواست پر عدالت نے فرحان ملک کا 4 روزہ جسمانی ریمانڈ منظور کرتے ہوئے انہیں ایف آئی اے کے حوالے کرنے کا حکم دیا۔فرحان ملک کے وکیل نے عدالت میں مؤقف اختیار کیا کہ ان کے موکل کے خلاف پہلے سے کئی انکوائریز چل رہی تھیں اور سندھ ہائی کورٹ نے ان انکوائریوں پر کارروائی نہ کرنے کے احکامات جاری کر رکھے تھے۔ وکیل نے مزید کہا کہ ایف آئی اے نے سندھ ہائی کورٹ کے احکامات کی خلاف ورزی کرتے ہوئے ان کے موکل کے خلاف کارروائی کی ہے۔

یاد رہے کہ گزشتہ روز، نجی چینل کے سابق ڈائریکٹر نیوز،رفتار کےمالک صحافی فرحان ملک کو ایف آئی اے سائبر کرائم کراچی کی ٹیم نے گرفتار کر لیا تھا۔ ان کے خلاف گزشتہ تین ماہ سے انکوائری جاری تھی اور انہیں جمعرات کو ایف آئی اے سائبر کرائم کراچی میں بیان دینے کے لیے طلب کیا گیا تھا۔ بعد ازاں، ڈائریکٹر سائبر کرائم کے احکامات پر سب انسپکٹر ذیشان نے مقدمہ نمبر 25/25 درج کیا اور فرحان ملک کو باضابطہ طور پر گرفتار کر لیا۔

اس گرفتاری کے بعد، میڈیا میں اس معاملے پر مختلف ردعمل سامنے آ رہے ہیں، اور صحافی برادری نے اس کارروائی کو غیر ضروری اور غیر قانونی قرار دیا ہے۔ صحافی برادری نے واقعہ کی مذمت کی ہے.

کراچی: سندھ ہائی کورٹ نے تین لاپتہ شہریوں کی گمشدگی کے حوالے سے درخواست کی سماعت کے دوران درخواست گزار کو تفتیشی افسر سے تعاون کرنے کی ہدایت کی ہے تاکہ اس معاملے میں سنجیدہ تفتیش کی جا سکے۔

سماعت کے دوران تفتیشی افسر نے عدالت کو بتایا کہ لاپتہ شہریوں کے فراہم کردہ موبائل فونز کی آخری لوکیشن لاڑکانہ سے ملی ہے۔ تاہم، عدالت نے تفتیشی افسر سے سوال کیا کہ کیا ان افراد کا کسی مخصوص تنظیم سے تعلق ہے؟ اس کے ساتھ ساتھ عدالت نے یہ بھی استفسار کیا کہ ابھی تک ان افراد کی گمشدگی کی ایف آئی آر کیوں درج نہیں کی گئی؟ اور ان تینوں افراد کا آپس میں کیا تعلق ہے؟درخواست گزار کے وکیل نے عدالت کو بتایا کہ ان افراد کا کسی تنظیم سے کوئی تعلق نہیں ہے۔ انہوں نے مزید کہا کہ تینوں افراد میں سے ایک شاہجہاں کا بیٹا ہے اور باقی دو اس کے دوست ہیں۔

عدالت نے سوال کیا کہ صرف شاہجہاں نے ہی درخواست کیوں دائر کی؟ اس پر درخواست گزار کے وکیل نے بتایا کہ شاہجہاں کے رشتہ دار بھی عدالت میں موجود ہیں اور یہ افراد بنوں سے کسی ملاقات کے لیے آئے تھے۔تفتیشی افسر نے عدالت کو بتایا کہ یہ افراد کراچی نہیں آئے اور ان کی لوکیشن لاڑکانہ کی ہے۔ تاہم، عدالت نے اس بات کا نوٹس لیا کہ تفتیشی افسر نے عدالت میں غلط بیانی کی ہے، کیونکہ ریکارڈ بتا رہا تھا کہ یہ افراد لاڑکانہ ہی گئے تھے۔سماعت کے دوران عدالت نے مزید کہا کہ ممکن ہے یہ کیس ہنی ٹریپ سے متعلق ہو، اور درخواست گزار سے کہا کہ وہ تفتیشی افسر کے ساتھ تعاون کریں تاکہ اس معاملے کی سنجیدگی سے تفتیش کی جا سکے۔ عدالت نے کیس کی مزید سماعت ایک ماہ کے لیے ملتوی کر دی۔

سندھ ہائیکورٹ میں اداکار ساجد حسن کے بیٹے ساحر حسن کی منشیات برآمدگی کیس میں درخواست ضمانت کی فوری سماعت کی درخواست دائر کی گئی۔ وکیل کی درخواست پر عدالت نے فوری سماعت کی استدعا منظور کرتے ہوئے کیس کی سماعت 26 مارچ تک ملتوی کر دی۔

منشیات برآمدگی کے کیس میں گرفتار اداکار ساجد حسن کے بیٹے ساحر حسن نے اپنے وکیل کے ذریعے سندھ ہائی کورٹ میں درخواست ضمانت کی فوری سماعت کی درخواست دائر کی تھی۔ وکیل نے درخواست میں مؤقف اختیار کیا کہ ملزم ساحر حسن عدالتی ریمانڈ پر جیل میں ہے اور اس پر منشیات برآمد ہونے کا الزام عائد کیا گیا ہے۔وکیل درخواست گزار کا کہنا تھا کہ ملزم ساحر حسن کو 22 فروری کو کراچی کے علاقے ڈی ایچ اے فیز 6 سے گرفتار کیا گیا تھا۔ پولیس کے مطابق ملزم کے قبضے سے پانچ پیکٹ ویڈ (گانجا) برآمد ہوئے تھے۔عدالت نے درخواست کی فوری سماعت کی درخواست منظور کرتے ہوئے کیس کی سماعت 26 مارچ تک ملتوی کر دی۔ عدالت میں اس مقدمے کی آئندہ سماعت میں مزید قانونی کارروائی متوقع ہے۔

واضح رہے کہ ملزم ساحر حسن نے ایک ویڈیو بیان میں انکشافات کیے تھے ،ساحر نے بتایا کہ وہ اسلام آباد میں اپنے دوست یحییٰ کے ذریعے ویڈ منگواتا تھا۔ یحییٰ کا کزن ساحر کا دوست تھا اور اسی کے ذریعے اس کا رابطہ ہوا تھا۔ساحر حسن نے مزید کہا کہ انہیں گھر پر نجی کوریئر کمپنیوں کے ذریعے ویڈ فراہم کی جاتی تھی۔ انہوں نے 2017 میں ارمغان سے ملاقات کا بھی ذکر کیا، جو 2016 سے منشیات فروخت کر رہا تھا۔ ساحر کے مطابق، ارمغان کی جیل میں بلال ٹینشن سے ملاقات ہوئی تھی اور اسی ملاقات کے بعد ان کا تعلق ارمغان سے بڑھا۔