Category: کراچی

کراچی: عوامی نیشنل پارٹی (ANP) کے مرکزی صدر سینیٹر ایمل ولی خان نے کراچی بار میں خطاب کرتے ہوئے کہا ہے کہ عدلیہ کے نظام میں موجود خرابیوں کو دور کرنے کے لیے وکلاء کو مزید کام کرنا ہوگا۔ انہوں نے 19 ویں ترمیم کے بارے میں کہا کہ یہ افتخار چوہدری نے مسلم لیگ کو استعمال کرتے ہوئے بندوق کی نوک پر کروائی تھی۔سینیٹر ایمل ولی نے مثال دیتے ہوئے کہا کہ "یہاں دادا کے کیس کا فیصلہ پوتے کے سامنے آتا ہے۔” انہوں نے ذوالفقار علی بھٹو کی پھانسی کے ذمہ داروں سے معافی مانگنے کا مطالبہ بھی کیا، کہا کہ "جس جس کے ساتھ ہم نے ظلم کیا ہے، ان سب لوگوں سے معافی مانگنی چاہیے۔”ایمل ولی نے پارلیمان کی بالادستی کی اہمیت پر زور دیتے ہوئے کہا کہ اداروں کو اپنے دائرہ کار میں رہ کر کام کرنا چاہیے۔ انہوں نے کہا کہ "پاکستان میں بدقسمتی سے ججز بولتے ہیں، ان کے فیصلے نہیں بولتے۔اس موقع پر کراچی بار کے صدر عامر نواز وڑائچ نے آئینی ترمیم کے بارے میں تشویش کا اظہار کرتے ہوئے کہا کہ "جو آئینی ترمیم ہونے جارہی ہے، اس کے تین چار ڈرافٹ گھوم رہے ہیں۔ ایسا لگ رہا ہے جیسے چوری چھپے سب کچھ ہورہا ہے۔” ایمل ولی خان کی اس تقریر نے عدلیہ کی اصلاحات اور پارلیمانی بالادستی کے حوالے سے نئے مباحثے کو جنم دیا ہے۔

کے الیکٹرک کو دھابیجی سندھ میں پاکستان کے پہلے 220 میگاواٹ ہائبرڈ ونڈ/سولر منصوبے کے لئے 7 بولیاں موصول ہوئی ہیں۔

باغی ٹی وی کی رپورٹ کے مطابق کمپنی نے مالیاتی بڈنگ کے لئے کراچی میں ایک تقریب کا انعقاد کیا جس میں کینیڈا سے تعلق رکھنے والی کمپنی جے سی ایم پاورنے 8.91 روپے فی یونٹ کی سب سے کم ٹیرف بولی لگائی جو ملک میں قابل تجدید توانائی کے شعبے میں ایک نئی مثال ہے۔کے الیکٹرک قابل تجدید توانائی کے شعبے میں مسابقتی بولی کے عمل میں پیش پیش ہے، جس کی منظوری نیشنل الیکٹرک پاور ریگولیٹری اتھارٹی (نیپرا) نے 2024ء کی پہلی ششماہی میں دی تھی۔ کمپنی کا مقصد 2030ء تک اپنے جنریشن مکس میں قابل تجدید توانائی کے حصے کو 30 فیصد تک بڑھانا ہے۔ اگلے مرحلے میں کے الیکٹرک بولی کی منظوری کے لئے تشخیصی رپورٹ نیپرا میں جمع کرائے گا۔

پاکستان اور چین ترقی کےمنصوبوں پر کام جاری رکھیں گے، وزیراعلیٰ سندھ

کے الیکٹرک کے سی ای او مونس علوی نے اس کامیابی پر اپنے خیالات کا اظہار کرتے ہوئے کہا کہ اس طرح کی بولی ملنا ہمارے لیے باعث اطمینان ہے اور اس عمل کو شفاف طریقے سے مکمل کیا گیا۔ بولی کے عمل میں حصہ لینے والوں کو مبارکباد پیش کرتے ہیں، ہم سرمایہ کاروں کے مشکور ہیں کہ انہوں نے کے الیکٹرک پر بطور برانڈ اور پاکستان کی اقتصادی صلاحیت پر اپنا اعتماد برقرار رکھا ہے۔انہوں نے مزید کہا کہ ہم اس طرح کے پیچیدہ اور جدید منصوبے کی مسابقتی بولی کے عمل کے لیے تعاون پر نیپرا کے شکر گزار ہیں۔ یہ کے الیکٹرک کے اپنے جنریشن منصوبے میں قابل تجدید توانائی کے حصے کو بڑھانے، پیداواری لاگت کو کم کرنے اور مہنگے درآمدی ایندھن پر انحصار کو بتدریج کم کرنے کے وژن کے عین مطابق ہے۔ اس طرح کا ٹیرف ملنے کے بعد ہمیں توقع ہے کہ حکومت صارفین کو بھی ریلیف دے سکے گی۔

کے الیکٹرک کے چیف سٹریٹجی آفیسر شہاب قادر نے کہا کہ یہ منصوبہ پاکستان کا پہلا منصوبہ ہے جس میں بہتر آپریشنل اور مالیاتی کارکردگی کے لیے سولر اور ونڈ انرجی کو یکجا کیا گیا ہے۔ ان منفرد خصوصیات کی وجہ سے یہ منصوبہ تکنیکی اعتبار سے بہت زیادہ مہارت کا متقاضی بھی ہے۔ بلوچستان میں وندر، بیلا اور سندھ میں دھابیجی میں واقع یہ قابل تجدید توانائی کے منصوبے، جن کی مجموعی صلاحیت 370 میگاواٹ ہے، کو 2960 میگاواٹ کی پیشکشیں موصول ہوئی ہیں۔ اس طرح کی بولیوں کا ملنا کمپنی کی طویل مدتی حکمت عملی کا ثبوت ہے، تاکہ پیداوار کی لاگت کو کم ترین سطح پر لایا جا سکے۔

وزیراعلیٰ سندھ مراد علی شاہ نے کہا ہے کہ پاکستان اور چین پائیدار ترقی، قابل تجدید توانائی، ڈیجیٹل کنیکٹیوٹی اور صنعتی منصوبوں پر کام جاری رکھیں گے۔

باغی ٹی وی کی رپورٹ کےمطابق ان خیالات کا اظہار انہوں نے عوامی جمہوریہ چین کے پچہترویں قومی دن پرچینی قونصل جنرل یانگ یونڈونگ کی جانب سے منعقد کی گئی تقریب سے خطاب کرتے ہوئے کیا۔ انہوں نے اس پرمسرت موقع پر چینی حکومت اور عوام کو دلی مبارکباد بھی دی۔ مراد علی شاہ نے کہا کہ دور اندیش قیادت کے تحت چین کی پچہتر سالہ ترقی کا سفر دنیا میں کئی ممالک کےلیے مثال ہے۔ چین نے مختصر وقت میں جو تیز ترین معاشی ترقی، ٹیکنالوجی کے میدان میں پیش رفت اور سماجی ترقی کی ہے وہ کسی سنگ میل سے کم نہیں۔وزیراعلیٰ سندھ نے کہا کہ پاکستان اور چین کے درمیان شہید ذوالفقار علی بھٹو کے دور سے تاریخی اور مضبوط سفارتی تعلقات قائم ہیں۔ پاک چین شراکت داری کا سنگ بنیاد رکھنے میں شہید ذوالفقار علی بھٹو اور چیئرمین ماؤ زی ڈونگ کے تعلقات اہم ہیں۔ شہید بےنظیر بھٹو نے بھی چین کی کمیونسٹ پارٹی کی قیادت کے ساتھ قریبی تعلقات استوار کیے اور اب نوجوان قیادت بلاول بھٹو زرداری بھی چین کو برادر ملک اور دوست سمجھتے ہیں۔

لندن میں امریکی سفارتخانے کے سامنے ڈاکٹر عافیہ کی رہائی کیلئے مظاہرہ

وزیراعلیٰ سندھ نے کہا کہ توانائی کے شعبے میں انفرااسٹرکچر کی تعمیر کےلیے چین کے ساتھ ہمارے تعلقات مزید مضبوط ہو رہے ہیں۔ سی پیک نے پاک چین تعلقات کی مضبوطی میں اہم کردار ادا کیا ہے۔ سندھ اس شراکت داری کی پہلی صف میں موجود ہے۔ مراد علی شاہ نے مزید کہا کہ انفرا اسٹرکچر، صنعت ، ٹیکنالوجی اور تعلیم کے شعبے میں پاک چین تعلقات مشترکہ ویژن کی عکاسی کرتے ہیں۔ چین کی مہارت اور سندھ کے وسائل کو ملا کر عوام کے روشن مستقبل کےلیے نئے مواقع پیدا کیے جاسکتے ہیں۔ وزیراعلیٰ سندھ نے وزیراعظم پاکستان شہباز شریف کے حالیہ دورہ چین کا حوالہ دیتے ہوئے کہا کہ دورے کے دوران کئی معاہدوں پر دستخط سے دونوں ممالک کے تعلقات کو نئی توانائی ملی ہے۔ ہم اکتوبر میں اسلام آباد شنگھائی تعاون تنظیم کانفرنس کے منتظر ہیں جس کی میزبانی کا اعزاز پاکستان کو ملا ہے۔

مراد علی شاہ نے کہا کہ پاکستان شنگھائی تعاون تنظیم کو بہت اہمیت دیتا ہے اور اس اہم موقع پر چینی وزیراعظم لی جیانگ کا استقبال کرنے کےلیے بےچین ہے۔ کانفرنس میں چینی وزیراعظم کی شرکت سے دونوں ممالک کے درمیان تعلقات کو آگے بڑھانے کےلیے اعلیٰ سطح کے رابطوں کا موقع ملے گا۔ وزیراعلیٰ سندھ نے بتایا کہ صدر آصٖف علی زرداری سمجھتے ہیں کہ نومبر میں ان کا دورہ نہ صرف سی پیک کے تحت مشترکہ کوششوں کو آگے بڑھائے گا بلکہ نئے شعبوں میں بھی تعلقات بڑھانے کا موقع ملے گا۔ مراد علی شاہ کا کہنا تھا کہ اعلیٰ سطح کے دورے سی پیک اور پاک بھارت دیرینہ شراکت داری سے علاقائی استحکام اور مشترکہ خوشحالی کے غیرمتزلزل عزم کے عکاس ہیں۔

کراچی: عوامی نیشنل پارٹی (اے این پی) کے سربراہ سینیٹر ایمل ولی خان نے کراچی پریس کلب میں میٹ دی پریس کے دوران ایک اہم بیان میں کہا کہ پاکستان تحریک انصاف (پی ٹی آئی) حقیقت نہیں بلکہ ایک پروجیکٹ ہے جس کے پیچھے مغرب کا ایجنڈا ہے۔ ایمل ولی خان نے اس بات پر زور دیا کہ پی ٹی آئی کی اصل حقیقت کو سامنے لایا جائے، اور انہوں نے دعویٰ کیا کہ اس حوالے سے امریکی کانگریس اور اسرائیلی اخبارات میں شائع ہونے والی معلومات اس بات کی تصدیق کرتی ہیں۔اے این پی کے سربراہ نے مزید کہا کہ تین صوبوں میں انتخابات کو نہیں مانا جا رہا، لیکن خیبر پختونخوا کے انتخابات کو سب شفاف مانتے ہیں۔ انہوں نے اس بات پر بھی روشنی ڈالی کہ موجودہ پی ٹی آئی کے رہنما بانی چیئرمین کے لوگ نہیں بلکہ صرف ادارے کی حیثیت سے کام کر رہے ہیں۔ ایمل ولی خان کا کہنا تھا کہ ہمیں پی ٹی آئی سے کوئی مسئلہ نہیں، بلکہ ان لوگوں سے ہے جنہوں نے پی ٹی آئی کو بنایا۔

ایمل ولی خان نے طالبان کے ساتھ مذاکرات کی یاد دہانی کراتے ہوئے کہا کہ طالبان اور پی ٹی آئی دونوں ایک ہی ہیں، اور پی ٹی آئی طالبان کا سیاسی ونگ ہے۔ انہوں نے کہا کہ اے این پی نے ریاست کے لیے طالبان سے مذاکرات کیے، اور انہوں نے خیبر پختونخوا میں جنگ کو خود ویلکم کیا۔ انہوں نے مزید کہا کہ حکومتیں دہشت گردوں کی ملی بھگت سے قائم کی گئی ہیں، اور بانی پی ٹی آئی نے 40 ہزار دہشت گردوں کو پاکستان منتقل کروایا۔ ایمل ولی خان نے ریاست پاکستان سے مطالبہ کیا کہ وہ اپنی غلطیوں کا اعتراف کرے اور ان لوگوں سے معافی مانگے جن کے ساتھ زیادتی ہوئی ہے۔ اے این پی سربراہ نے خیبر پختونخوا کی سیکیورٹی صورتحال کا ذکر کرتے ہوئے کہا کہ صوبے کے نصف سے زیادہ حصے میں پولیس کی رٹ نہیں ہے، اور وہاں ایک یونٹ بجلی بھی آئی پی پیز سے نہیں بنتی ہے۔ انہوں نے کہا کہ پاکستان میں بلیک منی کو اجازت دے دی گئی ہے اور یہ کہ ملک کے پاس معاشی طور پر اتنی رقم نہیں ہے کہ وہ اپنے قرضوں کی ادائیگی کر سکے۔

ایمل ولی خان نے کراچی کی اہمیت پر زور دیتے ہوئے کہا کہ یہ شہر پاکستان کا دل ہے اور ہر قوم کا شہر ہے، جس میں پختونوں کا بھی حصہ ہے۔ انہوں نے کہا کہ کسی بھی ملک کی معیشت قرضوں سے نہیں چلائی جا سکتی، اور ہمیں تمام شاہ خرچیاں ختم کرنی ہوں گی۔ سینیٹر ایمل ولی خان نے سپریم کورٹ کے فیصلوں پر تنقید کرتے ہوئے کہا کہ عدالتیں صرف ان کیسز کو اٹھاتی ہیں جو میڈیا میں زیر بحث آتے ہیں۔ انہوں نے ایک ایسی آئینی عدالت کے قیام کی ضرورت پر زور دیا جس میں سب کی نمائندگی ہو، بشمول آزاد کشمیر اور گلگت بلتستان کی۔یہ بیان اے این پی کی موجودہ سیاسی صورتحال اور تحریک انصاف کے کردار پر تنقید کی عکاسی کرتا ہے، جس سے سیاسی میدان میں مزید ہلچل متوقع ہے۔