Category: کراچی

کراچی: ملک کے دیگر شہروں کی طرح کراچی میں بھی مرغی کا گوشت من مانی قیمت پر فروخت ہونے لگا جب کہ انتظامیہ خاموش تماشائی بنی ہوئی ہے۔

تفصیلات کے مطابق مویشیوں میں پھیلنے والی بیماری کی وجہ سے گوشت سے اجتناب کرنے والے صارفین کو اب مرغی فروشوں کی من مانی قیمتوں کا سامنا ہے، منافع خوروں کو کھلی چھٹی مل گئی ہے اور کراچی میں مرغی کا گوشت سرکاری قیمت سے دگنے داموں پر فروخت ہورہا ہے۔

کمشنر کراچی نے مرغی کی سرکاری قیمت 214 روپے کلو مقرر کی ہے، یہ قیمت دو سال سے اسی سطح پر برقرار ہے۔ اس دوران مرغی کی قیمت نے 500 روپے کی بلند ترین سطح بھی عبور کی لیکن سرکاری قیمت نہ تو تبدیل ہوئی اور نہ ہی اس قیمت کا کسی جگہ اطلاق ہوسکا۔
مویشیوں میں پھیلنے والی جلد کی بیماری نے مرغی فروشوں کو منافع خوری کا موقع فراہم کردیا ہے تسلسل سے بڑھنے والی مرغی کی قیمتوں کو ایک بار پھر پر لگ گئے ہیں۔ شہر بھر میں مرغی کا گوشت سرکاری نرخ سے دگنے داموں پر 460 سے 480 روپے کلو تک فروخت کیا جارہا ہے۔

مویشیوں میں پھیلنے والی جلدی بیماری کی وجہ سے شہریوں کی جانب سے گوشت کے استعمال میں احتیاط برتی جارہی ہے جس کی وجہ سے قصابوں کی دکانوں پر سناٹا چھایا ہوا ہے تاہم اس صورتحال سے مرغی فروش بھرپور فائدہ اٹھارہے ہیں۔

گوشت فروش اس صورتحال سے نالاں ہیں جبکہ مرغی فروش حسب روایت پیچھے سے ریٹ مہنگا ہونے کا راگ الاپ رہے ہیں۔ شہر کے تمام بازاروں میں مرغی کی دکانوں پر کسی قسم کی ریٹ لسٹ تک آویزاں نہیں ہے اور مرغی فروش من مانی قیمت پر مرغی کا گوشت فروخت کررہے ہیں۔

شہریوں نے مرغی کے گوشت کی سرکاری قیمت سے دگنے داموں فروخت پر کمشنر کراچی اور ڈپٹی کمشنرز کی کارکردگی کو مایوس کن قرار دیا۔

شہریوں نے کہا کہ ٹھنڈے کمروں میں بیٹھ کر نرخ مقرر کرنے سے عوام کو مہنگائی سے ریلیف نہیں مل سکتا، شہر میں مرغی ہی کیا دودھ سبزیاں، اجناس اور گوشت من مانی قیمتوں پر فروخت کیے جارہے ہیں اور انتظامیہ ہاتھ پر ہاتھ دھرے بیٹھی ہے ۔

کراچی : شہر قائد میں 2 ماہ میں 151 شہریوں کا ٹریفک حادثات میں جاں بحق ہونے کا انکشاف سامنے آیا ہے جبکہ اسی دوران 7سو 84 افراد زخمی بھی ہوئے۔

تفصیلات کے مطابق کراچی کی سڑکوں پر تیز رفتار ڈرائیور شہریوں میں موت تقسیم کرنے لگے ،میڈیا رپورٹ میں انکشاف کیا گیا ہے کہ جنوری سی 2 مارچ تک151شہری حادثات میں جاں بحق ہوئے جبکہ 2 ماہ 2 دن کے اندر 7سو 84 افراد زخمی ہوئے۔
صرف یونیورسٹی روڈ پر گزشتہ روز طالبہ سمیت 2 افراد جاں بحق ہوئے جبکہ کورنگی میں بس نے 2 سگے بھائیوں کو کچل کر ابدی نیند سلادیا۔یونیورسٹی طالبہ عائشہ کی موت کا مقدمہ عزیز بھٹی تھانے میں درج کرلیا گیا ہے ، جس میں کہا گیا کہ والد کے مطابق بیٹی کو کراچی یونیورسٹی چھوڑنے جارہا تھا کہ رکشے سے اچانک پرانے جوتوں کا بورا گرا میری بائیک سلپ ہوگئی اور پیچھے سے آنے والا ٹینکر میری بیٹی کے سرپر چڑھ گیا۔
عزیز بھٹی پولیس نے واٹر ٹینکر قبضے میں لے لیا ہے تاہم ڈرائیور فرار ہوگیا۔ گذشتہ روز ہی نیپا پل کے قریب یونیورسٹی کی بس نے نوجوان کو کچل دیا ، موٹر سائیکل سوار کو پہلے گاڑی مکینک نے ٹکر ماری پھر بس نے روند دیا۔عزیز بھٹی پولیس نے بس اور کار دونوں کو قبضے میں لے لیا ، یونیورسٹی بس کا ڈرائیور فرار ہوگیا لیکن مکینک کو حراست میں لے لیا گیا ہے جبکہ کورنگی میں دونوں بھائیوں کو کچلنے والا ڈرائیور بھی فرار ہے۔خیال رہے یونیورسٹی روڈ پر پہلے بھی ٹریفک حادثات میں کئی طالبات جاں بحق ہوچکی ہیں ، اس سے قبل بے قابو ہیوی گاڑی نے فٹ پاتھ پر چڑھ کر طالبات کو روند ڈالا تھا۔

کراچی : پشاور میں دھماکے سے قبل نامعلوم افراد کی طرف سے اندھا دھند فائرنگ کی گئی ۔

باغی نیوز کے مطابق پولیس ذرائع کا کہنا ہے کہ دھماکے سے قبل نامعلوم افراد کی جانب سے علاقے میں اندھا دھند فائرنگ کی گئی اور اس کے بعد مسجد کے اندر دھماکا ہوگیا، جس میں متعدد افراد زخمی ہوگئے ہیں۔ ریسکیو، پولیس اور بم ڈسپوزل اسکواڈ کی ٹیمیں جائے وقوعہ پر پہنچ گئیں اور پولیس کی بھاری نفری نے علاقے کو گھیرے میں لے لیا ہے۔

باغی پریس کے نمائندہ خصوصی نے بتایا کہ دھماکا ایک تنگ گلی میں واقع مسجد میں ہوا ہے، دھماکا نماز جمعہ کے دوران ہوا جس میں اب تک 5 افراد کی اموات کی تصدیق ہوئی ہے اور ہلاکتوں میں اضافے کا خدشہ ہے، شہر میں ریسکیو کی بہترین سروس ہے لیکن گلی تنگ ہونے کی وجہ سے ریسکیو رضاکاروں کو آپریشن میں شدید مشکلات کا سامنا کرنا پڑ رہا ہے، دھماکے والی گلی کے باہر 30 سے زائد ایمبولینسز کھڑی ہیں لیکن گلی میں ایک وقت میں صرف ایک ایمبولینس جاسکتی ہے، جو صرف ایک زخمی کو لے کر آتی ہے، اور ابھی تک 15 سے 20 زخمیوں کو اسپتال منتقل کیا جاسکا ہے، اور زخمیوں کی تعداد بہت زیادہ ہے ۔

کراچی : آئی سی سی کے چیف ایگزیکٹو جیف الارڈائس کا کہنا ہے کہ پاکستان اورآسٹریلیا کے درمیان تاریخی سیریز ہورہی ہے۔

راولپنڈی کرکٹ اسٹیڈیم میں انٹرنیشنل کرکٹ کاؤنسل(آئی سی سی)، آسٹریلین کرکٹ بورڈ اورپاکستان کرکٹ بورڈ(پی سی بی) کے حکام نے مشترکہ پریس کانفرنس کی۔

آئی سی سی کے چیف ایگزیکٹو جیف الارڈائس کا کہنا تھا کہ پاکستان اور آسٹریلیا کے درمیان تاریخی ٹیسٹ سیریز ہورہی ہے۔ آسٹریلیا کا دورہ پاکستان ورلڈ ٹیسٹ چیمپئن شپ کے لیے بھی اہم ہے۔
کرکٹ آسٹریلیا کے چیف ایگزیکٹو نک ہاکلی نے کہا کہ پاکستان میں آج تاریخی دن ہے۔آسٹریلیا کی ٹیم کے شاندار استقبال پرپی سی بی اورپاکستانی کرکٹ مداحوں کا شکریہ ادا کرتا ہوں۔

انہوں نے مزید کہا کہ پاکستان میں کرکٹ کی تیاریاں دیکھ کر اعتماد مزید بڑھ گیاہے۔ کرکٹ سیریز سے پاکستان اور آسٹریلیا کے درمیان دوستی کو بھی فروغ ملےگا۔

پی سی بی کے چیف ایگزیکٹو فیصل حسنین کا کہنا تھا کہ آج پاکستان کرکٹ کی تاریخ کا اہم دن ہے۔پاکستانی مداحوں نے آسٹریلیا کودیکھنے کے لئے 24 سال انتظارکیا۔ راولپنڈی ٹیسٹ سے دونوں ٹیموں کے درمیان کرکٹ روابط کا نیا آغاز ہوگا ۔

کراچی: نقیب اللہ قتل کیس آخری مراحل میں التوا کا شکار ہوگیا عدالت نے ڈی پی او سرگودھا کو حاضری یقینی بنانے کے لیے آئی جی پنجاب کو خط لکھ دیا۔

انسداد دہشتگردی کی خصوصی عدالت نے تفتیشی افسر ڈاکٹر رضوان احمد خان کو 5 مارچ صبح ساڑھے 8 بجے ہر صورت پیش ہونے کا حکم دیدیا، کراچی اینٹرل جیل میں انسداد دہشتگردی گردی کمپلیکس میں خصوصی عدالت نمبر 3 کے روبرو نقیب اللہ قتل کیس کی سماعت ہوئی، ڈھائی ماہ سے مقدمے کی کارروائی آگے نہ بڑھ سکی، تفیتشی افسر ڈاکٹر رضوان کی غیر حاضری پر عدالت برہم ہوگئی۔

عدالت نے اظہار برہمی کرتے ہوئے ریمارکس دیے کہ ہر سماعت پر کوئی خط بھیج کر سماعت ملتوی کرنے کی استدعا کی جاتی ہے، خصوصی عدالت نے انسپکٹر جنرل پولیس پنجاب کو خط لکھ دیا، عدالت نے آئی جی پنجاب کو ہدایت کی ہے کہ وہ ڈی پی او سرگودھا اور متعلقہ مقدمے کے تفتیشی افسر ڈاکٹر رضوان کو آئندہ سماعت پر حاضری یقینی بنانے کا پابند کیا جائے۔
ملزم کے وکلا کہتے ہیں ہمیشہ کہا جاتا ہے وکلا صفائی غیر حاضر ہوتے ہیں لیکن ڈھائی ماہ سے ڈاکٹر رضوان پیش نہیں ہورہے ہیں، وکلا صفائی کا کہنا ہے ڈھائی ماہ سے ڈاکٹر رضوان غیر حاضر ہیں۔

پتا چلتا ہے وی آئی موومنٹ ہے سماعت ملتوی کرنے کی استدعا کی گئی ہے، ڈھائی ماہ گزر گئے ،مقدمہ تفتیشی افسر کی غیر حاضری کی وجہ سے التوا کا شکار ہے، 2 ماہ میں مقدمے کا ٹرائل مکمل کرنے کی ہائیکورٹ کی واضح ہدایت ہے۔

عدالت نے ڈی پی او سرگودھا اور مقدمے کے تفتیشی افسر ڈاکٹر رضوان احمد خان کو ہر صورت 5 مارچ ہفتے کی صبح ساڑھے 8 بجے پیش ہونے کا حکم دیدیا، عدالت نے سماعت 5 مارچ تک ملتوی کردی، سماعت کے موقع پر ملزمان اور وکلا عدالت پیش ہوئے ۔