Category: کراچی

کراچی : حزب اختلاف کی جماعتوں کی جانب سے اعلان کردہ حکومت مخالف احتجاج کے حوالے سے شہبازشریف اور بلاول بھٹو کی جلد ملاقات کا امکان ہے۔
باخبر نیوز کے مطابق قومی اسمبلی میں اپوزیشن لیڈر شہبازشریف کی طرف سے چیئرمین پیپلزپارٹی بلاول بھٹو زرداری کو پی ڈی ایم کے ساتھ مارچ کی پیشکش کی جائے گی ، جس کے لیے شہازشریف اور بلاول بھٹو کے درمیان اگلے ہفتے اسلام آباد میں ملاقات ہونے کا امکان ظاہر کیا گیا ہے ، جس کے لیے مسلم لیگ (ن) اور پیپلزپارٹی کے درمیان قیادت کی سطح پر رابطہ ہوا ہے۔

میڈیا رپورٹ میں ذرائع کا حوالہ دیتے ہوئے بتایا گیا کہ شہازشریف اور بلاول بھٹو کے درمیان ملاقات قومی اسمبلی کے اجلاس کے دوران پارلیمنٹ میں ہوگی ، جس کا مقصد اپوزیشن کی طرف سے حکومت مخالف مؤثر احتجاج کرنا ہے ، دونوں رہنماؤں کی ملاقات میں پیپلزپارٹی اور پی ڈی ایم کے اسلام آباد مارچ کے حوالے سے بات چیت ہوگی، جب کہ شہباز شریف بلاول بھٹو کو پی ڈی ایم کی جانب سے ہونے والے مارچ میں شرکت کی دعوت دیں گے اور اگر بلاول بھٹو مارچ میں شرکت کے لئے رضا مند نہ ہوئے تو پھر پی ڈی ایم اپنا شیڈول پیپلزپارٹی کے ساتھ ایڈجسٹ کرے گی۔

دوسری طرف وفاقی وزیراطلاعات ونشریات فواد چودھری نے کہا ہے کہ اپوزیشن جماعتیں الگ الگ آئیں انہیں اسلام آباد میں خیمے لگا کر دیں گے، اپوزیشن جماعتوں کو الگ الگ خیمے اس لیے لگا کر دیں گے تاکہ آپس میں نہ لڑیں، پانچ سات خیموں میں اپوزیشن کے لوگ آجائیں گے ، نواز شریف اور مریم نواز کو سزا ہوچکی ہے، شہبازشریف اور حمزہ شہباز کیخلاف بھی مقدمات داخل ہو چکے ہیں، آئندہ ہفتے شہبازشریف کیخلاف بھی کیس دائر کرینگے، وہ اپنی سیٹ کی فکر کریں۔

کراچی : کراچی کے شہریوں کا انتظار ختم ہوا، آج(پیر)سے گرین لائن بس مکمل فعال کردی جائے گی۔ 21 کلومیٹر طویل ٹریک پر80 بسیں صبح 7سے رات 10بجے تک رواں دواں رہیں گی۔

کراچی میں گرین لائن پوری آب و تاب کے ساتھ چلنے کو تیار ہے، آج(پیر)سے 21 کلومیٹر ٹریک پر شہریوں کو سہولت فراہم کریں گی، 22 بس اسٹیشنز کو بھی تیار کر لیا گیاہے۔

سندھ اسنفراسٹرکچر کمپنی کے مطابق 10جنوری سے بس آپریشنز صبح سات سے رات دس بجے تک جاری رہیں گے۔

بہت صبر کے بعد سہولت ملی تو مسافروں نے بھی سکھ کا سانس لیا، مکمل طور پر آغاز کا دعوی ضرور ہے تاہم اب بھی گولیمار اور یوپی موڑ سمیت مختلف بس اسٹیشنز پر خودکار سیڑھیوں کی تنصیب باقی ہے تو کہیں تعمیر ومرمت کا کام بھی نا مکمل ہے ۔ ایسے میں شہریوں نے کرایہ کم کرنے کا بڑامطالبہ بھی کردیا۔ذرائع کے مطابق اسکیلیٹرز کی بیرون ملک سے درآمد میں تاخیر کے سبب مشینری کی تنصیب کا کام مکمل نہیں ہوا جسے جلد مکمل کرلیا جائے گا۔ پچیس دسمبرسے اب تک کل بیس بسیں آزمائشی بنیادوں پر چارگھنٹے کے لیے چلائی جارہی تھیں۔

کراچی: قومی کرکٹ ٹیم کے سابق کپتان اور مایہ ناز آل رائونڈر شعیب ملک نے کہا ہے کہ مری میں انسانی جانوں کے ضیاع پر دکھ ہے۔

اپنے بیان میں شعیب ملک نے کہا کہ اللّٰہ پاک سب کو اپنی حفاظت میں رکھے اور مرحومین کی مغفرت فرمائے۔ آمین

واضح رہے کہ وفاقی وزیر داخلہ شیخ رشید، پولیس حکام اور ریسکیو ذرائع نے مری میں شدید برفباری میں گاڑیوں میں پھنسے ہونے کے باعث 22 افراد کی اموات کی تصدیق کی ہے۔

کراچی : پیپلزپارٹی کے شریک رہنماء اور سابق صدر پاکستان آصف علی زرداری نے کہا ہے کہ مری میں حکومت کی نالائقی کی وجہ سے معصوم شہری زندگی سے محروم ہوئے۔

تفصیلات کے مطابق سانحہ مری میں اموات پر افسوس کا اظہار کرتے ہوئے انہوں نے کہا کہ مری میں حکومت کی جانب سے بروقت اقدامات نہ کرنا قابل افسوس ہے، حکومت کی نالائقی اور نااہلی سے ہی معصوم شہری زندگی سے محروم ہوگئے ، جاں بحق افراد کے لواحقین کےغم میں برابر کے شریک ہیں ، اللہ تعالیٰ جاں بحق افراد کی مغفرت اور ان لواحقین کو صبر عطا کرے۔

اسی طرح پاکستان مسلم لیگ ن کے رہنماء احسن اقبال نے کہا ہے کہ سانحہ مری میں حکومت کی بے حسی کی وجہ سے شہریوں کی جان و مال کا نقصان ہوا ، لاکھوں گاڑیوں کا مری میں داخلہ اور حکومت کی بے خبری پر سوالیہ نشان ہے ، اب پاکستان کو بچانے کا وقت آ گیا ہے، بے بس سیاح مری کی سردی میں بے یارو مددگار زندگی کی بازی ہارگئے ، عمران خان کی نااہل حکومت نے عوام کا جینا مشکل کر دیا ہے ، نااہل اور ناکام حکومت کو رخصت کرکے عوام کو تباہی سے بچا سکتے ہیں ، کیوں کہ اس وقت پی ٹی آئی حکومت نے ملک میں گیس کا بھی بحران پیدا کر دیا ہے ، اب ملک میں گندم کا شدید بحران آنے والا ہے ، پاکستان سے یوریا کھاد پہلے ہی بیرون ممالک اسمگل کی جا رہی ہے ۔