Category: کراچی

کراچی : لیاقت آباد سی ون ایریا میں دو روز قبل کورٹ میرج کرنے والا نوجوان پانچ منزلہ عمارت سے گر کر ہلاک ہوگیا، والد کا کہنا ہے کہ بیٹے کو پولیس نے عمارت سے دھکا دیا۔

تفصیلات کے مطابق عمارت سے گرنے والے نوجوان کی لاش ضابطے کی کارروائی کے لیے عباسی شہید اسپتال لائی گئی۔ اس حوالے سے ایس ایچ او سپر مارکیٹ ریاض نے بتایا کہ متوفی کی شناخت نبیل کے نام سے کی گئی جبکہ ابتدائی تحقیقات کے مطابق متوفی نے شریف آباد کی رہائشی لڑکی سے دو روز قبل کورٹ میرج کی تھی اور اس کے خلاف لڑکی کے اہلخانہ نے اغوا کا مقدمہ درج کرایا تھا لیکن لڑکی نے نبیل کے حق میں بیان دیا تھا۔

انھوں نے بتایا کہ جمعرات کی شب شریف آباد انویسٹی گیشن پولیس رہائشی عمارت کی پانچویں منزل پر نبیل کے گھر اس کے والد کا بیان لینے آئی تھی اس دوران نبیل گھر پر موجود تھا اور وہ عمارت کی چھت پر چلا گیا تاہم اس بات کی فوری طور پر تصدیق نہیں ہوسکی کہ اس نے خوفزدہ ہو کر عمارت سے چھلانگ لگا کر خودکشی کی ہے یا وہ اتفاقیہ طور پر گرا ہے یا پھر اسے کسی نے دھکا دیا تاہم پولیس تمام پہلوؤں پر تحقیقات کر رہی ہے۔

نوجوان کے والد نے الزام عائد کیا ہے کہ شریف آباد انویسٹی گیشن کے پولیس افسر نے ان کے گھر آنے کے بعد بیٹے کوپانچویں منزل سے دھکا دے کر قتل کیا، ایس ایس پی سینٹرل نے واقعے کا نوٹس لیتے ہوئے انکوائری کا حکم دے دیا۔

والد نے مزید بتایا کی ان کے بیٹے نبیل نے محلے میں رہائش پذیر آسیہ نامی لڑکی سے پسند کی شادی کی تھی، لڑکی کے گھر والوں نے بیٹے نبیل کے خلاف شریف آباد تھانے میں ایف آئی آر درج کروائی تھی، انھوں نے اپنے بیٹے نبیل کی ضمانت کروائی تھی اور 2 روز قبل بیٹے کا نکاح بھی ہو گیا تھا، پولیس افسر عامر نے ضمانت ہونے کے باوجود ہم سے 50 ہزار رشوت طلب کی اور رشوت نہ دینے پرپولیس افسر عامر ان کے گھر میں داخل ہوا اور بدمعاشی کرنا شروع کردی۔

والد کے مطابق میرے بیٹے نبیل کو ڈکیتی کے جھوٹے مقدمے میں بند کرنے کی دھمکیاں دیں، پولیس افسر عامر نے چادر اور چار دیواری کا تقدس پامال کیا، پولیس افسر انہیں اور بیٹے نبیل کو زبردستی تھانے لے جانے کی دھمکیاں دیتا رہا، اسی دوران پولیس افسر عامر نےان کے بیٹے نبیل کو دھکا دیا جو پانچویں منزل سے نیچے گر کر ہلاک ہو گیا۔

انھوں نے کہا کہ انہیں انصاف چاہیے اور وہ پولیس افسر کے خلاف مقدمہ درج کرواکر اسے گرفتار کرائیں گے۔ دوسری جانب ایس ایس پی سینٹرل معروف عثمان نے واقعہ کا نوٹس لتے ہوئے صاف شفاف انکوائری کا حکم دے دیا۔ ایس ایس پی سینٹرل نے واقعے کی انکوائری ایس پی نیو کراچی کو سونپ دی ہے ۔

کراچی: پی ٹی آئی کے رکن اسمبلی اورٹی وی میزبان ڈاکٹر عامر لیاقت کے ہم شکل سوشل میڈیا پر وائرل ہوگئے۔

ایک ویب سائٹ کوانٹرویو میں عامر لیاقت سے مشابہت رکھنے والے عثمان فیروزی کا کہنا تھا کہ آٹھویں کلاس میں ایک ٹیچر نے بتایا تھا کہ میری شکل اور بولنے کا انداز عامر لیاقت سے ملتا ہے۔

انہوں نے کہا کہ عامر لیاقت کا پروگرام شوق سے دیکھتا تھا اور پھر آہستہ آہستہ ان کے لباس، اسٹائل اورلباس کو کاپی کرنا شروع کردیا۔
عثمان فیروزی نے مزید بتایا کہ لوگ انہیں دیکھ کردھوکا کھا جاتے ہیں اورعامر لیاقت سمجھ کر سلام کرتے ہیں۔ عامر لیاقت کی تیسری شادی کی خبروں کے بعد بازار گیا تولوگوں نے شادی کی مبارکباد دی۔

عثمان فیروزی کا مزید کہنا تھا کہ میری ابھی ایک شادی بھی نہیں عامر لیاقت دعا کریں کہ ان کی بھی 4 شادیاں ہوں۔

کراچی: نجی ٹی وی کے صحافی اطہر متین کے قتل میں ملوث ملزم پولیس مقابلے میں ہلاک ہوگیا۔

ایس ایس پی قمبر کے مطابق قمبر اور کراچی پولیس کی شہداد کورٹ میں مشترکہ کارروائی کے دوران نارتھ ناظم آباد میں قتل ہونے والے صحافی اطہر متین کے قتل میں ملوث ملزم پولیس مقابلے میں مارا گیا۔

ایس ایس پی مشیر احمد بروھی کا کہنا ہے کہ قمبر پولیس اور کراچی پولیس کی جانب سے کارروائی کی گئی، ملزم قمبر شہداد کورٹ میں مبینہ پولیس مقابلے کے دوران ہلاک ہوا۔ ملزم نے پولیس اہلکاروں پر فائرنگ کی، جوابی فائرنگ میں ملزم مارا گیا۔

ایس ایس پی کے مطابق ہلاک ملزم انور حسنی نے اطہر متین پر فائر کئے تھے، ملزم کا دوسرا ساتھی چند روز قبل گرفتار کیا گیا تھا۔

واضح رہے کہ کراچی کے علاقے نارتھ ناظم آباد فائیو اسٹار چورنگی کے قریب 18 فروری کوگاڑی پرفائرنگ کے واقعے میں نجی ٹی وی چینل کے صحافی اطہر متین جاں بحق ہوگئے تھے۔

سندھ پولیس نے 26 فروری کو اطہر متین کے قتل میں ملوث مرکزی ملزم کی گرفتاری ظاہر کی تھی۔ پولیس ترجمان کا کہنا تھاملزم کو منگھوپیر کے علاقے بلوچستان بارڈر سے گرفتار کیا گیا ہے۔

اس سے قبل سندھ کے وزیراطلاعات سعید غنی نے ٹویٹ میں کہا تھا کہ سندھ پولیس نے نجی ٹی وی سے منسلک صحافی اطہرمتین کے قتل میں ملوث ایک شخص اشرف کوگرفتارکرلیا ہے

کراچی: صدر پولیس نے جناح اسپتال کے ایگزیکٹیو ڈائریکٹر کو مبینہ طور پر تشدد کا نشانہ بنانے والے ڈاکٹروں کے خلاف ان کے کوآرڈینٹر کی مدعیت میں مقدمہ درج کرلیا۔

صدر پولیس کے مطابق مدعی مقدمہ اجمل خان یوسفزئی نے مقدمہ درج کرایا ہے کہ وہ پیشے کے لحاظ سے ایگزیکٹو ڈائریکٹر جناح اسپتال پروفیسر شاہد رسول کا کوآرڈی نیٹر ہوں اور 28 فروری کو دوپہر ساڑھے 12بجے ایگزیکٹو ڈائریکٹر جناح اسپتال پروفیسر شاہد رسول سرجیکل وارڈ 21 میں معمول کے مطابق مریضوں کا چیک اپ کر رہے تھے اور میں بھی ان کے ساتھ تھا۔

مدعی مقدمہ نے الزام عائد کیا کہ اسی اثنا میں کچھ ڈاکٹرز جس میں ڈاکٹر وانیش ، ڈاکٹر کلیم کھوسو ، ڈاکٹر خدا بخش کھوسو اور ڈاکٹر بہادر سمیت دیگر 2 ڈاکٹرز جن کے نام مجھے معلوم نہیں جنھیں میں سامنے آنے پر شناخت کر سکتا ہوں اچانک وارڈ میں آئے اور پروفیسر شاہد رسول سے گالم گلوچ اور اپنے موبائل فون سے وڈیو بھی بنانا شروع کر دی جس پر پروفیسر شاہد رسول نے انھیں منع کیا تو وہ سب مشتعل ہوگئے اور پروفیسر شاہد رسول پر حملہ کر دیا، دھکم پیل شروع کر دی جس پر میں نے اور وہاں پر موجود گارڈز نے ایگزیکیٹو ڈائریکٹر جناح اسپتال پروفیسر شاہد رسول کو ان کے حملے سے بچایا لیکن وہ مسلسل گارڈز کی موجودگی میں انھیں گالم گلوچ اور سنگین نتائج کی دھمکیاں دیتے ہوئے وہاں سے چلے گئے۔

مدعی کے مطابق انھوں نے ایگزیکیٹو ڈائریکٹر شاہد رسول کے مشورے پر نامزد و دیگر نامعلوم کے خلاف مقدمہ درج کرانے تھانے آیا ہوں جس پر پولیس نے مقدمہ نمبر 110 سال 2022 درج کر کے انویسٹی گیشن پولیس کے حوالے کر دیا تاہم اس حوالے سے کوئی گرفتاری عمل میں نہیں آسکی۔

دوسری جانب ینگ ڈاکٹرز ایسوسی ایشن کا کہنا تھا کہ انتظامیہ نے من گھڑت اور جھوٹ پر مبنی بیان چلایا جو قابل مذمت اور غیر اخلاقی ہے ، وائی ڈی اے کا وفد ڈاکٹر کلیم کھوسو اور ڈاکٹر یاسر خان کی قیادت میں سرجیکل وارڈ گیا جب بات چیت شروع کی گئی تو ڈائریکٹر نے بغیر کوئی بات سنے دھمکیاں دیں۔

ان کا کہنا تھا کہ وائی ڈی اے نے اپنے جائز مطالبات کی خاطر 2 ماہ پہلے ایڈمن بلاک کے سامنے 10 دن احتجاج ریکارڈ کرایا تھا اس دوران بھی ہم پر حملے کیے گئے مگر اب تک مطالبات کی منظوری نہیں ہوئی، جائز حقوق کی بات کرنے پر دھمکیاں ، جھوٹے الزامات اور پولیس گردی سے ہراساں کیا جاتا ہے۔

کراچی: فیڈرل بی ایریا میں پولیس پر حملہ اسٹریٹ کرائم نہیں بلکہ ایک منظم دہشت گردی کی بڑی واردات نکلا۔

پولیس موبائل پر دہشت گردوں کے حملے کی مکمل منظر کشی کیمرے کی آنکھ نے محفوظ کر لی پولیس پارٹی پر ٹارگیٹڈ فائرنگ کی تحقیقات کاؤنٹر ٹیررازم ڈپارٹمنٹ کی سپرد کی جائے گی ۔

قانون کے محافظ خود ہی دہشت گردوں کے نشانے پر آگئے ۔ فیڈرل بی ایریا بلاک 22 میں پولیس موبائل کو کس فلمی انداز میں گھیر کر اسے نشانہ بنایا گیا اس تمام واقعہ کی منظر کشی کیمرے کی آنکھ نے محفوظ کر لیا۔

پولیس موبائل پر پانچ دہشت گردوں نے حملہ کیا جس کے لئے تین موٹر سائیکلوں پر سوار 5 ملزمان کو پولیس موبائل کو نشانہ بناتے دیکھا جاسکتا ہے ، سی سی ٹی وی فوٹیجز میں دیکھا گیا ہے کہ ملزمان سڑک پر کھلے عام پولیس موبائل کا راستہ روک کر فائرنگ کرتے نظر آتے ہیں جبکہ پولیس اہلکاروں کو حملہ آوروں پر جوابی فائرنگ کا موقع نہ ملا ، اور ملزمان با آسانی حملہ کر کے فرار ہو گئے۔

فوٹیجز میں دیکھا گیا ہے پانچ حملہ آوروں میں سے تین نے ہیلمٹ لگا رکھے تھے ، جبکہ سیاہ کوٹ پینٹ اور ٹائی پہنے ایک ہاتھ میں پستول اور دوسرے ہاتھ میں بیگ پکڑے ملزم کو بھی فائرنگ کرتے دیکھا جاسکتا ہے۔

پولیس موبائل نے جیسے ہی موڑ کاٹا وہاں موجود ملزم نے موٹرسائیکل سے اتر کر فائرنگ کی اور ملزمان کو پولیس کے تعاقب میں بھاگتے ہوئے فائرنگ کرتے دیکھا جا سکتا ہے جبکہ دیگر ملزمان نے بھی موٹر سائیکلوں سے اتر کر پولیس موبائل پر فائرنگ کی جس کے نتیجے میں پولیس اہلکار 35 سالہ عامر ولد شاہنواز اور دو راہگیر کامران شاہ اور ناصر علی زخمی ہوئے۔

پولیس اہلکار کو تین گولیاں لگی ہیں جس کی حالت تشویشناک بتائی جا رہی ہے ۔ موبائل پر حملے کے مقدمہ کی تحقیقات کائونٹر ٹیررازم ڈپارٹمنٹ کے سپرد کی جائیں گی ۔

کراچی: کاؤنٹر ٹیرر ازم ڈپارٹمنٹ انویسٹی گیشن پولیس نے فرقہ واریت کی وارداتوں میں ملوث انتہائی مطلوب دہشت گرد کو گرفتار کرلیا۔

اس حوالے سے ترجمان سی ٹی ڈی کی جانب سے جاری اعلامیے کے مطابق گرفتار دہشت گرد ذکی کاظمی کے دیگر ساتھیوں میں کاشف ، ابرار ، محسن ، دانش ، علی عرف ببلو ، سکندر ، راشد اور کاشان شامل ہیں۔

ترجمان کے مطابق گرفتار دہشت گرد نے اپنے دیگر ساتھیوں کے ہمراہ سال 2011 میں سعودی سفارت خانے پر دستی بم حملہ کیا تھا ۔ وہ شارع نور جہاں ، اقبال مارکیٹ ، سرسید ٹاؤن ، تیموریہ ، مبینہ ٹاؤن اور عیدگاہ تھانے میں درج مقدمات میں مفرور تھا جس میں 3 ٹارگٹ کلنگ کے واقعات اور ایک مسجد پر دستی بم حملے کا بھی مقدمہ شامل ہے