Category: کراچی

کراچی : محکمہ موسمیات نے کہاہے کہ کراچی سمیت سندھ بھر میں 28 جنوری تک سردی کی لہر برقرار رہ سکتی ہے۔

محکمہ موسمیات کے مطابق مغربی ہوائوں کا سسٹم ملک سے نکل گیا ہے تاہم سائبیرین ہوائیں ملک بھر کو اپنی لپیٹ میں لے رہی ہیں۔سندھ بھر میں موسم خشک اور سرد رہنے کا امکان ہے، جبکہ کراچی میں کم سے کم درجہ حرارت 8 سے 10 ڈگری سینٹی گریڈ ہوسکتا ہے ۔

کراچی : سماجی رہنما و ماہر تعلیم حنید لاکھانی نے کہا ہے کہ معاشرے میں بڑہتی ہوئی بیروزگاری مسائل کو جنم دے رہی ہے بے روزگار نوجوان معاشرے کے لیئے خطرہ بن رہے ہیں اپنے نوجوانوں کو تعلیم ، ملازمت اور مثبت سرگرمیوں کی جانب راغب کرنے کی ضرورت ہے نوجوان نسل کو بیروزگاری کے عذاب سے نکالنے کے لیئے اقدامات کرنا ہوں گے، جب ہم دوسروں کے مسائل کے بارے میں سوچنا شروع کریں گے تو تمام مسائل حل ہو جائیں گے، ان خیالات کا اظہارا نہوں نے حنید لاکھانی سیکرٹریٹ سے جاری کردہ بیان میں کیا، حنید لاکھانی نے کہا کہ جرم کی سب سے بڑی وجہ نا انصافی ہے اگر جرائم پر قابو پانا ہے تو ملک میں خلافت راشدہ قائم کرنا ہوگی جب ایک تعلیم یافتہ انسان کو اس کی قابلیت کے مطابق روزگار نہیں ملے گا اور وہ نوکری کے حصول کے لیئے در در کی ٹھوکریں کھائے گا اور ایک کم تعلیم یافتہ انسان رشوت یا تعلقات کی بنیاد پر قابلیت سے زائد عہدے پر فائز کردیا جائے گا تو معاشرے میںانتشار اور نفرت پھیلے گی لوگ محنت کرنے اور سیدھے رستے پر چلنے کی بجائے شارٹ کٹ اور ناجائز راستوں کی جانب مائل ہوں گے، شہرقائد میں اکثر دیکھنے کو ملتا ہے کہ ڈکیتی و دیگر وارداتوں میں ملوث نوجوان نہایت تعلیم یافتہ نکلتے ہیں اور ان کا ایک ہی مسئلہ ہوتا ہے کہ اتنی تعلیم ہونے کی باجود ہر جگہ سے دھکے ملتے ہیں ، انہوں نے کہا کہ پورے ملک میں بیروزگاری کے خاتمے کے لیئے اقدامات کرنا ہوں گے جب تک کاروباری طبقے کو سہولیات فراہم نہیں کی جائیں گی تو وہ کیسے ملک میں کاروباری سرگرمیاں بڑھائیںگے ، تاجروں کوسہولیات فراہم کرنے سے کاروباری سرگرمیاں بڑھیں گے اور نئے یونٹس کا قیام ہوگا جس سے لاکھوں کی تعداد میں لوگوں کو روزگار ملے گا ایکسپورٹ بڑھے گی تو مزدور، ٹرک والا، لوڈر، لفٹر آپریٹر سمیت مختلف شعبے کے لوگوں کو کام ملے گا اور جب ملک میں روزگار کے مواقع بڑھیں گے لوگوں کی آمدنی میں اضافہ ہوگا تو ان کی قوت خرید بڑھے گی جو کہ بیروزگاری، مہنگائی اور جرائم جیسے مسائل کے خاتمے میں اہم کردار ادا کریگی، انہوں نے مزید کہا کہ بہت سے لوگ بیروزگار ہیں جب ان کو نوکری نہیں ملتی تو گھروالوں کا پیٹ پالنے کے لیئے ان کو ناجائز ذریعوں کا سہارا لینا پڑتا ہے۔

کراچی : ایڈمنسٹریٹر ڈی ایم سی کورنگی جاوید الرحمن کلہوڑ نے ہدایت کی ہے کہ تیز ہوائوں سے عوامی زندگیوں کو محفوظ بنا نے اور بروقت سہولیات کی فراہمی کے لئے ڈی ایم سی کورنگی میں میونسپل ایمرجنسی کا نفاذ ،ایڈمنسٹریٹر نے محکمہ ایڈورٹائزمنٹ کو ہدایت کی ہے کہ ضلع کورنگی کی حدود میں لگے تمام اشتہاری بورڈ کو فی الفوار اُتار لیا جائے،محکمہ پارکس اینڈ سروسز کو ضلع حدود میں تیز ہوائوں سے گرنے والے درختوں کو شاہراہوں اور گلیوں سے فوری ہٹا نے کی ہدایت کی ۔
ڈائریکٹر پارکس وقاص سومرو نے رات گئے تک ضلع کورنگی کے شاہ فیصل ،ملیر ماڈل ،لانڈھی اور کورنگی زونز کا تفصیلی دورہ کرکے تیز ہوائوں سے گرنے والے درختوں اور پودوں کو شاہراہوں سے بروقت ہٹانے کے انتظامات کا معائنہ کیا اور اپنی نگرانی میں مختلف شاہراہوں سے درختوں کو ہٹا یا ڈائریکٹر پارکس وقاص سومرو نے کہا کہ ایڈمنسٹریٹر ڈی ایم سی کورنگی جاوید الرحمن کلہوڑ کی ہدایت پر محکمہ پارکس اینڈ سروسز کے چاروں زونز کو فعال کردیا گیا اور تمام عملہ او رمشینریز کو آن روڈ رکھا گیا ہے انہوںنے کہاکہ گزشتہ روز تیز ہوائوں سے ضلع کورنگی کی حدود میں درجنوں گرنے والے درختوں کو بروقت شاہراہوں سے اُٹھا لیا گیا ۔

کراچی : پاکستان پیپلزپارٹی نے 24 جنوری سے پاکستان بھر میں کسان احتجاج کا اعلان کردیا، وزیراطلاعات سندھ سعید غنی نے کہا کہ کسان حکومت کی نااہلی کیخلاف احتجاج کریں گے، کراچی میں کسان مارچ ملیر سے مزار قائد تک نکلے گا۔ انہوں نے میڈیا سے گفتگو کرتے ہوئے کہا کہ 24 جنوری سے پاکستان بھر میں کسان احتجاج ہوگا، کسان مارچ ملیر سے نکل کر مزار قائد کے قریب خداد کالونی پہنچے گا، کسان حکومت کی نااہلی کیخلاف احتجاج کریں گے۔
سعید غنی نے کہا کہ ملک میں صدارتی نظام آنے کا کوئی راستہ موجود نہیں، پی ٹی آئی اراکین اسمبلی کو جب چاہیں پارٹی میں شامل کرسکتے ہیں۔ انہوں نے کہا کہ اورنج لائن بسوں کے پیسے وفاقی حکومت کو دے چکے، اورنج لائن بسیں کب آئیں گی یہ وفاقی حکومت بتائے گی ۔
نالائق اور نااہل حکومت کو روانہ کرنے کیلئے اتحاد ہو سکتا ہے۔یاد رہے 20 جنوری کو پاکستان پیپلزپارٹی کے چیئرمین بلاول بھٹو زرداری کی ہدایت پر گزشتہ روز 21 جنوری بروز جمعہ بوقت بعد نماز جمعہ سے ڈویڑنل سطح پر ملک بھر کے کاشت کاروں سے اظہار یکجہتی کے لئے ٹریکٹر ٹرالی مارچ کا آغاز کیا گیا تھا، لاڑکانہ اور ساہیوال ڈویڑن میں ٹریکٹر ٹرالی مارچ ہوا، جبکہ ملک بھر کے تمام ڈویڑنز میں 24 جنوری کو ٹریکٹر ٹرالی مارچ کا انعقاد ہوگا۔

بلاول بھٹو زرداری نے کہا کہ ہم سمجھتے ہیں کہ کسان خوشحال ہوتا ہے تو ملک خوشحال ہوتا ہے۔زراعت ہماری معیشت کی ریڑھ کی ہڈی ہے۔اگر ہم زرعی معیشت کو کھڑا کردیں گے تو پوری معیشت ترقی کرسکتی ہے۔انہوں نے کہاکہ پاکستان پیپلز پارٹی کے دور میں ہم گندم، چاول اور چینی اپنی ضروریات پوری کرنے کے بعد برآمد کرتے تھے۔اس وقت ہم باہر سے گندم، چاول اور چینی منگوا رہے ہیں۔
جب سے خان صاحب کی حکومت آئی ہے، کسانوں کو ان کے فصل کی قیمت نہیں مل رہی۔بلاول بھٹو زرداری نے کہاکہ پیٹرولیم مصنوعات مہنگا ہونے کی وجہ سے ٹیوب ویل اور ٹریکٹر سمیت کاشت کاروں کی پیداواری لاگت میں اضافہ ہوا ہے۔ہمارے پچھلے سیزن میں پانی نہ ملنے کی وجہ سے پیڈی فصل کو نقصان ہوا۔اب یوریا کے بحران کی وجہ سے، کھاد کے بحران کی وجہ سے ہماری گندم کی فصل کو نقصان ہوگا۔

کراچی : کراچی کےضلع شرقی کو مختلف بلدیاتی سہولیات سے آراستہ کیا جارہا ہے۔

کراچی کےعلاقے بلوچ کالونی،نرسری،فوزیہ وہاب فلائی اوور اور کارساز فلائی اوورز کے نیچے ایگزیکٹیو انجنئیر ایم اینڈ ای امتیازبھٹو کی نگرانی میں رنگ برنگی لائٹس لگا کر پل اور راستوں کو خوبصورت بنادیا گیا۔

ایڈمنسٹریٹر اورمیونسپل کمشنرفہیم خان نے بتایا کہ ایڈمنسٹریٹربلدیہ عظمی کراچی بیرسٹر مرتضی وہاب کی ہدایات کو سامنے رکھتے ہوئےبلدیہ شرقی اور ضلع کوبلدیاتی سہولیات سےآراستہ کرنے کیلئے ہرممکن اقدامات کئے جارہے ہیں۔

اس سلسلےمیں پلوں، شاہراہوں، راؤنڈ اباؤٹس کوموسمی پودوں و پھولوں سے آراستہ کرنے کے ساتھ خوبصورت لائٹس سے آویزاں کیا جارہا ہے۔

ان مقامات کو دلکش روشنیوں سے آراستہ کرنے پرشہریوں نے خوشی کا اظہار کیا اور کہا کہ روشنیوں کے شہر کو خوبصورت روشنیوں سے منور کرنے کا کام قابل ستائش ہے ۔