Category: کراچی

کراچی : بلدیاتی ملازمین کے تمام جائز مطالبات پورے کئے جائیں گے ۔

تفصیلات کے مطابق پاکستان لوکل گورنمنٹ ورکرز فیڈریشن اور شاہ لطیف لوکل گورنمنٹ ایمپلائز یونین سندھ کے نمائندوں سے وزیر بلدیات ناصر شاہ کے مذاکرات ہوئے اور وزیر بلدیات، دیہی ترقی اور پبلک ہیلتھ انجینئرنگ سید ناصر حسین شاہ کی یقین دہانی پر آل پاکستان لوکل گورنمنٹ ورکرز فیڈریشن اور شاہ لطیف لوکل گورنمنٹ ایمپلائز یونین سندھ کے نمائندوں نے اپنے مطالبات کے لئے کی جانے والی ہڑتال ختم کرنے پر رضامندی ظاہر کی ہے۔
اس مقصد کے لئے وزیر بلدیات سندھ سید ناصر حسین شاہ نے آج آل پاکستان لوکل گورنمنٹ ورکرز فیڈریشن کے صدر ذوالفقار شاہ اور شاہ لطیف لوکل گورنمنٹ ایمپلائز یونین سندھ کے صدر حافظ مشتاق کوریجو سمیت دونوں تنظیموں کے نمائندوں کے ساتھ مذاکرات کئے اور کہا کہ پاکستان پیپلز پارٹی کی سندھ حکومت مزدوروں، کسانوں اور عوام کی حکومت ہے اور سندھ حکومت پیپلز پارٹی کے منشور کے مطابق محنت کشوں کے تمام جائز مطالبات کو پورا کرنے کے لئے محنت کشوں کی نمائندہ تنظیموں کی مشاورت اور تعاون کے ساتھ تمام جائز مطالبات کو ہر صورت پورا کرے گی۔
سید ناصر حسین شاہ نے بلدیاتی محکموں میں کام کرنے سے محنت کشوں کی تنظیموں کے نمائندوں سے ہڑتال ختم کرنے کی درخواست کی اور کہا کہ پیپلز پارٹی کے یومِ تاسیس کے موقع پر محنت کشوں کی تنظیموں کو ان کے تمام جائز مطالبات پورا کرنے کے لئے سندھ حکومت پرعزم ہے اور ہم جمہوری تقاضوں کے مطابق معاشرے کے تمام طبقات کے ساتھ باہمی مشاورت سے مسائل کو حل کرنے کی پالیسی پر گامزن رہیں گے۔
وزیر بلدیات سندھ سید ناصر حسین شاہ کی درخواست پر بلدیاتی ملازمین کی تنظیموں نے اپنی ہڑتال ختم کرنے پر رضامندی ظاہر کی ہے اور توقع ظاہر کی ہے کہ سندھ حکومت مربوط مذاکرات کے زریعے بلدیاتی ملازمین کے مسائل کو حل کرے گی۔

کراچی : وزیراعلی سندھ سید مراد علی شاہ نے صوبائی کابینہ کا اجلاس جمعرات 2 دسمبرکوصبح دس بجے وزیراعلی ہائوس کراچی میں طلب کرلیا ہے۔

اجلاس میں سندھ کابینہ سندھ اسمبلی میں منظورکی جانے والی قرارداد کی روشنی میں خلاف ضابطہ تعمیرکی گئی رہائشی عمارتوں کو ریگولرائز کرنے سے متعلق آرڈیننس کے اجراء سمیت دیگر آپشنز پر غوراورمشاورت کے بعد لائحہ عمل کی منظوری دے گی۔

علاوہ ازیں سندھ کابینہ میں محکمہ صحت سندھ میڈیکل اور ڈینٹل کالجز کے داخلوں کے لیے پاکستان میڈیکل کمیشن(PMC) کے احکامات کو مکمل طور پر مسترد کرتے ہوئے صوبے میں اپنا قانون بنانے کی سفارشات پیش کرے گی سندھ میں میڈیکل اور ڈینٹل کے داخلوں کے معاملے کو قانونی شکل دینے کی تیاریاں مکمل کرلیں گئیں ہیں۔

داخلہ ٹیسٹ ایم ڈی کیٹ میں کم سے کم 50 فیصد تک میرٹ کو لے جانے کا فیصلہ کرلیا گیا ہے جس کو سندھ کابینہ کی منظوری کے بعد قانونی شکل دی جائے گی محمکہ صحت نے سمری تیار کر کے وزیراعلی سندھ کو ارسال کردی ہے جسے کابینہ سے منظور کرایا جائیگا جبکہ کابینہ کے فیصلے کے بعد سندھ کے میڈیکل کالجز میں داخلوں کا مرحلہ شروع ہوگا۔

صوبائی کابینہ ایگراہم امورپربھی غورکے بعد ان کی منظوری دے گی ۔

کراچی : حافظ نعیم الرحمن نے بلدیاتی ترمیمی بل پر وزیر اعلیٰ سندھ کو قانونی نوٹس دے دیا

امیر جماعت اسلامی کراچی حافظ نعیم الرحمن نے بلدیاتی اداروں کے اختیارات مزید کم کرنے کے لیے سندھ حکومت کی جانب سے بلدیاتی ترمیمی بل 2021کی منظوری پر صوبے کے چیف ایگزیکٹو ،وزیر اعلی سندھ کو قانونی نوٹس بھجوادیاہے اور نوٹس میں منظور کردہ بلدیاتی بل کو آئین سے ہم آہنگ کرنے کے لئے سات دن کا وقت دیا گیا ہے۔
قانونی نوٹس میں موجودہ بل کو آئین سے متصادم قرار دیتے ہوئے متنازع شقوں کوتبدیل کرنے کا مطالبہ کرتے ہوئے کہا گیا ہے کہ آئین سے متصادم کسی قانون سازی کی کوئی حیثیت نہیں ہے، اگر سات دن میں نوٹس کے مطابق کاروائی نہ ہوئی تو اعلی عدلیہ کے روبرو قانونی چارہ جوئی کی جائے گی۔حافظ نعیم الرحمن نے یہ قانونی نوٹس جماعت اسلامی شہری و بلدیاتی امور کے نگراں و سینئر وکیل سیف الدین ایڈوکیٹ کے توسط سے بھیجا ہے ، نوٹس میں مزید کہا گیا ہے کہ وزیر اعلیٰ سندھ کی حیثیت سے آپ نے آئین پر عمل داری کا حلف اُٹھایا ہے ، آئین کی دفعہ 32کے مطابق ریاست پابند ہے کہ بلدیاتی اداروں کی حوصلہ افزائی کرے ، آرٹیکل 140-Aصوبائی حکومت کی حدود و ذمہ داریوں کو واضح طور پر الگ کر کے بتاتاہے کہ ہر صوبہ بلدیاتی حکومت کا نظام قائم کرے گا اور سیاسی ، انتظامی اور مالی اختیارات ،مقامی و بلدیاتی حکومت کے منتخب نمائندوں کو منتقل کیے جائیں گے ، صوبے کے چیف ایگزیکٹو کی حیثیت سے آئین کی ان شقوں پر عمل درآمد یقینی بنانا آپ پر لازم ہے ، بلدیاتی ترمیمی بل 2021میں آئین کی ان شقوں کی خلاف ورزی کرتے ہوئے اختیارات نچلی سطح پر منتقل کرنے کے بجائے جو اختیارات پہلے سے نچلی سطح پر تھے وہ بھی بالائی سطح پر منتقل کیے گئے ہیں اور مقامی حکومتوں و بلدیاتی اداروں کو با اختیار بنانے کے بجائے مزید بے اختیار بنایا گیا ہے ۔
جس انداز اور طریقے سے یہ بل سندھ اسمبلی میں منظور کروایا گیا ہے وہ بھی غیر جمہوری رویہ اور طرز عمل ہے اور اس بل کو زبردستی مسلط کرنے کے مترادف ہے ، وزیر اعلیٰ سندھ کو بھیجے گئے لیگل نوٹس میں جماعت اسلامی کی جانب سے بل منظور کرانے سے قبل وزیر اعلیٰ سندھ کو بھیجی گئی تجاویز کا بھی اعادہ کیا گیا جس کو بل کی تیاری میں پیش نظر نہیں رکھا گیا۔

کراچی : موجودہ حکومت کی اسمبلی میں قانون سازی ایک مذاق ہے : سردار بابر علی عباسی

فرسٹ ڈیموکریٹک فرنٹ پارٹی کے صوبہ سندھ کے صدر سردار بابر علی عباسی نے ایک نجی چینل کو خصوصی انٹرویو دیتے ہوئے ایسے حقائق سے پردہ اٹھایا جو ملک کو کمزور کر رہے ہیں ان کے ساتھ کراچی ڈویزن کے صدر محمد اسحق عباسی بھی موجود تھے ۔ سردار بابر علی عباسی نے کہا کہ موجودہ حکومت کی اسمبلی میں قانون سازی ایک مذاق ہے ۔ خان صاحب کی حکومت میں ملک کے غریبوں کے لئے کوئی قانون نہیں ہے ۔ لوگ بےروزگاری اور بھوک کا شکار ہو رہے ہیں اور دوسرے ملک کے ایک دہشت گرد کے لئے قانون پاس کیا جا رہا ہے جو کہ پاکستانی اور کشمیری عوام کے ساتھ ایک زیادتی ہے ۔ انہوں نے کہا کہ میں بھی ایک کشمیری ہوں اور مجھے فخر ہے اور جو ظلم و ستم وہاں ہو رہا ہے پاکستانی حکومت اور میڈیا نے تو آنکھیں بند کی ہوئی ہیں روزانہ کی بنیاد پر لوگوں کو شہید کیا جاتا ہے اور عورتوں کی عزتوں کو پامال کیا جاتا ہے ۔ پاکستان کی گورنمنٹ کو کشمیریوں سے کوئی سروکار نہیں سال میں ایک بار کشمیر ڈے مناتے ہیں اور اس دن تقریریں کی جاتی ہے علاوہ اس کے کشمیر کا نام بھی نہیں لیا جاتا ۔
انہوں نے کہا کہ پاکستان کے عوام اس وقت جس مشکل میں ہیں مہنگائی کے طوفان نے غریب آدمی سے جینے کا حق چھین لیا ہے اس کے علاوہ بے روزگاری نے نوجوانوں کی کمر توڑ دی ہے ۔ ہمارا منشور ہے کہ فرسٹ ڈیموکریٹک فرنٹ پارٹی غریبوں کو انصاف دلائے گی مہنگائی سے ، رشوت سے ، ظلم سے ، جبر سے ،زیادتی سے ۔
مستقبل میں ہماری پارٹی ایسے محب وطن پاکستانی سامنے لائے گی جن کی جڑوں مین پاکستان ہے یہ ہماری بد قسمتی ہے کہ امریکا اور یورپ سے امپورٹ ہوئے لوگ اقتدار مین آتے ہیں اور حکومت کے مزے لوٹتے ہیں ۔ انہیں معلوم ہی نہیں کی غریب عوام کے مسائل کیا ہیں ۔ خان صاحب کے ارد گرد بڑے مافیا کے لوگ بیٹھے ہیں ورلڈ بینک اور آئی ایم ایف سے قرضے لئے جا رہے ہیں اور ملک کو اندر ہی اندر کھوکھلا کیا جا رہا ہے ۔
فرسٹ ڈیموکریٹک فرنٹ پارٹی کا منشور ہی یہی ہے کہ ملک میں قانون کی بالا دستی ہو