کراچی میں کوویڈ وائرس کے ساتھ ساتھ ڈنگی وائرس میں بھی جینیاتی تبدیلی کا انکشاف ہوا ہے۔

ڈاؤیونیورسٹی کے پروفیسر اف پیتھالوجی پروفیسر سعید خان نے بتایا کہ امسال ڈنگی وائرس میں جینیاتی تبدیلیاں دیکھنے میں آئی ہیں جس کو طبی زبان میں سیرو ٹائپ کہتے ہیں، ڈنگی سیرو ٹائپس، ڈنگی انفیکشن DEN-1 ، DEN-2 ، DEN-3 اور DEN-4 نامی قریبی متعلقہ وائرس کی وجہ سے ہوتا ہے، ان چار وائرسوں کو سیرو ٹائپس کہا جاتا ہے، ایک سیرو ٹائپ میں بھی کچھ جینیاتی تبدیلیاں پائی گئیں ہیں۔

ان کا کہنا تھا کہ امسال ڈنگی وائرس سے متاثرہ مریضوں میں شدید نوعیت کی پیچیدگیاں بھی سامنے آرہی ہیں جس پر ڈاؤیونیورسٹی کے ماہرین مزید تحقحق کر رہے ہیں، دیگر ماہرین کا کہنا ہے کہ ڈنگی وائرس بھی اپنی شکل تبدیل کررہا ہے اور امسال ڈنگی وائرس سے متاثرہ افراد میں شدید پیچیدگیاں بھی سامنے آرہی ہیں، کراچی میں گذشتہ کئی سال سے اسپرے مہم نہ کیے جانے کی وجہ سے وائرس شدت اختیار کررہا ہے۔

صوبائی محکمہ صحت کے ڈائریکٹر جنرل سندھ کی جانب سے ایکسپریس کو اعدادوشمار جاری کیے جس میں بتایا گیا ہے کہ ماہ ستمبر یعنی ایک ماہ کے دوران کراچی سمیت سندھ میں 457 افراد ڈنگی وائرس سے متاثر ہوئے۔

معروف کامیڈین عمر شریف کا ڈاکٹروں نے آج صبح بھی معائنہ کیا ہے اہل خانہ کا کہنا ہے کہ ڈاکٹروں نےعمر شریف کی صحت کو بہتر قرار دیا

عمرشریف کی روانگی سے متعلق ڈاکٹرز نے غور شروع کردیا ہے، اس حوالے سے ان کے اہل خانہ نے بتایا کہ عمر شریف کی ہارٹ سرجری امریکا میں ہوگی۔

ڈاکٹروں نےآج صبح بھی عمر شریف کا معائنہ کیا، ڈاکٹروں کی جانب سےاہل خانہ کوعمرشریف کی صحت سےآگاہ کیا گیا۔ عمر شریف آج ایئر ایمبولینس کے ذریعہ امریکا روانہ ہوں گے، عمر شریف نجی اسپتال میں زیر علاج ہیں۔

واضح رہے کہ گزشتہ روز امریکہ سے ایئرایمبولینس کراچی پہنچ گئی تھی، اس کے باوجود کامیڈین عمر شریف کی علاج کیلئے ان کی امریکا روانگی ایک مرتبہ پھر تاخیر کا شکار ہوگئی تھی۔ ڈاکٹروں نے عمر شریف کی حالت بگڑنے پر انہیں سی سی یو منتقل کرکے سفر سے روک دیا تھا۔

وزیر اعظم عمران خان کے دورہ کراچی نے عام شہریوں کی مشکلات میں اضافہ کردیا۔ پروٹوکول کیلئے سڑکیں بند ہونے کے باعث شہری خوار ہوتے رہے۔

وزیر اعظم نے پیر کے روز کراچی کا دورہ کیا جہاں انہوں نے سرکلر ریلوے منصوبے کا افتتاح کیا۔ وزیر اعظم کے پروٹوکول کے باعث شہرِ قائد کی کئی سڑکیں بند رکھی گئیں جس کی وجہ سے شہری خوار ہوتے رہے۔وزیر اعظم گورنر ہاؤس گئے تو اردگرد کی سڑکوں کو عام ٹریفک کیلئے بند کردیا گیا جس کے باعث فوارہ چوک، میٹرول پول کےقریب ٹریفک جام رہا جس کے باعث شہریوں کو پریشانی کا سامنا کرنا پڑا۔

وزارت بحری امور نے سی پیک کے تحت کراچی کے لیے بڑا اقتصادی ٹرانسفارمیشن پراجیکٹ شروع کردیا۔

وفاقی وزیر برائے بحری امور علی زیدی نے کہا کہ اسلام آباد اور بیجنگ میں منعقد کمیٹی کے اجلاس میں یہ فیصلہ کیا گیا، دونوں ممالک نے کراچی کوسٹل کمپریہنسیو ڈویلپمنٹ زون سی پیک میں شامل کرنے پر اتفاق کیا ہے اور کراچی کوسٹل کمپریہنسیو ڈویلپمنٹ زون منصوبہ گیم چینجر ثابت ہوگا۔

انہوں نے کہا کہ یہ منصوبہ بحری امور کی وزارت کا ایک بہترین اقدام ہے اور منصوبے سے کراچی دنیا کی سر فہرست بندرگاہوں میں شامل ہوگا، منصوبہ کے پی ٹی کے ساتھ شراکت میں براہ راست چینی سرمایہ کاری پر بنایا جائے گا جب کہ منصوبے کی متوقع سرمایہ کاری تقریباً 3.5 بلین ڈالر ہے، یہ منصوبہ 20 ہزار سے زائد خاندانوں کو رہائشی آباد کاری بھی فراہم کرے گا۔

فیڈرل بورڈ آف ریونیو (ایف بی آر) کے رکن انٹرنل ریونیو آپریشنز قیصر اقبال نے کہا ہے کہ گھر سے کاروبار کرنے والے غیررجسٹرڈ افراد پر بجلی کے بلوں میں اضافی ٹیکس کا اطلاق ہوگا۔

قیصر اقبال نے انجمن تاجران کے صدر کاشف چوہدری کے ہمراہ پریس کانفرنس کی۔ پریس کانفرنس کرتے ہوئے قیصر اقبال کا کہنا تھاکہ چھوٹے تاجروں کے ایف بی آر سے مذاکرات کامیاب ہوئے ہیں، سوشل میڈیا کے دور میں صدارتی آرڈیننس کے حوالے سے غلط فہمیاں پھیلائی جارہی تھی۔

ان کا کہنا تھاکہ ایسے افراد جو گھر سے کاروبارکررہے ہیں لیکن رجسٹرڈ نہیں ہیں، ان پروفیشنلز کے بجلی کے بلوں پر اضافی ٹیکس کا اطلاق ہوگا۔

قیصر اقبال کا کہنا تھاکہ چھوٹے تاجروں کے ساتھ مشاورت کررہے ہیں اور کمشنرز کو کہا جارہا ہے کہ وہ تاجروں کے تحفظات سن کر ان کو مقامی سطح پر حل کریں۔

تاجر رہنما کاشف چوہدری نے کہا کہ پوائنٹ آف سیلز کا اطلاق چھوٹے تاجروں پر نہیں ہوگا، یہ واضح کر دیا گیا ہے کہ چھوٹے تاجر کا سیلز ٹیکس بجلی بل میں کٹ جاتا ہے، ٹیکس ترمیمی آرڈیننس اور بجلی بلوں پر اضافی ٹیکس کا معاملہ ختم ہو گیا۔

کراچی قائد آباد میں واقع ایس پی ملیر کے دفتر پر حملہ

شاہ لطیف پولیس کا فائرنگ کرنے والے مزمان کے خلاف ایکشن اور تین ملزمان کو گرفتار کیا گیا ۔

تفصیلات کے مطابق ایس پی آفس ملیر کے دفتر میں توڑ پھوڑ کی گئی , حملہ آوروں کی تعداد 100 سے زائد بتائی جاتی ہے واقعہ ایس پی ملیر کے دفتر کے باہر فائرنگ کرنے کے نتیجے میں پیش آیا ۔

ذرائع کے مطابق ایس پی ملیر دفتر کے نزدیک شادی کی تقریب میں شرکت کیلئے آنے والے افراد کی شدید ہوائی فائرنگ کی گئی پولیس نے کارروائی کرتے ہوئے ہوائی فائرنگ میں ملوث افراد کو حراست میں لے لیا۔
پولیس کے زیر حراست افراد کو چھڑانے کیلئے بارات میں شریک 50/60 مشتعل افراد نے ایس پی آفس پر حملہ کر دیا۔
شدید ہنگامہ آرائی کے دوران دفتر میں توڑ پھوڑ کی گئی اور سنتری ڈیوٹی پر مامور باوردی پولیس اہلکار کانسٹیبل احسن علی بھی زخمی ہوا۔ ہنگامہ آرائی میں ملوث افراد کار سرکار میں مداخلت کرتے ہوئے دو افراد کو پولیس کی حراست سے چھڑا کر لے گئے۔واقعے میں ملوث مسلح افراد نے فرار ہوتے ہوئے پولیس پر فائرنگ بھی کی۔
ملیر ڈویژن سے مزید نفری طلب کر لی گئی۔ پولیس cctv فوٹیج کی مدد سے ہنگامہ آرائی اور فائرنگ میں ملوث افراد کی شناخت کر رہی ہے۔ واقعے میں ملوث افراد کی گرفتاری کیلئے چھاپے مارے جا رہے ہیں۔
پولیس کیجانب سے واقعے کا مقدمہ درج کر لیا گیا، مزید کارروائی جاری ہے ۔ گرفتار تین ملزمان سے اسلحہ تحویل میں لے لیا گیا۔