Category: کراچی

تاجر برادری کے مطالبے پر سندھ حکومت نے جمعہ کے روز بھی مارکیٹیں کھولنے کا فیصلہ کیاہے اور آج مارکیٹیں کھلیں گی۔

ترجمان سندھ حکومت بیرسٹر مرتضی وہاب نے ایکسپریس نیوز سے فون پر گفتگو کرتے ہوئے کہا کہ تاجر برادری کے مطالبے پر سندھ حکومت نے جمعہ کے روز بھی مارکیٹیں کھولنے کا فیصلہ کیاہے اور آج جمعہ کو مارکیٹیں کھلیں گی۔

بیرسٹر مرتضی وہاب نے کہا کہ تاجروں کو آج جمعہ کے روز مارکیٹیں کھولنے کے لئے کہہ دیا گیا ہے، اب ہفتے میں صرف اتوار کو مارکیٹیں بند رہیں گی تاہم تجارتی مراکز میں کورونا ایس او پیز پر عملدرآمد کو یقینی بنانا ہوگا۔

ڈپٹی اسپیکر سندھ اسمبلی ریحانہ لغاری نے تنظیم علماءپاکستان کے سیکریٹری جنرل و پاکستان شریعت کونسل کے صوبائی جنرل سیکریٹری قاری اللہ داد سےاپنی رہائش گاہ پرملاقات کی ۔جس میں مذہبی ہم آہنگی سمیت دیگرموضوعات وباہمی دلچسپی کے امور پر تفصیلی گفتگوکی۔
ڈپٹی اسپیکر سندھ اسمبلی ریحانہ لغاری نے بتایا کہ سندھ اسمبلی میں صوبے میں بسنے والے تمام مذاہب کی مذہبی روایات واقداراوررسومات کے تحفظ و فروغ کے لیے ہرممکن اقدامات کیے جاتے ہیں، اور اس سلسلے میں مخلتف قوانین منظورہوکر نافذ ہوچکے ہیں جن کے تحت کسی بھی مذہب کی مقدسات،املاک،رسومات،اقداروروایات کی خلاف ورزی قانون جرم ہے اور ہرمذہب کو آئین پاکستان کے تحت اپنی رسومات کا انعقاد کرنے کا حق ہے۔ اس موقع پر قاری اللہ داد نے کہا کہ قانون ساز اسمبلی میں تمام مذاہب کی روایات و اقدار کے تحفظ کو یقینی بنانا آئین پاکستان کی روح ہے۔ دین اسلام تمام مذاہب کے تحفظ کی ضمانت دیتا ہے اوریہی اس معاشرے کی خوبصورتی ہے۔ اس موقع پر قاری اللہ دادنے ڈپٹی اسپیکر سندھ اسمبلی ریحانہ لغاری کے کووڈمرض میں مبتلا بھائی کی جلدصحتیابی کے لئے دعابھی کی۔

پاکستان پیٹرولیم نے سندھ میں قدرتی گیس کے نئے ذخائر دریافت کرلیے ہیں۔

پی پی ایل کی جانب سے پاکستان اسٹاک ایکس چینج کو بھیجے گئے مکتوب میں بتایاگیا ہے کہ صوبہ سندھ میں واقع لطیف بلاک کے جگن ون” کنویں سے گیس کے ان نئے ذخائر کی دریافت ہوئی ہے۔

مذکورہ بلاک کی 33فیصد ملکیت پاکستان پیٹرولیم کی ہے جبکہ اس بلاک میں ای این آئی پاکستان اور یو ای پی ایل بھی 33، 33 فیصد کے شراکت دار ہیں۔ خط میں بتایاگیا ہے کہ مذکورہ کنویں کی 11350 فٹ کھدائی کے بعد قدرتی گیس کی دریافت ممکن ہوئی ہے۔ کنویں کے سینڈ زون “بی” میں 12.6ایم ایم سی ایف ڈی گیس کا حصول ہوا ہے۔

اس کنویں کے سینڈ زون “سی” سے 13.7 ایم ایم سی ایف ڈی گیس حاصل ہورہی ہے۔ گیس کی دریافت کمپنی کی جانب سے جارحانہ ڈرلنگ کی وجہ سے ہوئی ہے، نئی دریافت شدہ قدرتی گیس کے ذخائر سے ملکی توانائی کی ضروریات پورا کرنے میں اہم ثابت ہوگی۔

وزیر اطلاعات و محنت سندھ سعید غنی سامبارو (عمرکوٹ) پہنچ گئے۔

صوبائی وزیر نے یہاں خاضخیلی برادری کے سربراہ سردار غلام مصطفي خان خاصخيلي کے انتقال پر فاتحہ خوانی کی۔

صوبائی وزیر نے مرحوم سردار غلام مصطفٰی خاصخیلی کے بیٹے، بھانجے، بھتیجوں اور دیگر اہلخانہ سے تعزیت کی۔

سردار غلام مصطفٰی خاصخیلی کے انتقال پر شدید غم ہوا ہو۔ ان کی وفات سے جو خلا پیدا ہوا ہے اس کو شاید کبھی پورا نہیں کیا جاسکے گا۔

میرے ان سے مراسم ایک والد کی حیثیت کے تھے اور وہ بھی مجھے اپنی اولاد کی طرح ہی سمجھتے تھے۔

آج ان کے انتقال سے نہ صرف پوری خاصخیلی برادری بلکہ پورا سندھ سوگوار ہے۔ اللہ تعالٰی مرحوم کی مغفرت فرمائے.

اللہ تعالٰی مرحوم کو اپنی جوار رحمت میں اعلی مقام عطا فرمائے اور لواحقین کو صبر جمیل عطا فرمائے۔بعد ازاں صوبائی وزیر نے مرحوم غلام مصطفٰی خاصخیلی کی قبر پر فاتحہ خوانی کی۔

ایف آئی اے، اسٹیٹ بینک سرکل کی کراچی کےاشتہاری اور مفروران ملزمان کے خلاف کارروائیاں جاری

کارروائی کے نتیجے میں عدالت سے قرار دیا گیا اشتہاری ملزم گرفتار

باغی ٹیوی کی رپورٹ کے مطابق ایف آئی اے، اسٹیٹ بینک سرکل کراچی کے سب انسپکٹر ذاکر حسین کی سربراہی میں اشتہاری، عدالتی مفروران و دیگر کی گرفتاری کےلئے ایک ٹیم تشکیل دی گئی تھی، ٹیم نے کارروائی کرتے ہوئے مقدمہ الزام نمبر 5/2013 زیر دفعہ 4,5,23 فارن ایکسچینج ریگولیشن ایکٹ 1947اور 420, 468, 471, 109 تعزیرات پاکستان میں ماخوذہ ملزم سید ضامن رضا کو گرفتار کیا۔

ملزم مقدمہ کے اندراج کے بعد گزشتہ آٹھ سالوں سے روپوش تھا اور گرفتاری سے بچنے کے لیے مختصر مدتِ میں رھائش اور موبائل سمز تبدیل کرتا رہتا تھا۔

ملزم نے اپنے نام سے ایک بینک اکاؤنٹ کھلوایا جو کے حوالہ /ھنڈی کے غیر قانونی سرگرمیوں میں استعمال ہوتا رہا۔ ملزم کے نام سے بینک اکاؤنٹ میں چھ کروڑ روپے سے زائد کی ٹرانزیکشنز کی گئیں۔

ملزم کو جاری شدہ چیک بک دیگر افراد استعمال کرتے رھے۔ گرفتار مذکورہ ملزم کو کل ریمانڈ کے مقصد کے لئے عدالت میں پیش کیا جائے گا۔

شہر قائد میں رات گئے مختلف علاقوں میں موسلادھار بارش ہوئی جس کے سبب مختلف علاقوں میں جگہ جگہ پانی کھڑا ہوگیا۔

ذرائع کے مطابق سب سے زیادہ بارش سرجانی ٹاؤن میں 58 ملی میٹر ریکارڈ کی گئی، موسم کا حال بتانے والوں کا کہنا ہے کہ آج دن میں بھی کراچی میں بارش کا امکان ہے۔ محکمہ موسمیات کی جانب سے 11ستمبر تک کراچی میں مزید بارشوں کی پیشگوئی کی گئی ہے۔

کراچی کے مختلف علاقوں میں سڑکیں زیر آب آگئیں لیکن پانی کی نکاسی کیلئے حسب سابق متعلقہ انتظامیہ غائب رہی، لوگوں کو اپنے روزگار پر جانے کیلیے دشواریوں کا سامنا کرنا پڑا۔

ذرائع کے مطابق واٹر پمپ سے گلبرگ چورنگی جانے والی سڑک زیر آب ہے جبکہ ٹاور کے قریب ایم اے جناح روڈ پر گھٹنوں بارش کا پانی موجود ہے۔

اس کے علاوہ لنڈی کوتل چورنگی کے قریب نالے کا پانی سڑک پر آگیا جس کے باعث گندگی چاروں جانب پھیل گئی، لیاقت آباد 10 نمبر کی سڑک پر بھی برساتی پانی جمع ہوگیا۔

تازہ ترین اطلاعات کے مطابق گزشتہ رات کراچی میں ہونے والی موسلا دھار بارش کے باعث سفاری پارک کے اطراف سڑکوں پر جمع پانی کی نکاسی کا کام شروع کردیا گیا۔

وزیر اعلیٰ سندھ کے معاون خصوصی برائے محکمہ بحالی خصوصی افراد سندھ صادق علی میمن ڈیف ریچ اسکولز و ٹریننگ سینٹرز پہنچ گئے۔

یہ مرکز سماعت سے افراد کی بحالی کے کاموں میں مصروف عمل ہے۔دورے کے موقع پر ڈائریکٹر جنرل سندھ پرسنز وتھ ڈس ایبیلٹی پروٹیکشن اتھارٹی غلام نبی نظامانی بھی ہمراہ تھے۔

وزیر اعلیٰ سندھ کے معاون خصوصی صادق میمن نے مرکز کے مختلف شعبوں کا معائنہ کیا۔ وزیر اعلیٰ سندھ کے معاون خصوصی صادق میمن کو مرکز میں فراہم کی جانے والی سہولیات کے بارے میں بریفنگ دی گئی۔

وزیر اعلیٰ سندھ کے معاون خصوصی صادق میمن نے کہا کہ سماعت سے محروم افراد کو فراہم کی جانے والی سہولیات قابل تعریف ہیں۔حکومت سندھ سماعت محروم افراد کے بحالی کے کاموں پر خصوصی توجہ دے رہی ہے۔

سندھ واحد صوبہ ہے جس نے سماعت سے محروم افراد کو ڈرائیونگ لائسنس جاری کیا ہے۔

پاکستان تحریک انصاف کے رہنما اور سینیٹر فیصل واوڈا کی والدہ انتقال کرگئیں۔

سماجی رابطے کی ویب سائٹ ٹوئٹر پر جاری ایک بیان میں سینیٹر فیصل واوڈا نے بتایا کہ میری والدہ آج اپنے خالق حقیقی سے جاملیں، طبیعت ناسازی کے باعث والدہ کچھ دنوں سے کومہ میں تھیں۔

سینیٹر فیصل واوڈا نے بتایا کہ والدہ کی نمازہ جنازہ کل بعد نماز ظہر ڈی ایچ اے فیز سیون کی جامع مسجد عائشہ میں ادا کی جائے گی، باغی ٹی وی فیملی کی جانب سے سینیٹر فیصل واوڈا کی والدہ کے انتقال پر اظہار تعزیت کیا گیا ہے۔

سیاسی رہنماؤں کے ساتھ ساتھ مختلف مکتبہ فکر سے تعلق رکھنے والے افراد نے سینیٹر فیصل کی والدہ کے انتقال پر ان سے اظہار تعزیت کیا ہے اور ان کی والدہ کے بلند درجات کی دعا کی ہے

کے الیکٹرک نے تیس سال پرانے 25 ہزار روپے کے بل کی عدم ادائیگی پر رہائشی عمارت کی بجلی منقطع کردی۔

گلستان جوہر بلاک 1 میں قائم رہائشی عمارت فاران سینٹر کے 30 سال پرانے 25 ہزار روپے کے بل کی عدم ادائیگی کو بنیاد بنا کر کے الیکٹرک نے عمارت کی بجلی کاٹ دی۔

اس عمارت میں 16 فلیٹ، ایک بینک اور پانج دکانیں ہیں، جو بجلی کٹنے کے بعد اندھیرے میں ڈوب گئے ہیں۔

مکینوں نے مؤقف اپنایا کہ ’ہم اپنے رہائشی فلیٹ کے بجلی کا بل ہرماہ باقاعدگی سے ادا کررہے ہیں، جس کی وجہ سے ہمارے کے الیکٹرک کے بل پر اسٹار صارف لکھا ہوتا ہے‘۔

بجلی منقطع کرنے کے لیے آنے والی ٹیم کے مطابق عمارت کی تعمیر کےوقت بلڈر کی طرف کچھ رقم واجب الاد تھی، اس وقت کی کے ای ایس سی نے 25 ہزار روپے کا بل ادا نہ کرنے پر عمارت کا میٹر کاٹ دیا تھا۔

بلڈر کے مطابق کے الیکٹرک نے میٹر پرتیس برسوں میں سرچارجز لگا لگا کر بل 20 لاکھ روپے کیا اور پھر اس رقم کو ادا کرنے کی صورت میں ہی بجلی بحال کرنے کا اعلان کیا۔

دوسری جانب کے الیکٹرک کے ترجمان نے وضاحت کی کہ گلستان جوہر میں غیر قانونی کنڈے کے استعمال اور واجبات کی عدم ادائیگی پر ایک عمارت کی بجلی منقطع کی گئی ہے، کئی بار رابطہ اور یاد دہانی کرائی گئی مگر واجبات ادا نہیں کیے گئے۔

وزیر صحت سندھ عذراپیچوہو نے عالمی ادارہ صحت سے منظور ویکسین 12 سے17 سال کے بچوں کو لگانے کا مطالبہ کرتے ہوئے کہا محکمہ تعلیم اورمحکمہ صحت اسکول کھولنے سے متعلق ایک صفحے پر ہیں۔

تفصیلات کے مطابق وزیر صحت سندھ عذراپیچوہو کی جانب سے بیان میں کہا گیا ہے کہ اسکول بند کرنے کے حق میں نہیں ، جلوس اور جلسوں میں ایس او پیز کی پابندی نہیں ہوتی، محکمہ تعلیم اورمحکمہ صحت اسکول کھولنے سے متعلق ایک صفحے پر ہیں۔

عذراپیچوہو نے مطالبہ کیا کہ عالمی ادارہ صحت سے منظور ویکسین 12 سے17 سال کے بچوں کو لگائی جائے۔

یاد رہے محکمہ صحت سندھ نے کورونا کیسز میں کمی کے پیش نظر اسپتالوں کو معمو ل کے آپریشن کی اجازت دے دی ، اس سے قبل سندھ کےاسپتالوں میں کوروناکیسزبڑھنے پرصرف ضروری آپریشن کئے جارہے تھے۔

خیال رہے سندھ بھر میں گزشتہ 24 گھنٹوں کےدوران کورونا کے مثبت کیسز کی شرح 6.11 فیصد اور کراچی میں یہ شرح 8 فیصد سے زائد ریکارڈ کی گئی۔

اس وقت کورونا وائرس کے 48299 مریض زیر علاج ہیں، جن میں سے 47421 مریض گھروں اور 45 مریض آئسولیشن سینٹرز پر زیر علاج ہیں، جبکہ مختلف اسپتالوں میں 833 مریض زیر علاج ہیں۔

سندھ میں کورونا متاثرہ 746 مریضوں کی حالت تشویشناک جبکہ کوویڈ-19 کے 69 مریض وینٹی لیٹرز پر ہیں