Category: قصور

قصور (باغی ٹی وی بیوروچیف غنی محمود): قصور پولیس نے ایک اہم کارروائی کرتے ہوئے ایک خطرناک ڈکیت گینگ کے تین ارکان کو گرفتار کر لیا ہے۔ ڈی پی او قصور محمد عیسیٰ خاں کی ہدایت پر تھانہ چھانگا مانگا پولیس نے عدیل مسیح ڈکیت گینگ کے خلاف کارروائی کرتے ہوئے ان تینوں ملزمان کو رنگے ہاتھوں دبوچ لیا۔

پولیس کے مطابق ملزمان کے قبضے سے ساڑھے چار لاکھ روپے نقدی، دو موٹر سائیکلیں، موبائل فون اور اسلحہ برآمد ہوا ہے۔ ملزمان چھانگا مانگا جنگل اور آس پاس کے علاقوں میں راہگیروں سے نقدی، موبائل فون اور موٹر سائیکلیں چھیننے کی وارداتیں کرتے تھے۔

ایس ایچ او انسپکٹر محمد اسمعیل بھٹی کی سربراہی میں تشکیل دی گئی ایک خصوصی ٹیم نے جدید ٹیکنالوجی کی مدد سے اس گینگ کو گرفتار کیا۔ ابتدائی تحقیقات میں ملزمان نے نواحی علاقوں میں ڈکیتی کی نو وارداتوں کا اعتراف کیا ہے۔ پولیس مزید تفتیش کر رہی ہے۔

ڈی پی او قصور محمد عیسیٰ خاں نے تھانہ چھانگا مانگا پولیس کی اس کامیابی پر انہیں مبارکباد دی ہے۔

قصور(باغی ٹی وی بیوروچیف غنی محمود) شہر اور اس کے گردونواح میں ڈکیتی، چوری اور راہزنی کے واقعات میں اضافہ ہو گیا ہے۔ مختلف واقعات میں ڈاکوؤں نے شہریوں کو لاکھوں روپے نقدی، موٹر سائیکلیں، موبائل فون، زرعی آلات اور دیگر قیمتی سامان سے محروم کر دیا ہے۔

تفصیلات کے مطابق تھانہ کھڈیاں کی حدود میں عبدالقدوس نامی شخص سے دو نامعلوم افراد نے اسلحہ کے زور پر 10 لاکھ روپے نقدی، موٹر سائیکل اور موبائل فون لوٹ لیا۔

تھانہ کوٹ رادھا کشن کے علاقہ میں اصغر علی کی موٹر سائیکل نامعلوم چور چوری کر لے گئے۔

تھانہ صدر پتوکی کی حدود میں نیامت علی نامی شخص سے دو نامعلوم افراد نے اسلحہ کے زور پر نقدی اور موبائل فون چھین لیا۔

تھانہ صدر پھولنگر کی حدود میں عامر اقبال کے زرعی رقبے سے نامعلوم چور سپرے مشین، تھریشر شافٹ اور دیگر سامان چوری کر لے گئے۔

مقامی پولیس نے تمام واقعات کے حوالے سے مقدمات درج کر لیے ہیں اور ملزمان کو پکڑنے کے لیے تفتیش جاری ہے،ان واقعات کے بعد شہر میں خوف و ہراس کی فضا پھیلی ہوئی ہے۔ شہریوں نے پولیس سے مطالبہ کیا ہے کہ وہ ایسے واقعات کو روکنے کے لیے فوری اقدامات کریں۔

قصور(باغی ٹی وی بیوروچیف غنی محمود) تھانہ گنڈا سنگھ والا کے علاقے کٹی کلنجر میں محمد عارف اور محمد سلیم گروپوں کے درمیان تقریباً پانچ سے چھ سال سے جاری تنازعے کو قصور پولیس نے اپنی کوششوں سے ختم کروا دیا ہے۔

تفصیلات کے مطابق دونوں گروپوں کے درمیان کافی عرصے سے تنازعہ چلا آ رہا تھا اور اس دوران دونوں فریقین کے درمیان فائرنگ کا تبادلہ بھی ہو چکا تھا۔ اس تنازعے کی وجہ سے دونوں فریقین کے درمیان مقدمات بھی زیر سماعت تھے۔

تھانہ گنڈا سنگھ والا کے ایس ایچ او زاہد جمیل، اے ایس آئی محمد نعیم، اور محمد رضا (سپیشل برانچ) نے دونوں فریقین کو سمجھایا اور انہیں اپنی پرانی دشمنی کو بھول کر ایک دوسرے کے ساتھ صلح کرنے پر آمادہ کیا۔ پولیس کی ان کوششوں سے دونوں فریقین نے ایک دوسرے کو معاف کر دیا اور تنازعے کا خاتمہ ہو گیا۔

اس پر علاقے کے لوگوں نے قصور پولیس کا شکریہ ادا کیا اور ان کی اس کوشش کو سراہا۔

قصور(باغی ٹی وی بیوروچیف غنی محمود)اورلوڈ ٹرکوں کی وجہ سے دیپالپور روڈ پر حادثات میں اضافہ،ٹریفک پولیس کی بے حسی ،شہریوں کی زندگی اجیرن، طویل عرصے سے زیر تعمیر اس روڈ پر اوور لوڈڈ ٹرکوں اور ٹرالیوں کا مسلسل آنا جانا شہریوں کے لیے جان کا خطرہ بن چکا ہے۔

تفصیلات کے مطابق، دیپالپور روڈ پر تعمیراتی کاموں کی وجہ سے سڑک کی حالت انتہائی خراب ہے۔ اس کے علاوہ، اوور لوڈڈ ٹرکوں کا سائز سڑک کے برابر ہونے کی وجہ سے انہیں اوور ٹیک کرنا انتہائی خطرناک ہو گیا ہے۔ سڑک کے کئی حصے ون وے ہونے کی وجہ سے یہ خطرہ مزید بڑھ گیا ہے۔

گزشتہ دن نور پور کے قریب ایک اوور لوڈڈ ٹرالی کے الٹنے سے سڑک کا ایک حصہ بند ہو گیا، جس سے شہریوں کو مزید مشکلات کا سامنا کرنا پڑ رہا ہے۔

شہریوں کا کہنا ہے کہ ٹریفک پولیس اور ہائی وے پیٹرولنگ پولیس اس صورتحال پر نظر انداز کیے ہوئے ہیں۔ انہوں نے ڈی پی او قصور سے اپیل کی ہے کہ وہ خود نوٹس لے کر اس مسئلے کا حل نکالیں۔

قصور،باغی ٹی وی (بیوروچیف غنی محمود) پنجاب حکومت نے خواتین کو وراثت سے محروم کرنے کے خلاف سخت کارروائی کا فیصلہ کیا ہے۔ اس حوالے سے ایک نئی مہم شروع کی گئی ہے جس کا نام "violation against women never again” رکھا گیا ہے۔

تفصیلات کے مطابق جن خواتین کو وراثت میں ان کا حق نہیں دیا گیا، وہ پاکستان پینل کوڈ کی دفعہ 498 اے کے تحت مقدمہ درج کروا سکتی ہیں۔ اس دفعہ کے تحت مجرم کو 10 سال قید یا 10 لاکھ روپے جرمانہ یا دونوں سزائیں ہو سکتی ہیں۔

پنجاب حکومت کی اس اقدام پر عوام خاص طور پر خواتین نے خوشی کا اظہار کیا ہے۔ اس فیصلے کو خواتین کے حقوق کے لیے ایک اہم قدم قرار دیا جا رہا ہے۔

قصور،باغی ٹی وی (بیوروچیف غنی محمود) ڈی پی او محمد عیسیٰ خان کی ہدایت پر پولیس نے تھانہ کوٹرادھاکشن کے علاقے چک 65 میں ایک بڑے پیمانے پر سرچ آپریشن کیا۔ اس آپریشن میں پولیس نے 7 ملزمان کو گرفتار کیا ہے جن کے قبضے سے ایک کلوگرام آئس اور تقریباً 5 کلوگرام چرس برآمد ہوئی ہے۔

گرفتار ملزمان میں سنگین مقدمات میں مطلوب ایک اے کیٹگری کا خطرناک مجرم بھی شامل ہے۔ اس آپریشن میں ڈی ایس پی خالد اسلم، ایس ایچ او راؤ دلشاد علی اور تھانہ کی نفری نے حصہ لیا۔ پولیس نے تقریباً 40 گھروں کی تلاشی لی اور 160 سے زائد افراد سے پوچھ گچھ کی۔

ڈی پی او کا کہنا ہے کہ اس سرچ آپریشن کا مقصد سنگین جرائم میں ملوث ملزمان کی گرفتاری اور علاقے میں امن و امان قائم کرنا ہے۔ انہوں نے کہا کہ ضلعی پولیس شہریوں کی جان و مال کی حفاظت کے لیے دن رات کوشاں ہے۔

قصور،باغی ٹی وی (بیوروچیف غنی محمود) فیروزپور روڈ پر تیز رفتار بس نے موٹر سائیکل سوار ماں بیٹے کو ٹکر ماری جس کے نتیجے میں دونوں شدید زخمی ہوگئے۔ ریسکیو 1122 نے زخمیوں کو ہسپتال منتقل کردیا۔

تفصیلات کے مطابق منیر اپنی ماں صغراں بی بی کو موٹر سائیکل پر لے کر جا رہا تھا کہ کالی پل کے قریب ایک تیز رفتار مسافر بس نے انہیں پیچھے سے ٹکر ماری۔ حادثے کی اطلاع پر ریسکیو عملہ فوری طور پر موقع پر پہنچا اور زخمیوں کو ابتدائی طبی امداد دے کر بلھے شاہ ڈسٹرکٹ ہسپتال منتقل کردیا۔

مقامی لوگوں کا کہنا ہے کہ ٹریفک پولیس ٹریفک قوانین پر عمل درآمد کروانے میں مکمل طور پر ناکام ہے۔ شہر میں روزانہ حادثات ہوتے ہیں لیکن پولیس کوئی اہم اقدامات نہیں اٹھا رہی۔ لوگوں نے ڈی پی او قصور سے ازخود نوٹس لے کر ٹریفک پولیس کے خلاف کارروائی کرنے کا مطالبہ کیا ہے۔

واضح رہے کہ دو دن قبل فقیرئیے والا روڈ پر ایک جوان لڑکا ٹریفک حادثے میں جاں بحق ہوگیا تھا۔ اس کے باوجود ٹریفک پولیس سڑکوں پر نظر نہیں آتی اور اگر نظر آتی ہے تو صرف موٹر سائیکل سواروں کے کاغذات چیک کرنے تک محدود رہتی ہے۔