وزیراعلیٰ پنجاب چودھری پرویز الٰہی سے سیکرٹری جنرل پی ٹی آئی اسد عمرکی قیادت میں وفد کی ملاقات کی.وفد میں شفقت محمود، میاں محمود الرشید، میاں اسلم ا قبال، ڈاکٹر یاسمین راشد، محسن لغاری اور عندلیب عباس شامل تھیں ،پرنسپل سیکرٹری وزیراعلیٰ محمد خان بھٹی بھی اس موقع پر موجود تھے.
ملاقات میں جنوبی پنجاب میں سیلاب متاثرین کے لئے امدادی سرگرمیوں کے حوالے سے تبادلہ خیال کیا گیا.چودھری پرویز الٰہی نے بتایا کہ سیلاب متاثرین کی مدد کے لئے وزیراعلیٰ فلڈ ریلیف فنڈ قائم کردیا ہے۔صاحب حیثیت او رمخیر حضرات بینک آف پنجاب کے اکاؤنٹ نمبر 6010159451200028 میں امدادی رقوم جمع کرا سکتے ہیں۔وزیراعلیٰ فلڈ ریلیف فنڈ کا IBAN نمبر6010159451200028 PK92BPUNہےصاحب حیثیت افرا دکو مصیبت میں گھرے بہن بھائیوں کی پکار پر آگے آنا ہوگا-
چودھری پرویز الٰہی نے کہا کہ جنوبی پنجاب کے علاقوں تونسہ، ڈیرہ غازی خان او رراجن پور میں بارشوں او رسیلاب سے بہت تباہی ہوئی۔لوگ بے گھر ہوچکے ہیں اور فصلیں او راملاک تباہ ہوچکی ہیں۔میں بلا تاخیر خود تونسہ اورراجن پور گیا او رمتاثرین سے ملاقات کر کے صورتحال کاخود جائزہ لیا۔سیلاب زدہ علاقوں میں ایمرجنسی نافذ کر کے آفت زدہ قرار دیا گیاہے. میری قوم سے اپیل ہے کہ وہ متاثرہ بہن بھائیوں کی مدد کے لئے فلڈ ریلیف فنڈ میں بڑھ چڑھ کر حصہ لیں۔
چودھری پرویز ا لہٰی کا کہنا تھا کہ اس آفت سے نمٹنے کے لئے سب کو یکجا ہو کر متاثرین کے ساتھ کھڑا ہونا ہے۔پنجاب حکومت مشکل کی اس گھڑی میں متاثرین کے سا تھ کھڑی ہے اور تمام وسائل ان کے لئے حاضر ہیں۔متاثرہ علاقوں میں حکومت پنجاب نے ریسکیو اور ریلیف آپریشن کو مزید تیز کردیا ہے۔اضافی انسانی وسائل او رضروری مشینری کو متاثرہ علاقے میں پہنچا دیاگیاہے۔سیلاب انسانی المیہ کی شکل اختیار کررہاہے۔ انسانی جانوں کے ضیاع پر دل بے حد افسردہ ہے۔
