Category: لاہور

وزیر اعلیٰ پنجاب مریم نواز نے سیلاب سے متاثر ہونے والوں کو اپنے لیے اللہ کی طرف سے مہمان قرار دیتے ہوئے کہا کہ حکومت سیلاب میں متاثر ہونے والے کسانوں کو 20 ہزار روپے فی ایکڑ کے حساب سے امداد دیگی۔

ساہیوال میں الیکٹرک بسوں کے افتتاح کی تقریب سے خطاب کرتے ہوئے مریم نواز کا کہنا تھا ساہیوال کے لیے 30 الیکٹرک بسیں لے کر آئی ہوں جس میں لوگ باعزت طریقے سے سفر کریں گے، ساہیوال کے لوگ جو سفر کئی سو روپے میں کیا کرتے تھے اب صرف 20 روپے میں کیا کریں گے،بس سروس خواتین، اسپیشل افراد، بزرگوں اور طلبہ کے لیے فری ہے جبکہ بس میں اسپیشل افراد کے لیے خصوصی ریمپ بھی بنایا گیا ہے، بس میں سی سی ٹی وی کیمرے لگے ہیں، مانیٹر کریں گے کہ کہیں خواتین کو ہراساں نہ کیا جائے۔

ان کا کہنا تھا ساہیوال والے نواز شریف سے اور نواز شریف ساہیوال والوں سے پیار کرتے ہیں، ایکسپریس وے بنائی تو نوازشریف نے بنائی، ایٹمی دھماکے کیے تو نوازشریف نے کیے، ملک سے نواز شریف کی خدمات نکال دو تو کھنڈرات کے سوا کچھ نہیں بچے گا،معرکہ حق میں ہم نے تاریخی فتح حاصل کی، معرکہ حق میں کامیابی سے دنیا میں پاکستان کا وقار بلند ہوا، پاکستان اور سعودی عرب کے درمیان دفاعی معاہدہ اہم سنگ میل ہے، مکہ اور مدینہ ہمارے لیے پاک دھرتی ہیں، پاکستان اب خادمین الحرمین الشریفین میں شامل ہو گیا ہے،پنجاب میں پاکستان کی تاریخ کا بدترین سیلاب آیا، 25 لاکھ افراد کو سیلاب آنے سے پہلے محفوظ مقام پر منتقل کیا، سیلاب میں پھنسے لاکھوں لوگوں کو محفوظ مقام پر منتقل کیا، 2 ملین سے زیادہ جانوروں کو بھی محفوظ مقام پر پہنچایا۔

انہوں نے کہا کہ جتنے لوگوں کو ریسکیو کیا انہیں اپنا مہمان سمجھتے ہیں، میرے لیے وہ سیلاب زدگان نہیں اللہ تعالی کے مہمان ہیں، سیلاب زدگان کو عزت کے ساتھ میز کرسی پر کھانا دے رہے ہیں، جس کا گھر مکمل تباہ ہوا اسے 10 لاکھ روپے ملیں گے، جس کا مٹی کا گھر گرا اسے 5 لاکھ روپے ملیں گے، جس کی گائے بھینس بہہ گئی ہے اسے 5 لاکھ روپے ملیں گے اور جس کی بھیڑ بکڑی بہہ گئی ہے اسے 50 ہزار روپے ملیں گے، سیلاب سے پہنچنے والے نقصان پر کسانوں کو 20 ہزار روپے فی ایکڑ امداد دیں گے،ا پنجاب کے ہر ضلع میں بے گھر لوگوں کیلئے گھر بنائے جارہے ہیں، وزیراعلیٰ کا کام ہے کہ دکھ کی گھڑی میں عوام کے ساتھ کھڑے ہوں، کوئی ایسا شخص نہیں تھا جو حکومت میں ہو اور چین سے سو رہا ہو، 15 لاکھ گھرانوں کو راشن کارڈ فراہم کیا جا رہا ہے، اپنا گھر اسکیم کے تحت 80 ہزار گھر بن رہے ہیں۔

مظفرگڑھ میں 10 سالہ خانہ بدوش بچی سے مبینہ اجتماعی زیادتی کا واقعہ، وزیراعلیٰ پنجاب مریم نواز شریف کی ہدایت پر حنا پرویز بٹ نے نوٹس لے لیا

حنا پرویز بٹ نے ڈی پی او مظفرگڑھ سے تفصیلی رپورٹ طلب کر لی، پولیس نے بروقت کارروائی کرتے ہوئے دو مشتبہ افراد کو حراست میں لے لیا متاثرہ بچی کو نشتر اسپتال منتقل کر دیا گیا، حالت مستحکم بتائی جا رہی ہے خصوصی تحقیقاتی ٹیم تشکیل دے دی گئی، مقدمہ درجۂ اولیت پر رکھا گیا ہے۔ حنا پرویز بٹ کا کہنا ہے کہ متاثرہ اور اہل خانہ کو تمام قانونی، طبی اور نفسیاتی سہولتیں فراہم کی جائیں گی۔ کم سن بچیوں کے ساتھ جرائم ناقابلِ برداشت ہیں، انصاف میں کوئی رعایت نہیں ہو گی۔ حکومت پنجاب کے عزم "خواتین کے لیے محفوظ پنجاب” کے تحت ہر ممکن اقدام کیا جائے گا۔ ضلعی وومن پروٹیکشن آفیسر کو واقعے کی نگرانی کی خصوصی ہدایات جاری کر دی ہیں ملزمان کو جلد کیفر کردار تک پہنچایا جائے گا۔

گورنرپنجاب سردار سلیم حیدر خان این ڈی ایم اے کی جانب غزہ اور فلسطین کے مسلمانوں کے لئے امدادی جہاز روانہ کرنے لاہور ائیر پورٹ پہنچ گئے۔

گورنرپنجاب سردار سلیم حیدر خان کا کہنا تھا کہ 23کھیپ روانہ کی ہیں مجموعی طور پر 2ہزار 2227ٹن امدادی سامان روانہ کیا جاچکاہے ،غزا کو بروقت سامان کی فراہمی پر این ڈی ایم اے نے بھرپور کرداد ادا کیا ہے،امدادی سامان میں کپڑے، ادویات،خشک راشن اور کھانے پینے کی اشیاء تھیں ،غزہ اور فلسطین کے مظلوم مسلمان ہمارے بھائی ہیں۔اسرائیل دنیا میں امن کیلئے خطرہ بن چکا ہے،فلسطین کے معصوم بچوں اور بے گناہ انسانیت کو روزانہ کی بنیاد پر شہید کیا جا رہا ہے،اقوام متحدہ اسرائیلی دہشت گردی کا سختی سے نوٹس لے۔تمام اسلامی ممالک کو مل کر فلسطین کا ساتھ دینا ہوگا۔اسرائیل غزہ اور فلسطین کے شہری علاقوں میں بمباری کر کے انسانی اصولوں کی خلاف ورزی کر رہا ہے۔

پاکستان میں دل کی بڑھتی ہوئی بیماریوں، خاص طور پر نوجوانوں میں ہارٹ اٹیک کے بڑھتے ہوئے واقعات کو روکنے کے لیے مصنوعی ذہانت (AI) کے استعمال پر تحقیق شروع کر دی گئی ہے۔

لاہور میں پاکستان ہائپرٹینشن لیگ کانفرنس میں شریک سینئر کارڈیالوجسٹس کا کہنا تھا کہ دنیا بھر میں صحت کے شعبے میں مصنوعی ذہانت سے بیماریوں کی بروقت تشخیص اور علاج میں انقلاب آ رہا ہے اور پاکستان بھی اس سے بھرپور فائدہ اٹھا سکتا ہے، خاص طور پر دل کی بیماریوں کی ابتدائی شناخت اور مؤثر علاج میں۔

اتوار کو لاہور میں کانفرنس کے دوران نوجوان ڈاکٹروں اور ریسرچرز کو ان کے تحقیقی پروپوزلز پر لاکھوں روپے کے ریسرچ گرانٹس دی گئیں۔ یہ گرانٹس فارمیوو ریسرچ فورم کی جانب سے فراہم کی گئیں تاکہ دل کی بیماریوں کی بروقت تشخیص، علاج اور بچاؤ کے لیے تحقیق کو فروغ دیا جا سکے۔“شارک ٹینک کارڈیالوجی” ایونٹ میں ملک بھر سے دس تحقیقی مطالعات پیش کیے گئے جن کا جائزہ سینئر ماہرین امراض قلب پروفیسر فواد فاروق (این آئی سی وی ڈی کراچی)، پروفیسر نصیر سامور (آرمڈ فورسز انسٹیٹیوٹ آف کارڈیالوجی، راولپنڈی) اور پروفیسر فاران طیاب (کلثوم انٹرنیشنل ہسپتال، اسلام آباد) نے لیا۔ انہوں نے تین بہترین تحقیقی منصوبوں کا انتخاب کیا۔

پہلا انعام ڈاکٹر عامر شہباز (شیخ زید ہسپتال لاہور) نے حاصل کیا جنہوں نے ہارٹ اٹیک کے مریضوں میں اسٹنٹ کے بعد دی جانے والی دو دواؤں ٹکاگریلر اور ہائی ڈوز کلوپیڈوگریل کا تقابلی مطالعہ کیا۔ ان کا کہنا تھا کہ مستقبل میں ایسے مطالعات میں مصنوعی ذہانت کے استعمال سے مریضوں کے بڑے ڈیٹا کا تجزیہ تیز اور زیادہ درست انداز میں ممکن ہوگا، جس سے مؤثر اور کم خرچ علاج کے انتخاب میں مدد ملے گی۔

دوسرا انعام ڈاکٹر دیپا آہوجہ (سندھ انسٹیٹیوٹ آف کارڈیو ویسکیولر ڈیزیز، لاڑکانہ) نے جیتا جنہوں نے ریڈیل آرٹری تک رسائی کے لیے الٹراساؤنڈ گائیڈڈ کینولیشن اور روایتی طریقہ کار کا موازنہ کیا۔ ان کا کہنا ہے کہ اس عمل کو مصنوعی ذہانت کے ساتھ مربوط کر کے ریئل ٹائم گائیڈنس فراہم کی جا سکتی ہے، جس سے پیچیدگیوں میں کمی اور مریضوں کے لیے زیادہ محفوظ اور کم تکلیف دہ علاج ممکن بنایا جا سکتا ہے۔

تیسری پوزیشن ڈاکٹر آمنہ جاوید ملک (فیصل مسعود ٹیچنگ ہسپتال، سرگودھا) کو ملی جنہوں نے ہائی بلڈ پریشر کے مریضوں میں ایکو کارڈیوگرافی کے ذریعے دل کی پوشیدہ خرابیوں کی نشاندہی کے لیے مصنوعی ذہانت کا استعمال کیا۔ ان کی تحقیق سے ظاہر ہوا کہ جدید امیجنگ کے خودکار تجزیے سے ایسے نقصانات بھی سامنے لائے جا سکتے ہیں جو عام ٹیسٹوں میں نظر نہیں آتے، یوں بروقت علاج ممکن ہو پاتا ہے۔

ججز نے نوجوان تحقیق کاروں کو سراہتے ہوئے کہا کہ یہ خوش آئند بات ہے کہ نئی نسل کے کارڈیالوجسٹ روایتی پریکٹس سے آگے بڑھ کر تحقیق اور جدید ٹیکنالوجی کے استعمال پر زور دے رہے ہیں۔ پروفیسر فواد فاروق نے کہا کہ نوجوان ڈاکٹروں کی یہ کاوش درست سمت میں ایک اہم قدم ہے۔

فارمیوو ریسرچ فورم کے ڈائریکٹر ڈیجیٹل ہیلتھ اینڈ اے آئی ڈاکٹر مسعود جاوید نے کہا کہ کمپنی کا مقصد صرف ادویات فروخت کرنا نہیں بلکہ پاکستان میں تحقیق کا کلچر پروان چڑھانا اور ایک صحت مند معاشرہ تشکیل دینا ہے۔ ان کے مطابق کمپنی اس سے قبل ڈاکٹروں اور طلبہ کے لیے کتب شائع کرنے، مشاعرے اور کتب میلوں کے انعقاد اور تحقیقی گرانٹس دینے جیسے اقدامات بھی کر چکی ہے۔

ماہرین کا کہنا تھا کہ پاکستان میں دل کی بیماریوں کی شرح خطرناک حد تک بڑھ رہی ہے اور اب نوجوان بھی تیس اور چالیس سال کی عمر میں ہارٹ اٹیک کا شکار ہو رہے ہیں۔ ان کے مطابق مصنوعی ذہانت پر مبنی حل اور مقامی تحقیق علاج اور بچاؤ کو نہ صرف زیادہ مؤثر بلکہ سستا اور قابل رسائی بھی بنا سکتے ہیں

نبی کریم ﷺ کو مجسم رحمت بنا کر بھیجا گیا ہے۔اظہار محبت اور اظہار عقیدت ماہ ربیع الاول کی مناسبت سے ضرور ہونی چاہیے لیکن ان حدود و قیود کا خیال رکھا جائے جن کا حکم بعثت رحمت عالم ﷺ کے ساتھ تمام مومنین پر ضروری ہے ان کا پابند ہونا ہوگا۔اپنی ذات کو بالائے طاق رکھتے ہوئے ایک ایک لفظ پر عمل کرنا ہوگا۔

امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان نے بعثت رحمت عالم ﷺ کانفرنس لاہور کینٹ میں خواتین و حضرات کی بڑی تعداد سے خطاب کرتے ہوئے کہا کہماہ ربیع الاول کو ایام کے ساتھ مقید نہ کیا جائے۔ ہر مومن پر لازم ہے کہ وہ اپنی خواہشاتِ نفسانی کو پسِ پشت ڈالتے ہوئے شریعت کے بتائے ہوئے راستے پر چلے اور اپنے ہر قول و فعل کو شمعِ نبوت کی روشنی میں پرکھے۔ یہ محبت صرف چند رسمی تقریبات یا مخصوص ایام تک محدود نہیں، بلکہ اس کا تقاضا یہ ہے کہ ہم اپنی زندگی کے ہر سانس اور ہر لمحے کو آپ ﷺ کی سیرتِ طیبہ اور احکامات کے تابع بنا دیں۔ انہوں نے مزید کہا کہ حقیقی عید میلاد النبی وہی ہے جب ہماری پوری زندگی رسول اللہ ﷺ کے اسوہ حسنہ کی عملی تصویر بن جائے۔ اسی میں ہمارے ایمان کی تکمیل، ہماری محبت کی صداقت اور ہماری نجات کا راز پوشیدہ ہے۔

انہوں نے ملک میں موجود مختلف طبقات، بشمول علماء، تاجر برادری اور عدالتی نظام سے وابستہ افراد کو مخاطب کرتے ہوئے کہا کہ یہ تمام ادارے ملک کی ریڑھ کی ہڈی ہیں۔ انہوں نے کہا کہ ہمارے درمیان سیاسی اختلافات ہو سکتے ہیں، لیکن اگر یہ اختلاف ملک کو نقصان پہنچانے کی حد تک پہنچ جائیں تو ایسی صورت میں بحیثیت مسلمان ہمارا فرض بنتا ہے کہ ہم ملک کے تحفظ کو ترجیح دیں۔ انہوں نے کہا، ”جس طرح ہم اپنے گھر کا ٹوٹا ہوا برتن بھی باہر نہیں پھینکنا چاہتے، اسی طرح ہمیں اپنے ملک کے معاملات میں بھی احتیاط سے کام لینا چاہیے۔” انہوں نے حدیث مبارکہ کا حوالہ دیتے ہوئے کہا کہ نبی کریم ﷺ نے فرمایا ہے کہ راستے سے تکلیف دہ چیز کو ہٹانا ایمان کا حصہ ہے۔انہوں نے اللہ تعالیٰ سے دعا کی کہ وہ ہمیں سیرتِ نبوی ﷺ کو سمجھنے، اس پر عمل کرنے اور اس کی روشنی میں اپنی زندگیوں کو ڈھالنے کی توفیق عطا فرمائے۔اللہ کریم صحیح شعور عطا فرمائیں۔آخر میں انہوں نے ملکی سلامتی اور سیلاب زدگان کے لیے خصوصی دعا بھی فرمائی۔

یاد رہے کہ اس بابرکت پروگرام میں جہاں ہرطبقہ فکر کے لوگوں نے شرکت کی وہاں سیاسی و سماجی شخصیات کی بڑی تعداد بھی موجود تھی جن میں شیخ روحیل اصغر سابق مشیر وزیر اعظم،فیڈرل منسٹر رانا مبشر،تنویر اسلم سیتھی،بلال یاسین ایم پی اے،مولانا سرفراز اعوان،مولانا اسید الرحمان،سعد نذیر چئیر مین بلیو ورلڈ سٹی بھی شامل تھے