Category: لاہور

اسپیشلائزڈ ہیلتھ کیئر کے ڈائریکٹر مانیٹرنگ عتیق الرحمان کی سیالکوٹ میں ہسپتال عملے کے ساتھ بدتمیزی اور گالیوں کی ویڈیو سامنے آئی ہے جس میں دیکھا جا سکتا ہے کہ عتیق الرحمان عملے کے ساتھ انتہائی نامناسب رویئے کے ساتھ پیش آ رہے ہیں ، یہ ویڈیو بنا کر انہوں نے ٹک ٹاک پر بھی اپنے اکاؤنٹ پر اپلوڈ کر دی،

عتیق الرحمان نے علامہ اقبال میموریل ہسپتال سیالکوٹ کے عملے کے ساتھ انتہائی بدتمیزی اور بدسلوکی کی، حتیٰ کہ ایک موقع پر وہ عملے کو تھپڑ مارنے کی کوشش بھی کرتے ہوئے دیکھے گئے۔عتیق الرحمان نے ہسپتال کے عملے پر نازیبا زبان استعمال کی اور ان کے ساتھ بدسلوکی کی، جس سے ہسپتال کے اندر ایک ناخوشگوار صورتحال پیدا ہو گئی۔

مزید تشویشناک پہلو یہ ہے کہ عتیق الرحمان نے اس بدسلوکی کے مناظر کو اپنی ذاتی ٹک ٹاک ویڈیو پر بھی پوسٹ کیا، جس کا مقصد مبینہ طور پر سوشل میڈیا پر توجہ حاصل کرنا تھا۔ اس ویڈیو میں ان کا عملے کے ساتھ رویہ نہ صرف غیر پیشہ ورانہ بلکہ غیر اخلاقی بھی محسوس کیا جا رہا ہے۔شہریوں کا کہنا ہے کہ ایسے آفیسر کے خلاف کاروائی ہونی چاہئے جو عملے کے ساتھ بدتمیزی کے ساتھ پیش آتے ہیں اور پھر اس کی ویڈیو بنا کر وائرل کرتے ہیں، اگر افسران کو ٹک ٹاک بنانے کا شوق ہے تو ایسے افراد کو سرکاری ملازمتوں سے نکالا جائے

لاہور کے نواحی علاقے مناواں میں جنڈیالہ روڈ پر ایک مشتبہ ڈرون گرنے کا واقعہ پیش آیا۔

مقامی افراد کی اطلاع پر پولیس موقع پر پہنچی اور ڈرون کو اپنی تحویل میں لے لیا۔ ابتدائی تحقیقات کے مطابق شبہ ظاہر کیا جا رہا ہے کہ یہ ڈرون ممکنہ طور پر منشیات کی اسمگلنگ کے لیے استعمال کیا جا رہا تھا۔پولیس ذرائع کے مطابق، گرنے والا ڈرون جدید نوعیت کا ہے .ماہرین کی مدد سے ڈرون کا تجزیہ کیا جا رہا ہے تاکہ یہ معلوم کیا جا سکے کہ یہ کس مقام سے اڑایا گیا اور اس کے ذریعے کیا منتقل کیا جا رہا تھا۔

دوسری جانب اطلاعات ہیں کہ ڈرون بھارتی تھا جس کو سیکورٹی فورسز نے گرایا ہے، ڈرون کی پاکستانی حدود میں نقل و حرکت دیکھی گئی تھی، جس پر فوری کارروائی کی گئی۔ ابتدائی تحقیقات میں ڈرون کو سرویلنس کے لیے استعمال ہونے والا قرار دیا گیا ہے، اور اس میں کوئی بارودی مواد موجود نہیں تھا۔ حساس اداروں نے ڈرون کو تحویل میں لے کر مزید تحقیقات شروع کر دی ہیں۔

ڈرون کا اس طرح رہائشی علاقے میں آنا اور پھر گر جانا کئی سوالات کو جنم دیتا ہے، مقامی افراد میں اس واقعے کے بعد خوف و ہراس پایا جاتا ہے۔ شہریوں کا کہنا ہے کہ یہ پہلا موقع ہے کہ اس علاقے میں ایسا کوئی واقعہ پیش آیا ہے، اور حکام کو چاہیے کہ فضائی نگرانی کے ایسے واقعات پر نظر رکھیں تاکہ مستقبل میں کسی ناخوشگوار واقعے سے بچا جا سکے۔پولیس نے ڈرون قبضے میں لے کر سیف سٹی اتھارٹی اور حساس اداروں کو بھی اطلاع دے دی ہے، تاکہ ڈرون کی پرواز کی سمت اور کنٹرول کرنے والے مقام کا سراغ لگایا جا سکے۔

لاہور: فیصل ٹاؤن کے علاقے میں اکبر چوک فلائی اوور پر پیش آنے والے افسوسناک حادثے میں میاں بیوی جان کی بازی ہار گئے۔ پولیس کے مطابق حادثہ اُس وقت پیش آیا جب موٹرسائیکل سوار شوہر کو دل کا دورہ پڑا، جس کے باعث موٹرسائیکل بے قابو ہو کر فلائی اوور کی باؤنڈری وال سے ٹکرا گئی۔

جاں بحق ہونے والے 65 سالہ شیخ افضل اور اُن کی اہلیہ 60 سالہ عابدہ نور اقبال ٹاؤن سے فیروز پور روڈ پر واقع اپنے گھر واپس جا رہے تھے۔ فلائی اوور سے اترتے ہوئے شیخ افضل کو دل کا شدید دورہ پڑا، جس کے بعد ان کی موٹرسائیکل دیوار سے ٹکرا گئی۔ ٹکر کے نتیجے میں دونوں میاں بیوی فلائی اوور سے نیچے جا گرے۔پولیس کا کہنا ہے کہ خاتون عابدہ نور موقع پر ہی جاں بحق ہوگئیں جبکہ شوہر افضل کو تشویشناک حالت میں اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گئے۔ اہل خانہ اور اہلِ علاقہ اس حادثے پر شدید غمزدہ ہیں۔

دوسری جانب لاہور شہر میں دیگر مختلف مقامات پر بھی خطرناک ٹریفک حادثات میں مزید پانچ قیمتی جانیں ضائع ہو گئیں۔شاہکام فلائی اوور پر تیز رفتار کار کی ٹکر سے موٹرسائیکل سوار موقع پر جاں بحق ہو گیا جبکہ دو افراد زخمی ہوئے۔ پولیس نے واقعے کی ابتدائی رپورٹ درج کر کے تفتیش شروع کر دی ہے۔اسی مقام کے قریب کینال روڈ شاہکام چوک پر ایک اور افسوسناک واقعہ پیش آیا جہاں ایک کار کی ٹکر سے تین افراد جان سے ہاتھ دھو بیٹھے اور دو مزید زخمی ہو گئے۔ زخمیوں کو فوری طور پر قریبی اسپتال منتقل کر دیا گیا جہاں ان کی حالت تشویشناک بتائی جا رہی ہے۔پولیس کا کہنا ہے کہ ابتدائی تفتیش کے مطابق حادثات کی بنیادی وجہ تیز رفتاری اور غیر محتاط ڈرائیونگ ہے۔شہر میں بڑھتے ہوئے حادثات کے پیش نظر شہریوں سے احتیاطی تدابیر اختیار کرنے کی اپیل کی گئی ہے۔ پولیس نے سختی سے ہدایت کی ہے کہ موٹرسائیکل سوار ہیلمٹ اور حفاظتی سامان کا استعمال کریں اور گاڑی چلاتے وقت رفتار پر قابو رکھیں۔

وزیراعلیٰ پنجاب مریم نواز شریف سے لاہور میں تعینات ہونے والے امریکہ کے نئے قونصل جنرل اسٹیٹسن سینڈرزنے ملاقات کی۔

وزیراعلیٰ مریم نواز شریف نے اسٹیٹسن سینڈرز کو لاہور آمد پر خوش آمدید کہا اور قونصل جنرل کا منصب سنبھالنے پر دلی مبارکباد دی۔ ملاقات میں باہمی دلچسپی کے امور،تجارتی تعلقات،توانائی تعاون، ٹیکنالوجی، زراعت اور تعلیمی تبادلوں پر تفصیلی تبادلہ خیال کیا گیا۔ وزیراعلیٰ مریم نواز شریف نے امریکی صدر ڈونلڈ ٹرمپ کی جانب سے پاکستان اور بھارت کے درمیان ثالثی کی کوششوں کو سراہا۔وزیراعلیٰ مریم نواز شریف نے کہا کہ اسٹیٹسن سینڈرز کی تعیناتی تب ہوئی جب پاکستان اور امریکہ کے تعلقات میں مثبت پیش رفت دیکھنے میں آ رہی ہے۔ پاک امریکہ تعلقات کئی دہائیوں پر محیط ایک قابلِ اعتماد،مستحکم اور دور رس شراکت داری کی بنیاد پر قائم ہیں۔ عوامی رابطوں، تجارتی تعاون اور مشترکہ مفادات نے پاک امریکہ پارٹنرشپ کو مزید مضبوط کیا ہے۔وزیراعلیٰ مریم نواز شریف نے کہا کہ 2024 میں پاکستان اور امریکہ کے درمیان تجارتی حجم میں اضافہ خوش آئند امرہے۔امریکہ پاکستان کا سب سے بڑا تجارتی شراکت دار اور قابلِ اعتماد اقتصادی پارٹنر ہے۔ پاکستانی نژاد امریکی برادری دونوں ممالک کے درمیان عوامی روابط کی ایک مضبوط کڑی ہے۔اپریل 2025 میں امریکی کانگریشنل پاکستان کاکس سے بھی ملاقات کر چکی ہوں۔ وزیراعلیٰ مریم نواز شریف نے کہا کہ پنجاب میں ہر سال 20 ہزار سے زائد آئی ٹی گریجویٹس فارغ تحصیل ہو رہے ہیں۔ پنجاب پاکستان کی زرعی ریڑھ کی ہڈی ہے۔ پنجاب حکومت واٹر ایفیشنٹ فارمنگ، پریسیژن ایگریکلچر اور کولڈ چین انفرااسٹرکچر کی ترقی کو ترجیح دے رہی ہے۔ امریکی ایگریکلچر ٹیکنالوجی کمپنیاں پنجاب میں سرمایہ کاری کے بے شمار مواقع سے فائدہ اٹھا سکتی ہیں۔پاکستان اور امریکہ کا تعلق ایک آزمودہ، بااعتماد اور پائیدار شراکت داری کی مثال ہے۔وزیراعلیٰ مریم نواز شریف نے کہا کہ پاک امریکہ تعلق کو ایک جامع، اسٹریٹجک اور عوامی مفاد پر مبنی پارٹنرشپ میں تبدیل کرنے کے لیے پُرعزم ہیں۔پنجاب میں جدید ترین ٹیکنالوجی سے لیس نئی الیکٹرک ٹرین متعارف کرائی جا رہی ہے۔ پنجاب میں اپنی چھت اپنا گھر کے تحت چند ماہ کے قلیل عرصے میں پبلک سیکٹر ہاؤسنگ میں قابل تقلید مثال قا ئم کی۔

سبی ریلوے اسٹیشن کے قریب ریلوے ٹریک پر دھماکے کی کوشش کی گئی جس کا مقصد پشاور جانے والی جعفر ایکسپریس کو نقصان پہنچانا تھا۔ خوش قسمتی سے دھماکہ جعفر ایکسپریس کے گزر جانے کے بعد ہوا، جس کے باعث نہ تو ٹرین کو کوئی نقصان پہنچا اور نہ ہی مسافروں کو کوئی جسمانی نقصان ہوا۔

ریلوے حکام کے مطابق یہ واقعہ جعفر ایکسپریس کے سبی اسٹیشن سے روانہ ہونے کے فوراً بعد پیش آیا۔ دھماکے کی جگہ پر فوری طور پر سیکیورٹی فورسز اور ریلوے عملے نے پہنچ کر علاقے کو محفوظ بنایا اور تحقیقات شروع کر دی گئی ہیں۔ حکام کا کہنا ہے کہ دھماکہ خیز مواد کس نے اور کس مقصد کے لیے رکھا تھا، اس کی چھان بین جاری ہے۔ریلوے حکام نے عوام کو یقین دہانی کرائی ہے کہ جعفر ایکسپریس کو معمول کے مطابق سبی سے پشاور کے لیے روانہ کر دیا گیا ہے اور ریلوے کی سیکیورٹی کو مزید بڑھا دیا گیا ہے تاکہ مستقبل میں ایسے واقعات سے بچا جا سکے۔