Category: لاہور

وفاقی وزیر ریلویز محمد اعظم خان سواتی سے پاکستان ریلوے کی ٹریڈ یونینز کے وفود کی ریلوے ہیڈکوارٹرز آفس لاہور میں ملاقات ہوئی ہے. ملاقاتیں ریل مزدور اتحاد کے مرکزی صدر عنائت علی گجر،پریم یونین کے مرکزی صدرحافظ سلیمان بٹ اور پاکستان لیبر فیڈریشن یونین کے سیکرٹری جنرل حاجی سعید آرائیں کی قیادت میں ہوئیں.

یونینز وفود میں شامل عہدیداروں نے وزیر ریلویز محمد اعظم خان سواتی کو ریلوے ملازمین کے مسائل اور ریلوے کے نظام کو بہتر اور منافع بخش بنانے کے حوالے سے تجاویز پیش کیں. اس موقع پر وزیر ریلویز محمد اعظم خان سواتی نے یونینز وفود کو ریلوے ملازمین کے جائز مطالبات اور مسائل کو حل کرنے کی یقین دہانی کروائی۔

انہوں نے کہا کہ ہماری بنیادی ذمہ داری ٹرین آپریشن چلانا ہے جس پر پوری توجہ دے رہے ہیں، محکمہ کی بہتری اور منافع بخش بنانے کے حوالے سے جو بھی تجاویز ہوں گی ان پر ضرور غور کیا جائے گا. انہوں نے کہا کہ کرپشن کے خاتمے کے لئے میرے دروازے ہر وقت کُھلے ہیں، آپ لوگ میرا ساتھ دیں، اب ریلوے میں سیاست نہیں ہو گی بلکہ خدمت ہو گی

انہوں نے کہا کہ مزدوروں کے ساتھ ساتھ افسروں کو بھی ایک ساتھ لیکر چلنا ہے. بعد ازاں وفاقی وزیر ریلوے محمد اعظم خان سواتی نے ریلوے کے شعبہ کیٹرنگ سے وابسطہ کام کرنے والے ٹھیکداروں سے ملاقات کی جس میں اُنہوں نے اُن کے جائز مطالبات اور شکایات سنیں اور موقع پر ہی اُن کے ازالے کے لئے اُنہیں یقین دہانی کروائی
ہے.

اس موقع پر وزیر ریلوے نے اپنے خیالات کا اظہار کرتے ہوئے کہا کہ اب کوئی افسر آپ کے ساتھ کمیشن لینے کا سوچ بھی نہیں سکے گا۔، آپ کا براہ راست میرے ساتھ رابطہ رہے گا، میں ایسا سسٹم لا رہا ہوں جس میں شکایات کا فوری ازالہ ممکن ہو سکے گا.

وزیر ریلوے نے کیٹرنگ ٹھیکداروں کی ریلوے میں ٹھیکہ نہ ملنے کی صورت میں سیکورٹی کی مد میں پڑی رقم کو ایک ہفتے میں ادا کرنے کا بھی وعدہ کیا ہے ۔ اُنہوں نے کہا کہ آئندہ ایسا کنٹریکٹ تیار کیا جائے جس میں انہیں تمام سہولتیں دی جائیں گی جو کنٹریکٹ کا حصہ ہوں اور ہم اس کے پابند ہوں گے، کوئی پولیس اہلکار یا ریلوے ملازم آئندہ آپ سے مفت میں کوئی چیز نہیں کھائے گا اور نہ ہی ناجائز آپ کے کام میں مداخلت کرسکیں گے۔

بعدازاں وفاقی وزیر ریلوے اعظم خان سواتی نے رائل پام گالف اینڈ کنٹری کلب کا دورہ کیا۔ دورے کے دوران رائل پام گالف اینڈ کنٹری کلب کی انتظامیہ نے وفاقی وزیر کو رائل پام کو سپریم کورٹ کے احکامات کے مطابق چلانے کے حوالے سے تفصیلی بریفنگ دی۔ وفاقی وزیر ریلوے نے رائل پام مینجمنٹ کمیٹی سے خطاب کرتے ہوئے کہا کہ آپ بزنس مین کے لیے آسانی پیدا کریں اُسے سہولت دیں اور تبھی آپ کی زمینیں کمرشل بنیادوں پر چل سکیں گی، آپ مجھے تجاویز دیں میں آپ کے بزنس پلان میں اپنا حصہ ڈالوں گا، اس کی مکمل کمرشل ایکپلائٹیشن کے لیے ہرممکن کوشش کرتارہوں گا۔

بریفنگ کے دوران چیف ایگزیکٹوآفیسر پاکستان ریلویز نثار احمد میمن، ایڈیشنل جنرل منیجر ٹریفک سید مظہر علی شاہ، ایڈیشنل جنرل منیجرشاہ رخ افشار، ڈویژنل سپرنٹنڈنٹ لاہور ڈویژن عامر نثار چوہدری، مشیر وزیرریلوے دستگیر بلوچ چیف کمرشل منیجر پسنجر فاروق اقبال اور رائل پام وائس پریزیڈنٹ احمد سعید اقبال ملک بھی موجود تھے۔

سینئر وزیر پنجاب عبدالعلیم خان نے پاکستان میں جرمنی کے سفیر برنہارڈ شلاگیک سے ملاقات کی ہے. لاہور میں ہونے والی اس ملاقات میں دونوں شخصیات نے باہمی دلچسپی کے امور پر تبادلہ خیال کیا ہے. سینئر وزیر پنجاب اور جرمنی کے سفیر کی دونوں ممالک کے مابین تعلقات پر تفصیلی بات چیت ہوئی ہے.

سینئر وزیر پنجاب عبدالعلیم خان نے کہا کہ پاکستان اور جرمنی کے مابین بالخصوص ٹیکنیکل ایجوکیشن میں بہت سکوپ ہے، جرمنی کی ترقی اور بحیثیت قوم اُن کی کامیابیاں لائق تقلید ہیں،
تعلیم اور صحت کے علاوہ دیگر شعبوں میں بھی باہم تعاون ہو سکتا ہے. انہوں نے کہا کہ وزیر اعظم عمران خان ملک کو مضبوط اور خوشحال بنانے کے خواہاں ہیں. عبدالعلیم خان نے جرمن سفیر کے لئے خیر سگالی کا پیغام دیا ہے اور دورہ لاہور پر خوشی کا اظہار کیا ہے.

جرمن سفیر برنہارڈ شلاگیک نے پنجاب میں جاری مختلف منصوبوں میں دلچسپی کا اظہار کیا ہے.
برنہارڈ شلاگیک نے کہا کہ جرمنی پاکستان کے لئے دو طرفہ تعاون میں اضافے کا متمنی ہیں، دورہ یادگارد،زندہ دلان لاہور کی مہمان نوازی سے متاثر ہوں.

صوبائی وزیر صنعت و تجارت میاں اسلم اقبال نے صوبائی حلقے 170 کے علاقے گوجر کالونی کا دورہ کیا ہے.

میاں اسلم اقبال نے لاہور ویسٹ مینجمنٹ کمپنی کے تحت جاری صفائی آپریشن کاجائزہ لیا اور لوگوں کے مسائل سنے. ممبر پنجاب اسمبلی چوہدری امین، پی ٹی آئی رہنما عون چوہدری،ڈی ایم ڈی، ایل ڈبلیوایم سی اور جی ایم آپریشنز بھی اس موقع پر موجود تھے. صوبائی وزیر نے علاقے کے عوام کو صفائی، نکاسی آب اور دیگر مسائل کے حل کی یقین دہانی کرائی ہے.

صوبائی وزیر صنعت و تجارت میاں اسلم اقبال نے لوگوں کے اجتماع سے خطاب کیا ہے. انہوں نے کہا کہ عوام کے مسائل کا حل اور ان کے معیار زندگی کو بہتر بنانا ہماری اولین ترجیح ہے، پاکستان تحریک انصاف نعروں پر نہیں، عملی اقدامات پر یقین رکھتی ہے. میاں اسلم اقبال نے کہا کہ پی ٹی آئی کی حکومت نے اڑھائی سالوں میں عوامی فلاح کے ریکارڈ کے منصوبے مکمل کئے ہیں، ن لیگ اور پیپلز پارٹی نے کرپشن کے ریکارڈ بنائے ہیں ، ہم عوامی خدمت کے ریکارڈ بنارہے ہیں. انہوں نے کہا کہ ماضی میں ترقیاتی منصوبوں کے نام پر کی گئی لوٹ مار کو عوام ابھی بھولے نہیں ہیں، پنجاب میں ایک شعبدہ باز نے ذاتی تشہیر کے لئے نمائشی منصوبوں پر وسائل ضائع کئے ہیں.

انہوں نے کہا کہ سابق حکمرانوں کی غلط ترجیحات اور ناقص معاشی پالیسیوں کا خمیازہ عوام کو بھگتنا پڑ رہا ہے، ملک کی معاشی تباہی کے ذمہ دار دو خاندانوں نے قوم کی لوٹی ہوئی دولت سے بیرون ملک محلات کھڑے کئے ہیں،
اپنی لوٹی ہوئی دولت بچانے اور این آر او کے حصول کے لئے احتجاج کا ڈرامہ کر رہے ہیں. انہوں نے کہا کہ عمران خان کے ہوتے ہوئے کرپٹ ٹولے کو این آر او ملے گا اور نہ ہی لوٹی ہوئی دولت بچے گی، وزیر اعظم عمران خان کی قیادت میں عوام کرپشن کے خلاف جنگ جیتں گے.
ان کا کہنا ہے کہ عوام کا سیاسی بے روزگاروں کی منفی اور انتشار کی سیاست سے کوئی سروکار نہیں، مفاد پرست ٹولے کو ہر محاذ پر ناکامی کے بعد اپنی سیاست ڈوبتی نطر آرہی ہے.

میاں اسلم اقبال نے کہا کہ وزیر اعظم عمران خان کی قیادت میں ملک میں تبدیلی اور معاشی ترقی کی منزل پائیں گے، علاقے میں گرلز کالج اور مدر اینڈ چائلڈ کئر ہسپتال کے قیام کے لئے وزیر اعلیٰ پنجاب سے بات کرونگا، علاقے کے عوام کو درپیش تمام مسائل حل کریں گے.