Category: لاہور

واہگہ اٹاری بارڈر پر پاکستان اور بھارت کے درمیان قیدیوں کا تبادلہ کامیابی سے مکمل ہوگیا۔ سیکیورٹی ذرائع کے مطابق انڈین بارڈر سیکیورٹی فورس (بی ایس ایف) کے اہلکار پرنم کمار سنگھ کو بھارتی حکام کے حوالے کر دیا گیا۔

، پنجاب رینجرز کے اہلکار محمداللّٰہ کو پاکستانی حکام کے سپرد کیا گیا۔ یہ حوالگی کی کارروائی آج صبح 10 بجے مکمل کی گئی۔بی ایس ایف کا اہلکار پرنم کمار سنگھ 23 اپریل کو پاکستان کی سرحدی حدود کی خلاف ورزی کرتے ہوئے گرفتار ہوا تھا۔ ذرائع کے مطابق، سنگھ نے قصور بارڈر کراس کیا تھا اور اس کے پاس ایک رائفل بھی تھی، جس کے باعث اسے بین الاقوامی سرحد کی خلاف ورزی کے الزام میں حراست میں لیا گیا تھا۔یہ قیدیوں کا تبادلہ دونوں ممالک کے درمیان اچھے تعلقات کے فروغ کے لیے ایک مثبت قدم سمجھا جا رہا ہے، جس سے دونوں طرف کے شہریوں کے درمیان امن اور ہم آہنگی کی فضا قائم کرنے کی کوشش کی جا رہی ہے۔

لاہور میں افسوسناک ٹریفک حادثے کے نتیجے میں 5 افراد جان کی بازی ہار گئے جبکہ 3 افراد شدید زخمی ہو گئے۔

ق ہولناک حادثہ لاہور کے مصروف علاقے باغبان پورہ کے جی ٹی روڈ پر اس وقت پیش آیا جب ایک بے قابو ڈمپر نے سڑک کنارے کھڑے تین رکشوں اور دو موٹرسائیکلوں کو زوردار ٹکر مار دی۔ریسکیو 1122 کے مطابق حادثہ اتنا شدید تھا کہ رکشے اور موٹرسائیکلیں مکمل طور پر تباہ ہو گئیں اور کئی افراد موقع پر ہی دم توڑ گئے۔ جائے وقوعہ پر چیخ و پکار مچ گئی اور ارد گرد کے لوگ مدد کو پہنچے۔ریسکیو حکام کے مطابق پانچ افراد موقع پر جاں بحق ہو گئے جبکہ تین افراد کو شدید زخمی حالت میں اسپتال منتقل کر دیا گیا ہے۔ زخمیوں کو قریبی اسپتال میں طبی امداد فراہم کی جا رہی ہے جن میں سے دو کی حالت تشویشناک بتائی جا رہی ہے۔

ابتدائی تحقیقات کے مطابق ڈمپر کی بریک فیل ہونے کی اطلاعات ہیں تاہم حتمی وجہ کا تعین تفتیش مکمل ہونے کے بعد کیا جائے گا۔ حادثے کے بعد ڈرائیور موقع سے فرار ہو گیا، جس کی تلاش جاری ہے۔پولیس نے جائے حادثہ کو گھیرے میں لے کر شواہد اکٹھے کرنا شروع کر دیے ہیں جبکہ جاں بحق افراد کی شناخت کا عمل بھی جاری ہے۔

حادثے کے بعد جی ٹی روڈ پر ٹریفک کا نظام درہم برہم ہو گیا، تاہم ٹریفک پولیس کی بروقت کارروائی سے سڑک کو کلیئر کر دیا گیا۔عینی شاہدین کا کہنا ہے کہ ڈمپر کی رفتار بہت زیادہ تھی اور ڈرائیور نے گاڑی پر کنٹرول کھو دیا، جس کے باعث یہ اندوہناک واقعہ پیش آیا۔ شہریوں نے انتظامیہ سے مطالبہ کیا ہے کہ ایسے بھاری گاڑیوں کی نگرانی کے لیے سخت اقدامات کیے جائیں تاکہ آئندہ اس قسم کے حادثات سے بچا جا سکے۔

لاہور کے پوش علاقے ڈیفنس فیز 6 سے اغوا ہونے والے 64 سالہ معروف جنرل سرجن ڈاکٹر طاہر جمیل کو پولیس نے چند گھنٹوں کی کوشش کے بعد قصور سے بحفاظت بازیاب کروا لیا۔ اس اہم کارروائی میں کرائم کنٹرول ڈیپارٹمنٹ نے مرکزی کردار ادا کیا، جبکہ ڈی آئی جی آپریشنز فیصل کامران نے واقعے کو "ریڈ لائن” قرار دیتے ہوئے فوری کارروائی کی ہدایت دی۔

ذرائع کے مطابق ڈاکٹر طاہر جمیل ایک نجی اسپتال سے اپنی رہائش گاہ کی جانب روانہ تھے کہ دو موٹر سائیکلوں پر سوار نامعلوم مسلح افراد نے ان کی گاڑی کو روکا اور اسلحے کے زور پر انہیں اغوا کر کے ساتھ لے گئے۔ واردات کی اطلاع ملتے ہی لاہور پولیس حرکت میں آ گئی، شہر کے داخلی و خارجی راستوں پر ناکہ بندی کر دی گئی اور تفتیشی ٹیموں نے شواہد اکٹھے کرنا شروع کیے۔پولیس کی بروقت کارروائی کے نتیجے میں اغوا کاروں کا سراغ لگایا گیا، جس کے بعد کرائم کنٹرول ڈیپارٹمنٹ نے قصور میں کارروائی کر کے ڈاکٹر طاہر جمیل کو بازیاب کروایا۔ پولیس حکام کے مطابق جیسے ہی اغوا کاروں کو پولیس کی نقل و حرکت کا علم ہوا، انہوں نے گرفتاری سے بچنے کے لیے مغوی کو چھوڑ دیا اور فرار ہو گئے۔

ڈی آئی جی آپریشنز فیصل کامران خود جائے وقوعہ پر پہنچے، شواہد کا تفصیلی جائزہ لیا اور متاثرہ خاندان سے ملاقات کی۔ انہوں نے ڈاکٹر طاہر جمیل کی بحفاظت واپسی کی یقین دہانی کرائی اور واقعے کو ایک سنگین خطرہ قرار دیتے ہوئے کہا”یہ واقعہ ریڈ لائن ہے۔ شہریوں کی جان و مال کا تحفظ ہماری اولین ترجیح ہے، اغوا کاروں کو جلد از جلد گرفتار کیا جائے گا۔”ترجمان پولیس کے مطابق اغوا کی واردات کسی منظم گروہ کا کام لگتی ہے، تاہم جلد ہی مجرمان کو قانون کے کٹہرے میں لایا جائے گا۔ سی سی ٹی وی فوٹیج، موبائل ڈیٹا اور دیگر تکنیکی شواہد کی مدد سے تفتیش جاری ہے۔

ملکی صورتحال پر تبادلہ خیال،ملکی استحکام، یکجہتی اور اتحاد کیلئے تمام طبقات کو مل کر چلنا ہو گا۔قاری یعقوب شیخ

پاکستان مرکزی مسلم لیگ کے جوائنٹ سیکرٹری قاری محمد یعقوب شیخ کی سابق امیر جماعت اسلامی سراج الحق اور امیر ہدیۃ الہادی پاکستان پیر سید ہارون علی گیلانی سے ملاقات ہوئی ہے،ملاقات میں ملی و دینی امور، اتحادِ امت اور موجودہ ملکی صورتِ حال پر تفصیلی تبادلہ خیال کیا گیا۔

ملاقات میں باہمی مشاورت سے اس بات پر اتفاق ہوا کہ دین کی سربلندی، ملک کے استحکام، یکجہتی اور اتحاد کیلئے تمام طبقات کو مل کر چلنا ہو گا۔ قاری محمد یعقوب شیخ کا کہنا تھا کہ کہ علماء کرام کا اتحاد اورمشترکہ لائحہ عمل وقت کی اہم ترین ضرورت ہے۔مسلح افواج نے بھارتی جارحیت پر منہ توڑ جواب دیا،پاکستانی قوم آپریشن بنیان مرصوص کے دوران افواج پاکستان کے شانہ بشانہ تھی،پاکستان پر جب بھی مشکل وقت آیا دینی قوتیں بھی دفاع پاکستان کے لیے صف اول میں نظرآتی ہیں،

قاری محمد یعقوب شیخ نے سابق امیر جماعت اسلامی سراج الحق اور امیر ہدیۃ الہادی پاکستان پیر سید ہارون علی گیلانی کو مرکزی مسلم لیگ کے صلاحیت بڑھاؤ، اپنا کماؤ پروگرام بارے بریف کرتے ہوئے کہا کہ دس روزہ کورس میں ملک بھر سے ایک لاکھ سے زائد مردوخواتین نے کلاسز لی ہیں، مرکزی مسلم لیگ نوجوانوں کو ہنرمندبنانا چاہتی ہے، ہم چاہتے ہیں کہ نوجوان بیرون ملک جانے کی بجائے گھر بیٹھ کر ہنر سیکھیں اور پاکستانی معیشت کے استحکام میں کردار ادا کریں، جماعت اسلامی اور ہدیۃ الھادی پاکستان کے رہنماؤں نے مرکزی مسلم لیگ کے صلاحیت بڑھاؤ، اپنا کماؤ پروگرام کی کامیابی کو سراہا .

پاکستان مرکزی مسلم لیگ کے صدرخالد مسعود سندھو نے کہا ہے کہ پاکستان کی مسلح افواج نے بھارت کی عددی برتری اور عسکری غرور کو خاک میں ملا کر یہ ثابت کر دیا کہ جذبۂ ایمانی اور وطن سے محبت کسی بھی طاقت پر غالب آ سکتی ہے۔بھارتی حملے میں شہید ہونے والی مساجد کا حکومت کی جانب سے تعمیر کا اعلان خوش آئند ہے.

خالد مسعود سندھو نے معرکہ حق کے دوران پاک فضائیہ کے 5 اور پاک فوج کے 6 افسران و جوانوں کی عظیم قربانیوں کو سراہتے ہوئے کہا کہ ان سپوتوں نے اپنی جانوں کا نذرانہ دے کر ملک کی سالمیت، خودمختاری اور دفاع کو یقینی بنایا۔ مجھے اور پوری قوم کو اپنے ان شہداء پر فخر ہے، اور ہم شہدا کے اہل خانہ کے ساتھ مکمل یکجہتی کا اظہار کرتے ہیں، قوم اپنے بہادر سپوتوں کی قربانیوں کو کبھی فراموش نہیں کرے گی،آپریشن بنیان المرصوص کی کامیابی بھارت کے لیے ایک واضح پیغام ہے کہ پاکستان اپنی سرزمین کا دفاع کرنا جانتا ہے .

خلاد مسعود سندھو نے بھارتی جارحیت کے نتیجے میں 15 کم سن بچوں اور 7 خواتین سمیت 40 معصوم شہریوں کی شہادت پر تعزیت کا اظہار کرتے ہوئے کہا کہ شہدائے وطن کو ہم نہ بھولے ہیں، نہ بھولیں گے،پاکستانی قوم شہدا کی قربانیوں کی مقروض ہے، مرکزی مسلم لیگ کا ہر کارکن دفاع وطن کے لئے ہمیشہ تیار و بیدار ہے.