Category: لاہور

لاہور میں تقریباً 25 برس کے طویل وقفے کے بعد بسنت کے رنگ ایک بار پھر شہر میں لوٹ آئے، جس سے شہریوں میں خوشی اور جوش و خروش کی فضا قائم ہو گئی۔ شہر کی گلیوں، محلّوں اور چھتوں پر رنگ برنگی پتنگیں آسمان کی زینت بن گئیں، جبکہ نوجوانوں کے ساتھ ساتھ بزرگ اور بچے بھی بسنت کی خوشیوں میں شریک دکھائی دیے۔

بسنت کی اس بحالی میں جہاں عام شہری پتنگ بازی کے شوق میں پیش پیش نظر آئے، وہیں سینئر صحافی، معروف اینکر پرسن اور باغی ٹی وی کے سی ای او مبشر لقمان بھی کسی سے پیچھے نہ رہے۔ مبشر لقمان لاہور میں بسنت منانے کے لیے خود چھت پر پہنچ گئے، پتنگ اڑائی اور روایتی بسنتی ماحول سے بھرپور لطف اٹھایا، مبشر لقمان کی جانب سے ہفتہ کے روز لاہور میں خاندان اور قریبی دوستوں کے ساتھ بسنت منانے کا خصوصی اہتمام کیا گیا ہے۔ اس حوالے سے لاہور کے علاقے مزنگ میں تیاریاں مکمل کر لی گئی ہیں، جہاں روایتی انداز میں بسنت فیسٹیول منانے کے انتظامات کیے گئے ہیں .

لاہور: باغبانپورہ کے علاقے میں پتنگ بازی ایک اور قیمتی جان لے گئی۔ مدینہ کالونی باغبانپورہ میں والدین کا اکلوتا 18 سالہ بیٹا زین پتنگ پکڑتے ہوئے چھت سے گر کر جاں بحق ہو گیا،

باغی ٹی وی کی نمائندہ خصوصی نور فاطمہ کے مطابق نوجوان زین چھت پر موجود تھا کہ اسی دوران فضا میں اڑتی ہوئی پتنگ کو پکڑنے کی کوشش میں توازن برقرار نہ رکھ سکا اور اچانک نیچے جا گرا اور زخموں کی تاب نہ لاتے ہوئے دم توڑ گیا،اہلِ خانہ کے مطابق زین والدین کا اکلوتا بیٹا تھا، جس کی اچانک موت نے پورے گھر کو اجاڑ کر رکھ دیا۔ واقعے کے بعد محلے داروں اور رشتہ داروں کی بڑی تعداد متاثرہ خاندان کے گھر پہنچ گئی، جہاں کہرام مچا ہوا تھا۔

ادھر شہر بھر میں بسنت اور پتنگ بازی کے دوران حادثات کا سلسلہ تشویشناک حد تک بڑھ گیا ہے۔ پولیس اور ریسکیو حکام کے مطابق گزشتہ 15 گھنٹوں کے دوران پتنگ بازی اور چھتوں سے گرنے کے مختلف واقعات میں 2 شہری جاں بحق جبکہ 29 افراد زخمی ہو چکے ہیں۔ زخمیوں میں بچے اور نوجوان بھی شامل ہیں، جنہیں مختلف اسپتالوں میں طبی امداد فراہم کی جا رہی ہے۔

ریسکیو حکام کا کہنا ہے کہ بیشتر حادثات غیر محفوظ چھتوں، حفاظتی تدابیر کے فقدان اور غفلت کے باعث پیش آئے۔ شہریوں کو بار بار خبردار کیا جا رہا ہے کہ وہ پتنگ بازی کے دوران احتیاطی تدابیر اختیار کریں اور بچوں کو چھتوں پر اکیلا نہ چھوڑیں۔پولیس اور ضلعی انتظامیہ نے ایک بار پھر والدین اور شہریوں سے اپیل کی ہے کہ وہ پتنگ بازی جیسے خطرناک مشاغل سے گریز کریں تاکہ مزید قیمتی جانوں کا ضیاع روکا جا سکے۔ پتنگ بازی کی خوشی ایک لمحے میں زندگی بھر کا غم بن سکتی ہے

مرکزی مسلم لیگ کے صدر خالد مسعود سندھو نے اسلام آباد کے علاقے ترلائی میں واقع امام بارگاہ میں ہونے والے خودکش دھماکے کی شدید الفاظ میں مذمت کرتے ہوئے کہا ہے کہ امام بارگارہ میں دھماکا دہشتگردوں کی انتہائی بزدلانہ کارروائی ہے ،دہشتگرد ملک و ملت کے دشمن ہیں اور ایسی مذموم کارروائیوں کے ذریعے قوم کے حوصلے پست نہیں کیے جا سکتے۔

خالد مسعود سندھو نے دھماکے کے نتیجے میں جاں بحق ہونے والے افراد کے لواحقین سے دلی اظہارِ تعزیت کرتے ہوئے کہا کہ ہم غم کی اس گھڑی میں متاثرہ خاندانوں کے ساتھ کھڑے ہیں، جبکہ زخمیوں کی جلد اور مکمل صحتیابی کے لیے دعاگو ہیں،خالد مسعود سندھو کا کہنا تھا کہ امام بارگاہ میں ہونے والا دھماکہ پاکستان دشمن عناصر کی ایک اور ناکام کوشش ہے، جو دہشتگردی اور تخریب کاری کے ذریعے وطنِ عزیز کو عدم استحکام سے دوچار کرنا چاہتے ہیں، پاکستانی قوم دہشتگردی کے خلاف متحد ہے اور ایسے عناصر کے ناپاک عزائم کو کبھی کامیاب نہیں ہونے دے گی،

لاہور: پاکستان مسلم لیگ (ن) کے قائد اور سابق وزیراعظم نواز شریف بھی لاہور میں بسنت کی بعض تقریبات میں شرکت کریں گے۔

ذرائع کے مطابق نواز شریف نے بسنت کے موقع پر ایک دن اندرونِ شہر میں گزارنے کا پروگرام ترتیب دیا ہے، جہاں وہ اپنے قریبی اور پرانے دوستوں کے ساتھ بسنت منائیں گے اور ماضی کی یادیں تازہ کریں گے۔نواز شریف ممکنہ طور پر بلال یاسین کے گھر کی چھت پر بسنت منائیں گے،ذرائع کا کہنا ہے کہ اندرونِ لاہور میں منعقد ہونے والی اس نجی تقریب میں محدود افراد کو مدعو کیا گیا ہے، جہاں روایتی انداز میں بسنت کا جشن منایا جائے گا۔ نواز شریف اس موقع پر لاہوری ثقافت، پرانی روایات اور اپنے بچپن و لڑکپن کی یادوں کو بھی دوستوں کے ساتھ شیئر کریں گے۔

نواز شریف کو لاہوری کلچر سے خصوصی لگاؤ ہے اور وہ ہمیشہ بسنت کو پنجاب کا ایک اہم ثقافتی اور موسمی تہوار قرار دیتے رہے ہیں۔ ذرائع کے مطابق گزشتہ کئی ماہ سے نواز شریف محفوظ بسنت کے انعقاد کے لیے متحرک رہے اور اس حوالے سے پنجاب کے کلچر اور ثقافت سے وابستہ افراد سے متعدد ملاقاتیں بھی کیں۔ ان ملاقاتوں میں اس بات پر زور دیا گیا کہ بسنت کو ایسے طریقے سے منایا جائے جس سے کسی قسم کا جانی یا مالی نقصان نہ ہو۔نواز شریف کا مؤقف ہے کہ بسنت صرف ایک تہوار نہیں بلکہ پنجاب کی تہذیب اور ثقافت کی نمائندہ علامت ہے۔ ان کے مطابق بسنت کے ذریعے نہ صرف پنجاب کا مثبت تشخص اجاگر ہوتا ہے بلکہ اس سے مقامی معیشت، سیاحت، دستکاری، پتنگ سازی اور دیگر وابستہ کاروباروں کو بھی فروغ ملتا ہے۔ذرائع کے مطابق نواز شریف نے اندرونِ لاہور میں اپنے بچپن اور لڑکپن کا خاصا وقت گزارا ہے اور بسنت ان یادوں کا اہم حصہ رہی ہے، اسی لیے وہ اس تہوار کو محفوظ انداز میں بحال کرنے کے حامی رہے ہیں۔

واضح رہے کہ لاہور میں 6 سے 8 فروری تک بسنت کا تہوار منایا جا رہا ہے، جس کے لیے صوبائی حکومت، ضلعی انتظامیہ اور شہریوں کی جانب سے بھرپور انتظامات کیے گئے ہیں۔ شہر بھر میں چھتوں، گلیوں اور کھلے مقامات پر بسنت کی رونقیں دیکھنے میں آ رہی ہیں جبکہ سیکیورٹی اور حفاظتی اقدامات کو بھی یقینی بنایا جا رہا ہے۔

‎لاہور میں بسنت کا تہوار پوری آب و تاب کے ساتھ منانے کی تیاریاں مکمل کر لی گئی ہیں۔ شہر بھر میں بسنت کا رنگ نمایاں ہو چکا ہے اور شہری رات بارہ بجے کے بعد پتنگ بازی، پیچ لڑانے اور روایتی نعروں کے ساتھ تہوار کا آغاز کریں گے۔
‎اندرون لاہور میں گھروں کی چھتیں سجا دی گئی ہیں جبکہ مختلف علاقوں میں میلے کا سماں ہے۔ گلی محلوں میں پتنگوں اور ڈور کی خریداری عروج پر ہے اور بازاروں میں غیر معمولی رش دیکھا جا رہا ہے۔
‎بچے، نوجوان اور بزرگ سب ہی بسنت کے جوش میں مبتلا ہیں۔ شہر بھر میں خوشی، رنگ اور رونق کا ماحول ہے اور شہری بہار کے اس روایتی تہوار کو منانے کے لیے بے تاب نظر آ رہے ہیں۔