Category: لاہور

‎لاہور کے علاقے گلبرگ میں واقع ایک ہوٹل میں آگ لگنے کے نتیجے میں جاں بحق افراد کی تعداد دو ہوگئی، جبکہ امدادی اور ریسکیو کارروائیاں تاحال جاری ہیں۔ ریسکیو ٹیمیں لاپتہ وینڈر ریاض کی تلاش میں مصروف ہیں۔
‎رپورٹ کے مطابق ہوٹل میں لگنے والی آگ پر قابو پانے کے لیے ساڑھے تین گھنٹے سے کوششیں جاری ہیں۔ آگ لگنے کے بعد ہوٹل میں موجود 200 سے زائد افراد کو بحفاظت باہر نکال لیا گیا۔
‎ریسکیو حکام کا کہنا ہے کہ واقعے میں زخمی ہونے والے 6 افراد کو اسپتال منتقل کر دیا گیا ہے، جبکہ آگ لگنے کی وجوہات جاننے کے لیے تحقیقات جاری ہیں۔

وزیراعلیٰ پنجاب مریم نواز کا کہنا ہے کہ پنجاب کے عوام کو خوشیاں لوٹائیں گے، صوبے میں دنگے، فساد اور انتشار کا ماحول ختم کردیا۔

وزیراعلیٰ پنجاب مریم نواز نے لاہور میں بسنت فیسٹیول کا جائزہ اجلاس سے خطاب کرتے ہوئے کہا ہے کہ لاہور میں ٹریفک کیلئے بہترین پلان بنایا گیا، بسنت کو محفوظ بنانے کیلئے تمام ادارے متحرک ہیں، پنجاب کی ثقافت کو بھرپور طریقے سے اجاگر کیا جائے گا، بسنت 800 سال پرانا فیسٹیول ہے، پنجاب حکومت کے زیرانتظام بسنت منائی جائے گی۔ان کا کہنا ہے کہ پنجاب میں دنگے، فساد اور انتشار کا ماحول ختم کردیا، سیفٹی پلان کے تحت لاہور کو تین حصوں میں تقسیم کیا گیا، وقت سے پہلے پتنگ اڑانے پر گرفتاریاں عمل میں لائی گئیں، 6، 7 اور 8 فروری کو بسنت منائی جائے گی، غلط ڈور استعمال کرنے پر 5 سال قید کی سزا ہوگی، ڈوراور پتنگ کے مقرر سائز کی خلاف ورزی پر بھی سزا ہوگی۔

مریم نواز نے مزید کہا کہ پنجاب کے عوام کو خوشیاں لوٹائیں گے، ریڈ زون میں بغیر سیفٹی راڈ کے داخلے پر پابندی ہوگی، پنجاب حکومت موٹر سائیکل سواروں کو 10 لاکھ سیفٹی راڈ دے گی، 3 دنوں میں 500 بسوں پر سفر کی سہولت مفت ہوگی، بسنت کے دوران اورنج لائن، میٹرو اور الیکٹرک بسیں بھی فری چلائیں گے، 3 دن کے دوران 5 لاکھ ٹرپس کا میری طرف سے تحفہ ہے۔

لاہور کی انسدادِ دہشت گردی عدالت نے 9 مئی کو کلب چوک، جی او آر گیٹ پر ہونے والے حملے کے مقدمے میں غیر حاضر ملزمان کے خلاف سخت کارروائی کرتے ہوئے ان کے دائمی وارنٹ گرفتاری جاری کر دیے ہیں۔ عدالت نے پاکستان تحریک انصاف (پی ٹی آئی) کے رہنما حماد اظہر سمیت 7 ملزمان کو اشتہاری قرار دے دیا ہے۔

تفصیلات کے مطابق انسدادِ دہشت گردی عدالت میں کیس کی سماعت کے دوران ملزمان کی مسلسل غیر حاضری اور عدالتی احکامات کی عدم تعمیل پر عدالت نے قانون کے مطابق کارروائی کرتے ہوئے حماد اظہر سمیت دیگر نامزد ملزمان کے دائمی وارنٹ جاری کرنے کا حکم دیا۔ عدالت کا کہنا تھا کہ ملزمان کی گرفتاری تک قانونی کارروائی جاری رکھی جائے گی اور متعلقہ ادارے وارنٹس پر عملدرآمد کو یقینی بنائیں۔عدالتی حکم میں یہ بھی کہا گیا ہے کہ اشتہاری قرار دیے گئے ملزمان کی گرفتاری کے لیے تمام دستیاب قانونی وسائل بروئے کار لائے جائیں اور ان کے خلاف اشتہاری کارروائی کو مزید مؤثر بنایا جائے۔

یاد رہے کہ اسی مقدمے میں عدالت اس سے قبل ایک اہم فیصلہ سناتے ہوئے پی ٹی آئی کے سینئر رہنما شاہ محمود قریشی کو بری کر دیا تھا، جبکہ دیگر مرکزی رہنماؤں کے خلاف سخت سزائیں سنائی جا چکی ہیں۔انسدادِ دہشت گردی عدالت نے اس کیس میں ڈاکٹر یاسمین راشد، میاں محمود الرشید، اعجاز چوہدری اور عمر سرفراز چیمہ کو 10، 10 سال قید کی سزا سنائی تھی۔ عدالت کے مطابق استغاثہ نے ان ملزمان کے خلاف ٹھوس شواہد پیش کیے، جن کی بنیاد پر سزا سنانا لازم قرار پایا۔

لاہور: وزیر اعلیٰ پنجاب مریم نواز شریف نے صوبے میں رہائشی مسائل کے حل کے لیے ایک اور اہم اقدام اٹھاتے ہوئے گھروں کی توسیع کے لیے بلاسود قرضوں کے اجراء کی منظوری دے دی ہے۔ اس فیصلے سے جوائنٹ فیملی سسٹم میں رہنے والے ہزاروں خاندانوں کو براہِ راست فائدہ پہنچے گا۔

وزیر اعلیٰ مریم نواز کی زیر صدارت ’’اپنی چھت اپنا گھر‘‘ پروجیکٹ سے متعلق ایک اعلیٰ سطحی اجلاس منعقد ہوا، جس میں منصوبے کی پیش رفت، اہداف اور آئندہ حکمتِ عملی کا تفصیلی جائزہ لیا گیا۔ اجلاس میں گھروں کی توسیع کے لیے بلا سود قرضوں کے اجرا کی باضابطہ منظوری دی گئی، جس کے بعد اب مشترکہ خاندانوں میں رہائش پذیر افراد اپنے موجودہ گھروں کی توسیع کے لیے اس منصوبے کے تحت قرض حاصل کر سکیں گے۔اجلاس کے دوران جون 2026ء تک 1 لاکھ 60 ہزار گھروں کی تعمیر کا ہدف مقرر کیا گیا، جسے وزیر اعلیٰ نے قابلِ عمل قرار دیتے ہوئے متعلقہ اداروں کو رفتار تیز کرنے کی ہدایت کی۔ مریم نواز نے کہا کہ حکومت پنجاب عام شہری کو باعزت اور محفوظ چھت فراہم کرنے کے لیے ہر ممکن وسائل بروئے کار لا رہی ہے۔

اجلاس میں ’’اپنی زمین اپنا گھر‘‘ منصوبے کے تحت 1 ہزار 531 پلاٹوں کی الاٹمنٹ کی بھی منظوری دی گئی، جس سے بے گھر اور کم آمدن افراد کے لیے گھر بنانے کا خواب حقیقت میں بدلنے کی راہ ہموار ہو گئی ہے۔حکام نے اجلاس کو بتایا کہ اس وقت پنجاب بھر میں ’’اپنی چھت اپنا گھر‘‘ پروجیکٹ کے تحت 53 ہزار 843 مکانات زیر تعمیر ہیں، جو منصوبے کی کامیابی کا واضح ثبوت ہیں۔ مزید بتایا گیا کہ صوبے میں اب تک 164 ارب 66 کروڑ روپے کے ریکارڈ بلاسود قرضے فراہم کیے جا چکے ہیں، جو ملکی تاریخ میں اپنی نوعیت کا ایک بڑا اقدام ہے۔وزیر اعلیٰ مریم نواز نے اس موقع پر کہا کہ گھر صرف اینٹوں کا ڈھانچہ نہیں بلکہ خاندان کے تحفظ، عزت اور مستقبل کی ضمانت ہوتا ہے۔ انہوں نے ہدایت دی کہ قرضوں کی فراہمی کے عمل کو مزید شفاف، تیز اور آسان بنایا جائے تاکہ مستحق افراد بلا رکاوٹ فائدہ اٹھا سکیں۔

‎لاہور میں شیرنی کے بچی پر حملے کے واقعے میں مزید پیش رفت سامنے آ گئی ہے۔ خفیہ اطلاع پر ایس پی اقبال ٹاؤن کی سربراہی میں بڑی کارروائی کرتے ہوئے پولیس نے 11 غیر قانونی شیروں کو تحویل میں لے لیا جبکہ ملزمان کو گرفتار کر لیا گیا۔
‎ترجمان ڈی آئی جی آپریشنز کے مطابق برآمد کیے گئے جانوروں میں 5 شیرنیاں، 3 شیر اور 3 شیر کے بچے شامل ہیں۔ یہ شیر نواں کوٹ کے علاقے میں واقع ایک فیکٹری میں رکھے گئے تھے جہاں گراؤنڈ فلور پر ایمبرائیڈری کا کام جاری تھا جبکہ فرسٹ فلور پر شیروں کو رکھا گیا تھا۔
‎ترجمان کے مطابق ملزمان چند ماہ قبل شیخوپورہ سے شیروں کو لاہور منتقل کر کے لائے تھے تاہم ان کے پاس لاہور میں خطرناک جنگلی جانور رکھنے کا کوئی لائسنس موجود نہیں تھا۔
‎پولیس نے ملزمان کے خلاف مقدمہ درج کر لیا ہے جبکہ تمام شیروں کو محکمہ وائلڈ لائف کے حوالے کر دیا گیا ہے۔ ڈی آئی جی آپریشنز فیصل کامران نے کامیاب کارروائی پر ایس پی اقبال ٹاؤن ڈاکٹر عمر اور ان کی پوری ٹیم کو شاباش دی ہے۔
‎ترجمان کا کہنا ہے کہ ڈی آئی جی آپریشنز نے گزشتہ روز بچی کے زخمی ہونے کے واقعے کا نوٹس لیتے ہوئے شہر بھر میں وسیع پیمانے پر سرچ آپریشن کا حکم دیا تھا۔ حملے میں ملوث شیرنی اور اس کے مالکان کو پہلے ہی گرفتار کیا جا چکا ہے۔
‎ڈی آئی جی آپریشنز فیصل کامران کے مطابق ملزمان خطرناک جانوروں کے غیر قانونی کاروبار میں ملوث تھے، جس سے شہریوں کی زندگیوں کو سنگین خطرات لاحق تھے۔ ان کا کہنا تھا کہ اس عمل سے جانوروں کی جان بھی خطرے میں ڈالی گئی۔ معاملے میں قانون کے مطابق سخت کارروائی عمل میں لائی جا رہی ہے۔