لاہور کے علاقے کالج روڈ فلائی اوور پر پیش آنے والے افسوسناک حادثے میں 58 سالہ خاتون جاں بحق ہو گئیں۔ ریسکیو ذرائع کے مطابق حادثہ اُس وقت پیش آیا جب خاتون اپنے بیٹے کے پیچھے موٹر سائیکل پر بیٹھی ہوئی تھیں اور فلائی اوور سے گزر رہی تھیں۔
عینی شاہدین کے مطابق دورانِ سفر خاتون کا دوپٹہ اچانک موٹر سائیکل کے پچھلے پہیے میں پھنس گیا، جس کے باعث وہ توازن برقرار نہ رکھ سکیں اور فلائی اوور سے نیچے جا گریں۔ بلندی سے گرنے کے باعث خاتون شدید زخمی ہوئیں اور موقع پر ہی دم توڑ گئیں۔ریسکیو 1122 کو واقعے کی اطلاع ملتے ہی امدادی ٹیمیں فوری طور پر جائے حادثہ پر پہنچ گئیں۔ ریسکیو اہلکاروں نے خاتون کی لاش کو تحویل میں لے کر قریبی اسپتال منتقل کر دیا، جہاں ڈاکٹروں نے موت کی تصدیق کر دی۔
ماہرین کا کہنا ہے کہ موٹر سائیکل پر سفر کرتے وقت خواتین کو خاص طور پر دوپٹے یا لمبے لباس کو سنبھال کر رکھنا چاہیے تاکہ اس قسم کے حادثات سے بچا جا سکے۔یہ واقعہ ایک بار پھر اس امر کی یاد دہانی ہے کہ معمولی سی لاپرواہی یا حفاظتی غفلت بھی جان لیوا ثابت ہو سکتی ہے۔
